Lua (arte marcial)

Lua
Tamién Kapu Kuialua, Kuialua
Enfoque Híbridu
País d'orixe  Estaos Xuníos d'América
Fundador Guerreros ḥawaianos
Prauticantes famosos John Matua[1]
Deporte olímpicu Non
Cambiar los datos en Wikidata

Kapu Ku'ialua, Kuialua o simplemente Lua, ye un antiguu arte marcial ḥawaiianu especializáu na rotura de güesos, que fai sobre too usu de llaves a les articulaciones, proyeiciones, remanamientu de puntos de presión, golpes, delles armes tradicionales, estratexa militar, guerra na mar, asina como d'armes de fueu introducíes polos europeos.[2]

El nome del arte vien de "Ku'ialua", que significa lliteralmente dos golpes. Esi foi'l nome que se dio al dios ḥawaiianu d'esti arte marcial.

Polo xeneral solamente a les persones venceyaes a los "Ali'i" (nobleza), como los guerreros profesionales, guardies, y les mesmes families reales, se-yos deprendía Ku'ialua. Ensin embargu en tiempu de guerra tamién a los "Maka'ainana" (plebeyos) deprendíen-yos los movimientos y funciones básicos del arte marcial.

Los antiguos guerreros d'esti arte cubríense con una fina capa d'aceite de cocu y tosquilábense tol pelo'l cuerpu al envís de poder esmucise y evitar que los garraren en batalla. La denomación de los maestros de Lua, olohe, significa lliteralmente "ensin pelo".

Carauterístiques

[editar | editar la fonte]

La forma moderna d'esti arte axustóse pa cuadrar colos tiempos actuales; sicasí l'espíritu tradicional del arte caltiénse intautu. Les armes usaes polos nativos del Archipiélagu de Ḥawai pue que fueren el centru l'arte allá una vezona, porque dizse que'l lluchador que pierde les armes tien que recurrir a les soluciones a mano vacía del Ku'ialua.

Ente los métodos d'entrenamientu tán atrapar la llanza, entrenase nes foles y centrase nel "mana" o fuercia vital. Esta enerxía descríbese de forma asemeyada al chi o ki de les artes marciales chines o xaponeses. Fáense exercicios pa concentrar esta enerxía, bastante paecíos al exerciciu del chi kung.[3]

Armes

[editar | editar la fonte]
  • Hoe: remu de piragua.
  • Hoe Leiomano: remu armáu de dientes de tiburón.
  • Ihe: llanza pequeña con punta reuta o de filos espinosos (mangu d'hasta 2,7 m.)
  • Ka'ane: garrote (cuerda d'estrangular.)
  • Ko'oko'o: palos (llargu y curtiu.)
    • Ko'oko'o Loa: palu de 1,8 m.
    • Ko'oko'o Pōkole: palu de 1,2 m.
  • Ku'eku'e Lima Leiomano: arma de nudiellos ("puñu americanu".)
  • Leiomano: arma de diente de tiburón.
  • Ma'a: flonda.
  • Maka Pāhoa: daga de doble filu.
  • Newa: porra curtia.
  • Pahi: cuchiellu.
  • Pāhoa: daga d'un solu filu.
  • Pāhoa Ko'oko'o: cayáu con daga de doble filu.

Referencies

[editar | editar la fonte]
  1. ↑ Sherdog.com. «John Matua MMA Stats, Pictures, News, Videos, Biography, and More». Sherdog.com.
  2. ↑ «Discover Lua, Hawaii’s Martial Art». Black Belt magazine (21-03-2011).
  3. ↑ Warriors, History Channel program, emitíu: 21 agostu 2008

Enllaces esternos

[editar | editar la fonte]