Consonante llaminar

Una consonante laminal o llaminar (tamién llamada predorsal) ye una consonante articulada por aciu la obstrucción del pasu del aire pola llámina, esto ye, la superficie delantera plana allugada darréu detrás de la punta o ápice de la llingua.

Dientro del grupu de les consonantes coronales (aquelles qu'utilicen la parte anterior de la llingua), esisten tamién les apicales que s'estremen de les llaminares en que son producíes al crear la obstrucción col ápice o punta de la llingua solamente. Nun ye frecuente dientro d'una mesma llingua'l contraste ente llaminares y apicales y cuando ello asocede ye xeneralmente ente fonemes fricativos y africaos más que n'oclusives. El vascu utiliza esta distinción na rexón alveolar, al igual que'l bosniu, croata y serbiu. El polacu y el mandarín faen la distinción coles consonantes postalveolares. Sicasí, munches llingües aboríxenes de California faen tamién la distinción coles oclusives.

En dellos idiomes, les consonantes llaminares rexistren una amplia obstrucción (encierre) que cubre la parte frontera completa de la boca, del cielu la boca duru hasta los dientes. Por esta razón, son difíciles de comparar, yá que llaminares y apicales alveolares son dos articulaciones distintes. Una articulación bien común de les llaminares ye la llamada dento-alveolar, que traviesa'l cantar alveolar escontra los dientes, pero va un pocu más allá qu'otres consonantes alveolares llaminares que cubren más del cantar alveolar (y podría ser consideráu postalveolar).

Referencies

Enllaces esternos