Área metropolitana de Miami

Área metropolitana de Miami
Alministración
PaísBandera de Estaos Xuníos d'América Estaos Xuníos d'América
EstaosBandera de Florida Florida
Tipu d'entidá Área estadística metropolitana
Nome oficial Miami-Fort Lauderdale-West Palm Beach, FL Metropolitan Statistical Area (en)
Nome llocal Miami metropolitan area (en)
División
Xeografía
Coordenaes 26°08′N 80°12′W / 26.13°N 80.2°O / 26.13; -80.2
Superficie 15896 km²
Altitú media 6 m
Demografía
Población 6 138 333 hab. (1r abril 2020)
Densidá 386,16 hab/km²
Cambiar los datos en Wikidata

L'área metropolitana de Miami, conocida como Metro Miami y de nome oficial área estadística metropolitana de Miami-Fort Lauderdale-Pompano Beach ye, colos sos 6.138.333 habitantes en 2020[1], la mayor del estáu de Florida, la segunda mayor del sureste del país dempués de la de Washington DC y la séptima mayor de los Estaos Xuníos[2]. Allúgase nel sur del estáu de Florida, ya inclúi los condaos de Miami-Dade, Broward y Palm Beach, que son, por esti orde, los trés más poblaos del estáu. Estiéndese por 3.313 km² d'espaciu urbanu, y el so centru principal, no financiero y no cultural, ye la ciudá de Miami. El so condáu, Miami-Dade, yera en 2019, colos sos 2.716.940 habitantes, el séptimu más pobláu de tol país. Nel territoriu de la metrópolis inclúinse, amás de Miami, otres ciudaes principales: Fort Lauderdale, Pembroke Pines, West Palm Beach, Hialeah, Hollywood y Boca Raton. Esta área metropolitana coincide cola zona del estáu conocida col nomatu de Gold Coast (Costa Dorada).

Vista del skyline del downtown de Miami, ciudá cabezalera d'esti área metropolitana.

Esti área metropolitana ta incluyida nel área estadística combinada Miami-Port St. Lucie-Fort Lauderdale, qu'inclúi, amás de los trés condaos de Metro Miami, los de Martin, Saint Lucie ya Indian River, asitiaos al norte del condáu de Palm Beach, y ye conocida como'l Greater Miami (Gran Miami). Esta área estadística combinada inclúi, amás del AEM de Miami, les árees estadístiques metropolitanes de Port Saint Lucie y Sebastien-Vero Beach y los clústers urbanos (árees urbanes de más de 10.000 habitantes y menos de 50.000) de Belle Glade, Key Byscaine, Redland y West Jupiter.

Como la población del sur de Florida axúntase principalmente nuna faza estrencha de tierra asitiada ente l'océanu Atlánticu y los Everglades, l'área urbanizada de Miami (esto ye, la superficie de construcción continua, ensin separtación ente nucleos urbanos) tien 160 km de llargor, de sur a norte, con un anchor máximu, d'este a oeste, de 32 km y mínimu de 8 km. Esto convierte a Metro Miami na segunda área estadística metropolitana más estensa del país, namái per detrás del área metropolitana de Nueva York[3]. Amás d'eso, yera la octava área urbana con mayor densidá de población del país nel censu de 2000[4]. Tenía daquella 4.919.036 habitantes en 2.890 km², esto ye, 1.701,7 hab/km², con llugares como les ciudaes de Miami y Hialeah con densidaes perriba de los 3.800 hab/km²[4].

Referencies

[editar | editar la fonte]
  1. ↑ «2020 Population and Housing State Data». United States Census Bureau, Population Division (August 12, 2021). Consultáu'l August 14, 2021.
  2. ↑ «Annual Estimates of the Resident Population: April 1, 2010, to July 1, 2016 (PEPANNRES): All Metropolitan and Micropolitan Statistical Areas within the United States and Puerto Rico». American Factfinder. U.S. Census Bureau. Archiváu dende l'orixinal, el 2020-02-13. Consultáu'l May 2, 2017.
  3. ↑ Cox W, Miami-Fort Lauderdale-West Palm Beach: Linear & Visionless, artículu na web demographia.com (6 de payares de 2003).
  4. ↑ 4,0 4,1 USA Urbanized Areas Over 500,000: 2000 Rankings, entrada na web demographia.com.

Enllaces esternos

[editar | editar la fonte]