Sid Meier

Der Artikl is im Dialekt Hausrukfiatlarisch gschriem worn.
Da Meier Sid.

Da Sid Meier (auf d'Wöd kema 1954 in Detroit, Michigan) is a amearikanischa Kombjutaschbü-Brogramiara fu dem a boa fu de bekauntastn Schdrategi-Schbü wia de Civilization-Searie schdauman. Nochdem a laung fia de Fiama Microprose goawat hod, hod a 1996 mid seine Kolegn, in Jeff Briggs und in Brian Reynolds, a aigene Fiama grindd, nemli Firaxis Games. Unta Kombjutaschbü-Freind güt da Sid Meier heit praktisch schau ois Legendn. Haid duad a owa moastns neama söwa brogramian, sondan is fia s'Konzept und fia d'Idee fum Schbü zuaschdendi, wos ma in Amearika a Creative Director hoast.

Sai Lem

[Werkeln | Am Gwëntext werkeln]

Da Sid Meier hod in Michigan Gschicht und Infoamatik schdudiad und hod auf an Atari 800 zan easchdn Moi a weng zan umadumbrogramian augfaungd. Im 1981ga Joa hod a in Bill Stealey kena gleant, dea a schau a weng a Eafoarung mid Kombjutaschbü ghobt hod und gach drauf haum de zwoa d'Fiama Microprose grindd und augnfaunga aigane Iden fia Kombjutaschbü zan entwükin und zan famoaktn.

Bai Microprose han daun in Sid Meier seine bekauntasnd Schü aussa kema, wia Silent Service, Pirates!, Railroad Tycoon, Civilization und Colonization. De Schbü woan domois a grossa Eafoig, obwoi de domoling Kombjuta waid ned aso guad woan wia heit und a de Schbü desweng grafisch nu recht oafoch woan. D'Strategischbü fum Sid Meier woan owa recht guad konzipiad und woan a hisdoarisch recht genau und haum desweng an Haufn Fens ghobt. Drozdem is d'Fiama Microprose im 1994ga Joa in finanziele Schwiarigkaidn kema und is fu Spectrum HoloByte aufkauft woan. Auf des aufi is da Bill Stealey wega gaunga und zwoa Joa schbeda is a da Sid Meier wek.

Im 1996ga Joa hod da Sid Meier daun gemainsaum mim Jeff Briggs, am aundan Vetaran dea schau bai Civilization dabai woa, a neiche Fiama grindd, nemli Firaxis Games. Doat san daun noch lengara Zeid neiche Iden fum Sid Meier umgsezt woan und ois Kombjutaschbü aussa kema, wia Sid Meier's Gettysburg! und Sid Meier's Antietam!, de oi zwoa um Schlochtn im amearikanischn Biagakriag gengan. Schbeda han daun neiche Veasionen fu ödare Schbü aussa kema, de auf d'neiche bessane Kombjutadechnik aubasst woan und a de Gschicht waida ausbaud haum. Soichane Schbü fu Fireaxis han zan Baischbü Sid Meier's Alpha Centauri (1999), Sid Meier's Civilization III (2001), owa a s'neiche Sid Meier's Pirates! (2004) und Sid Meier's Railroads! (2006). S'ola neichasde Schbü fu Firaxis Games is Civilization Revolution, wos im Juni 2008 aussa kema soid und wida a Foatsezung fu da Civilization-Seria wean wiad.

Da Sid Meier lebt heit mid seina Frau, da Susan, und mid seim Buam, in Ryan, in Hunt Valley, Maryland. Seine Schbü haum oiwai nu an Haufn fu Fens und seid 1999 is a sogoa ois zwoata Schbüentwikla iwahaupt in de Academy of Interactive Arts and Sciences' Hall of Fame aufgnuma woan. Da easchde woa da Japana Shigeru Miyamoto fu Nintendo. Im Jena 2008 hod aussadem de CMP Game Group bekaunt gem, das da Sid Meier an Lifetime Achievement Award griagt, dea auf da Game Developer's Conference iwareicht wean soid.

