Dirre Waund

Dirre Waund; Dürre Wand
	De Dirre Waund: Schoba (links), Öhla (Mittn) und Katharinanschlog (rechts) De Dirre Waund: Schoba (links), Öhla (Mittn) und Katharinanschlog (rechts)
Häh	1222 m ü. A.
Log	Niedaöstareich, Östareich
Beag	Gebirgsgruppe 1862 nochm Trimmel, Guadnstoana Oipn
Dominanz	8,4 km → Schneebeag
Schoartnheh	261 m ↓ Schobakapöön
Geographische Log	47° 49′ 59″ N, 15° 55′ 17″ OKoordinaten: 47° 49′ 59″ N, 15° 55′ 17″ O
	Dirre Waund (Niederösterreich)
	Dirre Waund (Niederösterreich)

De Dirre Waund (dt. Dürre Wand) is a Beag in de Guadnstoana Oipn. Se liagt zwischn Schneebeag, Großm Neikogl und Hocha Waund in Niedaöstareich. De Dürre Waund is hecha wia de Hoche Waund, hod owa meah Quöön. Da 9 km launge Hauptkaum vo da Dian Waund ist in SW-NO-Richtung orientiat, am Kaum ohm fiaht a Waundaweg entlaung.

Aunfoaht

Ausgaungsuate san Miesnboch, Waidmaunsföd, Längapiaschting, Puchbeag und de Mamauwiesn.

Noch Miesnboch und Waidmaunsföd: vo Wean (A2 Ohfoaht Wöllaschduaf) oda Neistod foahst iwa de 21er bis noch Reichntoi, duatn biagst links oh eine ins Miesnbochtoi (Richtung Puchbeag). Weida entweda noch Waidmaunsföd (rechts ohbiagn), Boibaschduaf (grod weida) oda noch Tiafnboch (beim Gh. Hornung rechts ohbiagn). Vo Neistod geht a Zug bis Reichntoi (Hoitstöö „Miesenbach-Waidmannsfeld“, Kursbuachstreckn 521). Vo durtn foaht a Bus (KFL 7847) weida ins Miesnbochtoi eine.
Noch Längapiaschting: vo Wean (A2 Ohfoaht Wöllaschduaf) oda Neistod foahst iwa de 21er bis Guadnstoa, dortn biagst links oh Richtung Mariahüüfbeag. Owa ned aum Mariahüüfbeag auffe, sondan es kloane Straßl ins Längapiaschtingtal eine foahn.
Noch Puchbeag aum Schneebeag: Vo Wean (A2 Ohfoaht Neistod West) oda Neistod foahst iwa de 26er auf Puchbeag. Weida entweda noch Sonnleitn (Sebastian-Wossafoi) oda ins Oware Sierningbochtoi. Vo Neistod geht aa a Zug bis Puchbeag (Kursbuchstreckn 522).
Auf de Mamauwiesn: vo Wean (A2 Ohfoaht Wöllaschduaf) oda Neistod foahst iwa de 21er bis noch Guadnstoa, duatn biagst links oh ins Klostatoi (Richtung Schwoazau). Auf de Mamauwiesn fiaht a Schodastraßl auffe.

Gipfl

Schoba (Schober; 1213 m ü. A.): Da Schoba is a stäula, keglfeamiga Beag. Vo da Schobakapöön fiaht da Hans-Linhart-Steig auffe, mit scheenan Ausblickn zan Schneebeag. Vom Gipfl söwa host koa Aussicht, dafia is a Kreiz oman.
Öhla (Öhler; 1183 m): Da Südhaung vom Öhla is föösig; om hosd a scheene Aussicht. Des sognaunte Öhlakreiz steht am Öhlasattl estli vom Öhlaschutzhaus.
Katharinanschlog (Katharinenschlag; 1222 m): Da Katharinanschlog is da hechsta Gipfl vo da Dian Waund, des is a laungzogane Kuppn, wosd aa a scheene Aussicht hosd.
Plottnstoa (Plattenstein; 1154 m): Gipflkreiz und scheene Aussicht ins Piastingtoi und zan Schneebeag. Glei neman Gipfl steht de Gauamauhittn. Auf da Noadseitn is a stäula Föösohbruch.
Martesberg (918 m): is da letzte Auslaifa im Noadostn. Es fiahrt koa markiata Weg auffe.

Da Schoba vo da Mamauwiesn
Gipflkreiz aum Schoba
Da Öhla
Aussicht vom Katharinanschlog
Da Gipfl vom Plottnstoa mit da Gauamauhittn
Blick vom Plottnstoa aufn Großn Neikogl

Aunstieg

Vo Sonnleitn (oda mim Auto) zua Mamauwiesn, weida zua Schobakapöön und aufn Schoba und Öhla.
Vom Längapiastingtoi (Zinsnstoana, Öhlasimmal) oda vom Sierningbochtoi (Öhlahansl) zan Öhlerschutzhaus aum Kaum und weida entweda Richtung Öhla oda Katharinanschlog.
Vom Ascher zan Öhlerschutzhaus oda aufn Katharinanschlog.
Vo Miesnboch (Tiafnboch) aufn Plattnstoa (iwan Haslbaua oda Schwaighof).
Vo Miesnboch, Boibaschduaf oda Waidmaunsföd iwan Frohnbeag aufn Plottnstoa.

