Gorbizal
Un gorbizal ye una comunidá arbustiva, d'un altor mediu, na que les uzes (Erica ssp), como la urcia moural, la urcia, la queiruela y el carrizu tienen una relevancia notable. Dase la circunstancia de ser especies que pueden sobrevivir a perturbaciones severes, como'l fueu o la roza, yá que bilten a partir de yemes asitiaes n'órganos soterraños o cepes. El fechu de soportar el fueu da-yos una enorme ventaya sobre otru tipu de vexetación que tien que floriar y granar. Naturalmente vencen si los fueos son bien reiterativos, ente otros factores, pol emprobecimientu de la tierra.
Acompáñense tamién d'otros arbustos que pueden tener bona representación como dalgunes cistus (Cistus ssp), como la estepa, la estepa cerval y el carpizu. Suelen ser resultáu d'una degradación importante d'alcornocal y amás de los arbustos qu'apaecen nos borrachinales acompáñense tamién de carquexes, Halimium ocymoides, árgoma machu, grezu y Polygala microphylla, ente otres.
El gorbizal Mediterraneu constitúi un tipu de vexetación singular y de gran importancia poles sos endemismos en tola cuenca Mediterránea.
Nel suroeste de la Península Ibérica pueden estremase dos tipos de gorbizal: los gorbizales altos y los baxos o nanogorbizales. Nos gorbizales altos la especie dominante ye Erica australis (urcia moural) una urcia de flor rosada o fresa, que puede algamar hasta 3 m d'altor, dacuando acompañáu d'Erica arborea, (urcia) una uz de flor blanca que puede llegar tamién a esi altor. Eses dos especies d'uz suelen tar acompañaes pola Estepa cerval (Cistus populifolius), Cytisus striatus, Genista triacanthos, el carrizu (Calluna vulgaris) o la carquexa (Pterospartum tridentatum).
Los gorbizales baxos, qu'ocupen en munchos casos posiciones circundantes a los gorbizales altos, tán apoderaos pola presencia d'una uz d'escasu porte, la queiruela (Erica umbellata), que na mayoría de los casos acompáñase de Halimium ocymoides y con frecuencia tamién de la carquexa (Pterospartum tridentatum). Estos nanogorbizales atópense fundamentalmente en suelos bien degradaos.
Nel Andévalo (Andalucía) hai uan uza endémica de la faxa pirítica, Erica andevalensis, que forma gorbizales monoespecíficos no qu'a especies maderices refierse, fundamentalmente n'escombreres de mines y cantos de cursos d'agua ácedo debíu al fechu de la so tolerancia a los metales pesaos, circunstancia que nun comparten el restu de les especies y nestes condiciones namái ta acompañada dacuando por delles plantes yerbales. [1]
Ver tamién
[editar | editar la fonte]Referencies
[editar | editar la fonte]- ↑ Santa-Bárbara Carrascosa, C.; Valdés Castrillón, B. (2008). Guía de la Flora y Vegetación del Andévalo. Sevilla: Conseyería de Mediu Ambiente de la Xunta d'Andalucía. ISBN 978-84-96776-85-2.
