Палпацін

Дарт Сідыус
Дзейнасць	Вярхоўны канцлер, потым Імператар
Родная планета	Набу
Раса	чалавек
Пол	мужчына
Рост	173 см
Валасы	сівыя
Вочы	жоўтыя
Зброя	чырвоны светлавы меч
Прыналежнасць	сітх
Акцёр	Іэн Мак-Даярмід і Клайв Рывел

Імператар Палпацін (у мінулым вярхоўны канцлер Галактычнай рэспублікі; англ.: Palpatine), ён жа Дарт Сідыус (англ.: Darth Sidious) — выдуманы персанаж сусвету «Зорных Войнаў». Палпацін упершыню з’яўляецца ў новай трылогіі ў першым эпізодзе. У класічнай трылогіі прысутнічае толькі цёмны ўладар Дарт Сідыус, альбо Імператар.

Біяграфія

Палпацін — гэта, пэўна, адна з самых загадкавых асоб у гісторыі Зорных войнаў. Пра яго мінулае амаль нічога невядома. Ён нарадзіўся ў горадзе Тыід на планеце Набу на адзінаццаты дзень восьмага месяца восемдзесят другога года да бітвы на Явіне. Пазней ён некалькі разоў балатаваўся на дзяржаўныя пасады, але безвынікова. І толькі ў 52 годзе да біва на Явіне яго абралі на пасаду прадстаўніка сектара Чамол у Галактычным сенаце. Адбылося гэта адразу пасля загадкавага забойства Відара Кіма (невядома, ці мае Палпацін да гэтага дачыненне).

Жыццё Палпаціна вельмі таямнічае. У яго атрымліваецца захоўваць таямніцу сваёй сапраўднай існасці, нават побач з джэдаямі. Глядач толькі ў трэцім эпізодзе даведваецца пра тое, што Дарт Сідыус і канцлер — адна і тая ж асоба.

Палпацін быў вучнем у старога і вельмі мудрага сітха Дарта Плэгіуса Мудрага. Вучань Дарта Плэгіуса забівае свайго настаўніка, калі той спіць, і сам становіцца адзіным уладаром на цёмным баку Сілы. Пасля знішчэння свайго настаўніка Сідыус бярэ сабе ў вучні забрака і дае яму імя Дарт Мол. Палпацін сам выхоўвае яго сітхам і робіць з яго моцнага і ліхога ваяра-сітха.

На палітычнай арэне Палпацін вядомы як сенатар сярэдняй рукі, але з цягам часу ён рухаецца наперад і пераўтвараецца ў ініцыятыўнага палітыка. Адбываецца гэта таму, што ў яго маюцца добрыя стасункі з некаторымі ўплывовымі людзьмі рэспублікі, такімі як магістр джэдаяў Ёрус К’бат. У той жа час Палпацін знаёміцца з намеснікам губернатара захалуснага сектара Карусанта Уілгафам Таркінам. Гэта забяспечвае яму ўпэўнены рух па палітычнай лесвіцы. Палпацін зарабіў добрую рэпутацыю на барацьбе з карупцыяй.

Яшчэ ў першым эпізодзе пад выглядам Дарта Сідыуса ён звязваецца з віцэ-каралём Гандлёвай федэрацыі Нутам Ганрэем і дамаўляецца з ім аб блакадзе і нападзе на Набу. Верагодна, што Палпацін мае дачыненне да забойства Вяруны — караля Набу. Робіцца гэта ўсё таямніча, і таму сенат нічога не ведае і не рэагуе. Каралева Падмэ Амідала ў выніку атакі федэрацыі вымушана ўцякаць з Набу. Патрапіўшы на Карусант, яна абураецца бяздзеяннем сентараў і выносіць вотум недаверу Велоруму, і пасля патрабуе выбараў новага вярхоўнага канцлера замест існуючага. Але робіць каралева гэта пад уплывам Палпаціна. Складаныя палітычныя інтрыгі Палпаціна і яго прыхільнікаў уводзяць рэпутацыю існуючага канцлера ў глыбокі крызіс. Напад, які быў ініцыяваны Дарт Сідыусам на Набу, становіцца апошняй кропляй для Велорума. У выніку яго скідаюць з пасады вярхоўнага канцлера ўсеагульным галасаваннем у сенаце, а замест яго на пасаду вярхоўнага канцлера прыходзіць Палпацін. І гэта становіцца пачаткам утварэння Імперыі зла. Так вярхоўны канцлер Палпацін пачынае гуляць у сваю двайную гульню. І ніводная істота ў галактыцы, акрамя яго вучня, не ведала пра тое, што кіраўнік Рэспублікі і кіраўнік Гандлёвай федэрацыі — гэта адзін і той жа чалавек. Праз некалькі дзён адбываецца бітва на Набу, і родная планета Палпаціна атрымлівае незалежнасць. У выніку бітвы гіне першы вучань Сідыуса Дарт Мол, і Палпацін пачынае прыглядацца да Энакіна Скайуокера. Ён пачынае назіраць за Скайуокерам і з цягам часу становіцца для Энакіна лепшым сябрам і нават настаўнікам у палітычных пытаннях і не толькі. Па маленькіх кроках канцлер схіляе маладога джэдая на цёмны бок Сілы, пераконваючы яго ў тым, што той з’яўляецца найвыбітнейшым сярод джэдаяў, а Ордэн наўмысна не хоча заўважаць гэта. Палпацін, так бы мовіць, прымушае Энакіна пакрыўдзіцца на джэдаяў.

