Tawa (suterot)

Tawa

Tawa tir berpot ke Émile Zola sanegayan bak 1887, i san-alubeafa karba ke Rougon-Macquart yasa nevatum.

Vildeks

Jean koe Beauce gola va int inker

Radimi dodelafa gropa azu ujafa azu glastafa azu yambafa ke francafa blira bak Toleaf Gindugal, sanegason va bat berpot bak 1887, Zola va tawadayikafa gropa dulaper. Nope bata tizafa is zakafa neva, sutesik gan malyopasik voxis milsaref suterotaf dokobasik zo geltnediyir. Aluboy ke ban suterotik va goleks koe Le Figaro fela suteyed, pirdason da Zola gan swavadrunaropik di zo gorindeyer enide inafa akolegafa belga di zo roper.

Tire Tawa berpot tir fikaf is pimtas inde nendason va kiewega, tawadayik kal gomilara rodefaskir. Dalaf askisik tir Jean Macquart berikye ke Gervaise Macquart ( Sagondexo ). Stragat da Jean koe taneafa karba ke Rougon-Macquart bwoy awiyir lize wetce intakobasik va int tazukayar. Koe Atitsura berpot azu Pascal kurmikye dere titir. Bak perda al tir sayakik aze va une dene gadikye ke nik koe Romilly-sur-Aigre wida ke Beauce gola trasir. Voxen tilik laizon mulufter numazen Jean wetce dielzanisik zo kouner. To batlize va diref kurenik kakever, i va Françoise Fouan nazbeikya ke Michel Fouan. Yasaf konoleks va tel lorotaf pak ke taway pu in al nafer. Louis Fouan berikye ke Michel tise guazackafe gorar da ika jandera is krupara, va taway pu kot inaf nazbeik fu remzilir.

Pisonaratum

Ke nazbeikeem, Buteau tir. Bitonafu is djukukoilkasu va yasaf kiewegeem, vol fu dimefir enide va erava di tceder. Taneon va intafa gadikya adjuber kiren bantel va inafa kaljoxara va yasafa mona ta aneyara va kasafa jwa tatcer. Buteau va toloya kosakikya dikir. Va Lise taneafa kurer voxise va toleafa facnar, i va Françoise gelbese kan kurera va Jean Macquart.

Raveson da Françoise nope renarura ke Jean nazber, pune Buteau va battel djukuraytar kire kivar da artfira ke warzafe bewikye va yasaf konoleks di tugantozar. Pomanon gan Lise kurenya, inu va Françoise boer azen bantel kev dolistesiki platinon zo kokoar. Nope bakaks awalker numazen guazaf Louis Fouan bak kenibera zo telomtar kire va nakila xuye al tcoker. Preyutason va sopuyuna pisonara num artazukason va gomil gu walta, Buteau is kurenya va yasafa mona di anteyad. Kadimion Jean va bata gola bulur, idanon gan bata tawa maneke nekisa va volkaluca is gojera aze va ervolia gin vilter

Tawa tir olgapafa is danedipisa neva lize boga is tizuca is erbamola va kotcoba kalfelid. Bata wira va tawadayikafa tamava bak Toleaf Gindugal en tir setrakorafa. Klokaks diref berpot ke Rougon-Macquart bwoy va tamka dem fedaf gael gu bata geltrevarsafa tuwaveva di koplekur.

Dere rupel

  • Émile Zola : Francavaf francaf suterotik ( 1840-1902 )
  • (fr) Tawa, dene Wikisource ( xantokrent )
t · p · b
Rougon-Macquart yasa, nevatum ke Zola
Les Rougon-Macquart, Histoire naturelle et sociale d'une famille sous le Second Empire
( Rougon-Macquart yasa, Tuwavafa is seltafa izva ke lana yasa bak Toleaf Gindugal )
1870-e sandaLa Fortune des Rougon ( Tufa ke Rougon yasa ) • La Curée ( Guinera ) • Le Ventre de Paris ( Jivot ke Paris ) • La Conquête de Plassans ( Levrotira va Plassans ) • La Faute de l'abbé Mouret ( Derka ke Mouret gertikye ) • Son Excellence Eugène Rougon ( Eugène Rougon tabexik ) • L'Assommoir ( Sagondexo )
Zola is Rougon-Macquart
Zola is Rougon-Macquart
1880-e sanda Une page d'amour ( Lanu bu ke rena ) • Nana ( Nana ) • Pot-Bouille ( Pot-bouille ) • Au Bonheur des Dames ( Kalaxe ke weltikya ) • La Joie de vivre ( Blisa daava ) • Germinal ( Germinal ) • L'Œuvre ( An grot ) • La Terre ( Tawa ) • Le Rêve ( Klokaks )
1890-e sanda La Bête humaine ( Ayasulemya ) • L'Argent ( Erba ) • La Débâcle ( Atitsura ) • Le Docteur Pascal ( Pascal kurmikye )
Tawa
XANTO
Vergumvelt La Terre
Sutesik Émile Zola
Ava Francava
Suterotinda Berpot
Evla 1887
betara teza
  Tuveli icde Suteroteem 
Moek ke xantof piskuks ke 1887