William Bradford Shockley (13 de febreru de 1910, Londres – 12 d'agostu de 1989, Stanford) foi un físicu d'Estaos Xuníos. En xunto con John Bardeen y Walter Houser Brattain, llogró'l premiu Nobel de Física en 1956 "poles sos investigaciones sobre semiconductores y el descubrimientu del Transistor."[14]
En 1955, Shockley abandonó los llaboratorios Bell y tornó a la so ciudá natal, Palo Alto, California, nes proximidaes de la Universidá de Stanford, pa crear la so propia empresa, Shockley Semiconductors Laboratory, col sofitu económicu de Arnold Beckman, de Beckman Instruments. Cuntando cola influencia del so prestíu y el respaldu económicu de Beckman Instruments tratu de convencer a dellos de los sos compañeros de trabayu de Bell que se xunieren a él na nueva empresa; nengún quixo. Polo tanto empezó a restolar nes universidaes a los más destacaos estudiantes pa formar con ellos la empresa. Pero, dáu'l so estilu empresarial, ocho de los investigadores abandonaron la compañía en 1957 pa formar la empresa Fairchild Semiconductor. Ente ellos taben Robert Noyce y Gordon Moore que más tarde crearíen Intel.
A finales de los años 1960, Shockley realizó unes revesoses declaraciones alrodiu de les diferencies intelectuales ente les races, defendiendo que les pruebes d'intelixencia amosaben un factor xenéticu na capacidá intelectual revelando que los afroamericanos yeren inferiores a los norteamericanos caucásicos y que la mayor tasa de reproducción ente los primeres exercía un efeutu regresivu na evolución.
Ente les sos publicaciones destaca "Electrones y buecos nel semiconductor", obra publicada en 1950.