རྫོགས་ཆེན་དགོན།
གྲུབ་དབང་རྒྱལ་བ་རྫོགས་ཆེན་དགོན་གྱི་ལོ་རྒྱུས་བསྡུས་པ།
[རྩོམ་སྒྲིག]
སྔ་འགྱུར་གྲུབ་དབང་རྒྱལ་བ་རྫོགས་ཆེན་དགོན་ནི་བོད་རབ་བྱུང་བཅུ་གཅིག་པའི་ཤིང་མོ་གླང་གི་ལོ་སྟེ་སྤྱི་ལོ་༡༦༨༥པར་གྲུབ་ཐོབ་པདྨ་རིག་འཛིན་གྱིས་ཐོག་མར་ཕྱག་བཏབ་ཅིང་། དེ་ནས་ད་ལྟའི་བར་གྲུབ་དབང་སྐུ་རབས་དྲུག་དང་བསྟན་འཛིན་གདན་རབས་བཅུ་གཉིས་ཀྱི་རིང་ཆོས་སྡེ་འདི་ནས་བཤད་སྒྲུབ་ལས་གསུམ་གྱི་ཕྲིན་ལས་འགྲན་ཟླ་དང་བྲལ་བ་ཡངས་པའི་འཛམ་གླིང་གི་སའི་ཁྱོན་ཀུན་ཁྱབ་པ་བྱུང་བ་དང་། བོད་ཡུལ་མདོ་དབུས་ཁམས་གསུམ་དུ་ཆོས་བརྒྱུད་འཛིན་པའི་བུ་དགོན་སུམ་བརྒྱ་ལ་ཉེ་བ་འཕེལ་བས་སྔ་འགྱུར་རྙིང་མའི་མ་དགོན་ཆེན་མོ་དྲུག་གམ་གདན་ས་ཆེན་མོ་དྲུག་ཏུ་གྲགས་པའི་ཡ་གྱལ་དུ་གྱུར། ཆོས་སྡེ་ཆེན་མོ་འདི་ཉིད་གང་དུ་ཆགས་པའི་གནས་ནི་མདོ་ཁམས་སྒང་དྲུག་ལས་འབྲུ་རྫ་ཟལ་མོ་སྒང་གི་སའི་ཆར་གཏོགས་པ་ཨོ་རྒྱན་སངས་རྒྱས་གཉིས་པས་རྫུ་འཕྲུལ་གྱི་ཞབས་ཀྱིས་བཅགས་ཤིང་གངས་ར་ཉེར་ལྔའི་ནང་ཚན་ཡོན་ཏན་གནས་ཀྱི་གཙོ་བོར་བྱིན་གྱིས་རླབས་པའི་རུ་དམ་སྐྱིད་ཁྲམ་ལུང་པ་སྟེ། ད་ལྟའི་སྲིད་འཛིན་ས་ཁུལ་གྱི་དབང་དུ་བྱས་ན་ཀྲུང་གོའི་མཚོ་བོད་མཐོ་སྒང་གི་དཀར་མཛེས་བོད་རིགས་རང་སྐྱོང་ཁུལ། སྡེ་དགེ་རྫོང་གི་བྱང་ཤར་གྱི་མཚམས་རྒྱ་མཚོའི་ངོས་ནས་མཐོ་ཚད་སྤྱི་ཁྲི་༤༠༠༠ལྷག་ཡོད་པའི་གདོད་མའི་མཛེས་ལྗོངས་ཤིག་ཏུ་ཆགས་ཡོད།
གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ལྔ་རིག་ནང་བསྟན་སློབ་གླིང་གི་ལོ་རྒྱུས་བསྡུས་པ།
[རྩོམ་སྒྲིག]སྤྱི་ལོ་༡༨༤༨པར་རྫོགས་ཆེན་ཡིད་བཞིན་ནོར་བུ་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེ་དང་སྔ་འགྱུར་བསྟན་པའི་ཉི་མ་རྒྱལ་སྲས་གཞན་ཕན་མཐའ་ཡས་ཀྱིས་ཕྱག་བཏབ་པ་སྟེ། དེ་ནས་ད་ལྟའི་བར་ལོ་ངོ་བརྒྱ་དང་ལྔ་བཅུ་ལྷག་གི་རིང་ཆོས་སྡེ་འདི་ཉིད་ནས་བོད་ཀྱི་གནས་ལྔ་རིག་པ་སྤྱི་དང་མདོ་སྔགས་ཀྱིས་བསྡུས་པའི་ནང་བསྟན་རིག་གཞུང་ལ་འཆད་ཁྲིད་སློབ་གཉེར་རྒྱ་ཆེར་མཛད་པས། སེང་ཕྲུག་པདྨ་བཀྲ་ཤིས་དང་། རྫ་དཔལ་སྤྲུལ་རིན་པོ་ཆེ། མཁས་མཆོག་གུ་རུ་བཀྲ་ཤིས། མཁན་ཆེན་པདྨ་བཛྲ། འཇུ་མི་ཕམ། རྒྱ་རོང་བསྟ ན་འཛིན་གྲགས་པ། མི་ཉག་ཀུན་བཟང་བསོད་ནམས། འབར་བླ་བཀྲ་ཤིས་རྒྱ་མཚོ། འབམ་འདའ་དགེ་ལེགས་རྒྱ་མཚོ། ཨོ་རྒྱན་བསྟན་འཛིན་ནོར་བུ། མཁན་ཆེན་གཞན་དགའ་རིན་པོ་ཆེ། གླག་བླ་བསོད་ནམས་ཆོས་འགྲུབ། འབོ་གངས་དཀར་སྤྲུལ་སྐུ། བོད་སྤྲུལ་མདོ་སྔགས་བསྟན་པའི་ཉི་མ། ཁུ་ནུ་བླ་མ་བསྟན་འཛིན་རྒྱ་མཚོ། ཀཿཐོག་མཁན་ཆེན་ངག་ཆུང་། རྨེ་བ་མཁན་ཆེན་ཚེ་དབང་རིག་འཛིན་སོགས་མཚན་སྙན་འཛམ་གླིང་ལ་གཡོ་བའི་མཁས་དབང་བཅུ་ཕྲག་འགའ་བྱོན་པ་དང་། མཁས་དབང་དེ་དག་རེ་རེ་ལ་གསུང་རྩོམ་པོད་ཆེན་བཅུ་ནས་ཉི་ཤུའི་བར་བཞུགས་པ་ལས་ཕལ་མོ་ཆེ་དབྱིན་ཡིག་སོགས་སྐད་རིགས་འདྲ་མིན་བཅུ་ལྷག་ལ་བསྒྱུར་ཟིན་པ་དེང་དུས་འཛམ་གླིང་གི་རིག་གཞུང་ལྟེ་གནས་གང་སར་ཁྱབ་ཡོད། གཞན་ཡང་ས་དགེ་བཀའ་རྙིང་གི་མཁན་པོ་དང་སྤྲུལ་སྐུ་སོགས་བོད་ཀྱི་བཅུ་ཕྲག་རིག་གནས་ལ་ནང་བྱན་ཚུད་པའི་མཁས་དབང་བརྒྱ་ཕྲག་མང་པོ་སློབ་གླིང་འདི་ནས་རྒྱུན་མ་ཆད་པར་སྔ་ཕྱིར་སློབ་ཐོན་བྱུང་བས་བོད་མདོ་ཁམས་ཕྱོགས་ཀྱི་རིག་གནས་འབྱུང་བའི་ལྟེ་གནས་ཉག་གཅིག་ཏུ་གྱུར་པ་སྟེ། དཔེར་ན་ས་སྐྱའི་ཕྱོགས་ཀྱི་རྫོང་སར་བཤད་གྲྭ་ཆེན་མོ་དང་སྐྱེ་རྒུའི་བཤད་གྲྭ་སོགས། བཀའ་རྒྱུད་ཕྱོགས་ཀྱི་དཔལ་སྤྲུངས་བཤད་གྲྭ་དང་ཟུར་མང་བཤད་གྲྭ་སོགས། སྔ་འགྱུར་རྙིང་མའི་ཕྱོགས་ཀྱི་ཀཿཐོག་བཤད་གྲྭ་དང་། དཔལ་ཡུལ་བཤད་གྲྭ་སོགས་ཀྱང་ཆོས་སྡེ་འདིའི་མཁན་ཆེན་སློབ་བརྒྱུད་དག་གིས་ཐོག་མར་ཕྱག་བཏབ་ཅིང་རྒྱ་གཞུང་བཅུ་གསུམ་ལ་རྩལ་འདོན་གྱིས་བཤད་ཁྲིད་མཛད་མཁན་ཤ་སྟག་ཡིན། །
རྩ་བའི་གདན་ས་རུ་དམ་ཨོ་རྒྱན་བསམ་གཏན་ཆོས་གླིང་གི་ཕྱག་བཞེས་སྒྲུབ་འཕྲིན་དུས་མཆོད་དང་བཅས་པའི་ཚུལ་རྒྱས་པར་བཤད་པ།
[རྩོམ་སྒྲིག]རྩ་བའི་གདན་ས་ཆེན་མོ་ཨོ་རྒྱན་བསམ་གཏན་ཆོས་འཁོར་གླིང་གི་ལོ་རྒྱུས་རྒྱས་པ།
[རྩོམ་སྒྲིག]གྲུབ་དབང་རྫོགས་ཆེན་པའི་བཤད་སྒྲུབ་དགོན་གསུམ་གྱི་ཆོས་སྡེ་ཇི་ལྟར་དར་རྒྱས་སུ་བཞུགས་ཚུལ་བརྗོད་པ་ལས། དང་པོ་རྩ་བའི་གདན་ས་ཆེན་མོ་ཨོ་རྒྱན་བསམ་གཏན་ཆོས་འཁོར་གླིང་ནི། སྔ་རབས་མཁས་པའི་ཞལ་རྒྱུན་དུ། སྟོད་ན་རྡོར་སྨིན་དཔལ་གསུམ་དང་། སྨད་ན་ཀཿདཔལ་རྫོགས་གསུམ་ཞེས་གསང་ཆེན་རྙིང་མའི་གདན་ས་ཆེན་མོ་དྲུག་ཏུ་གྲགས་པའི་ཡ་གྱལ། སྔ་འགྱུར་བཤད་སྒྲུབ་བསྟན་པའི་ཆུ་འགོ་ཆེན་མོ་རྫོགས་ཆེན་རུ་དམ་ཨོ་རྒྱན་བསམ་གཏན་ཆོས་འཁོར་གླིང་ཞེས་ཡོངས་སུ་གྲགས་ལ། དགོན་སྡེ་ཆེན་མོ་འདི་ཉིད་ནི་གོང་དུ་སྨོས་པའི་མདོ་ཁམས་རུ་དམ་སྐྱིད་ཁྲམ་གྱི་ལུང་པར། རྒྱབ་རི་རྒྱལ་པོ་གདན་ལ་བཞུགས་འདྲའི་འདབས་རོལ། མདུན་ཐང་གསེར་གཞོང་མར་ཁུས་བཀང་འདྲའི་ཐད་ངོས། སྟག་འབྲུག་སེང་གེའི་གདན་གྱིས་མཐོ་བའི་སའི་ཆར་འབྲས་དཀར་གྱི་མཎྜལ་སྤུངས་པ་ལྟར་ཆགས་པ་སྟེ། སྤྱི་ལོ༡༦༨༥པ་བོད་རབ་བྱུང་བཅུ་གཅིག་པའི་ཁྲོ་བོ་ཞེས་པ་ཤིང་མོ་གླང་གི་ལོ་གྲུབ་དབང་པདྨ་རིག་འཛིན་དགུང་གྲངས་རེ་གཅིག་བཞེས་པའི་སྐབས་ས་སྐྱོང་སྡེ་དགེའི་རྒྱལ་པོ་ཁྲི་ཆེན་སངས་རྒྱས་བསྟན་པས་སྦྱིན་བདག་མཛད་ནས་ཐོག་མར་ཕྱག་བཏབ་ཅིང་། དུས་དེར་དགེ་འདུན་གྱི་འདུས་པ་སྟོང་དང་ལྔ་བརྒྱས་སྒྲུབ་པའི་རྒྱལ་མཚན་བཙུགས་ཏེ་ངེས་གསང་སྙིང་པོའི་བསྟན་པ་ཉིན་བྱེད་ལྟར་གསལ་བར་མཛད། དེ་ནས་ད་ལྟའི་བར་གྲུབ་དབང་སྐུ་རབས་དྲུག་དང་བསྟན་བདག་གདན་རབས་བཅུ་གཉིས་ཀྱི་རིང་བཤད་སྒྲུབ་ལས་གསུམ་གྱི་ཕྲིན་ལས་འོད་སྟོང་འབར་བས་ཡངས་པའི་ས་ཆེན་པོའི་ཁྱོན་ཀུན་ཡོངས་སུ་ཁྱབ་པ་སྟེ། ཀུན་གཟིགས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པའི་ཞལ་སྔ་ནས་མཛད་པའི་གདན་རབས་པདྨའི་དགའ་ཚལ་དུ། བོད་ཆེན་པོའི་ལྗོངས་ཀྱི་སའི་ཐིག་ལེར་སྟོབས་ཀྱི་འཁོར་ལོས་སྒྱུར་བ་སྡེ་དགེ་ཆོས་ཀྱི་རྒྱལ་པོའི་མངའ་ཁུལ་འདིར་ནི། སྔ་འགྱུར་པའི་བསྟན་པ་ཁོ་ན་དར་རྒྱས་ཆེ་བས་དགོན་གནས་ཆེ་ཕྲའང་མང་དུ་བཞུགས་ཤིང་དེ་ཐམས་ཅད་ཀྱང་རྒྱལ་བ་ཀཿཐོག་པ་དང་། གྲུབ་དབང་རྫོགས་ཆེན་པའི་ཕྲིན་ལས་ལས་བྱུང་བ་ཤ་སྟག་ཡིན་པས་དེའི་ཚུལ་མདོ་ཙམ་བརྗོད་ན། ཅེས་སོགས་གསལ་བར་གསུངས་པ་ལྟར་ས་སྐྱོང་སྡེ་དགེ་རྒྱལ་ཁབ་ཀྱིས་གཙོས་བོད་ཡུལ་མདོ་དབུས་ཁམས་གསུམ་དུ་རྩ་བའི་གདན་ས་ཆེན་མོ་ནས་ཕྱོགས་ཀྱི་བུ་དགོན་སུམ་བརྒྱ་ལ་ཉེ་བ་