Coordenaes: 6h 3m 55.184s, 20° 8′ 18.428″
Ji2 Orionis (χ2 Orionis / 62 Orionis / HD 41117) ye una estrella na constelación d'Orión de magnitú aparente +4,65. Anque comparte la denominación de Bayer «Ji» con Ji1 Orionis, nun esiste rellación física ente dambes. Ente que Ji1 Orionis ye una nana mariella a namái 28,7 años lluz del Sistema Solar, Ji2 Orionis alcuéntrase tan alloñada que la so distancia nun puede ser midida por paralax. El valor xeneralmente adoptáu —pol so probable pertenencia a l'asociación OB de Xéminis— ye de 4900 años lluz.
Como cabo esperar pola so distancia y rellumu, Ji2 Orionis ye una superxigante o hiperxigante blancu-azulada descomanadamente lluminosa, 410.000 vegaes más que'l Sol. De tipu espectral B2Iaev, el so radiu ye 59 vegaes más grande que'l radiu solar, equivalente a 0,28 UA. Sábese amás que Ji2 Orionis ye una estrella binaria, la so duplicidá descubierta per aciu tapecimientu.
Con una masa envalorada de 35 - 40 mases solares, la edá de Ji2 Orionis ye de namái 5 millones d'años. Nun futuru non bien llonxanu va españar como una brillosa supernova, al producise'l colapsu del so nucleu de fierro, una y bones la fusión nuclear nun progresa más allá d'esti elementu. Anque la mayor parte de los nucleos colapsen nuna estrella de neutrones, la enorme masa de Ji2 Orionis puede faer que'l so nucleu acabe formando un furacu prietu.