Pot-bouille (suterot)

Pot-bouille Pot-bouille tir berpot ke Émile Zola sanegayan bak 1882, i saneafa karba ke Rougon-Macquart yasa nevatum. Octave Mouret gradilikye va Paris artlapir aze va noeltafo bedablo koirubar. Ta seltafa ticfira, va fertikya pomatasa kaaneyar. Va lo irubasik adre kevlanir, i va irubasik kabdunedis va lidopanya vox foredones ik kiewagis va fertik ik parloes va erbakurera ik sinton gosas ta konolera ik jovles va nazbeik. Francavon Pot-bouille trogarn bak XIX^-eafa decemda va gubefa burmotara ke exoma gruvdon dasugdayar. Beonon Zola va trovge ke zikexa ke parisafo bedablopo enwe nedir lize kake tapegaf lentor linulara tid strafa. « Lipok va in ciwamayar ; kaiki winkikafa tarkara kabdue kulafa gorestuca ke fogelom, Octave va coba levwina kadime ontinaf tuvel kum sladua, luson toz vliguyur. » Vildeks Lan lipok is inaf irubasikeem Octave Mouret va Paris koirubar, keve Choiseul nuda, moe balemeaf vegem ke glastafo bedablo. Gan Campardon W^-ye isu W^-ya zo vedgober aze deneon turwison di zo gilestur. Va krupa is gorundana erba ixam digir aze va papleketikafe une dene Kalaxe ke weltikya dolexe ke Hédouin kadimion trasir. Va zolonaf irubasik ke lipok fure rungrupar ise va ayikya mempena is co ropomasa ta lokiewara va intafa debala tcaluter. Va Josserand kevlanir, i va yasa dem melafokafe gadikye, is kalstegesa is warkafa gadikya anton abdikerelesa va kurera va Hortense nazbeikya isu Berthe, is Léon taneafe nazbeikye gilton gracafe kir tolongon blise do Dambreville W^-ya, is Saturnin ironokafe nazbeikye oviskafe is tizafe. Josserand yasa kaike blibacka blir isen gadikya pu toloya nazbeikya va guivera va ayikye ta kuredara kotaver. Sielestura zo grustar edje Narcisse Bachelard berye ke Josserand W^-ya di zo tugrijar enide ine va buelegara vas 50000 franc talolk pu kota nutikya gruyer voxe krular. Kurera is foredonera Octave va fertika kaaneyar. Doster da kona skedegara va Hédouin W^-ya tilikya me rotir. Azon gan Valérie Vabre zo ilikatcur numaze va Marie Pichon vegemafa vegungikya narar, voxen bantelya va seltafa ticfira me ropomar. Azon do lo irubasik ke lipok gu kapa ke Duveyrier yasa zo ganer. Va Vabre W^-ye pilkotik ke bedablo is inaf baroy nazbeik kevlanir, trabe va Clotilde kurenikya ke Duveyrier, is Théophile kurenikye ke Valérie, is Auguste gedisik va sidotafa lesofa dolta. Berthe va dolpa firvina gan Clotilde impavantar ise do Augute va int sostar. Me grupet kase bantel mexariur oke zo ikser, voxen Berthe iegar : « Va jin rotul !» numen batcoba va kurera fartur. Octave va Trublot kaelafe nikye moe zanisikyaf vegem kevlanir : bantel va konaktanya gililagir. Bam Octave va koef kusk dazanin gan burmotaxoeem ke lipok kosmar, lize zanisikya va kapsa ke lipok dilkdilkon rimekiskon pwaded. Octave gan Clarisse fertikya ke Duveyrier zo vedgober. Lo irubasik ke lipok gu kurera ke Berthe Josserand is Auguste Vabre zo ganed, voxen Théophile Vabre va kapa skalter : koe gemak ke Valérie va nesasi lipi al trasir. Bak mista va Octave sanegon buntur nume bantel va int gorojur, nedison da intafa suterinda en tir amidafa gu tela ke lipi. Merobrostayason va Hédouin W^-ya tilik ke Kalaxe ke weltikya, Octave griflir aze dene Auguste Vabre isu Valérie zo seger. Givur da Marie vegungikya vey ine nazber. Gasparine fertikya ke Campardon, dotrakunon gan kurenikya, doon kosoker. Kadimion Vabre xantumye awalker. Moi kotawara tcokena gan lo irubasik ke lipok, konolesik zo givad da boza nope velitura anton zo iskemad, nume va sint gosad. Dum gadikya abdion, Berthe va kurenye rotaskipedar ise kiewagisa erba loloon modiner. Octave guon va int kavanar, toz yalecker aze tere ilagir. Berthe va amlitara ke Rachel kwikya luster kotviele va Octave denon kazokever. Voxen kwikya va kurenikye al givar numen ine va Octave ticon denlanir. Berthe otcer, koo fogelom lebamon kraber aze gan Marie zo vedgober. Eldeon Auguste va Paris kan riniz exuler, aneyason va Duveyrier gotitis vrutasik ke toldoalie kev Octave. Do Bachelard kosmar da fertikya ke Duveyrier dem gutoeem va kraba su