Louis van Gaal

Louis van Gaal
Louis van Gaal, 2011
Personalia
Name	Aloysius Paulus Maria van Gaal
Geburtstag	8. August 1951
Geburtsort	Amsterdam, Holland
Position	Middlfejdspuia

Da Aloysius Paulus Maria van Gaal, kuaz Louis van Gaal (* 8. August 1951 in Amsterdam), is a ehemaliga hollendischa Fuaßboispuia und heit -draina. Er drainiert aktuell de hollendische Nationalmonschoft.

Karriere ois Spuia

Louis van Gaal hod mitm Fuaßboi im Nochwux vo RKSV de Meer ogfangt. Nacha is a in de Jugend vo Ajax Amsterdam gwexlt. Do hod a scho im letztn Jugendjoar in da Profimonschoft gspuit. Wei a bei Ajax Amsterdam zua koan Einsotz keman is, is a nacha ins Ausland ganga. Sei neia Klub is da Royal Antwerpen FC worn. Aa do is a koa Stammspuia gwen. Do is a via Joar im Varein bliebm, is olladings nua in insgsamt 41 Punktspuin zum Einsotz keman und hod siebm Tor gschossn. 1977 is a in de hollendische Hoamat zruck keman. Do hod a oa Joar beim Easchtligist Telstar gspuit und is nacha zua Sparta Rotterdam gwexlt. In Rotterdam is eam da Duachbruch glunga. Do is a Stammspuia worn, in in ocht Joarn 246 Moi zan Einsotz keman und hod 25 Tor gschossn. 1986 is a zua AZ Alkmaar gwexlt, wo a oba nua in 17 Ligaspuin zuam Eisotz keman is. Nach am Jahr hod a sei Karriere beendet.

Karriere ois Draina

In seim oanzign Joar ois Spuia beim AZ Alkmaar wor da van Gaal aa Co-Draina. Nachm End vo seina Spuiakarriere is a im Amt bliebm.

1988 is a nacha zua Ajax Amsterdam gwexlt. Do is a Co-Draina vom Leo Beenhakker worn. Nochm Weggang vom Beenhakker 1991 is ea da Draina worn. Mit Ajax wor a nacha recht eafoigreich: UEFA-Pokoi (1992), hollendischa Pokoi (1993), dreimoi hollendischa Superpokoi (1993, 1994 und 1995), dreimoi hollendische Moastaschoft (1994, 1995, 1996) und Champions League (1995). Da Wejdpokoi hod aa ned fejn deafa.

1997 hod a sein easchtn Drainerpostn im Ausland ibanumma, beim FC Barcelona. Mit da Monnschoft hod a in UEFA Supa Cup (1997) gwunna, zwoa Moastaschoftn und oamoi de Copa dl Rey. Trotzdem is a vo de Fans kritisiad worn. Voa oim wegn seina Dransferpolitik. In seina Amtszeit hom bis zu 8 Hollenda fia Barcelona gspuid.

Anno 2000 hod a nacha zam easchtn Moi de hollendische Nationalmonschoft ibanumma. An da Qualiikation fia de WM-Endrunde 2002 is a oba gscheitad. 2002 is a nacha zum FC Barcelona zruck ganga, 2003 wor de Zammaorbat oba scho vieda voabei. Zwoa Joar lang wor a ohne Drainerjob - in desa Zeit wor a oa Joar lang technischa Direktoa bei Ajax Amsterdam -, dann i a Drainer beim AZ Alkmaar worn. 2009 is a mit dera Monschoft hollendischa Moast worn. 2009 hod a in Drainerpostn beim FC Bayern Minga ibanumma. Mid da Monnschoft um Philipp Lahm, Bastian Schweinsteiger, Franck Ribery und Arjn Robbn is a 2010 Deitscha Moasta und Pokalsiega worn. Ea is mid de Bayern aa bis ins Finale vo da Champions League keman, wo s olladings a 0:2 Niedalog gegn Inta Mailand gebm hod. Im Meaz 2011 ia a beim FC Bayern entlossn worn. Vo Novemba 2011 bis Juni 2012 wor a Spoatdirektoa bei Ajax Amsterdam. Ofang August hod a nacha zum zwoatn Moi in Drainerpostn vo da hollendischn Nationalejf ibanumma.

Auszeichnunga

• Hollendischa Drainer vom Joar: 2007, 2009
• Sprachwahrer des Jahres: 2009 (3. Platz)^[1] (Ea hod bei Bayern Minga deitsch stod englisch ois Spuiasproch eigfiat!)
• Trainer der Saison: 2009/10^[2] (gwejd vo da Vereinigung der Vertragsfußballspieler)
• Drainer vom Joar in Deitschland: 2010^[3]

Schriftn

• Biographie & Vision (Originaltitel: Biografie & visie, Publish unlimited, 2009, ISBN 978-94-90285-01-2,^[4] deitschsprochige Vaeffentlichung: Visie Sport, 2010, ISBN 978-3-00-032183-2)

Im Netz

• Louis van Gaal in der Datenbank von weltfussball.de
• Hoamseitn vom Louis van Gaal

Beleg

1. deutschesprachwelt.de: Die Sprachwahrer des Jahres 2009.
2. fcbayern.telekom.de: Bayern bestimmen VDV-Besten-Wahl 2009/10 vom 13. Juli 2010.
3. fcbayern.telekom.de: Hohe Auszeichnung für Van Gaal und Robben vom 8. August 2010.
4. http://www.nzz.ch/nachrichten/kultur/aktuell/der_prozess-trainer_1.3899260.html