Salvator Mundi (Leonardo)
An Salvator Mundi sarong pintura ki Hesus Kristo komo siya Salvator Mundi (Paraligtas kan Kinaban) na tinatanya ginibo mga 1500 asin tinutubod kan mga nangengenot na mga iskolar na sarong obra ni Leonardo Da Vinci poon kan ini otro madukayan kan taon 2005. Totoo, ibang mga may adal dai oyon sa siring na pagtubod. Haloy nang nawara, kan ini nadukayan liwat, ini piglinig asin pigpaeksibit kan 2011. An pintura piglaladawan si Kristo sa gubing Renaissance, nagbabasbas kan saiyang nakataas na toong kamot na may naka-ikis na moro, manta an walang kamot salo an sarong kristal na bola. An pinturang ini napabakal pa sana sa sarong subasta kan 15 Nobyembre 2017 sa halagang $450.3 milyon, bagay na nagtaong bagong marka bilang iyo na an pinakamahal na pintura naibenta.[1][2]
An pintura nag'agi sa subastahan na Christire's kan Nweba York asin an kagrogaring na nagtangro ipabakal ini iyo an Rusong bilyonaryo na si Dmitry Rybolovlev, na nabakal man sa halagang $127.5 million sa sarong pribadong bentahan kan 2013. [3]
Nagsasabing ki Leonardo
[baguhon | baguhon an source]Saro sa nangengenot na eksperto sa mga obra Leonardo, si Martin Kemp na nagtabang sa pag'ogid kan obra, nagtataram na tolostolos inabotan siyang kaba kan mahiling niya an pintura asin dai siyang duda an pintura tunay na obra ni Leonardo.[4]
Alagad, si Jacques Franck, sarong historyador sa arte asin saro man na espesyalista sa Leonardo, na pirang beses nang pinagmaanan an nasabing pintura, nagsabi na "An obrang ini bakong ki Leonardo. Magayon na trabaho sa studio asin pwede gayod masabing may dikit na istilong Leonardo." An saro pa, si Dr. Cqarmen Bambach, espesyalista sa Arte Renaissance Italyano sa Metropolitan Museum of Art, pigkwestyon an pagsarabi kan iba na lubos ki Leonardo an siring na pintura ta sabi niya "garo an pam-ibabaw na agi kan pinta gibo ni Boltraffio alagad may pahid brutsa si Leonardo mismo sa ibang kabtang, siring kan toong kamot ni Kristo, ibang parte kan takyag, an walang kamot asin an bolang kristal na kapot." Saro pang art historian si Profesor Charles Hope nagtaram na siya "dai tubod na tunay na Leonardo an pintura asin kun itaed sa mga awtentikong mga Leonardo dai ngani magluwas na marayrahay sa hitsura. Kalokohan na paghunaon ini obra Leonardong tunay. Mayo sa toltol na pag'iisip na masabi ini tunay."[5][6]
Mga panluwas na takod
[baguhon | baguhon an source]- Leonardo’s Salvator Mundi makes auction history, Christies.com
- Original press release from Robert Simon Archived 2012-04-25 at the Wayback Machine.
- Platonic receptacles, Leonardo and the Salvator Mundi, mga detalyeng ikonograpiko asin piggikanan kan pintura (Sinaray sa original)
Galería
[baguhon | baguhon an source]-
Kamugtakan bago piglinig asin hinirahay kan National Gallery. -
Bersyon kan escuela de Leonardo, antigong pagsasadiri ni marqués de Ganay. -
Bersyon pa kan escuela de Leonardo, yaon ngonyan sa Museo de Bellas artes de Nancy. -
Bersyon ni Marco d'Oggiono, ca. 1494.
