Guantes de boxéu
Los guantes de boxéu son guantes acolchaos colos que los boxeadores protexen les manes nos combates. El términu refierse tamién a los guantes que s’usen pa entrenar, magar qu'estos son distintos de los de competición. Los guantes de boxéu modernos diseñáronse pa protexer les manes del lluchador de la que golpia (al aviesu de los antiguos “cestus”, que taben pensaos como arma), masque anguaño esisten guantes especiales pa la competición, pal entrenamientu del combate y pa otros tipos d'entrenamientu, como’l de sacu. L’usu de los guantes de boxéu modernos previén la mayoría de les mancadures superficiales na cara, pero nun amenorga’l riesgu de dañu cerebral pa los participantes, y pue inclusive agrandalu al facilitar que se solmenen mocaes más grandes ensin mancase les manes.
Historia
[editar | editar la fonte]L’usu de proteiciones de manes nos torneos deportivos de llucha conozse dende polo menos l'antigua Grecia. Nel sieglu II, Clemente d'Alexandría creyía que l'inventor de los guantes de boxéu fuera’l míticu Amicus, fíu de Poseidón y rei de los bébrices d'Anatolia. Sicasí los guantes y el mesmu deporte yeren daquella bien diferentes del boxéu modernu. Na antigua Grecia avezaben a lliar tires de cueru alredor de les manes pa protexese. Esto foi l'orixe del “cestus” de los gladiadores de la dómina romana, qu'amestaba metal a los guantes pa facer más dañu. L’usu del cestus torgóse haza’l 50 e.C., y l'emperador Arcadiu torgó’l boxéu nel 393 dC.
El boxéu remaneció n’Inglaterra haza’l sieglu XVII. Facíense bien dellos alcuentros colos nudiellos desnudos, ensin reglamentu anterior a les regles del London Prize Ring, anque dacuando llevábense guantes. Los guantes foron obligaos poles regles del Marqués de Queensberry, espublizaes nel 1867. De resultes foi menguando la popularidá de los combates a mano llimpia, qu'anguaño chinquen la illegalidá en dellos países.
L’aniciu del guante acolcháu modernu débese a Jack Broughton, que creó una forma de guante de boxéu (los llamaos “mufflers”) nel sieglu XIX.
Variantes
[editar | editar la fonte]Los guantes de boxéu pueden ser d'estilos y pesos distintos, y davezu pónense sobro encaños de manes qu'aiden a estabilizar la zona’l puñu énte mancadures como la típica francedura del quintu metacarpu del boxeador. Los guantes rápidos son manoples relativamente llixeres de vinilu o cueru diseñaes principalmente pa protexer les manes del deportista contra arrascuños y mancadures de la que fai “trabayu de sacu” perllixeru, como’l de “punching bag” sobre basa. Los guantes de sacu tán acolchaos pa protexer al deportista contra la práutica progresiva de golpiar otros sacos cada vez más pesaos; son los más recomendaos polos entrenadores pal entrenamientu, sobre too pa los deportistes que nun faen combate. Los guantes de sparring tán pensaos pa protexer a dambos deportistes de la que prautiquen combate. Los guantes de combate profesionales tamién tán pensaos pa protexer a los deportistes, pero polo xeneral tán menos acolchaos. Los guantes de sparring pueden tener un pesu que va de les 14 a les 20 onces, mentanto los guantes de sacu y los guantes de combate amatéur y profesional van de les 8 a les 10 onces. Pa la competición los guantes átense y séllense con esparadrapu enantes del combate. Entós l'esparadrapu fírmalu un miembru autorizáu de la organización p'asegurar que nun se desigua a querer. Sicasí los guantes d'entrenamientu empleguen davezu velcru en cuenta de gordones al envís de que los deportistes puedan ponelos y quitalos más fácilmente.
