Bayam

Tanaman Bayam

Bayam adalah tumbuhan nang rajin ditanam gasan dimakan daunnya sawagai sayuran hijau. Tumbuhan ngini datang tumatan Amerika trupik tagal wayahini manjalar ka samunyaan dunia. Tumbuhan ngini dipinandui sawagai sayuran nang banyak baisi zat wasi nang panting gasan awak.

Garambas

Terna semusim nang katuju iklim hangat lawan cahaya kuat. Bayam tahan haja lawan pancahayaan langsung marga marupakan tumbuhan C4. Batang babanyu lawan kada tapi bakayu. Daun batangkai, babantuk bulat mahintalu, lamah, babalang hijau, habang, atawa hijau kaputihan. Kambang tasusun babanyak macam tukal nang kipit, bagian bawah baandak di katiak, bagian pucuk bakumpul jadi karangan kambang di hujung tangkai lawan katiak pacikangan. Biginya babalang hirang, halui, lawan karas.

Panggunaan

Bayam sawagai sayur hanya umum dipinandui di Asia Timur lawan Asia Tenggara, makanya disambat dalam basa Inggris sawagai Chinese amaranth. Di Indonesia lawan Malaysia, bayam rancak disalahartikan manjadi "spinach" dalam basa Inggris (mungkin sawagai akibat panarjemahan nang dalam film kemos Popeye), padahal ngaran ngitu mangacu ka huaran sayuran daun lain - lihat Bayam (Spinacia).

Di tingkat konsumen, dipinandui dua macam bayam sayur: bayam putik lawan bayam cabut. Bayam putik badaun libar lawan tumbuh tagak ganal (sampai mandua mitir) lawan daun anumnya dimakan tautama sawagai lalapan (misalnya di pecel, gado-gado), urap, lawan jua disanga imbah diculup ka adunan galapung. Daun bayam cabut baukuran tahalus lawan ditanam gasan waktu singkat (paling lawas 25 hari), tarasuk gasan diulah sup encer nangkaya sayur bayam lawan sayur bobor. Bayam putik rajinnya tumatan janis A. hybridus (bayam kakap) lawan bayam cabut tautama diambil tumatan A. tricolor. Huaran lainnya nang juwa dimanpaatkan adalah A. spinosus (bayam duri) lawan A. blitum (bayam kotok).

Kandungan wasi pada bayam tatinggi pada sayuran daun lain (wasi marupakan panyusun situkrum, protein nang umpat dalam fotosintesis) jadinya baguna gasan pandarita anemia.

Manpaat Bayam gasan Kasihatan^[1]

Baik gasan Panjanakan

Bayam baisi pitamin A beta karoten, lutein lawan zeaxanthin. Kandungan lutein lawan zeaxhantin kawa mambantu mata gasan manyaring cahaya galumbang handap nang barbahaya lawan jua mahalangi karusakan di makula atawa pusat retina mata.

Manguati Utut

Manpaat matan sayur bayam hijau adalah kawa manguatakan utut marga faktor koenzim Q-10 (C0-Q10) nang batugas sawagai antioksidan lawan jua mambantu mamumpa darah ka samunyaan awak. Darah nang dipumpa ka samunyaan awak ngini dibantui juwa lawan utut jantung nang sudah kuat badahulu. Kandungan koenzim dalam bayam juwa hingkat manurunakan risiku gagal jantung lawan jantung koroner.

Manjaga takanan darah

Kandungan kalium di bayam hingkat malamasakan tawing pambuluh darah jadinya manurunakan takanan darah lawan malindungi pada utut tasulait. Salaya ngitu risiku takana darah tinggi gin kawa barkurang marga kandungan folat nang bapungsi mananangakan pambuluh darah. Disamping folat, ada juwa kandungan nitrat alami yaitu sanyawa nang bapungsi gasan mambuka pambuluh darah dalam maningkatakan aliran darah lawan maringanakan gawian jantung.

Mambantu mahalangi Kanker

Manpaat lainnya matan bayam nang balum banyak ditahu ialah bayam hingkat mambantu mahalangi kanker lawan mambantu malambat partumbuhan sel tumor. Bayam mangandung beta karoten lawan pitamin C nang aktip bapungsi dalam parlindungan lawan parkambangan sel kanker. Salaya beta karoten lawan pitamin C, zat nang hingkat mahalangi kanker adalah klorofil. Klorofil ngini efektif sawagai panahan epek karsinogenik tumatan amina heterosilik.

Album

• 
• 
• 

Pranala luar

• (Bahasa Indonesia) Bayam di situs web Sentra Informasi IPTEK Archived 2010-05-22 at the Wayback Machine^{[pranala nonaktif permanen]}

Jujuhutan

1. Bandung, soleh, Indonesia. "Manfaat Bayam Untuk Kesehatan - Dinas Ketahanan Pangan dan Peternakan". dkpp.jabarprov.go.id (dalam bahasa Indonesia). Diarsipkan dari versi asli tanggal 2023-12-30. Diakses tanggal 2023-12-30.