Mildred Harris | |
---|---|
Vida | |
Nacimientu | Cheyenne, 29 de payares de 1901[1] |
Nacionalidá | Estaos Xuníos |
Muerte | Hollywood, 20 de xunetu de 1944[1] (42 años) |
Sepultura | Hollywood Forever Cemetery (es) |
Causa de la muerte | neumonía |
Familia | |
Casada con |
Charles Chaplin (1918 – 1920) Everett Terrence McGovern (en) (1924 – 1929) Bill Fleckenstein (1934 – ) |
Fíos/es | 2 |
Estudios | |
Llingües falaes | inglés[2] |
Oficiu | actriz de cine |
Premios | |
IMDb | nm0365121 |
Mildred Harris (29 de payares de 1901, Cheyenne – 20 de xunetu de 1944, Hollywood), foi una actriz d'Estaos Xuníos del cine mudu.
Nació en Cheyenne, capital del estáu d'Estaos Xuníos de Wyoming, fía de Harry Harris, operador del telégrafu, y la so esposa Anna Parsons Foote. Les sos primeres apaiciones na pantalla fueron a la edá d'once años, nel western de 1912 The Post Telegrapher, dirixida por Francis Ford y Thomas Ince. Darréu, empezó a desempeñar papeles xuveniles, de vezu formando pareya col actor Paul Willis, incluyendo apaiciones na serie basada en El Maraviyosu Magu d'Oz, de Lyman Frank Baum. Más llueu, apaez como chica del harén na famosa película muda Intolerance (1916), de D. W. Griffith. Llevó'l nomatu «Innocent Mildred Harris» pol aspectu de pinina y aneñáu d'una chica menuda con rizos rubios y güeyos azules.
El 23 d'ochobre de 1918 casó en priváu con Charles Chaplin, matrimoniu que provocó un escándalu por cuenta de que Harris tenía 16 años, ente que Chaplin yá tenía 29. El matrimoniu, vino provocáu por un embaranzu non deseáu de Harris, que darréu resultó ser una falsa alarma. Desconozse si realmente foi una falsa alarma, o un engañu pa consiguir el matrimoniu con Chaplin, que taba empezando a espuntar na so carrera artística. La rellación col actor Charles Chaplin incluyóse na película biográfica Chaplin na que foi carauterizada pola actriz ucraína Milla Jovovich.
Sicasí, tres la boda Harris quedó embaranzada, dando a lluz a Norman Spencer Chaplin el 7 de xunetu de 1919, pero'l neñu nació con graves problemes de salú, y finó al tercer día. El neñu foi incineráu nel Campusantu Inglewood Park.[3][4] Separáronse na seronda d'esi añu. Charles, que siempre vio a Mildred n'inferioridá intelectual, afirmaba nes sos memories que anque-y paecía una rapaza guapa, nunca tuvo namoráu d'ella.
Tres la separación, Chaplin mudóse al Los Angeles Athletic Club, mentanto Harris tentó mantener les apariencies, creyendo que sería posible una reconciliación. Finalmente, en 1920, solicitó'l divorciu por crueldá mental. Chaplin acusóla d'infidelidá, y anque nun nomaría públicamente al amante, albidrábase que pudo tener un idiliu con Alla Nazimova. El procesu tuvo una gran repercusión nos medios. El divorciu otorgóse'n payares de 1920, recibiendo Harris $ 100,000 (US $ 1,195,515 en dólares de 2016).
Tres el matrimoniu con Chaplin tuvo un curtia rellación col Príncipe de Gales, Duque de Windsor, y llueu rei Eduardu VIII. Ella foi la que presentó al príncipe a la que se convertiría na so esposa, Wallis Simpson.[5]
En 1924, Harris casó nuevamente con Everett Terrence McGovern. La pareya tuvo un fíu, Everett Terrence McGovern, Jr., en 1925. Esti matrimoniu tamién acabó en divorciu el 26 de payares de 1929, cuando Harris lo solicitó por deserción. En 1934, volvió a contraer matrimoniu col ex xugador de fútbol William P. Fleckenstein en Asheville , Carolina del Norte. Remanecieron casaos hasta la muerte de Harris en 1944.
De primeres, Mildred Harris nun llogra adautase bien al cine sonoru, polo que se dedica principalmente al vodevil y al burlesque, realizando una xira col comediante Phil Silvers. Sicasí foi mui emponderada pola actuación na adautación cinematográfica de 1930 del musical de Broadway No, No Nanette. Igualmente digna d'alcordanza ye l'actuación na comedia Movie Maniacs de Three Stooges de 1936, onde retrató a una temperamental y exixente estrella de cine.
Harris siguió trabayando en cine durante la década de 1940, en gran parte gracies a la bonalidá del so antiguu direutor, Cecil B. DeMille , que la elixó en Reap the Wild Wind de 1942 (protagonizada por Paulette Goddard que, como Harris, tuviera casada con Charlie Chaplin), y La historia del Dr. Wassell de 1944. La última apaición nel cine foi na película de 1945 Having A Wonderful Crime, estrenada póstumamente.
Tien una estrella nel «Paséu de la Fama» de Hollywood Boulevard.
Finó de neumonía a los 42 años, después de 3 selmanes d'enfermedá, como consecuencia d'una importante intervención quirúrxica abdominal. Ta enterrada nel Hollywood Forever Cemetery de Los Angeles.