bulur. Kuncayane arti batakaf mielcek is kultos ke yontan, Auguste va toldoalie tere ebgar. Berthe va gadikeem dimdenlanir ; gadikye akoler. Xultura ke murkuca Arti konak aksat, Josserand W^-ye awalker. Octave dene Kalaxe ke weltikya dolexe algin zo seger. Hédouin W^-ya nyobrafa mali anyustoy aksat bam kuredar enide in va arienta doon di gedir. Auguste luxeon zo rawar : Kalaxe ke weltikya tir elicarsafe. Duveyrier va Clarisse luxeon al katrasir ise kiewagir voxe nope inafa vligura isu volsagaca mejer. Plukenon gan fertya is boikera ke kurenya, djukukser voxe tiner. Mauduit gertik keve gabu nope lidafa aytcura ke selt pikser. Glastafa murkuca va biliteem tere lajubesar : Auguste va Berthe dimnarir ; Adèle kwikya ke Josserand mielon ant radekar aze va pintik mewinon jovler ; Octave is Hédouin W^-ya sinton kured ; kapa dene Duveyrier zo wanud. Koredik Lipok keve Choiseul nuda Zola va koredik gu irubano xo is vegem is vredinda gesiapar. Sidot Lesofe dolexe gedine gan Auguste Vabre. Gourd W^-ye isu W^-ya : lipoksusik. Vegemos Auguste Vabre. Taneaf vegem Théophile Vabre is Valérie kurenik ( nazbeikya ke Louhette W^-ya isu W^-ye ) is Camille nazbeikye. Alphonse Duveyrier is Clotilde kurenik ( nazbeikya ke Vabre W^-ye ) is Gustave san-tevdafe nazbeikye, is Vabre W^-ye ikagadikye tise pilkotik ke lipok. Moi awalkera ke Vabre W^-ye, Alphonse Duveyrier vanpir warzaf pilkotik. Toleaf vegem Megrupene weltikye : abiccoba ke bata yasa zo gruper. Kaikion : Auguste Vabre do Berthe kurenik ( nazbeikya ke Josserand ) is Saturnin Josserand berikye ke bantel. Bareaf vegem Achille Campardon is Rose kurenik ( nazbeikya ke Domergue W^-ye isu W^-ya, tisa nik ke gadikeem ke Octave ) is Angèle san-balemdafa nazbeikya. Kaikion Gasparine kosayikya ke Rose is fertik ke Achille va int denon inker. Juzeur W^-ya. Megrupene lizukedusikye. Balemeaf vegem Josserand W^-ye isu Éléonore kurenik ( berikya ke Bachelard ) is baroy ke balemoy nazbeik : Hortense is Berthe is Saturnin. Gadikya gazarsar, anamstegeson va kurenik is kwik. Inafa tanafa erava tir kurera va toloya nazbeya, trasison mu sina va neyanya. Batenide, va « kurenik » tcabaner, pebuson da rena tir dilafa larde ayikye soye tir rovliguckune. Saturnin oviskaf is tizaf gu oviskikxe tolon zo kobuder. Jules Pichon is Marie kurenik ( nazbeikya ke Vuillaume W^-ye isu W^-ya ) is Lilitte nazbeikya. Ara ocya ke Marie dovey Octave ilagiyise bak berpot koblir. Octave Mouret ( nazbeikye ke François Mouret is Marthe Rougon ). Alubeaf vegem ( vegem ke kwikeem ) Lisa is Victoire ( kwikya dene Campardon yasa ) ; Hippolyte is Clémence is Julie ( dene Duveyrier ) ; Louise ( dene Juzeur W^-ya ) ; Adèle ( dene Josserand ) ; Françoise ( dene Théophile Vabre isu Valérie ) ; Rachel ( dene Auguste Vabre isu Berthe ). Kwik nuyon levgoled, meterektanon gan glastafa oblaka, kan dilk ke burmotaxo ke krabeem tigis keve koef kusk, i keve « bate idjafe fe liz kota ugafa is ewafa dorita ke lipok zo dagimar. » Ar koredik Narcisse Bachelard berikye ke Éléonore Josserand. Tir kulaf numen berikya va buelegaks mu Berthe nutya giopon lasulevnarir. Voxen in abdualbar da va Fanny Menu ( Fifi ) blisu dene ziavikya kiewagir. Inu tici berpot va Gueulin kurer. Gueulin nutikye ke Narcisse Bachelard. Léon Josserand nazbeikye ke Josserand W^-ye isu W^-ya, is Dambreville W^-ya. Tici berpot in va Raymonde nutya ke Dambreville W^-ya kurer. Clarisse Bocquet fertikya ke Duveyrier W^-ye. Caroline Hédouin ( kobl- Deleuze ) kurenikya ke Charles Hédouin digisik va Kalaxe ke weltikya dolexe. Kaiki awalkera ke kurenik, va Octave Mouret kurer. Juillerat kurmikye. Mauduit gertikye. Hector Trublot, yikye vliguse va kurera is glastafa renara is ponkafe gu kwafa renarura. Verdier, fertikye ke Hortense Josserand. Dere rupel Émile Zola : Francavaf francaf suterotik ( 1840-1902 ) (fr) Pot-bouille, dene Wikisource ( xantokrent )

Pot-bouille XANTO Vergumvelt Pot-Bouille Sutesik Émile Zola Ava Francava Suterotinda Berpot Evla 1882 betara teza   Tuveli icde Suteroteem  Moek ke xantof piskuks ke 1882