Pamandiran di Tusculum

Cicero - Musei Capitolini

Pamandiran di Tusculum Karya seri Tusculan marupakan salah sabuting karya Cicero. Karya ngini batujuan hagan maningkatakan tarap hidup masyarakat; manguatakan wan jua manunjul buhan masyarakat supaya manuju cara hidup nang tabaik matan tadahulu. Seri Tusculan ngini dimulai pas wayah taburuk hagan Cicero - tahun pauncitan kediktatoran Caesar, haratan Cicero kada kawa bapulitik. Buku ngini didadikasiakan hagan Brutus nang tagas. Brutus nang manjadi pambunuh Caesar, Brutus nang satahun sabalumnya diundang ulih Cicero hagan mangisahakan duwa buting padatuannya, Lucius Brutus nang mengusir tiran Tarquinus wan Lucius Ahala nang mambunuh Maelius, nang jua marupakan tiran. Namun, pas Februari 45 SM, Cicero didera duka nang luar biasa karana kamatian putrinya, Tullia. Di tangah kasadihannya, inya manyambat batapa kamatian akan maulah inya lega, karana Tullia sudah habis umur wan inya kada kawa lagi jadi nagarawan. Pas uncitnya, inya maulah seri Tusculan hagan manjalasakan bahwa apilan dalam hidup harus dihadapi.

Rom Tusculum

Talapas matan situasinya, Cicero baisi alasan khusus haratan mamilih hagan mambahas topik ngini. Dalam buku sabalumnya, On the Chief Good and Evil (De Finibus h.8n), inya mambarii pandangan nang balain. Inya maranungakan aspik tiuritis etika wan manjabarakan prinsip-prinsip kalakuan manusia.

Adigan dalam buku ngini tarjadi di vila paistirahatan Cicero, Tusculum, di parak Frascati, 21 km matan Roma. Cicero banyak baisi rumah, tatapi vila ngitu marupakan vila nang paling inya katujui. Cicero manukar vila ngitu pas tahun 68 SM di lahan bargengsi mamakai duit bininya, Terentia. Cicero suah bapikir hagan manjual villa ngitu haratan pas vila ngitu rusak karana situasi pulitik pas masa pangasingannya; tapi Cicero baulang kali manyambat batapa vila ngini sangat baharga dalam suratnya. Salawas 48 SM sampai 45 SM, Cicero mahabisakan waktu di tempat ngini. Manurut gambaran matan Merivale, di tempat ngini, Cicero 'kawa manjanaki tujuh buting bukit nang baangsur mahilang ditaguk Cakrawala'. Vila ngini wan bangunan-bangunan di sakulilingnya hibak lawan karya seni Yunani, tarmasuk patung Hermanthena di atas pilar persegi nang inya banggaakan. Sabuting hatap lawan ukiran ngaran Cicero ditamuakan di Tusculum sakitaran tahun 1740, imbahnya ditamuakan raruntuhan nang habarnya ngitu rumah cicero; tatapi dugaan ngitu talalu optimis, karana banyak rumah-rumah urang Roma nang lain disana. Salah sabuitingnya adalah Lucius Licinius Lucullus, nang baisi parpustakaan ganal nang rancak didatangi ulih Cicero. Pas tahun 46 SM, Cicero maundangi mintuhanya, Publius Cornelius Dolabella, wan saikung letnan Caesar, Aulus Hirtius, hagan bamalam di villa ampunnya, wan mambarii palajaran retorika.

Karya Diskusi di Tusculum ngini adlaah produk matan pardabatan lima hari di vila ngitu. Karya Cicero ngini manganai filsafat; akan tatapi mamakai dialog nang fiktif matan pamikiran panulis, Cicero. Sacara sabarataan, Cicero manggambarakan isi matan kalima buku atawa volumu karya ngini adalah tantang esensi kahidupan nang barbahagia. Adapun inti matan saban volume nang ngitu adalah:

  1. Volume panambayan; manjabarkan bahwa kematian kada usah ditakutakan.
  2. Volume kadua; menjabarkan bahwa rasa sakit ngitu kada manahan.
  3. Volume katiga; manampaiakan bahwa kasadihan kawa diatasi.
  4. Volume kaampat; mamandirakan kakacauan pikiran
  5. wan volume kelima; mamandirakan teori nang mencerahkan bidang filsafat - bahwasanya kabaikan moral sudah cukup membahagiakan siapapun.

Inti sabarataan matan kaampat volume panambayan adalah pandangan bahwa manusia kawa basikap rasional maski di bawah pangaruh rasa takut, rasa sakit, sarta kakacauan emosional. Sedangkan volume kalima adalah kulminasi mata sabuitng pandakatan hagan manjabarakan bahawasanya saban gangguan nang mahaur kabahagiaan ngitu harus dihadapi. Isi matan volume ngini disimpulakan dalam sabuitng pandangan bahwa kabaikan moral sudah cukup hagan maulah kahidupan nang bahagia. [1]

Referensi

[babak | babak asal-mulanya]
  1. ^ Tentang Hidup yang Bajik (Cicero). Yogyakarta: BASABASI. 2019. ISBN 978-623-7290-51-3.