Equipamientu modernu de boxéu
[editar | editar la fonte]
Los guantes modernos de boxéu entamaron a aprucir a finales de los años 1990. Los más de diez años de diseños y pruebes por dalgunos de los mayores fabricantes y figures del boxéu aidaron a crear un equipamientu seguru y duraderu. Los guantes de boxéu modernos inclúin una teunoloxía de maya poroso pa la palma arriendes de velcru y cueru cosío ensembre, dalgunos con amortiguación suspendida y acolcháu reforzáu pal boxeador. Nel Reinu Xuníu síguese a l'AIBA (Asociación Internacional de Boxéu Amatéur) p'aprobar el nuevu diseñu de guantes incluyendo les categoríes de pesu de 12 onces y de 14 y 16 onces col envís de que coincidan col grosor y resistencia del cueru que los boxeadores pueden usar nos combates.
Los guantes que s’usen nel boxéu amatéur son davezu bermeyos o azules, con un “área de puntuación” blanca p'aidar a los xueces a comprobar y dar más fácilmente los puntos. Los pesos más comunes pa los guantes nos Estaos Xuníos son 16, 12 y 8 onces. Munchos deportistes entrenen con guantes más pesaos que los qu'usen en competición en visu a agrandar la resistencia.
Rellación de los guantes cola seguridá y les lesiones
[editar | editar la fonte]La rellación de los guantes coles lesiones que se producen metanes un combate ye asuntu d'alderique. Na dómina de los combates a mano llimpia cutir na cabeza yera menos avezao pola mor del riesgu de daños na mano del boxeador. Los guantes amenorguen la cantidá de cortes producíos, pero investigaciones de l'Asociación Médica Británica afiten que los guantes nun reducen les lesiones cerebrales y hasta pue que les aumenten, darréu que la principal causa de dañu ye l'aceleración y desaceleración de la cabeza, y los lluchadores que lleven guantes pueden pegar más fuerte na cabeza. Los guantes pue qu'amenorguen la posibilidá de lesiones oculares, especialmente si nun tienen pulgar, pero tamién boxeadores que lleven guantes modernos cadecen de resgones y desprendimientos de retina. Un estudiu estensu estimó’l riesgu de muerte nel boxéu a mano llimpia en 14.000 muertes por millón de participantes. Esto ye 184 veces más muertes por millón que nel boxéu profesional modernu, que tien 76 muertes por millón de participantes (según el mesmu estudiu).[1]
Hai que se decatar de que los datos del númberu de combates y muertes de la dómina del boxéu a mano llimpia nun son completos, y asina mesmo hai munches diferencies nes regles y nos cuidaos médicos. Los combates de boxéu colos nudiellos desnudos solíen tener llugar hasta qu'ún de los lluchadores nun yera pa siguir, con asaltos qu'a vegaes duraben hores, y dalgunos lluchadores morríen dempués de que los llevaren al vilu vilu pal so rincón en visu a que volvieren a la llucha cuando d'otramiente de xuru que nun siguíen. Les regles del London Prize Ring especificaron más tarde qu'un lluchador tenía que "caminar hasta la so esquina ensin ayuda o perdía’l combate”. Les regles del combate a mano llimpia tamién permitíen los agarres y los valtos, y dalgunes muertes producíense per aciu de que’l lluchador pegaba cola cabeza nuna piedra o borde.[2]
Influencia de los guantes de boxéu n’otros deportes de combate
[editar | editar la fonte]Los guantes MMA o “guantes de grappling” colos deos abiertos, que s’empleguen davezu nos combates d'artes marciales mestes, nun son guantes de boxéu propiamente. Asemeyaos a los guantes de kempo con refuerzu de moñeca, pulgar zarráu y nudiellos resgaos, popularizaos en 1973 pola película Enter the Dragon de Bruce Lee, fornen con daqué acolcháu al que los lleva, pero dexen los deos llibres pa maniobres complexes de llucha y “grappling”, como’l combate cuerpu a cuerpu, que son illegales nel deporte del boxéu modernu.
Referencies
[editar | editar la fonte]Enllaces esternos
[editar | editar la fonte]- [https://web.archive.org/web/20110903052544/http://www.mmafightstore.net/mma-gloves Archiváu 2011-09-03 en Wayback Machine Guantes de MMA]
Wikimedia Commons acueye conteníu multimedia sobre Guantes de boxéu.
