Ліцэнзія на адкрытую базу зьвестак

Ліцэнзія на адкрытую базу зьвестак (Open Database License, ODbL) — гэта публічная ліцэнзія, прызначаная для выкарыстаньня ў адкрытых базах зьвестак. Гэтая ліцэнзія дазваляе карыстальнікам свабодна дзяліцца зь іншымі, зьмяняць, выкарыстоўваць базу зьвестак пры захаваньні гэткіх жа свабод для іншых («распаўсюд на тых жа ўмовах» — Share Alike). Ліцэнзія ахоўвае існуючыя аўтарскія правы, а таксама правы на базу зьвестак. Цяперашняя вэрсія ліцэнзіі 1.0^[1].

Гісторыя і распаўсюд

Тэкст ліцэнзіі быў распрацаваны ў 2007 годзе юрыстамі Jordan Hatcher і Dr. Charlotte Waelde з Open Data Commons, якая зьяўляецца часткай Фундацыі адкрытых ведаў (Open Knowledge Foundation).^[2] Найбольш шырокі распаўсюд атрымала ў адкрытым геаінфармацыйным праекце openstreetmap.org, які з 2012 году выкарыстоўвае ODbL замест Creative Commons^[3]. На сёньня разьвіцьцё дадзенай ліцэнзіі падтрымліваецца рухам за адкрытыя базы зьвестак^[4].

Структура і характарыстыкі

Характарыстыка

Ліцэнзія ўлічвае так званыя правы на базу зьвестак sui generis, зацьверджаныя Дырэктывай Эўразьвязу 96/9/ЕС, таксама аўтарскія, сумежныя правы. Варта адзначыць, што ліцэнзія не пакрывае аўтарскія правы на сам кантэнт базы зьвестак.

Структура

Тэкст ліцэнзіі складаецца з 10 частак.

1. Вызначэньні і значныя словы
2. Што ахоплівае гэта Ліцэнзія
3. Прапаноўваемыя правы
4. Умовы выкарыстаньня
5. Асабістыя немаёмасныя правы
6. Чэсная дзелавая практыка, выключэньні Базы зьвестак і іншыя неахопліваемыя правы
7. Гарантыі і адмовы ад адказнасьці
8. Абмежаваньні адказнасьці
9. Спыненьне вашых правоў у гэтай ліцэнзіі
10. Агульнае ^[1]

Дадатковыя зьвесткі

• Фонд свабоднага праграмнага забесьпячэньня лічыць гэту ліцэнзію несумяшчальнай з GNU GPL, але ня супраць выкарыстаньня зьвестак, атрыманых ад ліцэнзаваных ODbL ліцэнзіяй баз зьвестак^[5].
• Партал адкрытых зьвестак Нэпалу актыўна выкарыстоўвае гэтую ліцэнзію^[6]

Крыніцы

1. ^ Юрыдычны тэкст ліцэнзіі на адкрытыя базы зьвестак
2. Чарнавік Open Database License
3. Працэдура імплемэнтацыі ліцэнзіі ODbL у праекце Openstreetmap
4. Альянс адкрытых баз зьвестак
5. Пазыцыя Фонда свабоднага праграмнага забесьпячэньня датычна ODbL
6. Партал адкрытых зьвестак Нэпалу

Вонкавыя спасылкі

• Сайт Open Data Commons — стваральнікаў ODbL
• тэкст Open Database License
• Беларускі пераклад ліцэнзіі.
• Чалавекачытальны тэкст ліцэнзіі ODbL.
• Перакладзеная вэрсія ліцэнзіі на беларускую мову.