Amir Hamzah

Si Tengku Amir Hamzah (28 Pebrero 1911 – 20 Marso 1946) sarong Indones na makatta asin heroe nasyunal kan Indonesya. Namundag sa sarong aristokratikong pamilya sa Sultanato nin Langkat sa Sumatrang Amnayan, siya nag'adal sa Sumatra asin sa Java. Kan siya yaon sa senior haiskul sa Surakarta mga 1930, siya naimbwelto sa makabanwang hiron mala ta pigbabantayan na an mga hiro niya kan mga Olandes na administrador.

Kan 1937 si Amir pinabalik sa Sumatra ta ipina'agom saiya an aking babae kan Sultan asin ta siya nasibot na sa mga responsabilidad sa sultanata. Totoo, mamundo siya kan pangyaring ini ta bago kaiyan may kailusyon na siyang kaklase na si Ilik Sundari na halawig na katrato niya maski pa ngane kan siya naparayo ta nagkuang abogasya sa Batavia (ngonyan Jakarta) asin ta sindang duwa magka-ugos pa nanggad. Kan nakamit na kan Indonesya an katalingkasan kan 1945, nagin siyang representante kan gobyerno sa Langkat. Pagsunod na taon siya nadamay sa mga ginadan huli sa kariribokan kan magbungkaras an rebolusyon sosyalista pinamayohan kan Partai Komunis kan Indonesya. Ilinubong siya sa lubongan na komun.

An mga rawitdawit ni Amir may tema sa pagkamoot asin relihiyon asin nagpapanalmingan nin hararom na pagkakasiplingan sa pinaka'ubod kan saiyang boot. Gamit Malayo asin Java'ng tataramon, asin batay sa mga pinalakwas na estrukturang tradisyonal, nagpapahiling nin ritmo asin pagkasarambit sa kawat nin pagrarawit gamit an mga simbolismo sa mga tinatakin-takin na mga tataramon. An mga amay niyang mga obra manongod sa mga maludok na paghihidaw na pagkamoot, na naglalabyog sa duwang mate, erotika asin mabining pagkamoot; manta an mga huri na niyang pinagrawit nagkaigwa nang tugkadon na kahulogan dapit sa relihiyon. Sinasabi na sa duwang aripompon, an Nyani Sunyi an binibistong mas gantad. Si Amir konsideradong iyo an "Hade sa Panahon kan mga Makattang Poedjangga Baroe", asin siya an midbid na poetang Indones sa lantad internasyunal sa periodong bago nag'abot an Makabanwang Rebolusyon kan Indonesya.^[1]

Mga tinokda

Gabos'gabos si Amir nagtokda nin limang polong rawitdawit, kagwalong saysay, kagduwang artikulo, apat na halipot na osipon, tolong kadamotan nin mga rawit, asin sarong orihinal na libro. Kadakulan kan saiyang mga mukna nalagda sa magasin na Poedjangga Baroe, magasin na tinogdas niya kan taon 1933 katuwang sa Armijn Pane asin Sutan Takdir Alisjahbana^[2] Si Amir nagpalis man hale sa ibang lenggwahe nin duwang polo may apat na rawitdawit, sarong prosa, asin sarong libro.^[3]

Toltolan

↑ https://web.archive.org/web/20120102031021/http://www.jakarta.go.id/jakv1/encyclopedia/detail/838 Kinuaz 20-3-16. Sa Indones nakasurat.
↑ Jassin, H.B. (1962). Amir Hamzah: Radja Penjair Pudjangga Baru [Amir Hamzah: King of the Pudjangga Baru Poets] (in Indonesian). Jakarta: Gunung Agung. OCLC 7138547 Toltolan kinua sa Wikipidyang Ingles, 20-3-16
↑ Jassin, H.B. (1962). Amir Hamzah: Radja Penjair Pudjangga Baru [Amir Hamzah: King of the Pudjangga Baru Poets] (in Indonesian). Jakarta: Gunung Agung. OCLC 7138547 Toltolan kinua sa Wikipidyqang Ingles, 203-16

Sarong tamboan an artikulong ini. Makakatabang ka sa Wikipedia sa pagpoon kaining pahina.

[1] ttps://web.archive.org/web/20120102031021/http://www.jakarta.go.id/jakv1/encyclopedia/detail/838 Kinuaz 20-3-16. Sa Indones nakasurat.

[2] Jassin, H.B. (1962). Amir Hamzah: Radja Penjair Pudjangga Baru [Amir Hamzah: King of the Pudjangga Baru Poets] (in Indonesian). Jakarta: Gunung Agung. OCLC 7138547 Toltolan kinua sa Wikipidyang Ingles, 20-3-16

[3] Jassin, H.B. (1962). Amir Hamzah: Radja Penjair Pudjangga Baru [Amir Hamzah: King of the Pudjangga Baru Poets] (in Indonesian). Jakarta: Gunung Agung. OCLC 7138547 Toltolan kinua sa Wikipidyqang Ingles, 203-16

[1]

[2]

[3]