Марыя Віктараўна Васілевіч

Марыя Віктараўна Васілевіч
Род дзейнасці удзельніца конкурсу прыгажосці, мадэль, блогер, палітык, вядучая
Дата нараджэння 9 красавіка 1997(1997-04-09) (27 гадоў)
Месца нараджэння
Грамадзянства
Альма-матар
Партыя
Узнагароды і прэміі
Сайт vasilevichmv.house.gov.by (руск.)
У Вікіпедыі ёсць артыкулы пра іншых людзей з прозвішчам Васілевіч.

Марыя Віктараўна Васілевіч (нар. 9 красавіка 1997, Мінск, Беларусь) — пераможца конкурсу «Міс Беларусь-2018», удзельніца конкурсу прыгажосці «Міс свету» (2018). Дэпутат Палаты прадстаўнікоў Нацыянальнага сходу Рэспублікі Беларусь (2019-2024).

Біяграфія

[правіць | правіць зыходнік]

Дзяцінства і адукацыя

[правіць | правіць зыходнік]

Марыя Васілевіч нарадзілася 9 красавіка 1997 года ў горадзе Мінску ў сям’і ваеннага і выхавальніцы дзіцячага саду. Cкончыла школу ў 2014 годзе.

У 2019 годзе скончыла Беларускі дзяржаўны эканамічны ўніверсітэт па спецыяльнасці «Дзяржаўнае кіраванне», затым магістратуру Беларускага дзяржаўнага эканамічнага ўніверсітэта па спецыяльнасці «Эканоміка».

Прафесійная дзейнасць

[правіць | правіць зыходнік]

Працавала спецыялістам па развіцці бізнесу ТАА «ТДИ Промоивент», рэдактарам аддзела рэдактараў галоўнай дырэкцыі падрыхтоўкі тэлепраграм генеральнага прадзюсарскага цэнтра Белтэлерадыёкампаніі[1]. Затым уладкавалася на працу вядучай на перадачы «Добрай раніцы!» на тэлеканале «Беларусь 1», аднак хутка зышла.

Мадэлінг

[правіць | правіць зыходнік]

Прыгажосць і гарманічныя параметры 90-60-90 адкрылі для Марыі Васілевіч шлях у мадэльны бізнес. Яна стала падпрацоўваць на здымках і паказах у 18 гадоў, але ў конкурсах прыгажосці спачатку ўдзельнічаць адмаўлялася. Аднак у 21 год змяніла меркаванне і прыйшла на нацыянальны конкурс, дзе нечакана для сябе ўзяла карону. Гэта падзея дала штуршок да вядомасці і прасоўванні па кар’ернай лесвіцы.

Стала пераможцай нацыянальнага конкурсу прыгажосці «Міс Беларусь-2018», фінал конкурсу адбыўся вечарам 4 мая 2018 года ў Мінску. Заахвочвальнымі прызамі для Міс сталі пазадарожнік Geely Atlas і 12 000 беларускіх рублёў[2][3].

У снежні 2018 года Марыя Васілевіч адправілася ў Кітай, дзе ў шэрагу 118 саперніц беларусцы ўдалося прабіцца ў пяцёрку найпрыгажэйшых жанчын планеты, яе прызналі найлепшай на еўрапейскім кантыненце. Прадстаўляла краіну на конкурсе «Міс Свету». Увайшла ў лік прызёраў конкурсу і заняла 3 месца сярод удзельніц, атрымаўшы званне «Міс Свету Еўропы»[4].

8 студзеня 2019 года стала лаўрэатам прэміі «За духоўнае адраджэнне» — «за значны ўклад у развіццё міжнароднага культурнага супрацоўніцтва і актыўную дабрачынную дзейнасць»

12 лютага 2019 года стала зорным паслом II Еўрапейскіх гульняў 2019 года.

Восенню 2019 года на парламенцкіх выбарах яе вылучылі кандыдатам ад 104-й Кальварыйскай выбарчай акругі горада Мінска. Кіраўнік Цэнтрвыбаркама скептычна ацаніла гэтую навіну, Лідзія Ярмошына падкрэсліла, што 22-гадовай дзяўчыне да народу ісці няма з чым[5]. «Варта было б спачатку стаць добрым прафесіяналам у сваёй справе, каб да тваёй думкі сталі прыслухоўвацца у Парламенце», — заявіла Лідзія Ярмошына. Пасля гэтага Аляксандр Лукашэнка папракнуў Ярмошыну, што маладым трэба дапамагаць, а не спыняць іх ініцыятыву[6].

Кар’ера дэпутаткі

[правіць | правіць зыходнік]

Марыя Васілевіч прайшла ў Палату прадстаўнікоў ад 104-й Кальварыйскай выбарчай акругі[7][8]. Аднак, сярод усіх 110 акруг яна набрала найменшую колькасць галасоў — 28,94 %. Марыя заявіла, што лічыць узрост сваёй перавагай, паколькі яна поўная рашучасці, адказнасці, крэатыўнасці і смеласці. Заяўляла, што плануе працаваць не пакладаючы рук і дамагацца, каб дзейнасць Парламента Беларусі станавілася ўсё больш адкрытай і публічнай, і гэта дапаможа дамагчыся эфектыўнага супрацоўніцтва народа і ўлады. Таксама Марыя Васілевіч выступае за ўдасканаленне сістэмы адукацыі, сістэматызацыю і актуалізацыю пад сучасныя рэаліі існуючых нарматыўна-прававых актаў. Для таго, каб законы былі зразумелыя кожнаму беларусу, бо яны «пішуцца для людзей». Яна настойвае на тым, што «неабходна адмовіцца ад абмеркавання гэтых праблем толькі ў высокіх кабінетах».

