Der Artikl is im Dialekt Weanarisch gschriem worn. |
Da Müllirahmstrudl, aa Millirahmstrudel[1] gheat za de berihmtastn weana Möhspeisn.
S ötaste haundschriftlich iwaliefate Strudlrezept iwahaupt is a Rezept fia an Müllirahmstrudl (Mülch Raimb Strudl) und steht in an anonymen Kochbiachl ausm Joa 1696[2][3]. Ka Zuafoi, wei da Strudl duach de Tiakn (ois Marschvapflegung) kuaz davua im Zug vo da zweitn Tiaknbelogarung (1683) noch Wean kumman is[4]. Doss da Stelzer Franz (1842–1913), a Gostwiat in Bradnfuat, da Eafinda vom Müllirahmstrudl warad, is a Legendn.[5]. Da woare Kean vo da Gschicht is der, dass de Wiatschoft vom Stelzer a Pügastättn fia Liabhowa vom Müllirahmstrudl gwesn is.
De Füü vo aan Müllirahmstrudl wiad aus Semmen gmocht, de wos in Mülli eigwaggt woan. Dazua kumman no Eidotta, Staubzucka, Buddan, Vanüll, Sauarahm und Weimbal. Des Gaunze wiad mit Eischnee aufglockat. Da Iwaguss besteht aus Müüch, Zucka und Ei. De Möhspeis wiad mit Vanillesooß iwagossn und woam augricht.