འཕེལ་བ་དེང་དུས་ཀྱི་སྟོང་ལྡིར་ཙམ་མ་ཡིན་པར་དངོས་སུ་བྱུང་ཞིང་། དགོན་ལག་སོ་སོའི་ལོ་རྒྱུས་གདན་རབས་ཆ་ཚང་ཐེངས་འདིར་ལག་སོན་མ་བྱུང་པ་སོགས་ཀྱིས་རྟེན་འབྲེལ་མཐའ་ཅན་དུ་བྱས་ཤིང་། འབྱུང་ཆར་སོ་སོའི་ལོ་རྒྱུས་གདན་རབས་ཆ་ཚང་པར་རིས་དང་བཅས་པའི་དེབ་ཆེན་ཞིག་མི་འགྱང་ཅིས་ཀྱང་བསྐྲུན་འོས་རང་བསྟན་ལ་ལྷག་བསམ་དང་མཁྱེན་དཔྱོད་ལྡན་པ་རྣམས་ལ་ཐུགས་གསོས་སུ་ཞུ་བ་དང་བཅས། །འདིར་སྐབས་སུ་བབ་པ་རུ་དམ་གདན་ས་ཆེན་མོ་འདི་ཉིད་དུ་གནའ་བོའི་དུས་སུ་སྐྱེ་དགུའི་བསོད་ནམས་ཀྱི་ཞིང་ས་རྒྱལ་བའི་སྐུ་གསུང་ཐུགས་ཀྱི་རྟེན་དང་བརྟེན་གཞི་གཙུག་ལག་ཁང་ཆེན་མོ་དག་ཇི་ལྟར་བཞུགས་པའི་ཚུལ་མདོ་ཙམ་བརྗོད་ན། དེ་ཡང་ཆོས་སྡེ་ཆེན་མོའི་དཀྱིལ་དབུས་སུ་ཐུབ་བསྟན་ཡོངས་སུ་འདུས་པའི་དགའ་བའི་ཚལ་གྱི་གན་དྷོ་ལ་འདུས་པ་སུམ་སྟོང་ལྷག་ཤོང་བའི་རྒྱ་ཁྱོན་དང་ལྡན་པ་སུམ་ཐོག་སྒོ་ཁྱམས་གློ་འབུར་དུ་བྱས་པ་ལྷང་ངེར་བརྗིད་ཆགས་པ་དང་། དེའི་ནང་རོལ་འོག་ཁང་ཆེན་མོའི་དཀྱིལ་དབུས་སུ་གསེར་ཟངས་ལས་གྲུབ་པའི་དུས་གསུམ་སངས་རྒྱས་ཀྱི་སྐུ་བརྙན་ཐོག་བརྩེགས་གཉིས་པ་འཁོར་ཉེ་སྲས་བརྒྱད་དང་གནས་བརྟན་བཅུ་དྲུག་གིས་བསྐོར་བ། གཡས་ཕྱོགས་སུ་རྒྱལ་བ་རྡོ་རྗེ་འཆང་ཆེན་པོ་ནས་རྫོགས་ཆེན་སྟོན་པ་བཅུ་གཉིས་དང་བཅས་པའི་སྐུ་བརྙན་དང་། གསང་ཆེན་ངེས་པའི་རྒྱུད་ཀྱི་གླེགས་བམ་སོགས་བཀའ་གཏེར་གྱི་ཆོས་དཔེ་གྲངས་མེད་པ་བཞུགས་སུ་གསོལ་བ། གཡོན་ཕྱོགས་སུ་གྲུབ་དབང་སྐུ་ཕྲེང་རིམ་བྱོན་གྱི་སྐུ་བརྙན་དང་གསུང་འབུམ། གསེར་གདུང་བཅས་སྐུ་གསུང་ཐུགས་རྟེན་ཕྲེང་བསྟར་བསྒྲིགས་པ། ཕྱོགས་ཀྱི་གྱང་ངོས་རྣམས་སུ་སྟོན་པ་སངས་རྒྱས་ཀྱི་སྐྱེས་རབས་དང་། སློབ་དཔོན་པདྨའི་རྣམ་ཐར་བཅས་གསེར་ཞུན་གྱི་ཁུ་བས་ལྡེབས་རིས་སུ་བྲིས་པ་སོགས་བྱིན་རླབས་ཀྱི་གཟི་འོད་འབར་བའི་སྐུ་གསུང་ཐུགས་རྟེན་མཐའ་ཡས་པ་བཞུགས་ཤིང་། དེ་དག་ལ་མཆོད་པའི་ཡོ་བྱད་ཀྱང་རིན་པོ་ཆེ་སྣ་ཚོགས་ལས་གྲུབ་པའི་བཀྲ་ཤིས་རྫས་རྟགས་ཀྱི་དངོས་པོ་དང་། དར་གྱི་རྒྱལ་མཚན། བླ་བྲེ། འཕན་འཕུར། ནོར་བུའི་ཕྲེང་བ་སོགས་དཀྱིལ་འཁོར་གྱི་ཡོ་ཆས་མ་ཚང་བ་མེད་པ་ཀུན་བཟང་མཆོད་པའི་སྤྲིན་ཆེན་བསམ་གྱིས་མི་ཁྱབ་པས་ལེགས་པར་མཆོད་པ། ཡང་ཐོག་བར་ཁང་གི་དཀྱིལ་དབུས་སུ་གསེར་དངུལ་ལས་བྱས་པའི་ཁང་བཟང་དུ་སྟོན་པ་ཐུབ་པའི་དབང་པོའི་སྐུ་བརྙན་ལོངས་སྐུར་ཞལ་བསྒྱུར་བ་ཇོ་བོ་མཐོང་གྲོལ་ཆེན་པོ་སྐུ་རྒྱུ་ཛྙཻཀྵིམ་ལས་གྲུབ་པ་ཐུབ་དབང་དགུང་ལོ་བཅུ་གཉིས་པའི་སྐུ་ཚད་ཅན། གཡས་གཡོན་དུ་མཆོག་ཟུང་གཉིས་མཉམ་པར་བཞེངས་པ། གསེར་གཡུ་མུ་མེན་སོགས་རིན་པོ་ཆེའི་ཕྲ་ཚོམ་གྱིས་བརྒྱན་ཅིང་མཆོད་པའི་བྱེ་བྲག་གྱ་ནོམ་པས་མཆོད་པ། དེའི་གཡས་གཡོན་དུ་རྒྱུད་མར་གསང་སྙིང་ལྷ་ཁང་། སྡོམ་རྒྱུན་ལྷ་ཁང་། བཀའ་བརྒྱུད་ལྷ་ཁང་། ས་སྐྱའི་ལྷ་ཁང་། དགའ་ལྡན་ལྷ་ཁང་། མགོན་ཁང་ཆེན་མོ་བཅས་རིམ་པར་བསྒྲིགས་པ་ལ་སོ་སོའི་ལུགས་ཀྱི་སྐུ་གསུང་ཐུགས་རྟེན་མང་པོས་ཕྱུར་བུར་བཀང་བ་དང་། མཆོད་རྫས་སྣ་ཚོགས་པས་ལེགས་པར་མཆོད་པ། དབུ་རྩེའི་ཡང་ཐོག་ཏུ་གསེར་གྱི་རྒྱ་ཕིབས་དང་གན་ཛི་ར། ཆོས་འཁོར་དང་རྒྱལ་མཚན། རི་དྭགས་ཆོས་ཉན་པ་དང་ཆུ་སྲིན་གྱི་མགོ་བོ་བཅས་ཀྱིས་མཛེས་པར་བརྒྱན་ཅིང་བརྗིད་ཆགས་པ། མདོ་ལྟར་གཙུག་ལག་ཁང་དང་སྔགས་ལྟར་གཞལ་ཡས་ཁང་གི་བཀོད་པ་རྫོགས་པ་སོགས་ངོ་མཚར་བཟོ་སྒྲོས་ཀྱི་རྣམ་པས་ཡོངས་སུ་སྤུད་པ་ཉིད་དུ་གྲུབ་བོ། །དེ་དང་མི་རིང་བའི་ཤར་ཕྱོགས་སུ། རྒྱ་ཁྱོན་དང་བཟོ་དབྱིབས་གོང་དང་ཕལ་ཆེར་མཚུངས་པའི་ལྷ་སར་ལྷ་ཁང་ཆེན་མོ་ཐོག་བརྩེགས་གསུམ་པ་རྟེན་གྱི་གཙོ་བོ་གསེར་ཟངས་ལས་གྲུབ་པའི་མཁན་སློབ་ཆོས་གསུམ་གྱི་སྐུ་བརྙན་ལྷ་ཁང་དང་མཐོ་ཚད་མཉམ་པ། ལོགས་བྲིས་སུ་ཐུབ་པའི་མཛད་པ་བཅུ་གཉིས་དང་གུ་རུ་མཚན་བརྒྱད་སོགས་ནང་གི་བཀོད་པ་གོང་དང་མཚུངས་པ། བར་ཁང་དུ་རྫོགས་ཆེན་མཁའ་འགྲོ་སྙིང་ཐིག་གི་བླ་བརྒྱུད་སྐུ་བརྙན་ལྡེབས་རིས་སུ་བྲིས་པ། ཐོག་ཁང་དུ་མདོ་སྔགས་ཆོས་ཚུལ་རྒྱ་མཚོའི་དཔེ་མཛོད་དང་། གསུང་རབ་བཀའ་འབུམ་སྣ་ཚོགས་ཀྱི་པར་ཁང་བཅས་བཞུགས་པ་དང་། དེ་ལྟར་གཙུག་ལག་ཁང་ཆེན་མོ་གཉིས་ཀྱི་དབུས་སུ་ཕོ་བྲང་ཁམས་གསུམ་ཟིལ་གནོན་ཐོག་བརྩེགས་གསུམ་པ། ཕྱི་ཕོ་བྲང་ལ་ནང་ལྷ་ཁང་དུ་གྲུབ་པ། ཐོག་སོ་དང་པོར་བླ་མ། ཡི་དམ། མཁའ་འགྲོ་བཅས་ཀྱི་ལྷ་ཁང་དང་། རྡོར་སེམས་སྟོང་སྐུ་ཁང་། ཚེ་སྒྲུབ་ལྷ་ཁང་། དབང་ཁང་དངོས་གྲུབ་འདོད་འཇོ། གཡང་ཁང་རྣམ་སྲས་བང་མཛོད། མགོན་ཁང་དབང་དྲག་རོལ་པ། གཟིམས་སྤྱིལ་འཆི་མེད་གྲུབ་པའི་དགའ་ཚལ། ཚོམས་ཆེན་འདོད་རྒུ་ལྷུན་གྲུབ་སོགས་སུ་སྲིད་ན་དཀོན་པའི་སྐུ་རྟེན་དང་། ཞལ་ཐང་། གཡང་རྫས། སྤྱན་གཟིགས་བཅས་མི་དང་མི་མིན་གྱི་ནོར་བུ་འདོད་རྒུ་མ་ཚང་བ་མེད་པས་ཡོངས་སུ་གཏམས་པ། དེ་བཞིན་བར་སོ་དང་འོག་སོ་གཉིས་སུ། མཛོད་ཁང་ཆེ་ཆུང་དྲུག རྒྱན་ཁང་གསུམ། སྤྱི་ཁྱབ་གཞུང་ལས་ཁང་དང་མགྲོན་ཁང་བཅས་ཀྱིས་ཕྱོགས་སུ་ཁེངས་པ། གཞན་ཡང་དགོན་པའི་ཕྱོགས་དང་ཕྱོགས་མཚམས་རྣམས་སུ་ཐུབ་དབང་སྟོང་སྐུ་ལྷ་ཁང་། གུ་རུ་སྟོང་སྐུ་ལྷ་ཁང་། ཀུན་དགའ་ར་བ། ཞི་ཁྲོའི་ལྷ་ཁང་། ཕྱག་རྡོར་ལྷ་ཁང་། བདུད་འདུལ་ལྷ་ཁང་། གེ་སར་ལྷ་ཁང་། གསེར་འཁོར་ལྷ་ཁང་དང་། དངུལ་འཁོར་ལྷ་ཁང་བཅས་གཙུག་ལག་ཁང་ཆེ་ཆུང་མང་པོས་གང་བ་དང་། དེ་མཚུངས་མཐའ་འཁོར་ཀུན་ཏུ་བླ་བྲང་ཁག་བཅུ་གཉིས་དང་གྲྭ་ཤག་ཆེ་ཆུང་གྲངས་མེད་པས་མཛེས་པར་བཀང་བ། མཐའ་སྐོར་གྱི་ཕྱོགས་བཞིར་ཕྱག་ན་རྡོ་རྗེ་འབྱུང་པོ་འདུལ་བྱེད་ཀྱི་ལྷ་ཁང་བཞི་ཞལ་ཕྱིར་ཕྱོགས་པ་དང་། བསྲུང་བཟློག་གི་སྙིང་པོ་ཅན་གྱི་དར་ཆེན་མཐོན་པོ་དག་ཕྱོགས་བཞིར་བསྒྲེངས་པས་བར་ཆད་སྲུང་བ། གཡོན་གཤམ་དུ་བདུད་འདུལ་དང་སྲི་མནན་ལ་སོགས་པའི་མཆོད་རྟེན་ཆེན་མོ་རྣམས་རབ་ཏུ་བརྗིད་པ་བཅས་ཞིབ་ཕྲའི་གནས་ཚུལ་ཡིག་ཚོགས་ཀྱི་ངལ་ནས་འདིར་མ་བཀོད་པས་ལོ་རྒྱུས་རྣམ་ཐར་གཞན་དག་ལ་གཟིགས་ཤིང་མཁྱེན་པར་ཞུ། །
