Джані Версачэ

Джані Версачэ
Gianni Versace
Фатаграфія
Дата нараджэння 2 снежня 1946(1946-12-02)[1][2][…]
Месца нараджэння
Дата смерці 15 ліпеня 1997(1997-07-15)[3][1][…] (50 гадоў)
Месца смерці
Месца пахавання
Грамадзянства
Род дзейнасці прадпрымальнік, дызайнер, дызайнер касцюмаў, мадэльер, мадэльер-дызайнер
Узнагароды
камандор ордэна «За заслугі перад Італьянскай Рэспублікай»
Сайт versace.com
Лагатып Вікісховішча Медыяфайлы на Вікісховішчы

Джані Версачэ (італ. Gianni Versace; 2 снежня 1946 — 15 ліпеня 1997) — італьянскі мадэльер, які заснаваў у 1978 годзе марку «Gianni Versace», пад якой на сённяшні дзень выпускаюцца элітнае адзенне, аксесуары, касметыка, парфумерыя, посуд, аўтамабілі, тэлефоны і мэбля. Пасля смерці дызайнера марка была пераназваная ў «Versace».

Біяграфія

[правіць | правіць зыходнік]

Пачаў кар’еру ў родным горадзе, у краме моднай вопраткі Francesca Versace Elle, якой валодала яго маці. Тут ён дапамагаў ёй падшываць вопратку, падбіраць аксесуары, а таксама пастаўляць тканіны з Мілана, Парыжа і Лондана. У 25 гадоў адпраўляецца ў Мілан, дзе пачынае працу ў якасці дызайнера ў некалькіх марак адначасова — Genny, Callaghan і Istante. 28 сакавіка 1978 года ў міланскім Палацца Перманентэ з грандыёзным поспехам прайшла прэзентацыя першай калекцыі жаночай вопраткі пад брэндам «Джані Версачэ». У 1980-я гады Джані актыўна распрацоўвае адзенне ад свайго імя, паралельна працуючы для іншых фірмаў. Галоўным адміністратарам яго моднага Дома стаў яго старэйшы брат Санта Версачэ, а за фотафесіі адказвала яго сястра Данатэла. У 1981 годзе выходзіць першая жаночая парфума «Gianni Versace», а ў 1986 — мужчынскі водар «L’Homme». У 1989 годзе Версачэ выходзіць у свет высокай моды — запускае ад-куцюрную лінію Atelier Versace, праводзячы паказы ў памяшканні басейна парыжскага гатэля «Рыц» (дзе калісьці праходзілі паказы Кока Шанэль). У пачатку 1990-х Джані Версачэ стаў ужо сусветна вядомым дызайнерам «адзення для эгацэнтрыстаў», яго любіць прэса і зоркі першай велічыні, ад Мадонны да прынцэсы Дыяны. У гэты ж час пачынаецца выпуск фарфоравага і шклянога посуду (сумесна з фірмай Rosenthal) і мэблі (Versace Home) ад Джані Версачэ.

Джані Версачэ быў вялікім прыхільнікам Антычнасці і імкнуўся сумяшчаць у сваіх калекцыях арыстакратызм і бунтарства (адна з яго кніг нездарма называлася «Rock and Royalty»). Кожная яго калекцыя кардынальна адрознівалася ад папярэдняй: у вопратцы былі матывы то панк-культуры, то стылю барока, то сада-мазахісцкіх нарадаў з секс-шопаў, то поп-арта і творчасці Эндзі Уорхала, то гей-клубаў. У яго была калекцыя, прысвечаная Жаклін Кенэдзі. У цэлым Версачэ ўвёў у моду наступнае: спалучэнне чорнай скуры і залатой фурнітуры, сумяшчэнне вячэрніх сукенак і ніжняй бялізны, яркія прынты на кашулях, скураныя штаны на мужчынах, высокія абцасы і многае іншае. Лічыцца, што ён упершыню вывеў на подыум мужчыну без гальштука і мужчыну ў джынсах.

Версачэ не хаваў сваёй гомасексуальнай арыентацыі, пражыўшы 11 гадоў сумесна са сваім спадарожнікам жыцця — стылістам Антоніа д’Аміка. У сваіх кватэрах (Мілан, Нью-Ёрк) і на сваіх вілах (возера Кома ў Італіі, дом у Маямі) ён любіў бавіць час у кампаніі сваіх сяброў — Элтана Джона, Мадонны, Джорджа Майкла.

Джані быў застрэлены 15 ліпеня 1997 у горадзе Маямі-Біч (прыгарадзе Маямі), на прыступках свайго асабняка, серыйным забойцам гомасексуальнай арыентацыі Эндру К’юнененам без якой-небудзь прычыны. У СМІ адразу з’явілася версія аб дачыненні да забойства італьянскай мафіі, а некаторыя газеты абвінавачвалі ў злачынстве сям’ю Версачэ. Праз некалькі дзён яго забойца, акружаны кольцам паліцыянтаў, скончыў сабой. Па некаторых сведчаннях, на забойцы была ніжняя бялізна ад фірмы Версачэ. Джані быў пахаваны ля возера Кома, у садзе вілы Фантанела, але пасля продажу апошняй рускаму алігарху — рэстаратару Аркадзю Новікаву прах куцюр’е быў перанесены ў Мілан.

Элтан Джон, над афармленнем дыска якога працаваў дызайнер у 1991—1994 гадах, прысвяціў яму свой альбом «The Big Picture» (1997).

Пасля смерці Версачэ на чале яго фірмы ўстала малодшая сястра, Данатэлі Версачэ.

Зноскі

  1. ↑ а б Gianni Versace // Brockhaus Enzyklopädie
  2. ↑ Grossman M. E. Gianni Versace // Versace, Gianni // Grove Art Online / J. Turner — [Oxford, England], Houndmills, Basingstoke, England, New York: OUP, 2017. — doi:10.1093/GAO/9781884446054.ARTICLE.T2079928
  3. ↑ Gianni Versace // RKDartists Праверана 9 кастрычніка 2017.
  4. ↑ LIBRIS — Каралеўская бібліятэка Швецыі, 2012. Праверана 24 жніўня 2018.

Літаратура

[правіць | правіць зыходнік]

Спасылкі

[правіць | правіць зыходнік]