Černuobīlis
Černuobīlis (okrainėitėškā Чорнобиль, rosėškā: Чернобыль) — miests šiaurės Okraėnuo, Kijeva srėtie, 90 km ī šiauri nu Kijeva, 15 km nū robežiaus so Baltarosėjė. Černuobīlis bova svarbos rīšiu, prekības ė komėrcėjės cėntros, īpatėngā XIX o. Ož 14,5 km nū miesta bova pabūdavuota Černuobīlė atuomėnė alektrėnė. Miests ėšgarsiejė, kumet diel operatuoriu klaiduos ė trūkomu RBMK tėpa reaktuoriaus konstrukcėjuo 1986 m. balondė 26 d. 01:23 vėitėnio čieso ivīka dėdliausė svietė atuomėnės jiegainės avarėjė, toriejosė gluobalaus masta pasiekmiū. Spruogos reaktoriou ė kėlos gaisruou ī aplinka pateka radioaktīvės medegas. Oficēlē žova 56 žmuonės, avarėjės čiesu ėš miesta ė apīlinkiu bova evakouta aple 130 tūkst. gīvėntuoju (skaitont Pripetės ė Opačičė miestus). Tėk apīlėnkies gīvenama vėresnio omžiaus žmuoniū, katrie nevierėjė radiacėjė a nenuorėjė palėktė gėmtuosės žemės. Daba reaktuorios īr ožbetonouts sarkuofagė, ale Černuobīlė zuona ėšleikt vėina ėš patiū radiuoaktīviausiu veitu cieluo Žemie. Apsauguos zuona irinki Černuobīliaus īr 30 km spėndolio.
Ivairēs skaitlevėmās diel prīžastiu, sosėjusiu so katastruofa žova 10 tūkst. žmuoniu, dā 3,5 mėlėjuona sosėrga. Diel radiacėjės, skīdliaukės viežīs patonkiejė dešėmts sīkiu. Černuobīlie alektrėnė alektra gamėna da 14 metu — ligė 2000 m.