Mein Kampf

Mein Kampf

Patos kan edisyon 1926–1928
Nasyon	Alemanya
Tataramon	Aleman
Ulayon	Autobiograpiya
Kagpublikar	Eher Verlag
Taon kan publikasyon	18 Hulyo 1925
Published in English	13 Oktobre 1933 (hinayokong) 1939 (halaba)
Klase nin media	Imprinta (Matagas na patos asin Papel)
Pahina	720
ISBN	978-1495333347
LC Class	DD247.H5
Sinundan kan	Zweites Buch

An Mein Kampf (Aleman: [maɪ̯n kampf], An Sakong Pakikipagtusay) sarong 1925 librong autobiograpiya na sinurat kan pamayo kan Partido Nazi na si Adolf Hitler. An libro piglaladawan kun paano si Hitler luwayluway nagin antisemitiko. Igdi sa libro saiyang ibiniklad an saiyang ideolohiya politikal asin kun ano an mga plano niya para sa Alemanya. An enot na tomo nalagda kan 1925 asin an ikaduwang tomo napublikar kan 1926. An nagpakarhay kan libro iyo si Rudolf Hess, saiyang katuwang.

Si HItler pinonan an Mein Kampf kan siya napipiot sa preso huli sa saiyang dai-nakaantos na pag'alsa sa Munich kan Nobyembre 1923 na pig'apod niyang saiyang mga krimen politikal. Sa pagtubod ni HItler, an libro makaligtas saiya sa mga gastosan niya sa saiyang kaso. Pig'isip niya na dapat an libro magluwas sa duwang tomo na an enot dapat mapublikar kaamayi kan 1925. Kan magadan si HItler, an permiso sa libro napasa sa gobyerno estado kan Bavaria na dai nagtugot ipaimprenta o kopyahon an libro sa laog kan Alemanya. Kan 2016, kan magpaso na an copyright kapot kan gobyerno Bavaria, an Mein Kampf pinagpublikar liwat sa Alemanya, primerong gayo poon kan taon 1945.

Kan taon na 1939 an libro nakapabakal nin 5,200,000 kopya asin napalis sa 11 lenggwahe.^[1]

Mga tinotolod na kaisipan ni Hitler sa Mein Kampf

An Mein Kampf kuta may titulong "Apat may Kabangang Taon na Pakikipagtusay Laban sa Kaputikan, Kapalpalan asin Katalsotan". alagad an kaglagda kan libro sinimple na sanang titulohan na "Mein Kampf" o "Sakong Pakikipagtusay". Igdi ibiniklad ni Hitler an saiyang mga ideya manongod sa pagkatawo kan Aleman asin relasyon sa ibang mga rasa o lahi. Saiyang pigtotolod an ideya na an Aleman o Aryan iyo an pinakasuperior na rasa na dapat iyo an magdominar sa kinaban. An gabos na rasa, orog na an mga Hudyo asin mga Eslabos (Tseko, Polako asin Ruso) mga inferior na lahi. Dapat daa an mga Aleman bako lang "magsibot sa pag'ataman nin mga purong kasta kan ayam, kabayo o ikos, kundi sigurohon na an dugong Aryan magin puro asin liso". Sinasabi niya man na an mga Hudyo iyo an nagraratak sa ekonomiya kan Alemanya asin dapat puhoon ngane makaolagwad sa pag'asenso an nasyon niya..^[2]

An pagtubod niya mayo nin pagkapantay an mga lahi asin ta an lahing superior iyo an dapat mangimbabaw susog sa eternal na pagboboot kan natural na pagkarinsay kan uniberso. Sinasabi niya pa na an kultura kan Aryan iyo an kapu'ngolan kan gabos na kadunongan asin gabos na lahi dapat maduko asin mapadaog sa superioridad kan kulturang Aryan alagad nanginginabang an mga rasang inferior basta an mga ini nasasakop kan mga dominanteng Aryan.^[3]