Урэшце Энакін становіцца новым вучнем Дарта Сідыуса — Дартам Вейдэрам.

У другім і трэцім эпізодах канцлер пры падтрымцы арміі клонаў распачынае кланічную вайну з Гандлёвай федэрацыяй, гэта дае яму магчымасць дыктаваць сваю волю сенату пад выглядам абаронца дэмакратыі. І ў рэшце рэшт сенат надае яму спецыяльныя паўнамоцтвы, пасля чаго вярхоўны канцлер Палпацін пачынае дзейнічаць агрэсіўна: аддае кланічным войскам Загад 66, знішчае Ордэн джэдаяў а таксама з мэтай нібы хутчэйшай перамогі ў вайне рэарганізуе Галактычную рэспубліку ў першую Галактычную імперыю. Незадоўга да гэтага Палпацін схіляе на свой бок маладога джэдая Энакіна Скайуокера, абяццаючы яму ўратаваць Падмэ ад смерці. Энакін прысягае Палпаціну і атрымлівае ад яго імя Дарт Вейдэр. Энакін, альбо Дарт Вейдэр, выконвае любыя яго загады па знішчэнні джэдаяў. Так Імператар Дарт Сідыус цалкам знішчае свабоду і дэмакратыю. Ён пачынае будаўніцтва новай зброі імперыі — Зоркі смерці. Імператар ставіць сваёй мэтай канчатковае знішчэнне ўсіх джэдаяў і сенатараў. Ягонай мэтай ёсць абсалютная ўлада ва ўсёй галактыцы, і дзеля гэтай мэты ён не шкадуе нікога на сваім шляху. У якасці «машыны» для забойства ён выкарыстоўвае свайго вучня Вейдэра, які аддана служыць яму. Разам з Дартам Вейдэрам Палпацін падпарадкоўвае сабе амаль усю галактыку і ўсталёўвае паўсюль таталітарны рэжым, імперскую дыктатуру.

У Эпізод V Імператар Палпацін, разумеючы пагрозу, якая сыходзіць ад дзяцей Энакіна, ставіць галоўнай мэтай знайсці іх і знішчыць. Але ж Палпацін не разлічвае на тое, што Вейдэр насамрэч не згодны выконваць любы яго загад, ён упэнены ў тым, што Дарт Вейдэр цалкам падпарадкоўваецца яму. Але яго самаўпэўненасць у сваёй уладзе над усім урэшце рэшт і забіла яго: ў канцы шостага эпізоду, калі Дарт Вейдэр не здолеў перамагчы і забіць Люка, Імператар сам вырашае забіць яго, але яму ў гэты момант перашкаджае здзейсніць гэта Дарт Вейдэр. Імператар Палпацін гіне ад рук свайго ж вучня, як і Дарт Плэгіус. Так разам з ім гіне і яго Імперыя зла.

Сіла

Дарт Сідыус належыць да цёмнага бока Сілы. Палпацін з’яўляецца цёмным уладаром сітхаў. Ён дасканала пазнаў цёмны бок Сілы і ўсе яе тонкасці. У класічнай трылогіі Імператар выглядае старым і нямоглым, але ж гэта толькі знешне. Ён дэманструе сваю бязмежную моц у шостым эпізодзе, калі атакуе Люка маланкамі. Дарэчы, маланкі — гэта аблюбаваны метад забойства ў Палпаціна. Разам з тым Імператар здольны падманваць розум, бачыць будучыню і нават ратаваць блізкіх сабе людзей ад смерці.

Зброя

Чырвоны светлавы меч, а таксама ўвесь імперскі баявы касмічны флот і новая Зорка смерці.

Спасылкі

• Palpatine на Вукіпедыі: Вікі пра Зорныя Войны