Territoriu del Noroeste

	territoriu de los Estaos Xuníos
Alministración
País	Estaos Xuníos d'América
Capital	Marietta (es)
Xeografía
Coordenaes	41°N 86°W / 41°N 86°O

El Territoriu del Noroeste (n'inglés Northwest Territory, de nome oficial Territory Northwest of the River Ohio) foi un territoriu (rexón embaxu de la xurisdicción del gobiernu federal) de los Estaos Xuníos formáu tres de la so guerra d'independencia. Comprendía la mayoría del territoriu colonial británicu anterior a esa guerra asitiáu al oeste de los montes Apalaches y al norte del ríu Ohio, esto ye, tola tierra al oeste de Pennsylvania, al noroeste del ríu Ohio y al este del ríu Mississippi asitiada al sur de los Grandes Llagos. Creóse como territoriu pola Ordenanza Noroeste (Northwest Ordinance) el 13 de xunetu de 1787, y el so territoriu reduciose al actual Ohio, al este del actual Michigan y a una faza del sureste del actual estáu d'Indiana tres de la formación del territoriu d'Indiana el 4 de xunetu de 1800. Desapaeció el 1 de marzu de 1803, cuando la fastera suroriental del territoriu conformó l'actual estáu d'Ohio y el restu del mesmu foi incorporáu al territoriu d'Indiana.

Nel momentu de la so formación el territoriu yera una gran estensión de terrenu xabaz perpoco pobláu, que yera recorrida por tribus nómadas d'indixenes americanos como los delaware, miami, potawatomi o shawnee; la presencia francesa llimitábase a unos pocos asentamientos coloniales. Pal tiempu nel que se disolvió, el territoriu yá tenía docenes de ciudaes y pueblos, dellos con varios miles d'habitantes, principalmente nel actual Ohio, nes conques de los ríos Ohio y Miami y alredor de los Grandes Llagos.

La rexón foi cedida a los Estaos Xuníos nes cláusules del tratáu de París de 1783. El Congresu de la Confederación aprobó en 1787 la Ordenanza Noroeste que regulaba l'alministración del territoriu y establecía les condiciones pa l'admisión de les xurisdicciones nes que lo dividía como estaos de la Xunión. Nún primer momentu'l territoriu tuvo gobernáu, embaxu la llei marcial, por un gobernador y un conceyu de trés xueces, pero cuando la población entamó a medrar formóse una asamblea llexislativa, la Asamblea Xeneral del Territoriu (Territorial General Assembly). El territoriu sodividíase en condaos, de los que llegó a haber hasta trece.

Los conflictos ente los colonos y los habitantes nativos americanos del territoriu acabaron provocando la guerra amerindia del noroeste, que finó cola victoria del xeneral Anthony Wayne sobre los nativos na batalla de Fallen Timbers (1794). El tratáu de Greenville, que sentó les condiciones de la paz, abrió'l camín pa la colonización del sur y l'este d'Ohio.

Territoriu del Noroeste

Referencies

Enllaces esternos