Stefano Gobbi

Si Padre Stefano Gobbi (22 Marso 1930 – 29 Hunyo 2011) sarong Italyanong padi na Katoliko Romano. Siya namundag sa Probinsya nin Como, Italya asin siya naordenan padi kan 1964. Nakua niya an doktorado sa Teologia Sagrada sa Pontifical University sa Roma. Siya an nagmukna kan hiron nin mga Katoliko na lakop sa kinaban na, an inapod na Marian Movement of Priests (MMP) na saiyang minukna kan may naresibi siya nin mga "pasabong" sa pagtubod niya naghahale ki Santa Maria. Nangyari ini kan siya nagsungko' kan 1972 sa Santuario sa Satuyang Ina nin Fatima. An Simbahan Katoliko Romano opisyalmente dai binibisto an mga soboot mga pasabong ki Padre Stefano Gobbi komo mga langitnon na pagsonson.^[1] Ano pa, may mga padi asin mga madre na nagdeklara na dakul sa mga tinataram ni Padre Gobbi sarungat sa doktrina asin mga katokdoan kan Simbahan Katoliko Romano asin pinapaglikay an mabasang Katoliko na dai basta maghuros sa padaling pagtubod.^[2]

Pangyayaring Pinagpo'nan

Kan 8 Mayo 1972 si Padre Gobbi yaon sa pilgrimahe sa Fátima, Portugal asin nagpapangadye sa santuario kan Satuyang Ina nin Fatima. Nag'osip siya na may naglaog sa saiyang payo mga pasabong (boses na internal) hale daa ki Sinanglitan Birhen Maria. Dai siya nagsabi na pinahilingan siya ni Santa Maria. An boses na ini pigsonsonan siya asin hinuhurot siya na magtipon nin mga iba pang kapadian na magugustong magkonsagrar sinda para ki Pusong Inmakulada ni Maria asin udok na makipagbunyog sa Santo Papa asin sa Simbahan Katoliko Romano.^[3].

Susog ki Padre Gobbi, ngapit siya nami'bi' ki Santa Mariang Sinanglitan sa paghanap katibayan kan mga nagsasabong sa interior kan boot niya. Ini daa saiyang naresibi kan Mayo 1972 manta siya nagpapangadye sa Church of the Annunciation kan Nazareth. Kan ika-13 nin Oktobre 1972, sa ika55ng anibersaryo kan Satuyang Ina nin Fatima, siya asin duwa pang padi pinagtogdas an Hiron para ki Maria nin mga Padi duman sa simbahan sa Gera Lario haraning Como, Italya. ^[4]

Pagtalubo kan hiron

An Hiron para ki Maria nin mga Padi nagdakula asin ta kan Septyembre 1973 kabali na an 80 kapadian kan ini pinakaenot nagtipon sa San Vittorino, harani sa Roma. Kan 1974, si Padre Gobbi nagpoon na kan senakulo (pagpangadye) sa Italya para sa mga padi asin laika asin dangan sa bilog nang kinaban.^[3] Durante sa mga senakulo, hinuhurot an mga Katoliko na magpangadye ki Hesus paagi ki Santa Maria, ta saiya man nag'agi an pagkamundag kan Simbahan, an Hawak ni Kristo. An HMP ngonyan nakabase sa Milan, Italya asin ta may mga sanga sa bilog na kinaban. An Hiron para ki Maria nin mga Padi sa Estados Unidos natogdas kan 1975, sa St. Francis, Maine asin nawarasan nin opisyal na basbas papal hale ki Papa Juan Pablo II kan Nobyembre 1993.

Mga mensahe

Kan July 1973, si Padre Gobbi nagpoon nang isurat an mga pig'uusip niyang mga pasabong bilang tunay na mensaheng gikan daa ki Santa Mariang Sinanglitan. An mga mensahe poon Hulyo 1973 sundo Desyembre 1997 napublikar sa librong, "To the Priests, Our Lady's Beloved Sons".^[3] Kardinal Bernardino Echeverría Ruiz, OFM, Kardinal Ignatius Moussa Daoud asin Kardinal John Baptist Wu idinukot an saindang imprimatur sa libro ni Padre Gobbi. An mga mensahe sa libro igwang makusog na tonong apokaliptiko.^[5]

Mga libro

• To the Priests Our Lady's Beloved Sons
• The Triumph, The Second Coming and the Eucharistic Reign
• Cenacles of the Marian Movement of Priests - Purpose/Guide

Toltolan

1. Review of "The Interior Locutions of Father Stefano Gobbi", Catholic Doors
2. [1]web.archive.org. Kinua 2019-03-09
3. "Marian Movement of Priests". www.ewtn.com. Retrieved 16 October 2017. 
4. "MMP". Archived from the original on 11 May 2008. Retrieved 16 October 2017. 
5. "Marian Movement of Priests", International Marian research Institute, University of Dayton