Вектарная графіка

Вектарная графіка (таксама называецца геаметрычным мадэляваннем ці аб’ектава-арыентаванай графікай) — гэта від камп’ютарнай графікі, у якім выявы ўтвараюцца з геаметрычных прымітываў (пункты, лініі, крывыя і многавугольнікі), апісваных матэматычнымі раўнаннямі. Назва ўжываецца ў проціпастаўленні з растравай графікай, у якой выява ўтвараецца з набора піксэляў.

Агляд

Усе сучасныя дысплэі адлюстроўваюць вектарныя выявы ў растравым фармаце. Растравыя выявы, якія ўтрымліваюць значэнне для кожнага піксэля на экране, захоўваюцца ў памяці, і ўвесь экран абнаўляецца 30 і болей разоў за секунду. Цяпер тэрмін «вектарная графіка» выкарыстоўваецца пераважна ў кантэксце двухмернай камп’ютарнай графікі, якая з’яўляецца адным з спосабаў адлюстравання выявы на растравым дысплэі. Іншыя спосабы ўключаюць тэкст, мультымедыя і трохмернае адлюстраванне.

Асаблівасці

Прыклад, які паказвае розніцу паміж вектарнай і растравай графікай пры павелічэнні.
a: зыходны вектарны малюнак;
b: ілюстрацыя, павялічаная ў 8 раз як вектарны малюнак;
c: ілюстрацыя, павялічаная ў 8 раз як растравы малюнак.

Растравыя выявы дрэнна маштабуюцца, тады як вектарныя выявы могуць быць неабмежавана павялічаны без страты якасці (выявы былі сканвертаваны у JPEG для паказу на гэтай старонцы)

Разгледзім круг з радыусам r. Для яго адлюстравання праграме патрэбны наступныя звесткі:

1. наступная інфармацыя апісвае круг
2. радыус r і раўнанне круга
3. размяшчэнне цэнтра круга
4. колер і стыль контура (можа быць празрыстым)
5. колер і стыль запаўнення (можа быць празрыстым)

Перавагі такога спосаба рысавання над растравай графікай:

• Мінімальны аб’ём інфармацыі забяспечвае значна меншы памер файла ў параўнанні з вялікімі растравымі выявамі (памер адлюстравання не залежыць ад велічыні аб’екта).

• Адпаведна, можна бясконца павялічваць, прыкладам, дугу акружнасці, і яна застанецца гладкай. Насупраць, многавугольнікі, якія ўтвараюць крывую, пакажуць, што дуга насамрэч не зусім крывая.

• Пры павелічэнні лініі і крывыя могуць захоўваць сваю шырыню пастаяннай.

• Параметры аб’ектаў захоўваюцца і могуць быць змененыя ў любы момант. Гэта значыць, што перамяшчэнне, маштабаванне, кручэнне, наданне запаўнення і пад. не пагаршаюць якасці выявы. Больш за тое, вымярэнні ў вектарных аб’ектах звычайна запісваюцца ў апаратна-незалежных адзінках, што дазваляе выконваць найлепшае растарызаванне на растравых прыладах.

• У трохмернай графіцы нашмат больш рэалістычныя цені адлюстроўваюцца на вектарных аб’ектах, паколькі цені могуць разглядацца як прамяні святла, што іх утвараюць. Гэта дазваляе ствараць фотарэалістычныя выявы.

Тыповыя прымітыўныя аб’екты

• лініі і ламаныя лініі
• многавугольнікі
• кругі і эліпсы
• крывыя Бязье
• безігоны
• тэкст (у камп’ютарных шрыфтах, такіх як TrueType, дзе кожная літара ўтвараецца крывой Бязье)

Гэты спіс не поўны. Існуюць розныя тыпы крывых (сплайны катмул-ром, NURBS і г.д.), якія выкарыстоўваюцца ў пэўных прыкладаннях.

Растравую выяву таксама можна лічыць прымітыўным аб’ектам. Канцэптуальна яна з’яўляецца прамавугольнікам.

Друк

Вектарная графіка асабліва важная для друку. Паколькі выявы ўтвараюцца з матэматычных крывых, яны будуць выразна надрукаваныя нават пры змяненні памераў. Прыкладам, вектарны лагатып можна з аднолькава выдатнай якасцю надрукаваць і на візітоўцы, і на рэкламным шчыце. Растравая выява нізкага вырашэння была б неверагодна размытая пры павелічэнні ад памеру візітоўкі да памеру рэкламнага шчыта.