Coordenaes: 8h 40m 59.206s, -23° 27′ 22.593″
Gliese 317 (GJ 317 / LHS 2037) ye una estrella de magnitú aparente +12 asitiada a 29,9 años lluz na constelación de Pyxis, la brúxula. A fecha de 2007 conozse la esistencia d'un planeta estrasolar y un posible segundu planeta, ésti ensin confirmar, orbitando alredor d'esta estrella.
Gliese 317 ye una nana colorada de tipu espectral M3.5V,[8] con una masa de 0,24 mases solares y una lluminosidá equivalente al 1% de la solar. Pal so color B-V, Gliese 317 ye sorprendentemente tenue, atopándose aproximao 1,8 magnitúes per debaxo de la secuencia principal. El so allugamientu nel diagrama de Hertzsprung-Russell suxer que pue ser una estrella subenana bien probe en metales. Sicasí, diversos estudios suxeren que GJ 317 tien una metalicidá similar a la solar ([Fe/H] = −0,23 ± 0,2) un valor muncho más alto que l'esperáu pola so posición nel diagrama H-R. Posibles errores na paralax o na midida de la magnitú pueden ser los responsables de la discrepancia.[9]
Gliese 317 b ye un planeta xovianu que xira en redol a la estrella a una distancia media de 0,95 UA —llixeramente inferior a la separación entra la Tierra y el Sol— nuna órbita moderadamente escéntrica, que fai qu'esta distancia varie ente 0,77 y 1,13 UA. Con una masa mínimo 1,2 vegaes la masa de Xúpiter, el so periodu orbital ye de 1,9 años.[10]
La posible presencia d'un segundu planeta, Gliese 317 c, camudaría los parámetros orbitales del primer planeta. Si se confirma la so esistencia, Gliese 317 c tendría una masa de 0,83 vegaes la masa de Xúpiter con un periodu orbital de 7,4 años.[10]
Nome | Masa | Semiexe mayor | Escentricidá | Periodu orbital | Descubrimientu | |
---|---|---|---|---|---|---|
Gliese 317 b | > 1,2 MJ | 0,95 UA | 0,193 ± 0,06 | 692.9 ± 4 díes | 2007 | |
Gliese 317 c | > 0,83 MJ | ? | 0,42 | 2700 díes | 2007 |