Gieris – pati abelniausė pudamentėnė lietuojamuoji etėkas kateguorėjė, nusakunti socēlėnės tėkruovės ėr žmuoniū eglesė duoruovėni vertingoma. Bluogė prīšībė. Plate gierė kateguorėje konkretėzoun kėtas siauresnės etėkas kateguorėjės ėr sāvuokas: žmuonėškoms, teisingoms, altruizmos, duorībė, geroms, ožuojauta, gailestingoms, gerašėrdiškoms ėr t.t.
Gierė sāvuoka dėdliausē apibendrinta skvarma ėšreišk privaluomībe ėr tun, kas duoruovės puovīza teigama. Šė sāvuoka atspind abelnūsius žmuoniū interesus, sėikius, lūkesnius, atentėis vėltis, sopratėma, kuoks torietom būtė žmuoniū gīvenėms ėr anūm santīkē. Kor rokounama aple gieri, ten rokounama ėr aple duoruove. Tačiau gierė kateguorėjė netapati duoruovē, apimuntē teigamas ėr neigamas žmuoniū gīvenėma poses. Gierė kateguorėjė znuočie tik tun, kas duoruovėškā teigama.
Gieris − pagrindėnė duoruovėnė vertībė, aukščiausė žmuoniū gīvenėma lieta ėr ideals. „Gieris īr umžėns, tauriausė mūsa gīvenėma lieta. Ka ėr kāp soprastomė gieri, gīvenėms īr ne kas kėta, kāp gierė sėikėms“ (L. Tolstuojus). Patė abelniausė skvarma gieris ėšreišk duoruovės kriterėju, katruo pagrindu lietuojami vėsė suocēlėnės tėkruovės reiškėnē bei asabnū žmuoniū veiksmā, puoelgē ėr kėtė duoruovėnė gīvenėma faktā.
Gierė reikšmie vėsuomenės gīvenėmou nuognē dėdelė. Uns ratavuo žmuogou tuobolietė, pakėltė aukščiau, īsėsāmuonintė sava vėita ėr paskirti gīvanėme. Apimdams vėsa tun, kas žmuoniū santīkiūse īr teigama, kėlnu ėr duoruovinga, gieris tamp sėiktėnu idealu.
Gieris nebūn atsėtėktinis. Uns prigaunams īveikus žmuoniū sāmuonie ėr elgesie īvairės bluogė apraiškas. Nugalint bluogi, ītvėrtėnams gieris. „Žmuogos tor darītė gera kou dėdesniam žmuoniū līkiou. Vėsuoks anuo veiksmos, katras īr prīšings šiou oždavėniou, īr zlastings veiksmos, išskėrontis anū ėš abelna, harmuoninga žmuoniū sogīvenėma.