ཞར་བྱུང་སྡེ་འདིར་བཀའ་གཏེར་གྱི་མཆོད་ཁག་སོགས་ཚོམ་བུ་ཚོགས་ཀྱི་སྒྲུབ་པའི་དུས་མཆོད་ཆེ་ཕྲའི་སྒོ་འཕར་ཇི་ལྟར་ཕྱེ་ཚུལ་ཕྱོགས་ཙམ་གླེང་བ་ལ། ཐོག་མར་ཧོར་ཟླ་དང་པོའི་ཚེས་གསུམ་ནས་བཅུའི་བར་སྟོང་གྲྭ་ཞིབ་འདུས་ཀྱིས་བུམ་སྒྲུབ་ཆེན་མོ་ཚེས་བཅུའི་གར་འཆམ་ཚེ་དབང་དང་བཅས་པ། དེ་དང་དུས་མཚུངས་སུ་བླ་གྲྭ་བཅུ་ཕྲག་གིས་ཉིན་བདུན་ལ་སྣ་སེལ་དུ་རྟ་མགྲིན་དྲེགས་ཟིལ་དང་། རྡོར་སེམས། ཀླུ་དབང་དགོངས་རྒྱན། ནོར་བདག གསང་འདུས་བཅས་གྲུབ་མཚམས། གཉུག་མར་གནས་པའི་དགེ་འདུན་པ་དག་གིས་ཟླ་དེའི་ཚེས་ཉི་ཤུ་ནས་སྙིང་ཐིག་ཕུར་པ་རྒྱུད་ལུགས་ཀྱི་སྒྲུབ་ཆེན་གཏོར་རྒྱག་ཉིན་དགུ་དང་། མཇུག་ཏུ་རྫོགས་ཆེན་ཕུར་ཆེན་ཞེས་གྲགས་པའི་གར་འཆམ་ཉིན་གྲངས་ལྔ་ལ་བསྟུད་མར་གནང་བ་དང་། གྲྭ་མང་ཡོངས་ནས་ཟླ་དེའི་ཚེས་བཅོ་ལྔ་ནས་དབུ་བརྩམས་ཏེ་སློབ་གྲྭ་ཆེན་མོ་ཞེས་ཟླ་བ་ཕྱེད་གསུམ་གྱི་རིང་ལ་འཛིན་གྲྭ་ཁག་བཅོ་ལྔ་རུ་བགོས་ཏེ་དུས་ཐོག་གཅིག་ཏུ་མདོ་སྔགས་གཞུང་ལུགས་དུ་མའི་འཆད་ཉན་མཛད། དེ་འཕྲོས་ཟླ་བ་གཉིས་པའི་ཚེས་གསུམ་ནས་ཉི་གྲགས་ནོར་བདག་གཡང་སྒྲུབ་ཉིན་བདུན་དང་། ཟླ་དེའི་ཚེས་བཅུ་གསུམ་ནས་དགོངས་འདུས་དང་། བཀའ་བརྒྱད་དྲེགས་འདུལ། རཏ་གླིང་ཕུར་བ། པད་གླིང་ཕྱག་རྡོར། ཚེ་སྒྲུབ་བདུད་བཞི་རྣམ་རྒྱལ། སྙིང་ཐིག་དྲག་པོ་རྟ་ཁྱུང་། སྡུག་བསྔལ་རང་གྲོལ། དཔལ་ཆེན་འདུས་པ། ཡང་ཏི་གསེར་གྱི་འབྲུ་གཅིག །ཐུགས་སྒྲུབ་བར་ཆད་ཀུན་སེལ། པད་གླིང་བླ་མ་ནོར་བུ་རྒྱལ་མཚན། གུ་རུ་ཡོན་ཏན་གཏེར་མཛོད། མཆོག་གླིང་གསང་བདག་དྲེགས་འདུལ། རྡོར་གླིང་ཐུགས་སྒྲུབ་ཡིད་བཞིན་ནོར་བུ། ཆོས་དབང་ཡང་དག གཡུ་ཐོག་སྙིང་ཐིག རྒྱ་སྟོན་རིག་འཛིན་བདེ་མཆོག །གུ་རུ་རིན་ཆེན་སེང་གེའི་དམོད་པ་དྲག་སྔགས། བྱང་གཏེར་རིག་འཛིན་གདུང་སྒྲུབ་བཅས་གཏེར་སྒྲུབ་མཆོད་ཁག་ཉི་ཤུ་ཉིན་བདུན་ལ་དུས་ཐོག་གཅིག་ཏུ་རྒྱས་འཚོགས་དང་། དེ་རྗེས་ཟླ་བ་གསུམ་པའི་ཚེས་གསུམ་ནས་རཏ་གླིང་ཚེ་སྒྲུབ་ཉིན་དགུ། དེའི་ཚེས་བཅོ་བརྒྱད་དང་བཅུ་དགུ་གཉིས་ལ་ཐུགས་ཆེན་བདེ་གཤེགས་ཀུན་འདུས་དང་འབྲེལ་བའི་རབ་གནས་ཉིན་གཉིས། ཧོར་ཟླ་བཞི་པའི་ཚེས་ཉེར་བཞི་ནས་སྔ་འགྱུར་བཀའ་གཏེར་གྱི་སྒྲུབ་མཆོད་ཆེན་མོ་མཆོད་ཁག་བཞི་བཅུ་ལྷག་གི་དངོས་གཞིིའི་སྒྲུབ་པ་ཉིན་བདུན་དང་རྩ་དྲུག་གར་གསུམ་གྱི་རྡོ་རྗེའི་གར་འཆམ་ཉིན་གསུམ་བཅས་ལེགས་པར་གྲུབ་འཕྲལ། ཟླ་བ་ལྔ་པའི་ཚེས་བཞི་ནས་ཀར་གླིང་ཞི་ཁྲོའི་གནས་སྟོང་ཉིན་བཞི་ལ་འཚོགས་པ་དང་། ཟླ་བ་དྲུག་པའི་ཚེས་བཅོ་ལྔ་ནས་དབྱར་གནས་ཟླ་བ་ཕྱེད་གཉིས་དང་ལྗོངས་རྒྱུ་ཉིན་གསུམ་གྱིས་ལེགས་པར་གྲོལ། དེ་རྗེས་ཟླ་བ་དགུ་པའི་ཚེས་ཉི་ཤུ་ནས་རཏ་གླིང་ཕུར་པའི་སྒྲུབ་པ་གཏོར་ཟློག་གཙོ་བོར་བྱེད་པ་ཉིན་བདུན་དང་། ཟླ་བ་བཅུ་པའི་ཚེས་གཅིག་ནས་ཞག་གྲངས་བརྒྱ་ལ་རྐང་བརྡས་བསྐུལ་ཏེ་དགེ་འདུན་པ་ཀུན་ཀྱིས་ཉིན་ལྟར་སྔ་ཕྱིའི་ཐུན་བཞི་གཅོད་པ་དང་། ཟླ་བ་བཅུ་བའི་ཚེས་ཉི་ཤུའི་ནང་གནམ་ཆོས་ཁྲོ་བཅུ་དང་ཀིང་ཀང་གཉིས་དུས་མཚུངས་སུ་ཉིན་བདུན་ལ་འཚོགས། དེའི་ཚེས་བཅོ་བརྒྱད་ལ་མི་འགྱུར་ནམ་མཁའི་རྡོ་རྗེའི་འདས་མཆོད་དང་། ཉེར་གཉིས་ལ་གྲུབ་དབང་ལྔ་པའི་འདས་མཆོད་བཅས་རིམ་གཞིན་འཚོགས། ཟླ་བ་བཅུ་གཅིག་པའི་ཚེས་ཉི་ཤུ་ནས་མ་ཏིའི་སེང་དམར་ཉིན་བདུན་དང་། ཚེས་ཉེར་ལྔ་ལ་གྲུབ་དབང་པདྨ་རིག་འཛིན་གྱི་འདས་མཆོད། ཟླ་བ་བཅུ་གཉིས་པའི་ཚེས་བཅོ་བརྒྱད་ལ་ཀུན་མཁྱེན་ཆེན་པོའི་འདས་མཆོད་དང་། ཚེས་ཉི་ཤུའི་ནང་བཀའ་བརྒྱད་ཁྲོ་བོ་རོལ་པའི་སྒྲུབ་ཆེན་ཉིན་བརྒྱད་དང་གར་འཆམ་གཏོར་རྒྱག་སོགས་ཉིན་གསུམ་གྱིས་གྲུབ། འདིའི་སྐབས་སུ་རྟ་མགྲིན་དྲེགས་ཟིལ་དང་། བདེ་མཆོག རཏ་ཕུར་གྱི་སྒོ་ནས་དམ་སྲི་མནན་པ་བཅས་སྒྲུབ་ཁག་སོ་སོ་ཉིན་བདུན་ལ་དུས་ཐོག་གཅིག་ཏུ་འཚོགས། གཞན་ཡང་ཟླ་རེའི་ཚེས་བཅུ་དང་ཉེར་ལྔ་ལ་རིག་འདུས་དང་ཡུམ་ཀའི་ཚོགས་མཆོད། དེ་མཚུངས་ཟླ་བ་ཕྱེད་ཀྱི་ཆ་ལ་མདོ་ལུགས་ཀྱི་གསོ་སྦྱོང་དང་། མར་ངོའི་ཉེར་དགུ་ལ་དགུ་གསོལ་དང་རྒྱུན་པར་གསོལ་ཀ་གྲྭ་ཚང་བླ་གྲྭ་ཆིག་བརྒྱ་ལྷག་གིས་ཉིན་བཞིན་གསོལ་ཀ་རྒྱུན་འཚོགས། གནམ་སྟོང་ལ་ཞི་ཁྲོའི་གནས་བརྒྱ་འཚོགས་པ་སོགས་དུས་ཀྱི་མཆོད་པ་ཆེ་ཕྲ་གང་གི་སྐབས་སུའང་དཀྱིལ་འཁོར་གྱི་གཟུགས་བརྙན་ཙམ་དང་། ཅ་ཅོའི་ངག་འདོན་ཙམ་མིན་པར་རྡོ་རྗེ་ཐེག་པའི་རྒྱུད་སྡེའི་དགོངས་དོན་ལྟར། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་ནས་བསྙེན་སྒྲུབ་ཡན་ལག་བཞིས་སྒྲུབ་པའི་གཞུང་བསྲང་ཐོག རང་ལུགས་དྲི་མ་མེད་པ་མཐོང་བརྒྱུད་ཆོ་གའི་ཕྱག་བཞེས་མ་ནོར་བས་སྒྲུབ་པའི་ཟུར་བརྒྱན་པ་བཅས། ཚད་དང་མཚན་ཉིད་ཀྱི་ཆོས་ཀུན་ཡོངས་སུ་ཚང་བའི་སྒོ་ནས་བསྙེན་སྒྲུབ་ཚུལ་བཞིན་མཛད་པས། ཡི་དམ་ལྷས་ཞལ་གཟིགས་དང་གསུང་འབྱོན་གནང་བ། སྒྲུབ་གཏོར་ལས་བདུད་རྩིའི་རྒྱུན་འབབ་པ། ཟོར་རྩེ་ལས་མེ་དཔུང་འབར་བ། ཧོམ་ཁུང་དུ་ཁྲག་འཁྱིལ་བ་སོགས་ལས་བཞི་གྲུབ་པའི་རྟགས་མཚན་ངོ་མཚར་བ་མངོན་སུམ་མཐོང་ཆོས་སུ་གྲུབ་པ་གྲངས་མེད་བྱུང་བར་གྲགས་སོ། །དེ་ལྟར་ཆོས་སྡེ་ཆེན་པོ་འདིའི་རིང་ལུགས་ཆོས་བརྒྱུད་ཀྱིས་མདོ་དབུས་ཁམས་གསུམ་སྟེ་བོད་ཆེན་པོའི་ལྗོངས་ཀུན་ཡོངས་སུ་ཁྱབ་པར་མ་ཟད། ཤར་ནུབ་ཀྱི་རྒྱ་མཚོ་ཆེན་པོ་བརྒལ་བའི་གླིང་ཆེན་དང་གླིང་ཕྲན་ཀུན་ཏུ་ཕྲིན་ལས་ཀྱི་འོད་སྣང་དཀར་པོ་འཕྲོས་དང་སྤྲོ་བཞིན་པ་ཇི་སྲིད་བསྐལ་པ་རྒྱ་མཚོར་ནུབ་པ་མེད་པར་གོང་ནས་གོང་དུ་འཕེལ་ཞིང་རྒྱས་པའི་སྨོན་འདུན་ཞུ། །
བཤད་པའི་སྡེ་ཤྲཱི་སེང་ཆོས་གྲྭ་ཆེན་མོའི་བྱུང་བ་བརྗོད་པ་རྒྱས་པར་བཤད་པ།
[རྩོམ་སྒྲིག]བཤད་པའི་ཆོས་སྡེ་ཆེན་མོ་དཔལ་གྱི་ནཱ་ལེནྡྲ་གཉིས་པ་གངས་ལྗོངས་མཁས་པའི་འབྱུང་གནས་ཤྲཱི་སེང་ཆོས་གྲྭ་ཆེན་མོ་ཡན་ལག་དང་བཅས་པའི་བྱུང་བ་བརྗོད་པ་ལ། དེ་ཡང་སྤྱི་ལོ་༡༨༤༨པ་བོད་རབ་བྱུང་བཅུ་བཞི་པའི་ས་སྤྲེལ་ལོར་རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེ་དང་། མཁན་ཆེན་སེང་ཕྲུག་པདྨ་བཀྲ་ཤིས། ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་བཅས་ཕྲིན་ལས་དུས་བབ་ཀྱི་སྐྱེས་བུ་ཆེན་པོ་དག་བཀའ་བགྲོས་ཏེ། དགོན་ལས་རྒྱང་གྲགས་གཅིག་གིས་རིང་བའི་མདུན་ཐང་ཆེན་མོའི་དཀྱིལ་དབུས། མཁས་པའི་ལྗགས་སམ་ཤེས་རབ་རལ་གྲིའི་དབྱིབས་དང་མཚུངས་པའི་ས་ཁད་ཅུང་མཐོ་བའི་སྤང་ལྗོངས་ཉམས་དགའ་བ། རིག་འཛིན་ཤྲཱི་སེང་ཧཱ་རྫུ་འཕྲུལ་གྱིས་བྱོན་ནས་བྲག་ལ་སྐུ་རྗེས་བཞག་སྟེ་བྱིན་གྱིས་བརླབས་ཤིང་། མདོ་མཁྱེན་བརྩེ་སྐྱེས་བུ་ཡེ་ཤེས་རྡོ་རྗེ་སྐུ་དངོས་ཀྱིས་ས་འདུལ་དང་རལ་གྲིས་ས་ཐིག་མཛད་པའི་གནས་དེར་རྫོགས་ཆེན་ཤྲཱི་སེང་ཧ་ཞེས་གྲགས་པའི་ཆོས་སྡེ་ཆེན་མོ་འདི་ཉིད་གསར་དུ་ཕྱག་བཏབ། དུས་དེར་གཉུག་མར་གནས་པའི་དགེ་འདུན་པ་ཞལ་གྲངས་ལྔ་བཅུ་ལྷག་བཞུགས་པའི་གཙུག་ལག་ཁང་གྲྭ་ཤག་དང་བཅས་པ་བསྐྲུན་པ་དང་། མདོ་ཁམས་ཉི་མ་ཤར་ཕྱོགས་ཀྱི་ལྗོངས་འདིར་མཉམ་མེད་ཤཀྱཱ་སེང་གེའི་རིང་ལུགས་འདུལ་བ་གཞི་གསུམ་