Барысаў-Арэна
| Барысаў-Арэна | |
 | |
| Краіна | Беларусь |
|---|---|
| Горад | Барысаў |
| Адрас | вул. Гагарына, 119 |
| Дата адкрыцьця | 3 траўня 2014 |
| Зьмяшчальнасьць | 13 400 |
| Хатняя каманда | БАТЭ |
| Памеры поля | 105 х 68 м |
| Каардынаты | 54°11′35″ пн. ш. 28°28′31″ у. д. / 54.19306° пн. ш. 28.47528° у. д.Каардынаты: 54°11′35″ пн. ш. 28°28′31″ у. д. / 54.19306° пн. ш. 28.47528° у. д. |
| Барысаў-Арэна на мапе Беларусі   Барысаў-Арэна | |
| Афіцыйны сайт | |
Барысаў-Арэна — футбольны стадыён у Барысаве, які зьяўляецца хатнім стадыёнам для футбольнага клюбу БАТЭ. Разьліковая ёмістасьць стадыёна — 13 400 гледачоў[1]. Стадыён быў уведзены ў эксплюатацыю ўвесну 2014 году. Афіцыйнае адкрыцьцё прайшло 3 траўня 2014 году фінальным матчам розыгрышу Кубка Беларусі паміж клюбамі «Шахцёр» і «Нёман»[2], перамогу ў якім атрымалі футбалісты з Салігорску з рахункам 0:1, адзіны мяч у гульні забіў украінскі паўабаронца Арцём Старгародзкі[3][4].
Будаўніцтва
[рэдагаваць | рэдагаваць крыніцу]Афіцыйна будаўніцтва новага барысаўскага стадыёна пачалося 12 лістапада 2010 году. Вучастак пад будаўніцтва быў абраны ў лясным масіве побач з трасай на Менск і на адлегласьці ў 60 кілямэтраў ад менскага аэрапорту.
Паводле стану на 3 кастрычніка 2012 году да стадыёна ўжо былі падведзены інжынэрныя камунікацыі — электразабесьпячэньне, водаправод, каналізацыя, пабудаваны будынак разьмеркавальнага пункта, у якім вёўся мантаж і наладка неабходнага абсталяваньня. Было ўсталявана 90 адсоткаў калёнаў і з дапамогай двух вежавых кранаў змантыравана каля 40 адсоткаў жалезабэтонных канструкцыяў. Усяго ж было сабрана мэталаканструкцыяў агульнай вагой каля 450 тонаў. Узьведзена амаль 45 адсоткаў трыбунаў, абсталявана 7 аўтастаянак, практычна цалкам уладкаваныя пад’язныя шляхі, на якіх засталося абкласьці толькі верхні пляст асфальтавага пакрыцьця. У першай дэкадзе кастрычніка плянавалася ўсталяваць першую фэрму даху і пачаць закладку сьценавых перагародак. На гэты час адкрыцьцё было заплянавана на сярэдзіну 2013 году.
У сярэдзіне сакавіка 2013 году для стадыёну гомельскае прадпрыемства «Сьвятлатэхніка» вырабіла больш за 12 тысячаў антывандальных сядзеньняў, якія немагчыма падпаліць і выламаць. У пачатку красавіку 2013 году было завершана ўсталяваньне фэрмаў, і іхная абвязка па крузе. Пасьля гэтага будаўнікі пачалі накрываць дах над паўночнай трыбунай.