Affrikat

An Affrikat is a zwifåcher Konsonant in ara Lautgruppm nouch da Artikulationsoart: Affrikatn fånga å mit an Plosiv (Vaschluslaut) und hejern af mit an Frikativ (Raiblaut). Dej zwoa Lautt wern eng vabundn asgsprocha, su das's da oane direkt inn åndern iwergejt.

De druntere Tabölln zoigt, wos fir Lautt in Internationaln Phonetischn Alphabet (IPA) unterschin wern. D IPA-Zaichn kinnts åklicka, nou kummt's af d Listn vo de IPA-Zaichn.

Korrekterwais wern d Affrikatn in IPA mit an Bung driwer gschrim - baispülswais p͡f t͡s d͡ʒ -, der wird ower gern weggaloun - ålso pf ts dʒ. Gem tout's aa speziölle Ligaturn: ʦ ʣ ʧ ʤ ʨ ʥ fir de eftestn Affrikatn. Dej Ligaturn ghejern ower nemmer zon Standard-IPA.

IPA	bschrim
p͡f	labiodental, Frikativ, stimmlous
t͡s	alveolar, Affrikat, stimmlous
d͡z	alveolar, Affrikat, stimmhaft
t͡ʃ	postalveolar, Affrikat, stimmlous
d͡ʒ	postalveolar, Affrikat, stimmhaft
t͡ɕ	alveolopalatal, Affrikat, stimmlous
d͡ʑ	alveolopalatal, Affrikat, stimmhaft
ʈ͡ʂ	retroflex, Affrikat, stimmlous
ɖ͡ʐ	retroflex, Affrikat, stimmhaft
k͡χ	velar/uvular, Affrikat, stimmlous
t͡ɬ	alveolar-lateral, Affrikat, stimmlous

De boarische Sprouch kennt vo deane: [p͡f t͡s t͡ʃ k͡χ]

Es [k͡χ] kummt ner in westlinga Sid- und Sidmittlboarischn (Tirolisch u. a.) und in Lechroanischn fir. In de åndern boarischn Dialekte stejt fir des a [k] oder a [g̊ ].

Artikulationsoartn (an Iwersicht)
pulmonal									niat-pulmonal
Nasal	Plosiv	Frikativ	Affrikat	Approximant	Vibrant	Tap	Flap	Lateral	Implosiv	Ejektiv	Klick