Radiotelevisión del Principáu d'Asturies

Radiotelevisión del Principáu d'Asturies
difusora y empresa pública
Llocalización
Sede	Xixón
Direición	España
Historia
Fundación	17 marzu 2003
Fundador	Xunta Xeneral del Principáu d'Asturies
Organigrama
Direutor executivu	Francisco González Orejas
Sector
Industria	mediu de comunicación de mases
Productos destacaos	televisión radiu
Web oficial

La Radiotelevisión del Principáu d'Asturies (RTPA)^[1] ye un grupu multimedia que pertenez al Principáu d'Asturies. Ta formáu poles sociedaes Televisión del Principáu d'Asturies SA y Radio del Principáu d'Asturies SA. Cuenta tamién con un diariu dixital de noticies: rtpa.es. El so direutor ye Antonio Virgili. Ye miembru de la Federación d'Organismos de Radio y Televisión Autonómiques, muérganu qu'agrupa a toles cadenes autonómiques públiques del Estáu español, cola esceición de la Canal Estremadura.

Estructúrase en 3 muérganos:

• Conseyu d'Alministración
• Conseyu de Comunicación
• Direición Xeneral

Tien les sos dependencies nel antiguu conventu de les monxes clarises, na Universidá Llaboral, en Xixón. El so presupuestu pa 2013 ye de 23 millones d'euros.

La TPA fizo la so primera emisión en pruebes el 20 d'avientu de 2005 a les 21 hores. El sábadu 7 de xineru entamó les retransmisiones deportives col partíu de fútbol ente'l Real Sporting de Xixón y el Racing de Ferrol, anque cola señal que-yos dio la TVG. Al día siguiente, fizo la so primer emisión propia d'un encuentru de fútbol, col Marino de Luanco - Durango dende Miramar, nuna producción subcontratada a una productora privada.

La principal polémica dende la so puesta en marcha xiró alredor de la emisión de programes en llingua asturiana. TPA cumplió'l vienres 9 d'avientu del 2011 2.000 díes n'antena dende l'empiezu de les emisiones regulares el 9 de xunu del 2006. Nesti tiempu, la cadena emitió más de 38.000 hores de programación, de les que'l 4,07% de la programación foi n'asturianu: un total de 1.555 hores y 46 minutos ^[2].

El 58,99% de los conteníos de la programación, un total de 22.546 hores y 33 minutos, foron programes de producción propia de la cadena. De toos ellos, realizáronse en direuto 10.914 hores y 38 minutos, el 28,56% de la programación. Otra manera, depués de l'actualidá, el conteníu más destacáu de TPA ye'l cine (13,87%), les series (12,80), la cultura y l'entretenimientu (8,05%), los deportes (5,46%), l'ociu y les aficiones (5,09%) y los documentales (3,94%). La primer cadena de TPA asítiase col 7,8% de share nel 2011 como la cuarta opción, per delantre de Cuatro (5,7%), La Sexta (5,0%) y La 2 (2,8%) y toles canales temátiques consideraes. La pública asturiana supérenla la La 1 (18,6%), Tele 5 (16,4%) y Antena 3 (10,3%).

N'actualidá, la televisión del Principáu d'Asturies emite tres señales de televisión y una de radio.

Canales de televisión

• A7: Cadena xeneralista qu'emite noticies, películes, deportes y programes d'entretenimientu principalmente en castellanu. Una pequeña parte de la so programación ta dedicada a la emisión de programes en llingua asturiana. Ta disponible na canal 60 de la TDT y al traviés de la rede de Telecable.

• A8: Ye la segunda canal de la Televisión del Principáu d'Asturies. Emite la mesma programación que la canal A7 una hora más tarde. Dende'l 1 d'abril y por problemes de presupuestu, la cadena caltién la emisión con una hora de retrasu de los programes de producción propia, pero sustitúi el cines y les series pola emisión en direutu de dos web cam asitiaes na plaza de la Escandalera d'Uviéu y la playa San Llorienzu de Xixón. Dende'l 18 d'ochobre de 2012, retresmite en direutu los debates parllamentarios de la Xunta Xeneral^[3].

• A9 HD Ye la señal n'alta definición de la Televisión del Principáu d'Asturies. Ye una canal en pruebes que namái emite la Fórmula 1 y el partíu del sábadu de la Lliga BBVA.

Emisores de radio

• RPA La Radio del Principáu d'Asturies. Emite una programación xeneralista basada nos informativos, la música y los programes d'entretenimientu. Al igual qu'asocede cola canal de televisión, emite la mayor parte del so tiempu en castellanu, anque tamién produz programes n'asturianu como Batura o Paraísu Natural.

Referencies

1. Academia de la Llingua Asturiana (2007). Cartafueyos Normativos. Abreviatures, rotulaciones y propuestes d’espresión y llocución. ISBN 978-84-8168-421-6.
2. http://www.lesnoticies.com/lesnoticies/noticies/programacion-nasturianu-tpa-namas-llega-xente-mayor/8786
3. https://www.europapress.es/asturias/noticia-tpa-comienza-retransmitir-pruebas-plenos-junta-general-20121017193552.html

Enllaces esternos

• Wikimedia Commons acueye conteníu multimedia sobre Radiotelevisión del Principáu d'Asturies.
• (castellán) Páxina principal de la RTPA
• Páxina n'asturianu de la RTPA Archiváu 2009-08-28 en Wayback Machine