У першую чаргу Васілевіч плануе заняцца дапрацоўкай праекту закона «Аб абыходжанні з жывёламі». Марыя Васілевіч — самы малады дэпутат Палаты прадстаўнікоў[9]. Член Пастаяннай камісіі па правах чалавека, нацыянальных адносінах і сродках масавай інфармацыі, а таксама член пастаянна дзеючых рабочых груп Нацыянальнага сходу па супрацоўніцтве з парламентамі Бельгіі, Брунея, Індыі, Польшчы і Саудаўскай Аравіі.

Пасля абрання Марыі Васілевіч дэпутатам Палаты прадстаўнікоў некаторыя СМІ (у прыватнасці, брытанская The Times[10]) апублікавалі артыкулы, у якіх казалі аб рамантычнай сувязі Марыі Васілевіч з Прэзідэнтам Беларусі Аляксандрам Лукашэнкам, у кампаніі якога дзяўчына неаднаразова з’яўлялася на розных мерапрыемствах. У сваім пасце ў сацыяльнай сетцы Instagram Марыя Васілевіч выказалася за свабоду слова, але і пра тое, што неабходна несці адказнасць за сказанае. Асабліва, калі ты журналіст. Таксама Марыя паскардзілася на тое, што вядомае сусветнае выданне дазваляе сабе публікаваць ілжывыя факты[11][12].

У 2020 годзе Беларусь ахапілі пратэсты. 13 жніўня 2020 года Марыя Васілевіч звярнулася да падпісчыкаў у Інстаграме з заклікам спыніць гвалт на вуліцах беларускіх гарадоў падчас пратэстаў супраць дзеючай улады[13][14]. Наведала ў сталічнай бальніцы хуткай дапамогі людзей, якія пацярпелі падчас вулічных акцый пратэсту, і выбачылася, неўзабаве пасля гэтага яна трапіла ў няласку і фактычна знікла з публічнай палітыкі[15].

У лістападзе 2020 года выступіла з прапановай пазбаўляць грамадзянства Рэспублікі Беларусь за прычыненне шкоды дзяржаве[16].

На наступных парламенцкіх выбарах яе кандыдатура не вылучалася.

Зноскі

[правіць | правіць зыходнік]
  1. ↑ Кто такая Мария Василевич Мария Викторовна. Официальный сайт Палаты представителей Национального собрания Республики Беларусь. Праверана 20 студзеня 2020.
  2. ↑ Мария Василевич завоевала титул “Мисс Беларусь-2018” – фото, видео(недаступная спасылка) (8 мая 2018). Архівавана з першакрыніцы 29 студзеня 2020. Праверана 20 студзеня 2020.
  3. ↑ Мисс Беларусь 2018 — Модные ножки
  4. ↑ Татьяна Ларина. Мария Василевич вернулась в Беларусь с титулом «Мисс мира Европа». БелНовости (18 снежня 2018). Праверана 20 студзеня 2020.
  5. ↑ Дарья Ломоновская. Лидия Ермошина о выдвижении «Мисс Беларусь» в парламент: В депутаты должны идти люди зрелые. Комсомольская правда (2 кастрычніка 2019). Праверана 20 студзеня 2020.(недаступная спасылка)
  6. ↑ Максим Чёрный. Как из-за выдвижения Василевич Лукашенко поругался Ермошиной. Салідарнасць (23 кастрычніка 2019). Праверана 20 студзеня 2020.
  7. ↑ Список избранных депутатов Палаты представителей Национального собрания Республики Беларусь седьмого созыва Архівавана 29 студзеня 2020.
  8. ↑ Сведения о результатах голосования по г. Минску Архівавана 30 верасня 2020.
  9. ↑ Антон Игнатов. Депутат Мария Василевич рассказала, чем намерена заняться в первую очередь. БелНовости (6 снежня 2019). Праверана 20 студзеня 2020.
  10. ↑ Marc Bennetts. Belarus dictator’s beauty queen ‘wins’ seat in parliament (англ.). The Times (18 лістапада 2019). Праверана 20 студзеня 2020.
  11. ↑ Антон Игнатов. Мария Василевич ответила на обвинения западных СМИ. БелНовости (21 лістапада 2019). Праверана 20 студзеня 2020.
  12. ↑ Надежда Бутович. Новый депутат Мария Василевич о статьях о себе: «Известное издание позволяет себе публиковать лживые факты». Комсомольская правда (21 лістапада 2019). Праверана 20 студзеня 2020.(недаступная спасылка)
  13. ↑ Ночью в Минске неизвестные разбили автомобиль Марии Василевич Архівавана 28 лістапада 2020.
  14. ↑ В Instagram удалены страницы Марии Василевич и Александра Солодухи
  15. ↑ https://nashaniva.com/333701
  16. ↑ Комментарий: Белорусам угрожают лишением гражданства