Nudol dem aultap Clangula hyemalis | |||||||||||||||
| |||||||||||||||
giltafa pulara | |||||||||||||||
Bliind | Animalia | ||||||||||||||
Dansok | Chordata | ||||||||||||||
Pula | Aves | ||||||||||||||
Veem | Anseriformes | ||||||||||||||
Yasa | Anatidae | ||||||||||||||
oxi | |||||||||||||||
Clangula | |||||||||||||||
Leach, 1819 | |||||||||||||||
katca | |||||||||||||||
Clangula hyemalis | |||||||||||||||
Linnaeus, 1758
| |||||||||||||||
|
Nudol dem aultap ( Clangula hyemalis ) tir katca ke Anatidae yasapa, tigisa koe naelafa arktikafa lenteka.
Koe Lentefa Amerika, lan nudol dem aultap koe dona titsuyafa vas 55 ok dace 60 metre zo onayad !
Nekev lumam, bata nudolinda tir an estobasik ke zverieem ke naelafa lenteka. Tire wale 15 is 28 metre va int belapon gilevlavekar aze arti loon tanoya wexa dimgepoyter. Balte lani amidapafi zveripi koe mid loedje rodetiskid voxe va int leeke vanludevad. Bak estobara, nudol dem aultap kan inieem pujer ; neke kan wilteem vion tegulan dere malsaver, is kan ault stoken ta ape milbavara is vodjura. Va tolmomartaf tulwadunol ( gerlantek is xumiz is benevot ikz- ) is tulam is aboka mo ludev gralomer. Inafa malestura dalon sotir kum pinapaf sulem ; tulon va 1700 tulwadunol abrotcaf vas leon sanoye deciteametre koe uvoona ke lan nudol dem aultap trasiyit !
Nudol dem aultap baron tandeon sokalmotcer. Kseveem ke bruxeem kle dun arapeniwer. Remi kot cadim, nudolye is nudolya tid aotceyena gu lerke ik ebelte ik batake, numen batcoba va keskotafa mastura nuravaldar. Wana ke amidaf bruxeem soe wan zo grupenser.
Kare cadim, nudol dem aultap va toloya patectoyinda nobar : va lavaxomo ke anamenaelafa ruga lize pokeon gibegamur, is va bira poke krimta tod dambafa lava lize gifentugalur. Koe Lentefa Amerika, koe Uzdapaxo gola dere fentugalur. Bata nudolinda tir tela loyavafa nudolafa katca ke ruga koe Nunaata lidam kanadafa Arktika is Sibira is Samia. Otacka vas tol-celemoyi zveri zo uldiner.