Žvagėnē
Tas straipsnis īr aple augala, katros lietoviu b. k. šaukiams žvagėnė. Aple kėtas tap žemaitėškā šaukiamas žuolės veiziekėt žvagėnis.
Žvagėnē, kėtap žvagėnė, žvagėlis, žvagėnīs (luotīnėškā: Capsella bursa-pastoris) ī tuokė žuolie, muokslėškā prigol katra prī krīžmažėidiu augalū (Brassicaceae) šeimuos.
Žvagėniū žėidā smolkē, balti aug krūvuo kekies. Stombris būn statmens, aple 30 cm aukštoma, negausē šakuots. Lapā vairiū skvarmū, prī žemės ėlgesni, vuo ont stombrė mažiokā. Augals vėinmetis ī, sonuokėn daugībė sieklu, anas ėlgam palėik daigės.
Žvagėnē piktžuolė ī. Aug laukūs, dėrvuonūs, daržūs, pakelies, griuoviūs. Žīdia nug balondė lėgo pat rodenė šalnū.
Žvagėniu sieklas sogol i tuokės brondelės, katras vasaras ontruo posie jėm žvongietė. Rokoun jēb žvagėnē šnabzd, čiesos pėivas pjautė.
Tink kap šierals paukštem ė triošem. Tink dietė i saluotas. Ī liekvarsta nug kraujavėma.
