Harold Peary

Harold Peary
Vida
Nacimientu San Leandro (es) Traducir, 25 de xunetu de 1908[1]
Nacionalidá Bandera de Estaos Xuníos d'América Estaos Xuníos
Muerte Torrance Memorial Medical Center (es) Traducir, 30 de marzu de 1985[1] (76 años)
Causa de la muerte infartu de miocardiu
Oficiu actor de cine, actor de televisión, llocutor radiofónicu, actor de voz, cantante
Premios
IMDb nm0669433
Cambiar los datos en Wikidata

Harold (Hal) Peary (25 de xunetu de 1908, San Leandro (es) Traducir – 30 de marzu de 1985, Torrance Memorial Medical Center (es) Traducir) foi un humorista, cantante y actor radiofónicu, cinematográficu, televisivu y de voz d'Estaos Xuníos. Foi sobremanera conocíu por dar vida a Throckmorton P. Gildersleeve, un personaxe secundariu de la serie radiofónica Fibber McGee and Molly que tuvo una serie propia, The Great Gildersleeve, el primer spin-off d'ésitu de la hestoria de la radiodifusión estauxunidense.

Primeros años

[editar | editar la fonte]

El so verdaderu nome yera José Pereira de Faria, y nació en San Leandro, California, nel senu d'una familia d'orixe portugués.[2] Peary empezó a actuar n'emisores radiofóniques locales en 1923, según les sos memories, y tuvo un espectáculu propiu como cantante, The Spanish Serenader, en San Francisco (California), anque se treslladó a Chicago, Illinois, en 1937. Inda en San Francisco, fixo "dellos papeles" en Wheatenaville, un programa emitíu pola NBC a partir del 26 de setiembre de 1932.[3]

En Chicago, el so trabayu radiofónicu llegó lo más alto gracies al so personaxe en Fibber McGee and Molly, Gildersleeve, el vecín de McGee. El personaxe realmente tuvo dellos nomes y ocupaciones, enantes de confirmase como Throckmorton Philaharmonic Gildersleeve, alministrador nuna fábrica de llencería. Peary trabayó tamién nuna serie d'horror, Lights Out, y n'otros programes radiofónicos, pero'l so ésitu y la so fama como Gildersleeve fueron la base pa desenvolver un programa propiu col so personaxe.

De Wistful Vista a Summerfield

[editar | editar la fonte]

El Gildersleeve de Peary aportó a lo bastante famosu como pa pensar en que'l personaxe tuviera una serie propia. Johnson's Wax, que patrocinaba Fibber McGee and Molly, tamién sofitó una grabación de prueba de The Great Gildersleeve, y la empresa Kraft Foods foi la patrocinadora del nuevu show. Gildersleeve foi tresplantáu de Wistful Vista a Summerfield con daqué más qu'un cambéu de llocalidá—agora solteru (el personaxe tenía una esposa en Fibber McGee and Molly a la que nunca llegó a oirse), y agora yera un inspeutor d'agües en cuenta de propietariu de la compañía Gildersleeve's Girlish Girdles.

The Great Gildersleeve estrenóse'l 31 d'agostu de 1941, teniendo un ésitu ininterrumpíu mientres el restu de la década. Lurene Tuttle interpretaba a Marjorie ; Walter Tetley, un veteranu del show de Fred Allen Town Hall Tonight y d'otros programes encarnaba a Leroy; Lillian Randolph a l'ama de llaves Birdie; y Earle Ross al xuez Horace Hooker. Otros actores qu'interveníen na serie yeren Richard LeGrand como Peavey, Arthur Q. Bryan como Floyd, Ken Christy como'l xefe de policía Gates, Shirley Mitchell como Leila Ransom, Bea Benaderet como Eve Goodwin, y dacuando Gale Gordon como Rumson Bullard.

