Bamban

Rapun Bamban

Tanaman Bamban atawa nang bangaran ilmiah Donax canniformis tamasuk tanaman nang banyak ditamuakan di Kalimantan, tanaman ini dianggap kurang bamanpaat, padahal sabujurnya kawa dimanpaatakan seratnya lawan bahasiat gasan kasihatan.[1]

Garambas

[babak | babak asal-mulanya]

Bamban tamasuk tanaman nang barumpun, tumbuhnya babantuk sabat nang tingginya kikira 1,5-5 m, batangnya bulat babalang hijau tuha, babuku nang saban bukunya baisan panjang kikira 1-2,5 m, daunnya tunggal batangking 8-20 cm, lambar daunnya babantuk bulat hintalu ada jua nang bantuknya lunjung, ukurannya kikira 10-25 × 1045 cm.[2]

Bamban baisian tangkai nang panjangnya 1,5-4 cm, diatasnya ada kambang babalang putih, bapasangan, daun kalupaknya babantuk sagitiga kipit nang panjangnya 2-5 mm, kambangnya kada lakas gugur, mahkuta kambangnya baukuran kikira 1,5-2 cm, banang sarinya kada sampuraka babantuk bulat hintalu tabalik. Buah Bamban baukuran libar 1,5-2 cm, panjangnya 1,8-2,5 cm, babantuk bulat, baisian 3 ruang gasan biginya tumbuh. Buah Bamban babalang hijau wayah balum masak, tagal baubah jadi putih amun sudah masak, tiksturnya lamah babantuk bulat, biginya babalang habuk. Bamban baakar sarabut nang babalang habuk tarang.[3]

Habitat

[babak | babak asal-mulanya]

Bamban katuju hidup di tanah nang basah, banyak dinaungi rapun nang ganal. lawan pH tanah nang masam.[1]Bamban dikatahui manyabar di Asia Tenggara nang kaya Malaysia, Thailand, Kamboja, Vietnam, Indonesia, Filipina, batarus ka arah utara sampai Taiwan, lawan ka arah barat sampai India.[2]

Sabuting panalitian mamadahakan bahwa Bamban tahan hidup di darah nang tanahnya babatasan lawan tanah nang rusak marga tarcamar logam berat atawa dairah bakas tambang.[4]

Manpaat

[babak | babak asal-mulanya]

Bamban di Kalimantan Selatan kawa dimanpaatakan gasan bahan baulah anyaman, bagian nang dimanpaatakan yaitu kulipak batangnya. Cara maulah anyaman matan kulit Bamban dimulai lawan prusis pamiritan atawa mamisahakan kulipak Bamban lawan daging rapun Bamban atawa sel gabus, imbah dipirit kulit Bamban dikaringakan, hanyar kawa dianyam. Sipat kulipak batang Bamban licin lawan karas amun dijapai, ini maulah Bamban ngalih diulah manjadi karajinan anyaman dibanding lawan serat lain nang kaya Purun. akar Bamban kawa jua dijadiakan gasan bahan tatamba panyakit kamih manis.[5]

Urang di Kalimantan Selatan mamakai daun Bamban anum nang pucuknya magun bagulung gasan maubati iritasi mata ringan, caranya banyu matan pucuk Bamban dititikakan ka mata nang sakit.[2] Banyu nang baasal matan batang Bamban ulih masyarakat Dayak Bakumpai kawa diparcaya bahasiat gasan maampihakan panas awak, bibir malatup, lawan batukan. Caranya batang Bamban dipatah, imbah itu banyunya dihantai dalam butul gasan dinginum. Banyu nang ada di rapun Bamban ini kawa jua gasan maubati panyakit bisul, caranya imbah batang Bamban dipatah, caran nang titkan langsung dikasaiakan ka kulit nang babisul.[3]

Sabaratan bagian rapun Bamban mangandung bamacam-macam sanyawa metabolit sekunder nang kaya fenolik, tanin, fitosterol, terpenoid, steroid, alkaloid, glikosida, saponin lawan flavonoid. Sanyawa flavonoid bapungsi gasan antoksidan nang kawa mahambat radikal bibas.[2]

Masyarakat di Magelang Jawa Tengah kawa mamanpaatakan daging batang Bamban atawa sel gabus gasan diulah bubur pulp atawa bahan baulah kartas.[6]

Jujuhutan

[babak | babak asal-mulanya]
  1. ^ a b Setyawati, Aprilia; Krisdianto, Krisdianto; Nisa, Chatimatun (2022-04-01). "PERTUMBUHAN BAMBAN (Donax canniformis) DI JEJANGKIT MUARA, KABUPATEN BARITO KUALA, PROVINSI KALIMANTAN SELATAN". BIOSCIENTIAE. 19 (1). doi:10.20527/b.v19i1.5102. ISSN 2808-1838. 
  2. ^ a b c d Ihsan, Hamlan Hamlan (2017-10-01). "Skrining Fitokimia dan Aktivitas Antibakteri dari Daun Bamban (Donax canniformis) untuk Formulasi Obat dari Bahan Alam (Phytochemical Screening and Antibacterial Activity of Donax canniformis for The Formulation Medicine from Natural Ingredients)". Jurnal Riset Industri Hasil Hutan. 9 (1): 29–40. doi:10.24111/jrihh.v9i1.3004. ISSN 2503-0779. 
  3. ^ a b Afifah, Khoirus Esti; Mahrudin, Mahrudin; Irianti, Riya (2022-11-19). "Kajian Etnobotani Donax canniformis K. Schum. (Bamban) Di Suku Dayak Bakumpai Desa Bantuil Kabupaten Barito Kuala Berbentuk Buku Ilmiah Populer". JUPEIS : Jurnal Pendidikan dan Ilmu Sosial (dalam bahasa Inggris). 1 (4): 81–90. doi:10.55784/jupeis.Vol1.Iss4.330. ISSN 2809-7998. 
  4. ^ Kissinger, Kissinger; Pitri, Rina Muhayah Noor (2018-04-28). "KETAHANAN HIDUP BEBERAPA JENIS TUMBUHAN DI KAWASAN VOID BEKAS TAMBANG BATUBARA". EnviroScienteae. 14 (1): 38. doi:10.20527/es.v14i1.4893. ISSN 2302-3708. 
  5. ^ Harsono, Dwi (2014-12-31). "SIFAT FISIS DAN MEKANIS ANYAMAN BAMBAN (Donax canniformis) DENGAN BAHAN STABILISATOR PEG 1000 DAN TANIN KULIT AKASIA". Jurnal Riset Industri Hasil Hutan. 7 (2): 23. doi:10.24111/jrihh.v7i2.1228. ISSN 2503-0779. 
  6. ^ Prakosa, Galit Gatut (2012). "PENGARUH KONSENTRASI LARUTAN PEMASAK DAN LAMA PEMASAKAN PADA PROSES SODA TERHADAP RENDEMEN DAN SIFAT FISIK PULP BATANG TANAMAN BAMBAN (Donax canniformis (G. Forst.) K. Schum)".