Namundag asin nag'adal sa Edinburgh, si Stevenson nagsasapo nin helang sa bronkiyal (parteng halanohan) sa haros lawig kan saiyang buhay, alagad labolabo an saiyang pagsurat asin pagbyahe kun saen-saen apesar kan saiyang kamatean. Kan siya hubin pa, siya nakikiramas sa sirkulo nin mga parasurat sa London, na hustong gayo an suporta saiya na Andrew Lang, Edmund Gosse,[1]Leslie Stephen asin W. E. Henley, an huri na iyo an posible nagtao saiya nin modelo para sa Long John Silver sa Treasure Island. Kan 1890, siya nag'estar sa Samoa kun saen, naalarma kan paglaog kan malaen na impluwensya dara kan mga Europeo asin Amerikano sa isla Pasipikong ini, siya nagpoon nang magsurat dapit sa kakanosan nin realidad asin nag'untok pagsurat nin mga adbentura asin romansang piksyon. Siya nagadan huli sa stroke sa saiyang residensya sa isla Samoa kan 1894 sa edad na 44.[2]
Sarong celebrity kan siya buhay pa, an reputasyon ni Stevenson nababa nataas alagad sa presente an saiyang mga trabaho inuumaw man. Kan 2018 siya pigta'wan ranggo sa likod sana ni Charles Dickens, komo an saiyang mga sinurat iyo an nag'ika-26 na napalis sa bilog na kinaban.[3]
The Hair Trunk or The Ideal Commonwealth (1877) – dai natapos, dai napublikar.[4] Sarong anotadong edisyon sa orihinal na manuskrito, pinaksarhay asin pigintrodyusir ni Roger G. Swearingen, napublikar sa titulong The Hair Trunk or The Ideal Commonwealth: An Extravaganza kan Agosto 2014.
Treasure Island (1883) – enot niyang mayor na eksito sa pagsurat, sarong istorya nin pagpirata, nakalubong na kayamanan, asin adbentura; ipinelikula nang gayo. Sarong surat kan 1881 ki W. E. Henley, siya nagsumitir nin titulo nang kaamay pa, "The Sea Cook, or Treasure Island: a Story for Boys".
Prince Otto (1885) – An ikatolong halawig na naratibo ni Stevenson, romansang aksyon na nabugtak sa sagin-sagin na estado Aleman na Grünewald.
Strange Case of Dr Jekyll and Mr Hyde (1886) –sarong nobelita dapit sa magkambal na personalidad; iginuhit nang husto sa mga drama, dula asin pelikula; dakulang impluwensya sa pagtalubo nin pakasabot kan isip subconscious paagi nin pagbulong kaini kan sarong maboot asin intelehenteng mediko na nagin psychopathic na mampak kan makainom nin sarong droga na tuyo kuta pagsuwayon an 'maray' asin 'maraot' sa personalidad nin tawo.
Kidnapped (1886) – sarong historikal na nobela nag'iistorya kan paghanap kan aking si David Balfour kan saiyang mana asin an saiyang pakikikampi ki Alan Breck Stewart sa mga intriga kan kariribokan na Jacobite sa Eskosya.