གྱི་ཕྱག་བཞེས་གཙང་མའི་སྒོ་འཕར་ཐོག་མར་ཕྱེས། དུས་མཚུངས་མདོ་སྔགས་རིག་གནས་བཅས་པ་འཆད་ཉན་ཐོས་བསམ་གྱིས་གཏན་ལ་ཕབ་སྟེ་རྒྱལ་བསྟན་ལུང་རྟོགས་ཀྱི་བསྟན་པ་རིན་པོ་ཆེ་བཤད་དང་སྒྲུབ་པས་སྤེལ་བའི་སྲོལ་གསར་དུ་བཏོད། དེ་ནས་རིམ་པར་མཁན་ཆེན་པདྨ་བཛྲ་དང་དཔལ་སྤྲུལ་འཇིགས་མེད་ཆོས་ཀྱི་དབང་པོ་རྣམ་གཉིས་ཀྱིས་རྒྱུན་བསྐྱངས་པ་དང་། མཁས་མཆོག་གཞན་ཕན་སྣང་བས་མཐའ་རྒྱས་སུ་སྤེལ་ཞིང་། སྐྱབས་རྗེ་པདྨ་སྐལ་བཟང་རིན་པོ་ཆེས་སླར་གསོ་རྒྱ་སྐྱེད་གནང་བ་སྟེ། མཁན་རབས་དང་པོ་མཁས་བཙུན་གྲུབ་པའི་དབང་ཕྱུག་སེང་ཕྲུག་པདྨ་བཀྲ་ཤིས་ནས། རྒྱལ་སྲས་གཞན་ཕན་མཐའ་ཡས། ཉི་གྲགས་རིག་འཛིན་བཟང་པོ། རྒྱལ་རོང་མཁན་པོ་པདྨ་ཤེས་བྱ། དཔལ་སྤྲུལ་འཇིགས་མེད་ཆོས་ཀྱི་དབང་པོ། འབྲུག་ཡུལ་མཁན་པོ་བསོད་ནམས་དགེ་ལེགས། གླིང་སྤྲུལ་ཐུབ་བསྟན་ཉིན་བྱེད་རྒྱལ་མཚན། རྐང་ཚའི་མཁན་ཆེན་པདྨ་བཛྲ། གཏོ་རུ་མཁན་པོ་སྐལ་ལྡན་རྒྱ་མཚོ། རྐང་ཚའི་མཁན་པོ་རྡོ་རྗེ་རབ་བརྟན། ཕུར་ཚའི་མཁན་པོ་ཨ་དཀོན་ནམ་དཀོན་མཆོག་འོད་ཟེར། འཇུ་མི་ཕམ་ཕྱོགས་ལས་རྣམ་རྒྱལ། མཛོ་བའི་མཁན་པོ་དགེ་ལེགས་རྣམ་རྒྱལ། མཁན་པོ་ཚེ་རིང་ནོར་བུ། ཁྲོ་བའི་མཁན་པོ་དཀོན་མཆོག་གྲགས་པ། ཨ་གྲོའི་མཁན་པོ་བསོད་ནམས་ཆོས་འཕེལ། མཁན་སྤྲུལ་ཐུབ་བསྟན་ཚུལ་ཁྲིམས་རྒྱ་མཚོ། རྟ་བའི་མཁན་པོ་དཀོན་མཆོག་བཟང་པོ། རྒྱ་ཀོང་མཁན་པོ་གཞན་ཕན་སྣང་བ། མཁན་ཆེན་པདྨ་ཐེག་མཆོག་བློ་ལྡན། ཨ་བོའི་མཁན་པོ་འཇིགས་མེད་བློ་གྲོས། ཨ་གྲོའི་མཁན་པོ་ཡེ་ཤེས་རྒྱ་མཚོ། མཁན་ཆེན་ཐུབ་བསྟན་སྙན་གྲགས། ཉག་ཤུལ་མཁན་པོ་འགྱུར་མེད་འོད་གསལ་ལམ་འགྱུར་དགའ། མཁས་གྲུབ་ངག་དབང་ནོར་བུ། མཁན་པོ་འཆི་མེད་ཡེ་ཤེས། མཁན་ཆེན་འཇིགས་མེད་ཡོན་ཏན་མགོན་པོ། མཁན་ཆེན་པདྨ་ཚེ་དབང་རྒྱ་མཚོ། ཨ་གྲོའི་མཁན་པོ་འོད་ཟེར་མཐའ་ཡས། ཚོང་དཔོན་མཁན་པོ་ནོར་གཡང་ངམ་དཀོན་མཆོག་ཡེ་ཤེས་འོད་ཟེར། མཁན་པོ་ཆོས་དབྱིངས་རྣམ་རྒྱལ། མཁན་པོ་བསྟན་འཛིན་ཆོས་བཟང་། ཙཱ་རིའི་མཁན་པོ་ཆོས་འབྱོར་བཅས་རྩ་བའི་གདན་སའི་ལས་ཐོག་མཁན་པོ་མཁན་རབས་ནོར་བུའི་ཕྲེང་བ་ལྟ་བུ་སོ་གསུམ་བྱོན་པ་དང་། དེ་དག་གི་སློབ་བརྒྱུད་ཡང་སློབ་ཏུ་གཏོགས་པ་རིས་མེད་བསྟན་པ་འཛིན་པའི་མཁས་གྲུབ་ནམ་མཁའི་སྐར་ཚོགས་ལྟར་བྱོན་པ་ལས་གཙོ་བོའི་མཚན་ཙམ་སྨོས་ན། འཇམ་དབྱངས་མཁྱེན་བརྩེའི་དབང་པོ། འབམ་མདའ་དགེ་ལེགས་རྒྱ་མཚོ། འཇའ་བ་དགེ་བཤེས་མདོ་སྔགས། འབར་ཆུང་བཀྲ་ཤིས་རྒྱ་མཚོ། རས་པ་བསྟན་འཛིན་གྲགས་པ། ཨོ་རྒྱན་བསྟན་འཛིན་ནོར་བུ། མཁན་ཆེན་ཡོན་ཏན་རྒྱ་མཚོ། མི་ཉག་ཀུན་བཟང་བསོད་ནམས། མཁས་གྲུབ་ཀུན་དགའ་དཔལ་ལྡན། ཞེ་ཆེན་མ་ཧཱ་པཎ་ཆེན་འགྱུར་མེད་མཐུ་སྟོབས་རྣམ་རྒྱལ། རྒྱལ་ཚབ་པདྨ་རྣམ་རྒྱལ། མཁན་ཆེན་ཀུན་བཟང་དཔལ་ལྡན། མུ་ར་པདྨ་བདེ་ཆེན་བཟང་པོ། མཁས་གྲུབ་འཇིགས་མེད་སྐལ་བཟང་། སྨྱོ་ཤུལ་ལུང་རྟོགས་བསྟན་པའི་ཉི་མ། དགུ་རོང་ཧོ་ཐོག་ཐུ་ཨོ་རྒྱན་འཇིགས་བྲལ་ཆོས་དབྱིངས་རྡོ་རྗེ། ཨ་མདོ་བ་རིག་འཛིན་བདུད་འཇོམས་རྡོ་རྗེ། འབྲུག་ཆོས་དབྱིངས་རོལ་པའི་རྡོ་རྗེ། མཁས་མཆོག་གླག་བླ་ཆོས་འགྲུབ། མཁན་ཆེན་ངག་དབང་དཔལ་བཟང་ངམ་ངག་ཆུང་། བཱ་ཐུར་མཁན་ཆེན་ཐུབ་བསྟན་ཆོས་འཕེལ། རྨེ་བ་མཁན་ཆེན་ཚེ་དབང་རིག་འཛིན། མཁན་ནོར་བུ་བསྟན་འཛིན། བོད་སྤྲུལ་མདོ་སྔགས་བསྟན་པའི་ཉི་མ། མཁྱེན་བརྩེ་ཆོས་ཀྱི་བློ་གྲོས། སི་ཏུ་པདྨ་དབང་མཆོག་རྒྱལ་པོ། རྒ་བ་འཇམ་དབྱངས་རྒྱལ་མཚན། དིལ་མཁྱེན་རབ་གསལ་ཟླ་བ། ར་ཧོར་ཆོས་ཀྱི་གྲགས་པ། གསེར་ཁ་ཆོས་གྲགས། དབོན་སྟོད་མཁྱེན་རབ། ཟུར་མང་པདྨ་རྣམ་རྒྱལ། འབོ་གངས་དཀར་སྤྲུལ་སྐུ། མཁན་ཆེན་ངག་དབང་ནོར་བུ། མཁན་ཚེ་རིང་ནོར་དགའ། ཉག་རོང་གུ་རུ་སྤྲུལ་སྐུ། ཁུ་ནུ་བསྟན་འཛིན་རྒྱལ་མཚན། འབྲུག་དགེ་བཤེས་བསྟན་པ་རིན་ཆེན། དཀར་མཛེས་བྲག་དཀར་མཆོག་སྤྲུལ། བུ་རྒྱུད་ལྷ་བ་སྤྲུལ་སྐུ། མཁར་ལེགས་མཆོག་སྤྲུལ་པདྨ་ཀུན་བཟང་རང་གྲོལ། ར་སྐོར་མཁན་པོ་ཐུབ་བསྟན་ནོར་བུ། ཨ་སྐྱོང་མཁན་ཆེན་ཐུབ་བསྟན་བརྩོན་འགྲུས། དགེ་རྒྱལ་ཐུབ་བསྟན་རྣམ་རྒྱལ། ར་ཧོར་མཁན་ཆེན་ཟླ་བའི་འོད་ཟེར། གསེར་རྟ་མཁན་ཆེན་ཆོས་དབྱིངས་ཁྱབ་བརྡལ། ཨ་སྐྱོང་བླ་མ་རྟོགས་ལྡན་བློ་གྲོས་རྒྱ་མཚོ། མཁན་ཆེན་པདྨ་ཚེ་དབང་ལྷུན་གྲུབ། བྲག་མཁར་མཁན་པོ་ཚེ་རིང་ཉི་མ། དགེ་མང་མཁན་པོ་དབང་ལོ། མཁས་བཙུན་དབང་སྡིས་རིན་པོ་ཆེ། རྨེ་པ་མཁན་པོ་ཐུབ་བསྟན། མཁན་པོ་ཚེ་དབང་ཕུན་ཚོགས། སྤས་རབ་ཐོར་ཅོག འཛིང་པ་མཁན་པོ་རྡོ་རྗེ་སོགས་སྔོན་གཤེགས་དམ་པ་རྣམས་དང་། ད་ལྟའི་དུས་འདིར་བསྟན་འགྲོའི་དཔལ་མགོན་དུ་འཚོ་ཞིང་བཞེས་པ་སྐྱབས་རྗེ་རྡོ་གྲུབ་རིན་པོ་ཆེ་ཕྲིན་ལས་དཔལ་འབར། མཁན་ཆེན་ཡིད་བཞིན་ནོར་བུ་འཇིགས་མེད་ཕུན་ཚོགས། གཟན་དཀར་མཆོག་སྤྲུལ་ཐུབ་བསྟན་ཉི་མ། མི་ཉག་རྩ་ར་ཆོས་གྲགས། ར་ཧོར་མཁན་པོ་ཐུབ་བསྟན། མཆོག་སྤྲུལ་ཤེས་རབ་རྒྱལ་མཚན་སོགས་སྔོན་ནས་ད་ལྟའི་བར་དུ་གཞུང་བརྒྱ་སྨྲ་བའི་མཁས་དབང་དང་། ཉམས་རྟོགས་ལྡན་པའི་གྲུབ་མཆོག་ཡང་སློབ་དང་བཅས་པས་འཛམ་གླིང་ཕྱོགས་ཀུན་ཁྱབ་པའི་མཁས་གྲུབ་ཀྱི་ཚང་ཆེན་པོ་བརྡོལ་བས་རྫོགས་ཆེན་ཤྲཱི་སེང་ཆོས་གྲྭ་ཞེས་མཚན་སྙན་སྲིད་པའི་རྩེ་མོར་ཡོངས་སུ་གཡོ་བའི་ཆོས་སྡེ་ཆེན་མོ་འདི་བྱུང་ལ། དེ་དག་སློབ་བརྒྱུད་དང་བཅས་པའི་རྣམ་ཐར་འོག་ཏུ་རྒྱས་པར་འབྱུང་ཞིང་། འདིར་སྐབས་སུ་བབ་པ་ཡང་དར་བསྟན་པའི་མེ་རོ་གསར་དུ་གསོས་པའི་ཚུལ་ཅུང་ཟད་གླེང་བ་ནི། ཇི་སྐད་དུ། གཡོན་རུ་གཏེར་ཆེན་པདྨ་རྣམ་གྲོལ་གླིང་པའི་མ་འོངས་ལུང་བྱང་ལས། ཆོས་སྡེ་ཤྲཱི་སེང་ཧ་ཡི༔ མི་འཇིགས་སེང་གེའི་ཁྲི་མཆོག་ལ༔ པདྨའི་ཐུགས་སྤྲུལ་པདྨའི་མཚན༔ རྒྱལ་བསྟན་སྤྱི་དང་བྱེ་བྲག་གི༔ དགེ་ལེགས་ཡོན་ཏན་ཉིན་མོར་བྱེད༔ བཤད་སྒྲུབ་བསྟན་པ་སྤེལ་ནུས་པའི༔ པད་གཞོན་མང་པོ་འདབ་སྟོང་འཛུམ༔ ཅེས་ཚད་མར་གྱུར་པའི་ལུང་ལས་གསལ་བ་ལྟར་སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་ནས་བོད་རབ་བྱུང་བཅུ་བདུན་པའི་རྣམ་བྱུང་ཞེས་པ་ས་ཕོ་འབྲུག་གི་ལོའི་ཧོར་ཟླ་དགུ་པའི་ཚེས་ཉེར་གཉིས་རྒྱལ་བ་ལྷ་ལས་བབ་པའི་དུས་ཚེས་བཟང་པོའི་ཉིན། སྔ་འགྱུར་བཤད་སྒྲུབ་བསྟན་པའི་ཆུ་འགོ་རྫོགས་ཆེན་ཤྲཱི་སེང་ཆོས་གྲྭ་ཆེན་མོ་བསྐྱར་གསོ་དབུ་འཛུགས་ཀྱི་མཛད་སྒོ་སྤེལ་ཏེ་གངས་ལྗོངས་མཁས་པའི་འབྱུང་གནས་རུ་དམ་རྫོགས་ཆེན་ཤྲཱི་སེང་ལྔ་རིག་ཆོས་གྲྭ་ཆེན་མོ་ཞེས་མཚན་བསྒྱུར། དུས་དེར་ཆོལ་གསུམ་བོད་ཀྱི་ཡུལ་ནས་ན་གཞོན་སྡེ་སྣོད་འཛིན་པའི་ཁྱུ་ཚོགས་ཀྱི་ངུར་སྨྲིག་བླ་གོས་གསར་པས་ནམ་མཁའི་ཁ་དོག་བསྒྱུར་པ་དང་། ཐེག་གསུམ་ཆོས་ཀྱི་སྒྲ་དབྱངས་ཀྱིས་ཁོར་ཡུག་གངས་རིའི་ལྗོངས་ཀུན་སླར་ཡང་གཉིད་ལས་སློང་བར་བྱས། དེ་ནས་བཟུང་སྐྱབས་རྗེ་རིན་པོ་ཆེ་ཉིད་ཀྱིས་ཐུགས་ཁུར་དང་སྐུ་ཉིད་བསྟན་འགྲོའི་དོན་དུ་འཕགས་ཡུལ་དུ་ཕེབས་སྐབས་རླངས་འཁོར་གདོང་ཐུག་གིས་བརྡབ་སྐྱོན་བྱུང་བའི་ཟུངས་ཁྲག་དྲོན་མོའི་རིན་གྱིས་རྨང་གཞི་བཏིང་སྟེ། ཆོས་གྲྭའི་གྲྭ་ཤག་གཙུག་ལག་ཁང་དང་བཅས་པ་གཞི་ཁྱོན་ཆེ་བའི་རྒྱ་བསྐྱེད་བཞེངས་སྐྲུན་མཛད་པ་སྟེ། ཆོས་གྲྭ་ཆེན་མོའི་དཀྱིལ་དབུས་སུ་ཐུབ་བསྟན་ཉིན་མོར་བྱེད་པའི་གཙུག་ལག་ཁང་སུམ་ཐོག་ཅན་རྒྱ་ཁྱོན་སྔར་བས་ཉིས་འགྱུར་གྱིས་ཆེ་ཞིང་བཟོ་རྩལ་ཁྱད་དུ་འཕགས་པའི་རྐོས་རིས་ཀྱིས་མཛེས་པ། འོག་ཁང་དུ་འདུས་པ་སྟོང་ཕྲག་ཤོང་བའི་ཚོམས་ཆེན་ཀུན་དགའ་ར་བ་དང་། བར་ཁང་དུ་སྡོམ་རྒྱུན་ལྷ་ཁང་དང་གསང་སྙིང་ལྷ་ཁང་སོགས་ནང་བཞུགས་སྐུ་གསུང་ཐུགས་རྟེན་དང་བཅས་པ། མཐའ་འཁོར་དུ་ཤར་ཐོས་བསམ་ནོར་བུའི་གླིང་དང་། ལྷོ་ལུང་རིགས་བསམ་འཕེལ་གླིང་། ནུབ་ངེས་དོན་ཆོས་འཁོར་གླིང་། བྱང་བཤད་སྒྲུབ་རྣམ་ངེས་གླིང་བཅས་གླིང་ཕྱོགས་ཆེ་བཞིའི་གྲྭ་ཤག་ཉིས་ཐོག་ཅན་ཕྱོགས་རེ་ལ་ཁང་མིག་བརྒྱ་རེ་ཉེ་བས་ལྕགས་རི་ལྟར་ཡོངས་སུ་བསྐོར་བ།ཤར་ཐོས་བསམ་ནོར་བུའི་གླིང་དུ། མཚོ་སྔོན། སྦྲ་ནག །ཨ་མདོ། མགོ་ལོག རྫ་རྒྱུད། རྨེ་ཡུལ། གསེར་ལྗོངས། གཙང་ཐང་། ར་ཧོར། ཆ་ནང་། མདོ་ཆེན། ཧོར་སོག རྒྱ་ནག་བྱང་ཤར་པ་སོགས་ཀྱི་གྲྭ་རྒྱུན་བཞུགས་ཁོངས་དང་། ལྷོ་ལུང་རིགས་བསམ་འཕེལ་གླིང་དུ། དབུས་གཙང་། མངའ་དྭགས། སྤོ་ཀོང་། ཆབ་བྲག །ནག་སོག འདམ་ཤོད། སྐྱེ་མདོ། ནང་ཆེན། སྡེ་གླིང་། འབྲི་རྒྱུད་བར་སྟོད། རྒྱ་སྡེ་ཁག་གསུམ། བུ་རྒྱུད། ར་ཚང་། འབྲུག་འབྲས་བལ་མོན་སོགས་ཀྱི་གྲྭ་ཁོངས། ནུབ་ངེས་དོན་ཆོས་འཁོར་གླིང་དུ། ཏྲེ་ཤོད། ཉག་རྒྱུད། ས་སྨད། འཇང་རོང་། འབའ་གླིང་། ལི་ཐང་། འབྲི་རྒྱུད་སྨད་པ། ཧྥི་གླིང་པ་སོགས་ཀྱི་གྲྭ་ཁོངས། བྱང་བཤད་སྒྲུབ་རྣམ་ངེས་གླིང་དུ། མི་ཉག་རོང་འབྲོག གཡུ་མཁར། རྒྱལ་རོང་། ཁྲོ་ཆུ། དར་མདོ། གངས་དཀར། ཉག་ཆུ། བརྒྱད་ཟིལ། སྡེ་རོང་། འདབས་པ། རྒྱ་ནག་ལྷོ་ནུབ་པ། ཤང་ཨོའོ། ཐེའེ་ཝན། འཇར་པེན་པ་སོགས་ཀྱི་གྲྭ་ཁོངས་བཅས་གླིང་ཕྱོགས་སོ་སོའི་གྲྭ་ཁོངས་དང་།ཆོས་གྲྭ་ཆེན་མོའི་སློབ་གཞིའི་ཡིག་ཆ་དང་འཛིན་གྲྭའི་རིམ་པ་ནི། འཛིན་གྲྭ་དང་པོས་བྲིས་གཟུགས། དག་ཡིག སུམ་ཅུ་པ། ཡིག་བསྐུར་རྣམ་བཞག བསྡུས་གྲྭའི་རིགས་ལམ་ཆུང་བ། དགེ་ཚུལ་གྱི་ཚིག་ལེའུར་བྱས་པ་ལྔ་བཅུ་པ། རྒྱལ་སྲས་ལག་ལེན། བཤེས་སྤྲིང་། ལོ་རྒྱུས་བཅས་དང་། འཛིན་གྲྭ་གཉིས་པས། ལཉ་ཝར་བྲིས་གཟུགས། རྟགས་འཇུག བསྡུས་གྲྭའི་རིགས་ལམ་འབྲིང་བ། སྒྲ་མཚམས་སྦྱོར་ལྔ་པ། མདོ་སྔགས་སྨོན་ལམ་གྱི་འགྲེལ་པ། ཀཱ་རི་ཀ་སུམ་བརྒྱ་བ། སོར་མདོ། རིག་པ་དྲུག་ཅུ། སྙན་ངག་ལེའུ་བར་པ། དབུ་མ་བཞི་བརྒྱ་པ། འབྱེད་རྣམ་གཉིས། མི་ཕམ་མཁས་འཇུག །བོད་ཀྱི་ཆོས་འབྱུང་ལོ་རྒྱུས་ཀྱི་དུམ་བུ་དང་པོ་བཅས་དང་། འཛིན་གྲྭ་གསུམ་པས། སུམ་རྟགས་གཉིས་ཀྱི་དཀའ་འགྲེལ། སྙན་ངག་ལེའུ་ཐོག་མཐའ། བསྡུས་གྲྭའི་རིགས་ལམ་ཆེ་བ། སྒྲ་ཀ་ལཱ་པ། ལོ་རྒྱུས་ཆོས་འབྱུང་གི་དུམ་བུ་བར་པ། འདུལ་བ་མདོ་རྩ་བ། དབུ་མ་རིགས་ཚོགས། ཡིད་བཞིན་མཛོད་ཀྱི་གྲུབ་བསྡུས། མདོ་སྡེ་རྒྱན། མངོན་པ་ཀུན་བཏུས་བཅས་དང་། འཛིན་གྲྭ་བཞི་པས། སྒྲ་ཙནྡྲ་པ། བློ་རིགས་དང་རྟགས་རིགས། འདུལ་བ་མེ་ཏོག་ཕྲེང་རྒྱུད། མངོན་པ་མཛོད། དབུ་མ་འཇུག་པ། དབུ་མ་རྒྱན། རྒྱུད་བླ་མ། གསང་སྙིང་མཆན་འགྲེལ་བཅས་དང་། འཛིན་གྲྭ་ལྔ་པས། མངོན་རྟོགས་རྒྱན་གྱི་མཆན་འགྲེལ། ཚད་མ་རིགས་གཏེར། ཡོན་ཏན་མཛོད། མངོན་པ་མཆིམས་ཆེན། འཛིན་གྲྭ་དྲུག་པས། ཚད་མ་རྣམ་འགྲེལ། སྡོམ་གསུམ་དཔག་སྙེ། འཇུག་འགྲེལ་ཆེན་མོ་ཁག ཤེར་ཕྱིན་ཡུམ་དོན་རབ་གསལ། གྲུབ་མཐའ་མཛོད། ཡིད་བཞིན་མཛོད་བཅས་དང་། འཛིན་གྲྭ་བདུན་པས། རོང་ཟོམ་ཐེག་ཆེན་ཚུལ་འཇུག་དང་སྣང་བ་ལྷ་སྒྲུབ། སྙིང་འགྲེལ་གསང་བདག་དགོངས་རྒྱན། མན་ངག་མཛོད། ཚིག་དོན་མཛོད་བཅས་དང་། འཛིན་གྲྭ་བརྒྱད་པས། རོང་ཟོམ་དཀོན་མཆོག་འགྲེལ། གསང་བདག་ཞལ་ལུང་། གནས་ལུགས་མཛོད། ཐེག་མཆོག་མཛོད། ཆོས་དབྱིངས་མཛོད་དང་། འཛིན་གྲྭ་དགུ་པ་ཡན་གྱི་ལོ་རིམ་བཞི་ཚན་གསུམ་པས། ངལ་གསོ་སྐོར་གསུམ། རྒྱུད་བཅུ་བདུན། སྙིང་ཐིག་ཡ་བཞིའི་ཁྲིད་སྦྱང་རྒྱས་པ་སྨིན་དབང་དང་བཅས་ནོད་རྒྱུ་བཅས། མདོར་ན་ལོ་ངོ་བཞི་ཚན་གསུམ་གྱི་རིང་མདོ་སྔགས་རིག་གནས་དང་བཅས་པའི་དགོངས་འགྲེལ་གཞུང་ལུགས་ཚད་མ་རྒྱ་གར་འཕགས་པའི་ཡུལ་གྱི་འཛམ་གླིང་མཛེས་པར་བྱེད་པའི་རྒྱན་དྲུག་མཆོག་གཉིས་ཀྱི་ལེགས་བཤད་ཀྱིས་སྲོག་བཟུང་ཞིང་། གངས་ལྗོངས་འཇམ་པའི་དབྱངས་དངོས་རྣམ་གསུམ་སོགས་རིས་མེད་མཁས་པའི་གཞུང་ལུགས་ཆེན་མོ་དག་ལ་ཞོར་གཟིགས་ཀྱིས་བཤད་པའི་ཟུར་བརྒྱན་པ་དང་། རང་ལུགས་སྔ་འགྱུར་རྙིང་མའི་ཀུན་མཁྱེན་རོང་ཀློང་རྣམ་གཉིས་དང་། སྨིན་གླིང་ཡབ་སྲས། མངའ་རིས་པཎ་ཆེན། རིག་འཛིན་འཇིགས་མེད་གླིང་པ་སོགས་མཁས་གྲུབ་རྣམས་ཀྱི་གསུང་འབུམ་དང་། ཁྱད་པར་ཆོས་སྡེ་འདི་ནས་བྱོན་པའི་མཁས་དབང་ཆེན་པོ་རྒྱལ་སྲས་གཞན་ཕན་མཐའ་ཡས། དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ། མཁས་མཆོག་གཞན་ཕན་སྣང་བ། འཇམ་མགོན་མི་ཕམ་ཕྱོགས་ལས་རྣམ་རྒྱལ། བོད་སྤྲུལ་མདོ་སྔགས་བསྟན་པའི་ཉི་མ་བཅས་ཀྱིས་མཛད་པའི་ཡིག་ཆ་ཁག་གིས་རང་ལུགས་ཐུན་མིན་གྱི་གྲུབ་མཐའི་གཞུང་འཛུགས་པར་བྱེད་དོ། །དེ་ལྟར་མདོ་སྔགས་རིག་གནས་དང་བཅས་པར་འཆད་ཉན་མཐར་ཕྱིན་པའི་མཚན་རྟགས་ཐོབ་ཐང་འཛིན་གྲྭའི་ལོ་རིམ་འཕར་ཆགས་དང་སྦྱངས་འབྲས་ཀྱི་ཡོན་ཏན་དངོས་ལ་བསྟུན་ཏེ་ཇི་ལྟར་འབུལ་ཚུལ་ནི། ཆོས་རྗེ་པདྨ་སྐལ་བཟང་རིན་པོ་ཆེའི་ཞལ་སྔ་ནས་མཛད་པའི་ཤྲཱི་སེང་ཆོས་གྲྭའི་བཅའ་ཡིག་དྲང་སྲོང་དགྱེས་པའི་བཀའ་ལུང་དུ་ཞིབ་པར་གཏན་ལ་ཕབ་པར་མཛད་པ་སྟེ། དེ་ཡང་སྐྱོར་དཔོན་ནི། གཞུང་ཕྱོགས་རེའི་ཚིག་དོན་འགྲོལ་ནུས་ཤིང་འཆད་རྩོད་ལ་གཞན་དྲིང་མི་འཇོག་པ། གཞུང་སོ་སོའི་རབ་འབྱམས་པ་ནི། གཞུང་རེ་རེའི་དཀའ་གནད། མཐའ་དཔྱད། དོགས་གཅོད་དང་བཅས་པར་དགག་བཞག་སྤོང་གསུམ་ལ་འགྲན་ཟླ་དང་བྲལ་བ། མཁན་ཆུང་ནི། སྔར་གྱི་སྟེང་འདུལ་བའི་ལས་ཆོག་ལ་ལྷག་པར་མཁས་ཤིང་སྤང་བླང་འདོམས་པ་ལ་མི་དམན་ཞིང་ཆོས་སྡེ་ཁག་གི་མཁན་ཚབ་ཕེར