Coordenaes: 5h 50m 57.592s, -35° 46′ 5.915″
Wazn o Wezn (β Columbae / β Col / HD 39425) ye la segunda estrella más brillosa de la constelación de Columba, dempués de Phact (α Columbae), con magnitú aparente +3,12. El so nome tien el mesmu orixe que'l de Wezen (δ Canis Majoris) y provién árabe وزن wazn, que'l so significáu ye «pesu». La distinta grafía d'unu y otru nome sirve pa estremar les dos estrelles.
A 86 años lluz del Sistema Solar, Wazn ye una estrella xigante naranxa de tipu espectral K2III con una temperatura superficial de 4535 K. Dientro de les xigantes naranxes ye una de les menos lluminoses, con una lluminosidá de «namái» 53 soles y un radiu 12 vegaes más grande que'l radiu solar. Les sos carauterístiques físiques son similares a Pólux (β Geminorum), anque s'atopa casi al triple de distancia qu'ésta.
Wazn tien dos carauterístiques que la estremen d'otres estrelles análogues. De primeres, muévese a 103 km/s en rellación al Sol, unes 6 o 7 vegaes más apriesa qu'otres estrelles de la nuesa redolada, lo qu'indica que ye una visitante d'otra parte de la galaxa. De segundes, a diferencia d'otres estrelles procedentes de fora del finu discu galácticu que tienen una baxa metalicidá, la rellación ente'l conteníu de metales y el d'hidróxenu en Wazn ye un 30% mayor que nel Sol.