Artikal ini masih dalam paubahan ganal gasan pahadangan. Gasan mahindari pambabakan nang barumpak, tulung kada manggawi pambabakan salawas pasan ini ditampaiakan. Laman ini pauncitan dibabak ulih InternetArchiveBot (Kontrib • Log) 182 hari 1027 manit halam. |
Binahung atawa piahong (Anredera cordifolia) adalah ngaran tanaman tatamba nang tumbuh di dataran randah atawa dataran tinggi. Tanaman Binahung sabujurannya sudah lawas ada di Indonesia, tagal hanyar am wayahni haja dijadiakan urang tatamba alami gasan panyakit nang ringan duwa barat.
Binahung disambat juwa lawan Dheng San Chi (Cina) wan kikira asalnya matan Korea ujar buhan pakar. Binahung ngini dimakan lawan urang Vietnam rahatan batampur malawan Amerika Serikat pas tahun 1950 sampai 1970-an. Salaya ngitu, Binahung dimakan juwa lawan urang matan banua Taiwan, Tiongkok dan lainnya. Lamun dahulnya Binahung nang dimakan yaitu daun, batang duwa bungkahnya.[1]
Tumbuhan Binahong ngini adalah tanaman nang malayap bisa ka tanaman lain, tawing rumah, jarajak atawa titihangan. Umur Binahung ngini handap haja, lamun sudah sampai manalu bulan, Binahung cagaran babungkah nang baandakan di daunnya.[2]
Batangnya Binahung pina linak jadinya kada tapi kajung wan sutil malilit, tarasa halus amun dijapai tagal ditikin tarasa karas. Bakalir habang-habang tuha tagal amun batangnya sudah tuha baubah ka putih. Panjangnya bisa sampai 20-30 m nang diamitirnya kikira 3,5 cm.[2]
Daunnya babantuk nangkaya hati nang batangking di calukannya. Kalirnya ada nang hijau ada juwa nang habang targantung duwa pariannya.[2]
Bungkahnya Binahung ganalnya sama lawan hujung jariji kalingking. Bantukan bungkahnya pina kasar duwa ada babulu-bulu halus nang panjangnya kikira 1-3 cm.[2]
Lacuknya Binahung baandakan atawa bagantungan di batang ganalnya di halapat daunnya.[2]
Binahung kawa maatasi panyakit bangkak di gulu, nang caranya adalah rancak manginum jus daun binahung. Salaya ngitu, Binahung biasanya juwa dipakai gasan panyakit luka, tipus, bibis, sakit usus, ngalih bahira, bangkak, darah baku, rimatik, asam urat, satruk duwa diabitis. Paling nyaman adalah nang mamakai daunnya nang diandak di kulimbit nang luka nang harapannya supaya lakas wagas.[3]
Banyu jarangan lacukan Binahung nang bantukannya bungkah juwa dipakai gasan tatamba hati bangkak, hal ngini marga Binahung baisi antiuksidan nang kawa manangkal radikal bibas. Daunnya Binahung juwa dipadahi kawa gasan panyakit paru-paru.[4] Urang nang tahu duwa manpaatnya, biasanya batanaman di tungkaran rumahnya. Cara nang paling baik gasan maambil tuahnya adalah manjarangnya atawa mamakan langsung daunnya.[5]
Daun Binahung juwa rancak dipakai urang gasan maubati jarawat, bibis, kulistirul, asam urat duwa imbah bauprasi.[6] Sapalih urang juwa mamakai daun binahung gasan manyuburakan rambut wan manjaga kasihatan rambutnya.[7] Daun Binahung nang diulah jadi bubuk gasan rarampahan dibawa mandi dipakai gasan mananambai panyakit gatalan di kulit.[8]