Coordenaes: 16h 14m 20.739s, -3° 41′ 39.561″
Yed Prior (δ Ophiuchi / δ Oph / 1 Ophiuchi)[9] ye una estrella na constelación d'Ophiuchus, el portador de la culiebra, de magnitú aparente +2,73. El nome de Yed Prior tien un orixe mistu. La pallabra Yed procede del árabe «mano», y la pallabra Prior provién del llatín «delantre», yá que preciede a Yed Posterior (ε Ophiuchi) nel so movimientu al traviés del cielu. Con ésta última forma una doble óptica, magar les dos estrelles nun tán rellacionaes físicamente, tando Yed Prior asitiada a 170 años lluz del Sistema Solar ente que Yed Posterior alcuéntrase a 108 años lluz.[10]
Yed Prior ye una xigante colorada de tipu espectral M0.5III —nel estremu más caliente de les xigantes coloraes— con una temperatura efectivo de 3800 K. El so radiu ye 58 vegaes más grande que'l radiu solar y la so lluminosidá, incluyendo la radiación infrarroxo emitida, ye 630 vegaes mayor que la solar. Elementos químicos como fierro y nitróxenu son muncho más abondosos en Yed Prior que nel Sol; el conteníu del primeru ye doble que nel Sol, ente que'l conteníu del segundu casi triplica al atopáu na nuesa estrella, resultáu de procesos nucleares internos.[10]