Bugs Bunny is a Trickfuim-Figua. Ea is a vamenschlichta Hos oda a Karnickl. In oana amerikanischn Umfrog vo TV-Guide im Joa 2002 is a zua beliabtastn Zeichntrick-Figua vo oin Zeitn gwejd woan.[1][2]
Da Bugs Bunny is a Siegatyp, ea gwinnt oafoch imma. Da Konflikt, de Aggression geht owa nia vo eam aus, sondan imma vo de Gegna. De roazn eam so long, bis a eana a Lektion eateit. Sei respektlose, lässige, unbekimmate Oat, gmischt mit Muadawitz, hod eam in Amerika so populea gmocht, wei si de Amis do wiedaeakennt hom. Duachn Bugs Bunny is aa de Rednsoat "Eh... What's up, doc?" in an amerikanischn Sprochschotz eigonga. Des "Äh... Is wos, Doktor?" sogta moast am Ofong zu seine Gegna, wearend ea lässig on oana Karottn kaut.
Da Bugs Bunny is 1940 zan easchtn Moi unta dem Noma auftretn. Seitdem hod in weit mea wia 150 Cartoons mitgwiakt (voa oim in de Serien "Looney Toons" und "Merrie Melodies") und wead bis zum heitigen Dog zoagt. Fia Knighty Knight Bugs (1958) hod da Bugs Bunny an Oscar fian bestn animiatn Kuazfuim dahoidn.
Ea is vo zoireichn Zeichnan und Autorn prägt woan, u. a. aa vom Tax Avery.