Saiyang idinodoon na gayo na an mga Hudyo iyo an mga kontrabida sa kinaban: sinda an nagmamanipular asin nagkokontrol kan pinansya kan kinaban, nagkakapot kan prensa, nag'imbento kan demokrasya liberal, asin kagtogdas kan Marksismo, kagwarak kan prostitusyon, mga bisyo asin ginagamit an kultura sa pagpalakop kan diringkilan sa kinaban.^[4]

Ginatongan nanggad ni Hitler an orgulyo kan rasang Aleman asin ipinahiling niya na an kasusupgan resulta kan pagkadaog kan Alemanya sa Enot na Gerang Pankinaban dapat mapara asin pigparasabi niya an areglo sa gerang idto sarong dakulaon na inhustisya sa saindang nasyon. Dai nagreparo an kinaban na an mga kaisipan ni Hitler mayong ibang ibubunga kundi magtao nin rason kun ano ta dapat manakop an Alemanya sa pagbawi kan superior na kamugtakan kan saiyang lahing Aryan. Mayong duda an saiyang mga ideya sa Mein Kampf iyo an nagin panggatong ngane magsabrit an makangirhat na Ikaduwang Gerang Pankinaban.

Napapalaman^[5]

An pagkasurunod kan mga kapitolo iyo an siring:

• Enot na tomo: An Pagbalos
  • Kabtang 1: Sa Harong kan sakuyang mga Magurang
  • Kabtang 2: Mga taon nin Pag'adal asin mpagtios sa Vienna
  • Kabtang 3: Mga Konsiderasyon Pulitika Batay sa Panahon Yaon Ako Vienna
  • Kabtang 4: Munich
  • Kabtang 5: An Gera Mundial
  • Kabtang 6: Propaganda sa Gera
  • Kabtang 7: An Rebolusyon
  • Kabtang 8: An Kapino'na kan Sakong Aktibidad sa Pulitika
  • Kabtang 9: An Partido Trabahador kan Alemanya
  • Kabtang 10: An Mga Dahelan kan Pagrampaog
  • Kabtang 11: Nasyon asin Lahi
  • Kabtang 12: An Enot na Periodo kan Pagtalubo kan Sosyalista Nasyonal Partido Trabahador kan Alemanya
• Ikaduwang Tomo: An Hiron kan Sosyalista Nasyonal
  • Kabtang 1: Pilosopiya asin Partido
  • Kabtang 2: An Estado
  • Kabtang 3: Mga Sakop asin Namamanwaan
  • Kabtang 4: Personalidad asin Pagmukna kan Estadong Völkisch
  • Kabtang 5: Pilosopiya asin Organisasyon
  • Kabtang 6: An Pakikipagtusay kan mga Enot na Periodo – An Kahalagahan kan Itinataram
  • Kabtang 7: An Pakikipagtusay laban sa Pulang Prentera
  • Kabtang 8: An Makusog mas Mapangyare kun Solo
  • Kabtang 9: Mga Ideyang Pundamental Manongod sa Kahulogan asin Organisasyon kan Sturmabteilung
  • Kabtang 10: Pederalismo sarong Maskara
  • Kabtang 11: Propaganda asin Organisasyon
  • Kabtang 12: An Problema sa Unyon Obrero
  • Kabtang 13: An Polisya kan Alyansa Aleman Pakagera
  • Kabtang 14: Polisya Pansubsangan
  • Kabtang 15: An katanosan kan PagDepensa sa Remalaso
• Paghinapos
• Indeks

Toltolan

1. [1]www. britannica.com. Ki nua 08-06-17
2. [2]www. britannica.com. Ki nua 08-06-17
3. [3]www. britannica.com. Ki nua 08-06-17
4. [4]historyplace.com. Kinua 08-06-17
5. [5] Archived 2019-01-05 at the Wayback Machine.www.hitler.org.Kinua 08-06-17