Bretschbü Foabüda

[Werkeln | Am Gwëntext werkeln]

D'Ide fia a boa fu denane Schbü hod da Sid Meier fu Bretschbü ghobt, de fum Francis Tresham eafundn woan san und bai da Fiama Hartland Trefoil Ltd. aussa kema san. Es gibt zan Baischbü a Bretschbü des Civilization hoast und in da Grundschdrukdua so enlich is wia s'Kombjutaschbü fum Sid Meier, hoid neta ned aso komplex. S'Schbü Railroad Tycoon basiad auf'n Aisnbau-Schbü 1829 fum Tresham, wos a im Kombjutaschbü daunkboa augem wiad und a fia's Schbü Pirates!, wos d'Gschciht fu de Piaratn in da Karibik in da Kolonialzeid noch schbüd, gibt's a Bretschbü-Foalog de Spanish Main hoast. Nochdem d'Kombjuta-Veasionen fu de Schbü komeaziel recht eafoigreich woan han, hod's natiali Diskusionen gem wegam Copyright fu da uaschbringlichn Ide dazua und desweng hod Microprose a im 1998ga Joa d'Bretschbü-Fiama Hartland Trefoil Ltd. kauft.

Seine Schbü

[Werkeln | Am Gwëntext werkeln]
  • Floyd of the Jungle (1982), Jump'n'Run
  • Chopper Rescue / Air Rescue (1983), Actionsschbü
  • Hellcat Ace (1982), Flugsimulazion
  • Spitfire Ace (1983), Flugsimulazion
  • Solo Flight (1984), Flugsimulazion
  • F-15 Strike Eagle (1985), Flugsimulazion
  • Crusade in Europe (1985), Strategi-Schbü
  • Conflict in Vietnam (1985), Strategi-Schbü
  • Decision in the Desert (1985), Strategi-Schbü
  • NATO Division Commander (1985), Strategi-Schbü
  • Silent Service (1985), U-Boot-Simulazion im Zwoatn Wödgriag
  • Gunship (1986), Kaumpfhubschrauwa-Simulatoa
  • Pirates! (1987), Strategi- und Action-Schbü in da Piaratnzeid
  • Red Storm Rising (1987), U-Boot-Simulazion
  • F-19 Stealth Fighter (1988), Flugsimulazion
  • Sid Meier's Railroad Tycoon (1990), Wiatschoftssimulazion aus da Aufaungszeid fu Aisnbau
  • Sid Meier's Covert Action (1991), Strategi und Agenten-Adventure
  • Sid Meier's Civilization (1991), Strategi-Schbü
  • Sid Meier's Colonization (1994), Strategi-Schbü
  • Sid Meier's Civilization II (1996), Strategi-Schbü
  • Sid Meier's Gettysburg! (1997), Echtzeid-Strategi-Schbü ausn amearikanischn Biagakriag
  • Sid Meier's Antietam! (1998), Echtzeid-Strategi-Schbü ausn amearikanischn Biagakriag
  • Sid Meier's South Mountain! (199x), Echtzeid-Strategi-Schbü ausn amearikanischn Biagakriag
  • Sid Meier's Alpha Centauri (1999), Strategi-Schbü
  • Sid Meier's SimGolf (2002), Goif-Menedscha-Simulazion
  • Sid Meier's Civilization III (2002), Strategi-Schbü
  • Pirates!|Sid Meier's Pirates! (2004), neiche Veasion fum Piaratn-Klassika
  • Sid Meier's Civilization IV (2005), Strategi-Schbü
  • Sid Meier's Railroads! (2006), neiche Veasion fum Aisnbau-Klassika
  • Civilization Revolution (2008), dawai nu ned aussa kema

Im Netz

[Werkeln | Am Gwëntext werkeln]