Dadjuga dem blakerafe ge Calidris alpina | |||||||||||||||
| |||||||||||||||
giltafa pulara | |||||||||||||||
Bliind | Animalia | ||||||||||||||
Dansok | Chordata | ||||||||||||||
Pula | Aves | ||||||||||||||
Veem | Charadriiformes | ||||||||||||||
Yasa | Scolopacidae | ||||||||||||||
oxi | |||||||||||||||
Calidris | |||||||||||||||
Merrem, 1804 | |||||||||||||||
katca | |||||||||||||||
Calidris alpina | |||||||||||||||
Linnaeus, 1758
| |||||||||||||||
|
Dadjuga dem blakerafe ge ( Calidris alpina ) tir katca ke Scolopacidae yasapa, tigisa koe naelafa arktikafa lenteka.
Abicedje, dadjuga dem blakerafe ge ( Calidris alpina ) va xatoy maltalad lize va titkraytara keyed. Tictalad aze laizon toljoyad. Koafima remstir viele dimtalad, kabdunedison va wiltlevak. Waroldon ton kotunafa belca, gin tittalad ; azon dum vipa bene terok, sinaf milk gin tittalar abdida iltalar.
Tokkane bati zveri sinton poketalasi bak talara va sint lajumeklantawed ? Toktan va niarura sugdavar ? Men grupet. Rotir abici zveri va nyapesik ik okilik yordad numen arak va sinafa tiura vere milaskir. Bak lamara, dadjuga dem blakerafe ge va kalie vas 70 ik 85 km- fuxe bartiv rofir. Moe soktaxo, va siuda dem dile loon vuntoyi zveri tadler. Tildeson, siuda lente suka ranyer. Dadjuga dem blakerafe ge gu domegaf ipomdunolam is aryona dadjuginda katanad. Va sina vultesa wale Numenius oxiolk vegungon ice aryon koyapasik mal kotafa Arktika dere rowit. Maltalara van geeka mali acku ke anyusteaksat tenuwer. Lobat lamasik koe Franca ( 150000 ik 340000 ) is Magriba ( 200000 ik 600000 ) is kene krimta ke Britana is Nederlanda is Pokefa Roneka voxis vagee Tanarasokeem fentugalud.
Fentugalon, zveri tir spupiafi loon dam bak imwugal : ast is ge tid loon lukoptafe isen ebeltafa kretsa ke jivot griawir. Inafa malesturinda kare cadim dere betawer : ini va felemoya beza divatoayasa koe ruga voxis varteba idulugalon impavantar ; va brozama is tulwadunol trasin koe dremxo is vektas vas benev ok gerlanta, fentugalon gralomer. Dadjuga dem blakerafe ge tir ke lan katcatum begamus wale naelafu ivamu is lentef laksiwak vas mon 70°. Lizukon, va 84° wak kaltalar, tulon koe Nunaata is Svalbard tursia is Sibira. Geeon, va 60° laksiwak koe Alaska is Kamtcatka kaiktalar. Inafa tigira tir aname kotlize lentef nael, vaxe Labrador gola.