Taido

Taido
(躰道)
Enfoque	Arte basáu na percusión (puñu/pie), flexible y rápidu, con munches pataes, saltos (inclusive acrobacies), xiros y cambeos d'altor
Contautu/durez	Contautu llixeru o non contautu
País d'orixe	Xapón
Fundador	Seiken Shukumine
Fecha de fundación	1965
Antepasaos	Gensei Ryu, Kárate d'Okinawa
Deporte olímpicu	Non

El Taido (taidō 躰道) ye un arte marcial xaponés fundáu oficialmente en 1965 por Seiken Shukumine (1925 - 2001). La pallabra taido significa "vía del cuerpu." El Taido tien raigaños nel Kárate tradicional d'Okinawa.

Fundación

Na creyencia de que les artes marciales, y en concreto'l kárate, nun cubicaben coles necesidaes del cambiante mundu modernu, Shukumine desendolcó primero un estilu de kárate llamáu Gensei Ryu alredor de 1950. Col tiempu Shukumine convencióse de que'l kárate ta torgáu pol so mou d'entrenamientu llinial. Pescudaba cómo facer la defensa más flexible y universal. Estes idees, xunto con dificultaes d'organización y delles diverxencies nel sen de la nueva Federación Xaponesa de Kárate, lleváronlu a introducir les sos nueves propuestes como "Taido", un arte marcial nuevu. Les téuniques del Taido ufren bien d'anovaciones: la inclusión de movimientos d'espiral y xiru, maniobres ximnástiques, pasos rápidos y efeutivos, y un ángulu corporal cambiante.

L'envís del Taido ye aplicar la metodoloxía científica y los valores tradicionales a la evolución de les artes marciales. Según el so creador, el fin caberu del Taido ye formar a los sos prauticantes pa que trabayen a un altu nivel na sociedá.

Cinco Principios del Taido

Caltén la mente tan nidia y calma como la superficie pulida d'un espeyu. Asina vas ver el corazón de les coses. Tener un estáu de mente correutu ayudaráte a torgar la confusión.
Asosiega. El cuerpu y la mente tienen que ser unu. Compórtate con correición y nun tendrás enxamás mieu de la ofiensa.
Forni'l to espíritu dende la fonte d'enerxía qu'hai dientro del to abdome. Con un espíritu correutu nunca tendrás mieu a combatir.
En cada aición sigui los preceutos correutos que t'aprendieron. Si lo faes asina nun puedes actuar incorreutamente.
Sé adautable nes tos téuniques y caltén la llibertá del movimientu físicu. La téunica correuta evitará que te dominen.

Cinco Tipos de Movimientos Corporales

Sen – Movimientu en xiru al rodiu d'exa vertical.
Un – Movimientu ascendente y descendente como una fola.
Hen – Movimientu de cayida carauterizáu por cambear la exa'l cuerpu.
Nen – Movimientu de xiru horizontal.
Ten – Movimientu de rodar y cayer.

Estos movimientos combínense con puñaes, pataes y otres téuniques, como “tixeres” o, más raramente, llaves y proyeiciones. L'oxetivu ye emplegar tola capacidá del cuerpu pa safar, esviar o volver contra él l'ataque del adversariu, asina como usar la enerxía del movimientu p'acelerar les téuniques y da-yos más eficacia. La última categoría, Ten, inclúi movimientos acrobáticos, como pataes haza atrás blincando en xiru, que faen que'l Taido seya mui espectacular de ver. Tien tamién el Taido una especial manera d'andar, llamada unsoku, asina como una manera acrobática de movese llamada unshin.

Competición

Les competiciones en Taido inclúin tres categoríes:

Jissen (combate de “sparring”), onde nun se consideren categoríes de pesu. Tórguense los golpes a la cabeza y a les piernes, pero permítense los barríos y les “tixeres”. Les téuniques direutes, ello ye les que se faen ensin movese, nun cunten.
Hokei (asemeyáu al kata), que ye un combate imaxinariu codificáu contra ún o más adversarios. Autorízase, y hasta s'afala, la creación de téuniques nueves según delles regles, si se reconoz la so eficacia y utilidá.
Tenkai, que ye un combate preparáu nel qu'un defensor vence a cinco adversarios al finar un ataque de 30 segundos. Son esenciales nél la eficacia, la complexidá y la precisión de les téuniques tanto como la espectacularidá, asina como'l realismu del combate y el so desendolcu ensin tiempos muertos. Nel Tenkai los xueces dan puntos al equipu completu de competición, como se fai por exemplu na natación sincronizada.

D'interés

El Taido prautícase anguaño en Xapón, Suecia, Finlandia, Noruega, Portugal, Dinamarca, Francia, Gran Bretaña, Holanda, Australia y los Estaos Xuníos d'América.

El Taido nun tien que ver col Shintaido.

Hai amás otres dos artes marciales llamaes tamién Taido: el Taidō (太道) del Maestru Nakai, prauticáu namái en Xapón, y el Tai-Do del maestru francés Bernard Cassol, enforma inspiráu nel jujutsu.