Street Transvestite Action Revolutionaries

Street Transvestite Action Revolutionaries (STAR) foi una organización activista LGBT fundada en 1970 por Sylvia Rivera y Marsha P. Johnson,^[1] famoses na subcultura neoyorkina de les drag queens de color.^[2]

Orixe

Dambos fundadores llevaben tiempu nel activismu polos derechos civiles. Tuvieron nos Disturbios de Stonewall de 1969 y formaron parte del intensu periodu d'organización gay qu'empezó nel espertar de Stonewall.^[3]

El 28 d'agostu de 1970 hubo una sentada nel Weinstein Hall de la Universidá de Nueva York dempués de que l'alministración atayara dellos bailles entamaos ellí.^[4] Según dizse, The Christopher Street Liberation Day Committee, quien entamaben la primer manifestación del Arguyu nel primer aniversariu de los Disturbios de Stonewall, coordinó una serie de cuatro bailles que se fadríen nel Weinstein Hall col fin de consiguir fondos pa financiar servicios llegales, médicos y de vivienda a la comunidá LGBT.^[5] Los "Dance-a-Fairs" (un xuegu de pallabres n'inglés ente "dance a fairs" y "dance affairs") fueron alcordaos con una asociación estudiantil del Weinstein Hall y más tarde especulóse que l'alministración atayara los últimos bailles por ser patrocinaos por una organización LGBT. La sentada foi sofitada pol Frente de Lliberación Gai, les Radicalesbians y más activistes.

Tanto Rivera como Johnson fueren dalguna vegada ensin techu. Cuando fueron capaces d'arrendar una habitación d'hotel o un apartamentu empezaron a colar a los sos amigos ensin techu nes sos habitaciones (dacuando hasta 50 al empar). Dempués de la sentada, a Rivera asocedióse-y formar una organización qu'apurriera un agospiamientu permanente a les persones ensin techu de la so comunidá.^[6]

STAR yera pa la xente gai de la cai, la xente ensin techu de la cai y cualesquier que precisara ayuda nesi momentu. Marsha y yo siempres coláramos xente nes nueses habitaciones d'hotel. Marsha y yo decidimos mercar un edificiu. Tábamos intentando escapar del control de la mafia nos chigres.

Entrevista con Leslie Feinberg nel Workers World en 1998

Sylvia Rivera

Primeros años

STAR empezó siendo parte del Frente de Lliberación Gai y foi creada pa defender a drag queens y fuxitivos ensin techu. Cuando consiguieron fondos, fundaron la STAR House, un abellugu pa esta población. Rivera y Johnson solíen percorrer les cais buscando que tol mundu tuviera alimentáu y con abellugu, y p'evitar que "los sos mozos" (los fuxitivos qu'acoyíen) tuvieren que faelo.

Primeramente Rivera quería que Johnson fuera presidenta de STAR, pero ella refugó'l puestu diciendo que yera falagador que pensaren nella, pero que realizaría meyor el trabayu daquién con meyores capacidaes de planificación al llargu plazu.

Activismu posterior de los fundadores

Johnson foi más tarde activista y organizadora d'ACT-UP. En 1992, el so cuerpu foi atopáu nel Ríu Hudson, nos muelles de Christopher Street, n'estrañes circunstancies. Anque primeramente la policía dio por fechu que fuera un suicidiu, la so familia, amigos y munchos testigos creen que Johnson foi asesinada.^[7] La presión pública fixo que'l casu vuelva abrir.

Cuando'l mainstream de la comunidá LGBT empezó a ser más asimilacionista, Rivera en munches ocasiones ver a sigo mesma en desalcuerdu cola organización de la Marcha del Arguyu de Nueva York y otros grupos mainstream LGBT que practicaben "polítiques de respetabilidad" o que víen a les drags como daqué misóxinu. A pesar de la oposición del mainstream, Rivera siguió primiendo por qu'hubiera una inclusión de les persones trans* y toles persones de xéneru non conforme nes organizaciones y llexislaciones LGBT. Tres munchos años viviendo en Upstate New York, Rivera volvió a la ciudá dempués de la muerte de Johnson, viviendo nuevamente mientres un tiempu nel "muelle gai" nos muelles de Christopher Street, y trabayando pa entamar y sofitar a les persones ensin techu, especialmente aquelles con SIDA y a quien teníen problemes coles drogues.^[8][9]

Resurrección

Dempués del asesinatu d'Amanda Milan el 20 de xunu de 2000, Rivera "resucitó" y renombró de volao STAR el 6 de xineru de 2001.^[10] Dempués de ser premiada n'Italia, Rivera siguió trabayando p'avanzar na llucha polos derechos civiles de les persones trans* na ciudá y l'estáu de Nueva York y lluchando pola autodeterminación de toles persones de xéneru non conforme.

Rivera morrió de cáncer de fégadu en 2002.

Legáu

En 2013, Untorelli Press publicó Street Transvestite Action Revolutionaries: Survival, Revolt, and Queer Antagonist Struggle, una coleición de documentos históricos, entevistes y analises críticos de STAR.^[11]

Nuna entrevista nel nel documental Pay It Non Mind: The Life & Times of Marsha P. Johnson (2012) puede vese cómo Johnson acredita a Rivera como fundadora de STAR. Ella y los sos amigos alderiquen sobre'l trabayu lleváu a cabu pol grupu.

Ver tamién

• Historia LGBT
• Homosexualidá nos Estaos Xuníos

Referencies

1. «Feature Doc 'Pay It Non Mind: The Life & Times of Marsha P. Johnson' Released Online. Watch It». Indiewire (26 d'avientu de 2012). Consultáu'l 17 de febreru de 2015.
2. Feinberg, Leslie (September 24, 2006).
3. Feinberg, Leslie (1996) Transgender Warriors: Making History from Joan of Arc to Dennis Rodman.
4. «Street Transvestite Action Revolutionaries». Consultáu'l 5 d'ochobre de 2016.
5. «An Army of Lovers Cannot Lose: The Occupation of NYU’s Weinstein Hall» (14 d'avientu de 2011). Consultáu'l 5 d'ochobre de 2016.
6. «Leslie Feinberg interviews Sylvia Rivera: 'I'm glad I was in the Stonewall riot'». Worker's World (2 de xunetu de 1998). Archiváu dende l'orixinal, el 2017-07-29. Consultáu'l 5 d'ochobre de 2016.
7. Jacobs, Shayna (16 d'avientu de 2012). «DA reopens unsolved 1992 case involving the 'saint of gay life'». Consultáu'l 15 de xunu de 2015.
8. Shepard, Benjamin Heim and Ronald Hayduk (2002) From ACT UP to the WTO: Urban Protest and Community Building in the Yera of Globalization.
9. Sylvia Rivera's obituary via MCCNY
10. (2002) Queens in Exile, the Forgotten Ones. Los Angeles: Alyson Books, páx. 67.
11. «Street Transvestite Action Revolutionaries: Survival, Revolt, and Queer Antagonist Struggle». Untorelli Press. Archiváu dende l'orixinal, el 2019-02-07.

Enllaces esternos

• Pay It Non Mind - The Life and Times of Marsha P. Johnson
• Randy Wicker Interviews Sylvia Rivera on the Pier