Peary tamién tuvo la ocasión de cantar en dellos episodios del programa, como en "Mystery Voice" (5/10/1942). Amás, Peary interpretó cuatro llargumetraxes basaos nel so Great Gildersleeve nos años 1940, siendo él l'únicu miembru del repartu radiofónica qu'actuaba nes adautaciones cinematográfiques.

Finalización de Gildersleeve

[editar | editar la fonte]

En 1950, sicasí, la trayeutoria de Peary como Gildersleeve llegó al so fin. A partir d'entós, Peary empezó pa la CBS una nueva sitcom, The Harold Peary Show, tamién conocíu como Honest Harold. Na serie actuaba Joseph Kearns nel papel de veterinariu Dr. Yancey, y Shirley Mitchell como Florabelle Breckenridge. The Harold Peary Show solamente emitióse una temporada, con un total de 38 episodios.

Cine y televisión

[editar | editar la fonte]
Peary, a la derecha, en Petticoat Junction (1969)

Amás de los sos cuatro películes sobre Gildersleeve, Peary actuó nel filme de Walt Disney A Tiger Walks (1964) y nel d'Elvis Presley Clambake (1965). Tamién trabayó en televisión, nel episodiu de Perry Mason "The Case of the Lover's Gamble" (1965). Tamién participó en delles sitcoms, ente elles Blondie, la versión televisiva de Fibber McGee and Molly,[4] The Dick Van Dyke Show, Petticoat Junction, The Brady Bunch y The Addams Family. Per otra parte, nos años 1970 Peary rodó un popular comercial televisivu pa la marca Faygo.

Últimos años

[editar | editar la fonte]

Peary trabayó como disc jockey na emisora de radio WMGM en Nueva York,[5] y a partir de 1953 tuvo un programa d'una hora de llunes a sábadu.[6]

Como actor de voz participó en munches producciones d'animación de Rankin/Bass Productions, Hanna-Barbera y otros, rodando tamién anuncios comerciales de Xibraltar Savings and Loan, Charmin, Red Goose Shoes, y Challenge Dairy.

Harold Peary finó en 1985 en Torrance, California, por causa de un infartu agudu de miocardiu. Tenía setenta y seis años d'edá. Los sos restos fueron encenraos y les cenices llanzaes al Océanu Pacíficu.

Referencies

[editar | editar la fonte]
  1. ↑ 1,0 1,1 Afirmao en: Encyclopædia Britannica Online. Identificador Encyclopædia Britannica Online: biography/Harold-Peary. Apaez como: Harold Peary. Data de consulta: 9 ochobre 2017. Llingua de la obra o nome: inglés.
  2. ↑ [1]
  3. ↑ Wheatena. 1 d'ochobre de 1932.  p. 22. http://www.americanradiohistory.com/hd2/Archive-BC-IDX/32-OCR/1932-10-01-BC-OCR-Page-0022.pdf. Consultáu'l 6 d'abril de 2015. 
  4. ↑ Brooks, Tim & Marsh, Earle (1979). The Complete Directory to Prime Time Network TV Shows: 1946-Present. Ballantine Books. ISBN 0-345-25525-9. P. 199.
  5. ↑ Jaker, Bill; Sulek, Frank and Kanze, Peter. (1998). The Airwaves of New York: Illustrated Histories of 156 AM Stations in the Metropolitan Area, 1921-1996. McFarland & Company, Inc. ISBN 978-0-7864-3872-3. P. 125.
  6. ↑ Vox Jox: Changes of Theme. 14 de payares de 1953. https://books.google.com/books?id=VAoEAAAAMBAJ&pg=PA38&dq=%22Hal+Peary%22+songs+OR+singing+OR+record+OR+album&hl=en&sa=X&ei=pQgKVJr4M9OdygTSo4GQBQ&ved=0CDoQ6AEwAg#v=onepage&q=%22Hal%20Peary%22%20songs%20OR%20singing%20OR%20record%20OR%20album&f=false. Consultáu'l 5 de setiembre de 2014. 

Enllaces esternos

[editar | editar la fonte]