Noldafa bugimoda Bubo scandiacus | |||||||||||||||
| |||||||||||||||
giltafa pulara | |||||||||||||||
Bliind | Animalia | ||||||||||||||
Dansok | Chordata | ||||||||||||||
Pula | Aves | ||||||||||||||
Veem | Strigiformes | ||||||||||||||
Yasa | Strigidae | ||||||||||||||
oxi | |||||||||||||||
Bubo | |||||||||||||||
Duméril, 1806 | |||||||||||||||
katca | |||||||||||||||
Bubo scandiacus | |||||||||||||||
Linnaeus, 1758
| |||||||||||||||
|
Noldafa bugimoda ( Bubo scandiacus ) tir katca ke Strigidae yasa, tigisa koe naelafa arktikafa lenteka.
Noldafa bugimoda tisa tan logija-rotif bugimodunol ke naelafa lenteka, koe arktikafa ruga ke Eurasia is Amerika blir. Voxen inafa tigira kare aultove dem abdualbana wivga ( tovukol ) oku riuca arapeniwer. Tulon valente Kanada moe Baffin ewala, tanoya bugimodafa yasa dem lerdoy oc is gadikeem va 1900 ik 2600 tovukol bad balemoy aksat rovoraweyar, ugale bat sebadadunol koe ruga viakud. Remi aluboya safta tiskina koe atoxo, tanoy oc va mon 140 malestur, trabe vas mon 11 kg- ! Bugimoda tir pockafa ta tcizara va derokafa rekola. Tire atoapar ugale wivga aultoved voxe tod riuca riwe me atoar. Ison bat listaf batakaf murtoy vas tovukol kotron me rupter ; kire va aryon sulem dere malestur, i va jotaf libakol voxis dalon jontika zveriinda : nitca is wulpa is proklaci is ipomdunoloc is nudoloc is aryon zverioc.
Bugimoda tir gundafa gu bruxafixu ise tir kalvekafa gu fent larde oralotsa is kotceem is iteem tid antafi bruxiskafi altoki. Bugimodaye va riwe kotron batakaf bruxeem dir, solve bugimodaya va jontik orikaf nok keve aftaf ludev atoer. Bak lanyona tanda ugale bugimoda jontikote tid, jontikbata va xantafa coyunta bulud aze va logeefa gola tolgenison kaltalad. Wali 1833 is 1950, mana tol-san-anyustoya tolgenira koe Lentefa Amerika dilizeyed. Bugimoda va geeka ke Kanada is lenteka ke Tanarasokeem arttalayad. Fentugalon, ant zveri abicote moe nazbalkexo koe orika is fent zavzagid. Arak keldur ise keno bostaf krant va taiga aala kotalar.