Natura

Natura
fenómenu

Natura o ñatura ye, en sentíu ampliu, el mundu o universu natural, físicu o material. La pallabra Natura refiérese a los fenómenos del mediu físicu, y tamién a la vida en xeneral, nún rangu que va de lo subatómicu a lo cósmicu.

La pallabra deriva de la pallabra llatina natura, usada pa denomar les cualidaes esenciales o la disposición innata de daqué, y que, nos tiempos antiguos, yera l'equivalente de la pallabra nacimientu ^[1]. La pallabra llatina, pela so banda, yera la torna a esa llingua de la pallabra griega physis (φύσις), que facía referencia a les carauterístiques intrínseques de les plantes, los animales y otres estructures del mundu físicu. L'usu actual del términu, emplegáu pa referise a tol universu físicu como un conxuntu, ye una de les derivaciones del conceptu orixinal. Entamó col usu que los filósofos presocráticos diéron-y al términu, y esi usu foi garrando fuercia de magar, y tomó'l so puxu definitivu cola llegada del métodu científicu y el desarrollu de les ciencies nomaes naturales nos caberos sieglos.

Dientro de los diversos usos actuales de la pallabra, Natura úsase davezu pa referise a la xeoloxía y a la vida xabaz. Delles veces úsase pa falar de los reinos animal y vexetal, y otres en rellación colos procesos de los oxetos inanimaos, con cómo dalgunos tipos d'ellos (el tiempu, la xeoloxía terrestre) esisten y van camudando acordies colos sos propios procesos intrínsecos. Tamién se fala del mediu natural pa referise a los animales, les viesques, les plantes... en xeneral, a aquelles coses que nun foron alteriaes enforma pola aición humana o que siguen esistiendo pese a ella. Asina, los oxetos fabricaos pol home y les interaiciones humanes, en xeneral, nun son consideraos parte de la natura, nun siendo que falemos d'ellos cola espresión natura humana.

Esti usu del términu implica qu'estrememos ente lo natural y lo artificial, siendo lo segundu aquello qu'esiste de resultes de l'aición humana. En dellos contestos concretos natural úsase tamién contrapuestu a términos como antinatural, sobrenatural o sintéticu.

Referencies

1. El términu natura na web del Diccionariu Etimolóxicu Online