Hittn

Des Öhlaschutzhaus (Öhlerschutzhaus) vo de Natuafreind, des steht aum Sattl zwischn Öhla und Katharinanschlog auf 1027 m Hechn und is 1928 eaeffnat wuan.
De Gauamauhittn (Gauermannhütte) vom Touristnklub aum Plottnstoa, de is 1908 vo da oipinan Gsööschoft „Waldegger“ baut wuan.

Gschicht

Es Miesnbochtoi is um 900 easchtmois bsiedelt wuan; 1166 im Falkensteiner Codex eawähnt. A großa Täu vo da Gegend hod dena Scheichnstoana gheat. „Miesnboch“ is boarisch fia „moosiger Bach“.

Geologie

Da Hauptkaum bsteht aus Dochstoakoik, im Noadwestn is a Dolomitschneidlaundschoft vuaglogat. Aa am Marechakogl san suiche Vualogn.

Höin

Im Gebiet vo da Dian Waund san uma 100 Höin vuahaundn. De meistn Höin san neadli vom Öhla und vom Plottnstoa im Stäugeländ, sowia im Marechakogl. De bekauntastn san:

Tablaloch 1862/10 (Tablerloch): In de Föösn neardli vom Plattnstoa. Des Tablaloch bsteht aus ana riesngroßn Hoin (bis zu 60 × 24 × 12 m), de stäu owe fiaht, und zwoa aunschliaßandn Labyrinthn („Kleines Labyrinth“ und „Haselbauerlabyrinth“), sowie a poa Seitnstreckn und Schlote. Insgsaumt is 345 m laung mit an Hächnuntaschied vo 57 m; zeitweis büdt si Eis in da Höin.
Erzloch 1862/4: 16 m tiafe Schochthöin beim Öhlakreiz, wo's im 16. Jh. drinad weatvolle Erze vamuadt haum; mittlawäu is a Haufn Obfoi drin.
Malepartuskluft 1862/19: mit 52 m Läng de gresste vo de Höin aum Marechakogl.

Des Portäu vom Tablaloch is 5 m hoch
Erzloch
Malepartuskluft

Literatua

Höhlenkundliche Mitteilungen. Landesverein für Höhlenkunde in Wien und Niederösterreich, Wien 1.1945 – 48.1992, ZDB-ID 952453-8.
Max H. Fink (Red.): Die Höhlen Niederösterreichs. Südöstliches Niederösterreich und Randgebiete. Band 1. Wissenschaftliche Beihefte zur Zeitschrift „Die Höhle“, Band 28, ZDB-ID 505211-7. Landesverein für Höhlenkunde in Wien und Niederösterreich, Wien 1979.
Helga und Wilhelm Hartmann (Red.): Die Höhlen Niederösterreichs. Band 4. Wissenschaftliche Beihefte zur Zeitschrift „Die Höhle“, Band 37, ZDB-ID 505211-7. Landesverein für Höhlenkunde in Wien und Niederösterreich, Wien 1990.
Kurt Kettner (u. a.): Ostalpen. Schutzhütten in Deutschland, Österreich und Südtirol. 1074 Schutzhütten und Biwakschachteln des DAV, OeAV, AVS und CAI sowie zahlreicher anderer alpiner Vereinigungen und privater Bewirtschafter. 9. Auflage. Die Alpenvereinshütten. Band 1. Bergverlag Rother, München 2005, ISBN 3-7633-8073-6.
Adi Mokrejs: Bergwanderatlas Niederösterreich. Über 200 der schönsten Bergwanderungen sowie Varianten und Bergtouren. Zweite, erweiterte und aktualisierte Auflage. Schall-Verlag, Alland 2012, ISBN 978-3-900533-66-3.

Im Netz

Commons: Dürre Wand – Sammlung vo Buidl, Videos und Audiodateien

Gauermannhütte.
Öhlerschutzhaus.
Verband Österreichischer Höhlenforscher (VÖH).
Prächtig statt dürr: Wandertipp der Tageszeitung Der Standard, 29. April 2011, abgerufen am 16. Juli 2013.
Am Sonntag gehen wir … Von Miesenbach auf die Dürre Wand. In: Wiener Zeitung, Nr. 210/1935 (CCXXXII. Jahrgang), 1. August 1935, S. 8, oben links. (Online bei ANNO)Vorlage:ANNO/Wartung/wrz.

Dea Artike is ois berig in de Hall of Fame (Ruhmeshoin) aufgnumma worn.