Biakastllaffa
| Der Artikl is im Dialekt Obaboarisch gschriem worn. |
Biakastllaffa is a Brauch aus da Jugendkuitur, dea si imma weida ausbroat. Es gähd dabei drum zu zwoat a Kistn Bia laa z'dringa, während ma a festgsetzte Streckn zrucklegt. Dees easchte Kastllaffa is 1982 in Minga, Bayern, vo Studentn organisiat worn.[1] De Spass-Spoatoat is oba aa aussahoib vom boarischn Sprochraum bezeigt.
Wias gähd
[Werkeln | Am Gwëntext werkeln]Beim Biakastllaffa lafft ma ned um, ned auf, scho gor ned zwischn und a ned in, sondern mim Kastl Bia a gewisse Streck ob. Wer moand, dass a dazua aa im Getränkemarkt werkln ko, liagt gscheid danem, wei nemli da Gschpass an der Sach is, das as Kistal vorher voi und nochad laar is. Natiarle is de Wahl vo da Brauerei und Biersortn a Glaubnsfrang, de oft amoi hoaß dischkriert werd. Da Alkoholgehalt ko se emmfois direkt auf de sportliche Leistung auswirka, wesweng Bockbier natirli fia erschwerte Bedingunga sorgt, währnd alkoholfreis Bia de "Sportla" zu bessane Leistunga befähigt. Bei Puristn is Alkoholfreis daher ois "Doping" vaschrian.
Reglwerk
[Werkeln | Am Gwëntext werkeln]De Regln vo so am Biakastlrennats san ned so schwaar. Oa Kastn Bier und zwoa, drei Leid, de mitmachan, sand oa Manschaft. Bei da Streckn untascheidt ma zwischn de gmiatlichn oa bis zwoa Kilometta Amateurstreck, da härtern Streck bis fünf Kilometta und am Biakastnmarathon mit mehr ois fünf Kilometta.
Üba de Streck vasuachan de Teams, ernan Kastn möglichst schnoi zum transportiern. Damid des ar an Spaß macht, werd der Kastn dawei natili ausgsuffa. Vorteil: Des Drum wird oiwei leichta, Nachteil: S'Laffa dafür umso schwara. Wenn ma des dann a no mit irgentweiche inta-aktivn Stationen mit Koordinationsübunga vabindt, gehts hoit dann goar nimma.
Insgsammt guit: Oiss is erlaubt, solangs Gaudi macht.
Kritik
[Werkeln | Am Gwëntext werkeln]Wia übaroin guit a do: Bewegung an da frischn Luft is gsund, genauso wia de oane oda andre Substanz im Bier. Aba des wars nachad aa scho. Dees meiste dro is ungsund wia d' Sau.
- Easchtns de Saufarei
- Zwoatns sschware Hem
Des hod dann a eftas an Effekt, dass der erwartete sportliche Musklkoter ausbleibt, dafür aba so ziemlich ois andere vakotert is bis zum Speim. Es werd doher gfordert, alkoholfreis Bia freizumgemm, wos aba vo de Rauschvafechta im Gengzuag ois "Doping" ogseng werd.
Vor oim da zwangsleiffig hohe Alkoholkonsum ruaft de Kritika afn Plan. Bei Teams vo zwoa Persona is laut Regln immahi a Menge vo drei bis vier Lita Bia (variiert vo Ort zu Ort) pro Person vorgschriem; vaschittn oda absichtlichs Ausspeimm werd mit Disqualifikation bstrafft. Emmfois gebts fia am Zui no ned drungas Bia a hohe Zeitstrafn, wogeng zuasätzlicha Biakonsum mid Zeitguatschrift honoriat werd.