Gamal Abdel Nasser

Si Gamal Abdel Nasser

Si Gamal Abdel Nasser Hussein (Arabe: جمال عبد الناصر حسين‎, ʕæbdenˈnɑːsˤeɾ ħeˈseːn]; Enero 15, 1918 – Setyembre 28, 1970) iyo an ikaduwang Presidente kan Ehipto poon 1956 sagkod na siya nagadan. Saro siyang koronel sa Hokbong Ehipto asin siya an namayo sa 1952 na Ehiptong Rebolusyon katuwang si Muhammad Naguib kun saen saindang rinumpag an monarkiya (Muhammad Aling Dinastiya). An administrasyon niya nagsaksi sa maigot na modernasisasyon, pagpaotob nin marikas na nasyonalisasyon, asin an pagburak kan pan-Arabong nasyonalismo.

Sarong matagom na pigura sa pulitika asin historya kan Arabo maski ngonyan na modernong panahon, siya hinihiling sya kan mga Arabo bilang simbolo asin kampyon kan mga intereses kan mga Arabong nasyon asin tagasurog kan katalingkasan asin dignidad kaini. Masabing saiyang napondo an pagkanap kan imperyalismo sa dagang Arabo. Siya man an kagmukna kan sinasabing Non-Aligned Movement kun saen an grupo niya daing kinakampihan sa pulitika sa kinaban asin iriwal kan mga nasyon na poderoso.

Si Nasser naomaw na gayo sa mga nasyon na Arabo kan dai siyang duwaduwa na binawe niya an mga negosyong mahalagang gayo sa ekonomiya kan ehipto na kontrolado kan mga dayuhan arog kan industriya sa pagmina nin mga mineral asin pagprodusir nin asayti asin , orog na, an pagpirit niya na makua kan Ehipto an pagkontrol asin pag'administrar kan Suez Canal kun saen an mga bapor kan darakulang nasyon naagi sa pagtransportar nin mga produkto. Maski ngane medyo namo'ritan an saiyang imahe huli kan pagsakyada kan Israel asin kapangganahan kaini sa Gerang Anom-na-aldaw, si Nasser minimirar pa kan dakulon na Arabo bilang sarong tunay na lider.

Mga panluwas na takod

[baguhon | baguhon an source]

Toltolan

[baguhon | baguhon an source]