་བ། མཁན་ཆུང་ཁྲི་བ་ནི། གཞུང་བཀའ་པོད་ལྔ་ལ་ཐོས་བསམ་རྒྱ་ཆེ་ཞིང་ཉམས་ལེན་གོ་ཡུལ་དུ་མ་ལུས་པ། མཁས་བཙུན་གཉིས་ལྡན་ལུགས་གཉིས་ཀྱི་གཟིགས་པ་ཡངས་པ། ཕྱོགས་ཀྱི་ཡན་ལག་གི་ཆོས་སྡེ་སོ་སོའམ་བཤད་གྲྭ་སོ་སོའི་མཁན་པོར་འོས་པ། གཞུང་ཆེན་རབ་འབྱམས་པ་ནི། གཞུང་ཆེན་པོ་བཅུ་གསུམ་ཆ་ལག་འགྲེལ་ཊཱིཀ་དང་བཅས་པར་ཐོས་བསམ་གྱིས་རྩ་བདར་ཆོད་པ། འཛིན་གྲྭ་བཞིའི་དམ་བཅའི་མཚན་རྟགས་བཞེས་ཤིང་བསྟན་བཅོས་རྩོམ་པའི་རྒྱུ་ཚོགས་ཚང་བ། བརྟན་མཁས་ཀྱི་ཡོན་ཏན་དང་ལྡན་ཞིང་འཆད་རྩོད་རྩོམ་གསུམ་ལ་སྤོབས་པའི་གཟེངས་མཐོ་བ། སྔགས་རབ་འབྱམས་པ་ནི། གསང་སྔགས་ཀྱི་རྒྱུད་སྡེ་ཕྱི་ནང་ཀུན་བསྣོལ་མཚམས་མ་ལོག་པར་འཆད་ཁྲིད་ནུས་ཤིང་རང་རྒྱུད་ལ་བོགས་ཐོན་པ། མདོ་སྔགས་རབ་འབྱམས་པ་ནི། མདོ་དང་སྔགས་ཀྱི་ཐོས་བསམ་སྔ་མའི་རྨང་གཞིའི་སྟེང་གཞུང་ལྔའི་རྩ་བ་དང་སྒྱུ་འཕྲུལ་གསང་བ་སྙིང་པོ་སྤྱི་དོན་དང་བཅས་པ་ཐུགས་ཐོག་ནས་རྒྱས་བཤད་ཞིབ་འགྲེལ་ནུས་པ། མཁན་ཆེན་ནི། བཅུ་ཕྲག་རིག་པའི་གནས་ལ་མཁྱེན་པ་རྒྱས་ཤིང་ལྟ་སྒོམ་སྤྱོད་པའི་ཉམས་བཞེས་ཁྱད་དུ་འཕགས་པ། རྒྱལ་བའི་བསྟན་པ་འཛིན་སྐྱོང་སྤེལ་བའི་ཐུགས་སྟོབས་ཆེ་བ། ཆོས་གྲྭ་ཆེན་པོ་རང་གི་མཁན་ཚབ་ཀྱི་བཞུགས་ཁྲིར་དབང་པ། མཁན་ཆེན་ཁྲི་པ་ནི། མདོ་སྔགས་རིག་གནས་དང་བཅས་པར་རང་བྱན་ཆུད་ཅིང་དམ་པའི་ཚུལ་དགུའི་ཡོན་ཏན་དང་ལྡན་པ། བསྙེན་སྒྲུབ་ལས་གསུམ་ལ་དབང་འབྱོར་བ། སྔར་བྱོན་མཁན་རབས་ནོར་བུའི་ཕྲེང་ཚར་གྱི་ཆོས་ཁྲིར་བཞུགས་པར་དབང་བ། ཁྲི་ཆེན་ནི། མཁན་ཆེན་ཁྲི་འཛིན་གྱི་ལས་ཐོག་ལོ་དུས་བཞི་ཚན་གཉིས་ཚང་ཞིང་འོད་གསལ་རྫོགས་པ་ཆེན་པོའི་ཟབ་རྒྱས་ཆོས་ཀྱི་བདུད་རྩིས་བུ་སློབ་ཁྲི་ཕྲག་བསྐྱངས་པ། རིམ་པ་དང་པོའི་བསྟན་འཛིན་སྐྱེས་ཆེན་དག་གི་སྐུའི་ཡོངས་འཛིན་དུ་འོས་པ། ཁྱབ་བདག་པ་ནི། ཤེས་བྱའི་ཆོས་ལ་མཁྱེན་པའི་བློ་གྲོས་རྒྱས་ཤིང་། གྲུབ་པའི་ས་མཐོར་གཤེགས་པའི་ལམ་རྟགས་ཀྱི་ཡོན་ཏན་བརྙེས་པ། ཟབ་གསང་ཆོས་ཀྱི་གཏེར་མཛོད། སྨིན་གྲོལ་དབང་གི་བུམ་པ། རིགས་དང་དཀྱིལ་འཁོར་ཀུན་ཀྱི་གཙོ་བོར་བཞེངས་པ། རིས་སུ་མ་ཆད་པའི་བསྟན་འཛིན་ཆེ་དགུ་དག་གིས་ཞབས་ཀྱི་པད་མོ་སྤྱི་བོར་ལེན་འོས་པ་བཅས་སོ། །དེ་ལྟར་ཆོས་སྡེ་ཆེན་མོ་འདི་ཉིད་ཀྱི་ཕྱི་ནང་གསང་གསུམ་གྱི་བཅའ་སྒྲིག་སོགས་ཞིབ་པའི་ལོ་རྒྱུས་སྐྱབས་རྗེ་མཆོག་གི་ཞལ་སྔ་ནས་མཛད་པའི་གསུང་རྩོམ་ཁག་ཏུ་གསལ་བས་འདིར་ཡང་དུ་བཀོད་པར་མ་བྱས་སོ། །
བསྟན་པའི་བདག་པོ་གྲུབ་དབང་རྫོགས་ཆེན་པ་སྐུ་ཕྲེང་དང་པོ་པདྨ་རིག་འཛིན།
[རྩོམ་སྒྲིག]དེ་ཡང་འོད་གསལ་གསང་བ་སྙིང་ཐིག་གི་བསྟན་པ་རིན་པོ་ཆེ་མདོ་ཁམས་སྨད་ཀྱི་ལྗོངས་སུ་ཐོག་མར་འདྲེན་པའི་ཤིང་རྟ་ཆེན་པོ་གྲུབ་པའི་དབང་ཕྱུག་རྫོགས་ཆེན་པདྨ་རིག་འཛིན་ཞེས་མཚན་སྙན་གྱི་གྲགས་དཀར་སྲིད་པ་གསུམ་ན་གཡོ་བ་གང་ཉིད་ངེས་པ་དོན་གྱི་དབང་དུ་ན། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོས་བསྐལ་པ་བཟང་པོ་འདི་ཡི་གོང་རོལ་དུ་བྱང་ཆུབ་མཆོག་ཏུ་ཐུགས་བསྐྱེད་པ་ནས། བྱང་ཆུབ་ཀྱི་སྤྱོད་པ་རླབས་པོ་ཆེ་ལ་གྲངས་མེད་གསུམ་དུ་བསླབ་པའི་དང་པོར་སངས་རྒྱས་བདུན་ཁྲི་ལྔ་སྟོང་བསྙེན་བཀུར་པའི་ཐ་མར་བྱོན་པ། བདེ་གཤེགས་རྒྱལ་བ་རིན་ཆེན་གཙུག་གཏོར་ཅན་ཞེས་སེམས་ཅན་འཆི་ཁ་མའི་རྣ་བར་མཚན་ཙམ་བསྒྲགས་པས་ཀྱང་། གནས་ངན་ལེན་གྱི་སྐྱེ་སྒོ་གཏན་དུ་བཅད་དེ་རྣམ་པར་གྲོལ་བའི་གོ་འཕང་མཆོག་ལ་དབུགས་འབྱིན་པར་མཛད་པའི་ཐུགས་བསྐྱེད་དང་སྨོན་ལམ་གྱི་མཐུ་ཟབ་མོ་སངས་རྒྱས་གཞན་ལས་རྨད་དུ་བྱུང་བ་དེ་ཉིད་དུ་མངོན་པར་རྫོགས་པར་སངས་རྒྱས་སུ་ཟིན་ཀྱང་། ཇི་སྐད་དུ། ཡབ་སྲས་མཇལ་པའི་མདོ་ལས། དཔའ་བོ་ཆེན་པོ་ཐབས་མཁས་ཏེ། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་དུ་ཡང་འདྲེན་པ་ཁྱེད། །སངས་རྒྱས་མང་པོར་བསྟན་པར་མཛད། །ཅེས་དང་། ཕལ་པོ་ཆེ་ལས། ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང་། །ཞེས་གསུངས་པ་ལྟར། མཐའ་ཡས་པའི་འགྲོ་བར་བརྩེ་བའི་སྙིང་རྗེའི་འཇུག་པ་ཚད་མེད་པས་དག་ཆེན་ཡེ་ཤེས་ཀྱི་རོལ་གར་བསམ་མི་ཁྱབ་པ་འབྱམས་སུ་ཀླས་པ་ལས། བསྐལ་བཟང་རྣམ་འདྲེན་བཞི་པའི་བསྟན་པ་རིན་པོ་ཆེ་འདི་ལ་ཟབ་གསང་རྫོགས་པ་ཆེན་པོའི་ཉེ་ལམ་ནས་གདུལ་བྱ་མཆོག་གི་རིགས་ཅན་དག་རྣམ་པར་གྲོལ་བའི་ས་ལ་འགོད་ཕྱིར་འཕགས་བོད་ཀྱི་ཡུལ་གྲུར་མཁས་དང་གྲུབ་པའི་རྣམ་རོལ་དུ་ཇི་ལྟར་བྱོན་པའི་ཚུལ་རྗེ་ཉིད་ཀྱི་ཞལ་གསུང་དང་། ཚད་མར་གྱུར་པའི་གཏེར་ལུང་དག་ལས་ཇི་སྐད་བསྟན་པའི་ཚུལ་ནི། རྒྱ་གར་འཕགས་པའི་ཡུལ་དུ་གྲུབ་བརྒྱའི་སྤྱི་མེས་དཔལ་ས་ར་ཧའམ་མདའ་སྣུན་རྗེ་དང་། གསང་རྒྱུད་རྒྱ་མཚོའི་མངའ་བདག་གྲུབ་ཆེན་ཀུ་ཀུ་རི་པ། འཇའ་ལུས་འཕོ་བ་ཆེན་པོའི་སྐུར་བཞེངས་པཎ་ཆེན་དྲི་མེད་བཤེས་གཉེན། བརྟུལ་ཞུགས་སྤྱོད་པའི་རྣལ་འབྱོར་ལྭ་བ་པ་དང་ཕག་ཚང་པ་སོགས་གྲུབ་པའི་དབང་ཕྱུག་ཆེན་པོ་རྣམས་དང་། གངས་ཅན་བོད་ཀྱི་ཡུལ་དུ་བསྟན་པ་སྔ་དར་གྱི་སྐབས་སུ། ཨོ་རྒྱན་ཆེན་པོའི་ཐུགས་སྲས་མཐུ་སྟོབས་ནུས་པའི་མངའ་བདག་ལང་གྲོ་དཀོན་མཆོག་འབྱུང་གནས། དྲག་པོ་མངོན་སྤྱོད་ཀྱི་ནུས་པས་ལྷ་སྲིན་བྲན་དུ་འཁོལ་བ་གླང་ཆེན་དཔལ་གྱི་སེང་གེ །སྤྲུལ་པའི་ཆོས་རྒྱལ་ཆེན་པོ་མངའ་བདག་ཁྲི་རལ་པ་ཅན་སོགས་དང་། རྒྱལ་བསྟན་ཕྱི་དར་གྱི་དུས་སུ། རྗེ་བཙུན་བཞད་པ་རྡོ་རྗེའི་ཐུགས་སྲས་དམ་པ་རས་ཆུང་རྡོ་རྗེ་གྲགས་པ་དང་། སྙན་བརྒྱུད་གདམས་པའི་སྲོལ་འཛིན་ངན་རྫོང་སྟོན་པ་བྷོ་དྷི་ར་ཛ། སྒྲུབ་བརྒྱུད་བསྟན་པའི་ཤིང་རྟ་ཀརྨ་པ་དུས་གསུམ་མཁྱེན་པ། སྣང་སྲིད་ཆོས་སྐུར་གྲོལ་པ་རྗེ་བཙུན་སྟག་ལུང་ཐང་པ། རྟོགས་པའི་དབང་ཕྱུག་གྲུབ་ཐོབ་གླིང་རྗེ་རས་པ། བརྟུལ་ཞུགས་སྤྱོད་པས་མྱོས་པ་གྲུབ་ཆེན་ཨོ་རྒྱན་པ། འཇམ་དཔལ་དབྱངས་དངོས་ཐམས་ཅད་མཁྱེན་པ་རྗེ་བློ་བཟང་གྲགས་པའི་དཔལ་སོགས་ཁམས་དབང་སྣ་ཚོགས་པའི་གདུལ་བྱའི་སྣང་ངོར་སྤྲུལ་པའི་སྐྱེ་རྒྱུད་ཇི་སྙེད་ཅིག་བྱོན་ཅིང་། དེ་ལྟར་སྒྱུ་འཕྲུལ་གྱི་རོལ་པ་ཚད་མེད་པ་རྟག་ཁྱབ་ལྷུན་གྲུབ་ཏུ་འབྱུང་བ་ནི་རྒྱལ་བ་རྣམས་ཀྱི་ཆོས་ཉིད་ལས་ཚུར་མཐོང་གིས་རིམ་དང་ཅིག་ཅར་གཅིག་དང་ཐ་དད་སོགས་སུ་དཔྱད་པ་ནི་གནས་མ་ཡིན་ཏེ། མདོ་སྡེ་ཕལ་པོ་ཆེ་ལས། ཇི་ལྟར་ཟླ་བ་ཤར་གྱུར་པ། །ཚད་མེད་པ་ཡི་གཟུགས་བརྙན་རྣམས། །ཆུ་ཡི་སྣོད་དུ་སྣང་གྱུར་ཀྱང་། །ཟླ་བ་གཉིས་སུ་གྱུར་པ་མེད། །སངས་རྒྱས་ལ་ནི་གཉིས་སྣང་མེད། །འདི་ལ་གཅིག་ཀྱང་ཡོད་མ་ཡིན། །སྐུ་ནི་གཉིས་སམ་གསུམ་དུ་མེད། །ཇི་ལྟར་སེམས་ཅན་བསམ་པ་བཞིན། །ཚད་མེད་པར་ནི་རབ་ཏུ་སྣང་། ། ཞེས་དང་། རྒྱུད་བླ་མ་ལས། གང་ཕྱིར་གདུལ་བྱ་དག་པ་ཡི། །ཆུ་ཡི་སྣོད་ནི་ཐམས་ཅད་ལ། །བདེ་གཤེགས་ཉི་མའི་གཟུགས་བརྙན་ནི། །དཔག་ཏུ་མེད་པ་གཅིག་ཅར་འཆར། །ཞེས་པ་ལྟར་ལ། དེ་ལས་སྙིགས་མའི་དུས་འདིར། འོད་གསལ་རྫོགས་པ་ཆེན་པོའི་བསྟན་པ་གཞིར་བཞེངས་སུ་བསླང་བར་བསམ་བཞིན་སྐྱེ་སྲིད་དུ་བྱོན་པ་གྲུབ་དབང་རིན་པོ་ཆེ་མཆོག་ནི། གཏེར་ཆེན་བདུད་འདུལ་རྡོ་རྗེའི་གཏེར་ལུང་ལས། རླངས་དཔལ་སྤྲུལ་པ་རི་བོའི་ཕྱོགས་སུ་འབྱུང༔ པདྨའི་མིང་ཅན་བྲང་ལ་སྨེ་བས་བརྒྱན༔ ཞེས་དང་། རིག་འཛིན་ཉི་མ་གྲགས་པའི་གཏེར་བྱང་ལས། ཡོན་ཏན་རིག་འཛིན་བཱི་མ་ལ༔ ཤར་ཕྱོགས་མདོ་ཁམས་སྨད་ནས་འབྱུང༔ པདྨའི་མིང་ཅན་བརྟུལ་ཞུགས་ཅན༔ བརླ་གཡས་སྨེ་བ་སྤྱན་འདྲས་མཚན༔ ཞེས་སོགས་འཁྲུལ་བྲལ་རྡོ་རྗེའི་བཀའ་ལུང་ཚད་མས་ལན་གཅིག་མིན་པར་ཡང་ཡང་བསྔགས་པ་ལྟར། ཡུལ་གངས་ཅན་ཆོལ་གསུམ་ཆོས་ཀྱི་ཞིང་ཁམས་ལས་མདོ་ཁམས་རི་བོ་ཆེའི་ཕྱོགས་སུ། བོད་རབ་བྱུང་བཅུ་པའི་ཤིང་མོ་གླང་གི་ལོ་སྟེ་སྤྱི་ལོ་༡༦༢༥པར་བཟོ་རིག་མཁས་པའི་ཡང་རྩེར་སོན་པ་བལ་པོ་བཀྲ་ཤིས་བྱ་བའི་སྲས་སུ་སྐུ་འཁྲུངས། ཆུང་ངུ་ཉིད་ནས་བཟང་པོའི་བག་ཆགས་ལྷན་སྐྱེས་སུ་མངའ་བས་ངུར་སྨྲིག་གི་རྒྱལ་མཚན་འཛིན་པ་ལ་མཆོག་ཏུ་མོས་པ་དང་། ཡི་གེའི་རིགས་དང་བཟོའི་རིག་པ་སོགས་གཙུག་ལག་གི་གནས་ཀུན་ཚེགས་མེད་པར་མཁྱེན་པའི་རྣམ་དཔྱོད་ཡངས་པ་བཅས་ངོ་མཚར་བའི་མཚན་རྟགས་རང་ཆས་སུ་མངའ་བའི་ཚུལ། རྗེ་ཉིད་ཀྱི་གསུང་མགུར་དྲང་སྲོང་དགྱེས་པའི་གླུ་དབྱངས་ལས་ཀྱང། སྐྱེས་པ་རི་བོའི་ཕྱོགས་སུ་སྐྱེས། །ཚར་བ་ཆབ་མདོའི་ཕྱོགས་སུ་ཚར། །ལོ་བཅུ་ལོན་ནས་ཡི་གེ་བསླབས། །ཆུང་ནས་རབ་བྱུང་ཆ་ལུགས་བྱས། །མཚན་ལྡན་བླ་མ་དམ་པ་བསྟེན། །བརྩེ་བའི་ཐུགས་ཀྱིས་བུ་བཞིན་བསྐྱངས། །དབང་ལུང་གདམས་པ་དཔག་མེད་ཞུས། །ཞེས་གསུངས་པ་ལྟར་དང་། དེ་ནས་མི་རིང་པར་མཁས་གྲུབ་ཀརྨ་ཆགས་མེད་དང་། གྲུབ་དབང་རིག་འཛིན་ཆོས་ཀྱི་རྒྱ་མཚོ། གོང་ས་རྒྱལ་མཆོག་ལྔ་པ། གཏེར་སྟོན་བདུད་འདུལ་རྡོ་རྗེ། རིག་འཛིན་གཏེར་བདག་གླིང་པ་སོགས་སྔ་ཕྱིར་ཡོངས་འཛིན་མཁས་གྲུབ་ཀྱི་སྐྱེས་ཆེན་སུམ་ཅུ་ལྷག་བསྟེན་ཏེ་མདོ་རྒྱུད་མན་ངག་རྒྱ་མཚོར་གསན་བསམ་མཐར་ཕྱིན་མཛད་པ་དང་། དཔལ་གྱི་བསམ་ཡས། ལྷོ་བྲག་མཁར་ཆུ། ཡེར་པ་ལྷ་རི། ཤང་ཟམ་བུ་ལུང། བྱང་གི་གནམ་མཚོ། དཔལ་གྱི་ཙ་རི་ཏྲ་སོགས་སྒྲུབ་པའི་གནས་ཆེན་རྣམས་སུ་བསྐྱེད་རྫོགས་རིམ་གཉིས་ཀྱི་རྣལ་འབྱོར་སྤྱི་དང་། ཁྱད་པར་འོད་གསལ་རྫོགས་པ་ཆེན་པོ་མན་ངག་སྙིང་ཐིག་གི་ཟབ་གནད་ལ་ཉམས་བཞེས་རྩལ་དུ་བཏོན་ནས་ཀུན་བཟང་ཆོས་སྐུའི་རྒྱལ་ཐབས་ལ་མངའ་དབང་བསྒྱུར་བ་སྟེ། ཐོག་མར་དགུང་ལོ་བཅུ་གསུམ་ཙམ་ནས་སྒྲུབ་བརྒྱུད་བསྟན་པའི་ཉི་མ་ཆགས་མེད་རིན་པོ་ཆེའི་ཞབས་པད་མཉེས་པ་གསུམ་གྱིས་བསྙེན་ཏེ་གསར་རྙིང་གི་གདམས་ཁྲིད་དུ་མ་གསན་བཞེས་དང་། ཕྱག་རྫོགས་ཀྱི་རྣལ་འབྱོར་ལ་ཉམས་ལེན་རྩེ་གཅིག་ཏུ་མཛད་པས་ཞག་ཉེར་གཅིག་ཙམ་ནས་འོད་གསལ་ཉིན་མཚན་ཁོར་ཡུག་ཏུ་འདྲེས་ཤིང་བདེ་གསལ་མི་རྟོག་པའི་ཉམས་སྣང་རྩོལ་མེད་དུ་སྐྱེས། རིམ་པར་བླ་མའི་མདུན་ནས་རཏྣའི་བླ་མ་ཞི་དྲག་དང་། ཕུར་པ། ཉང་གི་རྟ་ནག །ཀརྨ་གླིང་པའི་ཞི་ཁྲོ་སོགས་བཀའ་གཏེར་ཕྲིན་སྒྲུབ་ཀྱི་དབང་ལུང་གསན། དེ་སྐབས་ཆགས་མེད་རིན་པོ་ཆེ་ཉིད་ལའང་ཐུགས་དམ་གྱི་བོགས་ཐོན་བྱུང་ཚུལ། རང་རྣམ་ལས། རྟོགས་ལྡན་པདྨ་རིག་འཛིན་ལ། །ལུང་ནི་མང་ཞིག་བྱས་པའི་ཚེ། །སེམས་ངོ་ལ་ཡང་བོགས་ཐོན་ཞིང་། །ལུང་དང་འདྲེས་ནས་འགྲོ་བ་བྱུང་། །ཞེས་གསུངས། འདི་སྐབས་ཡི་དམ་ཐུགས་རྗེ་ཆེན་པོ་དང་ཨོ་རྒྱན་རྡོ་རྗེ་འཆང་གང་བྱེད་བརྟག་པས། རྗེ་ཉིད་ཀྱི་གཟིམས་ལམ་དུ་སློབ་དཔོན་ཆེན་པོའི་སྐུ་བརྙན་མཇལ་བ་དང་། ཆགས་མེད་རིན་པོ་ཆེའི་ཐུགས་དམ་བརྟག་པར་ཡང་ཨོ་རྒྱན་བསྒྲུབས་ན་ལེགས་ཚུལ་བྱུང་བ་ལྟར། ཐུགས་དམ་ཀྱི་མཐིལ་རཏྣའི་ཐུགས་སྒྲུབ་ཞི་བ་རྩལ་དུ་བཏོན་ནས་བསྙེན་པས་ཨོ་རྒྱན་ཆེན་པོས་ཞལ་གཟིགས་དང་སངས་རྒྱས་བྱང་སེམས་དཔའ་བོ་རྣལ་འབྱོར་མའི་ཚོགས་ཀྱིས་བྱིན་གྱིས་བརླབས། གཞན་ཡང་བསྐྱེད་རྫོགས་རྩ་རླུང་གི་གདམས་པའི་ཞུན་ཐར་བཅད་དེ་ཉམས་བཞེས་གནད་སྨིན་མཛད་པས། ཉིན་ཞག་རེ་ལ་རླུང་གི་རྒྱུ་བ་གཉིས་རེས་ཆོག་པ་སོགས་གྲུབ་པའི་རྟགས་མཚན་མཐའ་ཡས་པ་མངོན་དུ་གྱུར། ཆགས་མེད་རིན་པོ་ཆེས་རྡོ་རྗེའི་རྒྱལ་ཚབ་ཏུ་དབང་བསྐུར་ནས་སྨིན་གྲོལ་ཟབ་ཁྲིད་ཀྱི་རྒྱུན་བསྩལ་བར་བཀས་བསྐུལ། དགུང་གྲངས་ཉེར་བཞི་པར་ཀུན་སྤངས་བྱ་བཏང་གི་ཚུལ་གྱིས་སྤོ་བོའི་ཕྱོགས་སུ་ཕེབས་པས་གཏེར་ཆེན་བདུད་འདུལ་རྡོ་རྗེ་མཇལ། གཏེར་ཆེན་མཆོག་གིས་རང་གཏེར་དམ་ཆོས་སྤྲུལ་སྐུ་སྙིང་ཐིག་གི་ཆོས་བདག་ཏུ་ངོས་འཛིན་དང་ལུང་བསྟན་གྱིས་དབུགས་དབྱུང་། དབང་ལུང་གཏད་རྒྱ་བཅས་བསྔགས་བརྗོད་རྒྱ་ཆེ་བས་ཆོས་ཀྱི་བདག་པོར་མངའ་གསོལ། གཞན་ཡང་རིག་འཛིན་འཇའ་ཚོན་སྙིང་པོའི་ཐུགས་སྲས་དགེ་བའི་བཤེས་གཉེན་ཀུན་མཁྱེན་པ་ལས་རྟ་ཕག་སོགས་ཀྱི་དབང་ལུང་ཞུས་པས་འཇའ་ཚོན་མཆོག་གི་ཡེ་ཤེས་ཀྱི་སྐུས་རྗེས་སུ་བཟུང་། ཁྱད་པར་རྫོགས་ཆེན་བསོད་ནམས་དབང་པོའི་དངོས་སློབ་རྦ་ཁ་སྤྲུལ་སྐུ་རིག་འཛིན་ཆོས་ཀྱི་རྒྱ་མཚོ་ཞེས་རྫོགས་ཆེན་སྙིང་ཐིག་གི་བསྟན་པའི་བདག་པོ་གྲུབ་པའི་དབང་ཕྱུག་ཆེན་པོ་གང་དེའི་ཞབས་རྡུལ་སྤྱི་བོར་བླངས་ཏེ་ཐུན་མིན་རིགས་ཀྱི་བདག་པོར་བཀུར། སྒོ་གསུམ་མཉེས་པ་གསུམ་གྱིས་གུས་པས་བཏུད་དེ་ཟབ་ལམ་མཁའ་འགྲོ་སྙིང་ཐིག་གི་དབང་ལུང་སྙན་བརྒྱུད་ཀྱི་གདམས་པ་ཡོངས་སུ་བཞེས། ཡེ་ཤེས་ཀྱི་མཁའ་འགྲོ་མས་མཚོན་བྱེད་བརྡ་ཐབས་ཀྱི་ལྡེ་མིག་གཏད་དེ་གནང་བ་བྱིན་པ་ལྟར་ཁམས་པ་རྫོགས་ཆེན་པ་ཞེས་པའི་མཚན་དང་བཅས་བརྒྱུད་པ་འཛིན་པའི་རྒྱལ་ཚབ་ཏུ་དབང་བསྐུར། རྟོགས་པའི་ལམ་རྟགས་མངོན་དུ་གྱུར་ཏེ་ཆོས་ཉིད་མངོན་སུམ་གྱི་སྣང་བའི་འཆར་སྒོ་ཐིག་ལེ་སྟོང་སྒྲོན་གྱི་མུ་ཁྱུད་དུ་རྡོ་རྗེ་སེམས་དཔའ་དང་། འཕགས་པ་ནམ་མཁའི་རྒྱལ་པོ་བཀྲ་ལམ་མེར་གཟིགས་པ་བཅས་ཀ་དག་ཁྲེགས་ཆོད་ཀྱི་ལྟ་བ་མངོན་དུ་གྱུར། ལྷུན་གྲུབ་ཐོད་རྒལ་གྱི་སྒོམ་པའི་རྩལ་ཆེན་རྫོགས་ནས་ཀུན་བཟང་དགོངས་པའི་རྒྱལ་སྲིད་ལ་དབང་འབྱོར། དགུང་ལོ་སོ་དགུ་བཞེས་པ་རབ་བྱུང་བཅུ་གཅིག་པའི་ཆུ་ཡོས་ལོར་དབུས་འགྱུར་ཆོས་ཀྱི་ཞིང་སར་ཕེབས་ཞལ་ཕྱོགས། ལམ་བར་གྱི་སྒྲུབ་གནས་གཉན་ཁྲོད་རྣམས་སུ་ཐུགས་དམ་བོགས་འདོན་གྱི་ཕྱིར་དུ་གཉན་ས་གཅོད་པའི་ཚུལ་མཛད། འདི་སྐབས་ཐུགས་སྲས་ཐུ་བོ་རིག་འཛིན་ཉི་མ་གྲགས་པ་ཞབས་ཕྱིར་འབྱོར་ནས་གཙུག་ཕུད་བཞེས། ནང་ཆེན་རྒྱལ་པོ་སོགས་དད་ལྡན་གྱི་སྐྱེ་བོ་མང་པོར་ཆོས་སྦྱིན་གྱི་ཕྲིན་ལས་བསྩལ་བ་དང་བཅས་ཤིང་འབྲུག་ལོར་ཡུལ་དབུས་ལྷ་ལྡན་ཞིང་དུ་ཞབས་པད་འཁོད། རྟེན་གཙོ་ཇོ་ཤཱཀ་རྣམ་གཉིས་ལ་གསེར་ཆབ་སྙན་ཤལ་སོགས་མཆོད་པའི་སྤྲིན་ཕུང་རྒྱ་ཆེར་སྤྲོས་ཏེ་བསྟན་ལ་སྨན་པའི་ཐུགས་བསྐྱེད་རླབས་པོ་ཆེའི་མཚམས་སྦྱར། ཁྱད་པར་གངས་ལྗོངས་བསྟན་པ་ཡོངས་ཀྱི་བདག་པོ་ཐམས་ཅད་མཁྱེན་གཟིགས་རྒྱལ་དབང་ལྔ་པ་ཆེན་པོའི་གསེར་ཞལ་མཇལ། ཕན་ཚུན་ཐུགས་སྣང་གཤིན་པོས་ཉམས་རྟོགས་ཀྱི་བགྲོ་གླེང་དང་། ཁྱད་པར་གོང་ས་མཆོག་ལ་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་དབང་ཁྲིད་གསན་འབུལ་མཛད་པས། རྒྱལ་དབང་མཆོག་ལ་ཐུགས་དམ་བོགས་ཐོན་གྱི་ངེས་ཤེས་ཁྱད་པར་ཅན་ཐུགས་ལ་འཁྲུངས་ནས། གསུང་ལས། ཁམས་པ་རྫོགས་ཆེན་པ་ཉམས་རྟོགས་ཀྱི་བརྗོད་པ་བཅོས་མ་མ་ཡིན་པར་ཀློང་བརྡོལ་བ་གྲུབ་པའི་དབང་ཕྱུག་རྩེ་གཅིག་བསྐྱངས་པའི་ལག་རྗེས་ཤར་བར་སྣང་། ཞེས་དང་། ཕྱིས་སུ་གྲུབ་དབང་མཆོག་ལ་ཕུལ་བའི་ཆབ་ཤོག་ཀུན་བཟང་ཞལ་ངོམས་སུ། དགའ་རབ་ཤྲཱི་སེང་པད་འབྱུང་བཱི་མ་ལ། །བཻ་རོ་སོ་ཟུར་གནུབས་གཉགས་ལ་སོགས་པའི། །བཀའ་ཡི་གནད་ལ་སྦྱངས་རློམ་རྙིང་རློམ་འགས། །ཕྱག་རྫོགས་མ་ཕྱེད་འདྲེས་མའི་ཆོས་སྐད་མང་། །ཁྱེད་ཀྱིས་སྔོན་ཆད་རྩོལ་བས་ཉམས་བསྟར་ཀུན། །སྙིང་ཐིག་སྙིང་པོའི་དགོངས་དོན་ཇི་ལྟ་བ། །མ་རྟོགས་ལོག་རྟོག་མེད་པ་རྣམ་དག་པར། །ཁོ་ནར་སོང་བའི་ཚུལ་ལ་གཅིག་ཏུ་རངས། །ཅེས་དང་། སྔོ་འགྱུར་ནགས་ཀླུང་སྟུག་པོ་འཁྲིགས་པའི་དབུས། །སྔོན་མེད་ཡོངས་འདུས་ལྗོན་པ་ཁྱེད་དུ་ངེས། །ཚད་ཕེབས་རྫོགས་ནས་ཆོས་ཉིད་ཟད་ས་རུ། །འཁྱོལ་ལ་ཧ་ཅང་མི་རིང་ཕ་རོལ་ན། །སྐྱོན་བྲལ་ཡོན་ཏན་ཀུན་རྫོགས་རང་གི་སེམས། །ཁྱབ་བདག་རྡོ་རྗེ་འཆང་དུ་རྟག་པར་ཡོད། །ལོངས་སྐུའི་ཞིང་ཁམས་ཉུལ་བ་ཐོད་རྒལ་གྱི། །དཀར་སེར་ཁྲ་མེན་སྒྲོན་མ་དྲུག་གི་གནད། །ནན་ཏན་བགྱིད་ཁྱེད་རང་རིག་ཀུན་ཏུ་བཟང་། །རང་ཞལ་མཐོང་བའི་བར་དུ་དར་ཡོལ་ཙམ། །ཞེས་སོགས་ཕུལ་དུ་བྱུང་བའི་བསྔགས་བརྗོད་ཀྱི་མེ་ཏོག་འཐོར་བར་མཛད། དེ་མཚམས་སྟོད་ལུང་མཚུར་ཕུ་དང་། འུ་ཤང་རྡོོའི་ལྷ་ཁང་། སྒྲགས་ཀྱི་ཡང་རྫོང་། རྡོ་རྗེ་བྲག སྨིན་གྲོལ་གླིང་སོགས་གནས་ཆེན་ཆོས་སྡེ་ཁག་ཏུ་གནས་གཟིགས་དང་འབྲེལ་མཆོད་འབུལ་གྱི་དངོས་པོ་གྱ་ནོམ་པ་བསྟབས། ཁྱད་པར་དཔལ་བསམ་ཡས་ཀྱི་ཆོས་སྡེ་ཆེན་མོ་མེས་འཇིག་པས་ཉམས་པ་ལ་ཞིག་གསོའི་ཐེབས་རྩར་དངོས་རྫས་ཕོན་ཆེན་གནང་སྦྱིན་བསྩལ་བ་དང་། དེ་མཚུངས་མངའ་བདག་ཆོས་ཀྱི་དབང་པོ། གཏེར་ཆེན་འགྱུར་མེད་རྡོ་རྗེ། སྤྲུལ་སྐུ་པད་མ་གར་དབང་། སྒམ་པོ་སྤྲུལ་སྐུ། གསུང་སྤྲུལ་ཚུལ་ཁྲིམས་རྡོ་རྗེ་སོགས་ལྷོ་དབུས་ཀྱི་སྐྱེས་ཆེན་དུ་མ་དང་དབང་ལུང་ཟབ་ཆོས་ཀྱི་རྒྱུན་འབུལ་རེས་མཛད། རིམ་པར་ལྷོ་བྲག་མཁར་ཆུ། ཚེ་ལམ་དཔལ་རི། ལྷ་མོ་མཁར། དཔལ་གྱི་ཕུག་རིང་། དུར་ཁྲོད་ལ་ཁ་རྣམས་སུ་ཟླ་ངོ་རེར་སྐུ་མཚམས་བཅད་རྒྱ་ལ་བཞུགས་ཤིང་། དུར་ཁྲོད་ལ་ཁར་བཞུགས་པའི་ཐོ་རེངས་ཤིག་ལ་ཤར་ཕྱོགས་ཀྱི་ནམ་མཁའ་ནས་ལྷ་ལྕམ་མན་དཱ་ར་བ་དཀར་མོ་རུས་རྒྱན་གར་སྟབས་དང་བཅས་པས་ནུབ་ཀྱི་མཁའ་ངོས་ལ་བརྡ་ཆོས་སྣ་ཚོགས་སྟོན་བཞིན་བུན་ནེར་གཤེགས་པའི་ཉམས་སྣང་བྱུང་བ་སྐུ་ཚེ་དེར་མཁའ་སྤྱོད་འགྲུབ་པའི་བརྡ་རྟགས་སུ་གོ་ཡང་འགྲོ་ལ་བརྩེ་བའི་ཐུགས་ཀྱིས་དང་དུ་མ་བཞེས། དེ་མཚམས་མཆིམས་ཕུ་ནགས་ཀྱི་དབེན་ཁྲོད་དུ་ལོ་ངོ་གསུམ་ལ་བཅད་རྒྱ་མཛད་པས་ཉམས་རྟོགས་ཀྱི་ཡོན་ཏན་དབྱར་མཚོ་རྒྱས་པ་ལྟར་འཕེལ་ཞིང་དེར་མཁའ་འགྲོ་ཡེ་ཤེས་མཚོ་རྒྱལ་གྱིས་བདེ་གཤེགས་གཙུག་ཏོར་ཅན་དང་། གྲུབ་ཆེན་ཀུ་ཀུ་རི་པ། རྒྱལ་བ་སྟག་ལུང་ཐང་པ་བཅས་ཀྱི་སྤྲུལ་པ་ཡིན་པའི་ལུང་བསྟན་དང་ཞལ་གཟིགས་ཐོབ། དགུང་གྲངས་ཞེ་གསུམ་བཞེས་པ་ས་སྤྲེལ་ལོར་ཡུལ་ཉེར་བཞིའི་ནང་ཚན་བདེ་མཆོག་འཁོར་ལོ་སྡོམ་པའི་གནས་མཆོག་ཙཱ་རི་ཏྲའི་རོང་སྐོར་ལ་ཕེབས་ཤིང་། བདེ་མཆོག་བླ་མཚོ་དང་། སྟག་མ་ལ། དཔལ་གྱི་རི་ཟླུམ་སོགས་སུ་ཕེབས་སྐབས་སྲ་མཁྲེགས་རྡོ་ཡི་ཕ་ཝང་ལ་འདམ་ལྟར་བརྫིས་པའི་ཞབས་རྗེས་གཉིས་བཞག་པ་དང་། དཔོན་སློབ་ཐུན་མོང་གི་སྣང་ངོར་བདེ་མཆོག་ཕག་མོའི་གཟིགས་སྣང་ལན་འགར་བྱུང་བ་སོགས་ཡ་མཚན་གྲུབ་པའི་མངོན་རྟགས་གསལ་བར་བསྟན། ཁྱད་པར་གནས་ཀྱི་གཙུག་ཏོར་དག་པ་ཤེལ་གྱི་གངས་རིའི་འདབས་ཞོལ་ཟབ་ལམ་རྡོ་རྗེའི་དབེན་གནས་སུ། སྐུ་སྐྱེ་རིན་པོ་ཆེས་ཞབས་ཏོག་མཛད་དེ་ལོ་གྲངས་གསུམ་ལ་སྒྲུབ་པའི་རྒྱལ་མཚན་བཙུགས་ཏེ་བཞུགས་པས་བཀའ་བརྒྱད་བདུན་བརྒྱ་ཉེར་ལྔའི་ལྷ་ཚོགས་ཀྱིས་ཞལ་གཟིགས་པ་དང་། ཟབ་ཡངས་ཐུགས་ཀྱི་ཀློང་དུ་རྟོགས་པའི་བོགས་ཆེན་ཐོན་ཏེ་རིག་སྟོང་རྡོ་རྗེའི་ར་བར་སྐུ་བརྙན་ཕྲ་མོ་རྐྱང་སྐུ་དང་། ཉིས་སྦྲེལ། གསུམ་ཚོགས། བཞི་སྒྲིག ལྔ་ཚོམ་སོགས་གྲངས་མེད་ཀྱི་ཞིིང་ཁམས་ཐམས་ཅད་སྐུ་དང་ཡེ་ཤེས་ཀྱི་རོལ་པས་རིག་པ་ཚད་ལ་ཕེབས་པའི་གནད་གསང་གི་ལམ་མཆོག་ཕུལ་དུ་ཕྱིན་པ་བརྙེས། དེ་ལྟར་གསུང་མགུར་ལས་ཀྱང་། འོང་བ་དེ་སྟོད་ཀྱི་ཕྱོགས་སུ་བྱས། །ཐོས་བསམ་གྱི་ཡར་ལྟ་རྒྱ་ཆེར་བྱུང་། །ཐོས་དོན་དེ་ཉམས་ལེན་གནད་ཐོག་ཏུ། །སྒྲུབ་པ་ཡི་ངང་ཚུགས་བླ་མའི་དྲིན། །རྟེན་འབྲེལ་དེ་ལྷོ་བྲག་མཁར་ཆུར་བྱུང། །ཡེ་ཤེས་ཀྱི་མཁའ་འགྲོས་བརྡ་མཚོན་བསྟན། །བསམ་གཏན་གྱི་སྒོམ་ཚུགས་བཟུང་བ་ཡིས། །མཐར་ཐུག་གི་ལམ་སྣ་ཟིན་ངེས་བྱུང་། །སྒྲུབ་གནས་དེ་བསམ་ཡས་མཆིམས་ཕུར་བྱས། །ཀ་དག་ལྷུན་གྲུབ་ཀྱི་རང་ངོ་མཐོང་། །གནས་ལུགས་དང་མཐུན་པའི་ཉམས་ལེན་ཤེས། །ཚིག་དོན་ལ་བསྙེལ་བ་མེད་དམ་སྙམ། །བོགས་འདོན་དེ་ཙ་རི་ཏྲ་རུ་བྱས། །རིག་པ་ཡེ་ཤེས་ཀྱི་སྐུར་མཐོང་ནས། །རྡོ་རྗེ་རྩེ་མོ་ཡི་གནད་ཤེས་པས། །སྣང་སྟོང་ལ་འགལ་བ་མེད་པར་རྟོགས། །ཅེས་དང་། ངས་སྒྲུབ་གནས་དེ་བསམ་ཡས་མཆིམས་ཕུར་བྱས། །སྤྱོད་པ་དེ་ཙྭ་རི་རོང་དུ་བསྐྱངས། །རྟེན་འབྲེལ་དེ་ལྷོ་བྲག་མཁར་ཆུར་བྱུང་། །འགྲོ་དོན་དེ་ཡར་འབྲོག་ཀུན་ལ་བྱས། །ཞེས་གསུངས་པ་དང་། དེ་བཞིན་རྒོད་ཚང་པ་སྣ་ཚོགས་རང་གྲོལ་གྱི་ཞུ་མཆིད་ལས་ཀྱང་། གྲངས་མེད་སྐྱེ་བའི་གོང་རོལ་ན། །ཚོགས་གཉིས་ཀྱི་བྲེ་ཁ་ལེགས་ཁེངས་ཤིང་། །ཐོས་བསམ་དང་སྒོམ་སྒྲུབ་མཐའ་དག་ལ། །དབང་འབྱོར་གྱི་འབྲས་བུས་ཕྱུག་པ་ཁྱེད། །ཞེས་དང་། ཁྱེད་ཟབ་དོན་གྱི་ཉམས་བཞེས་མཐར་ཕྱིན་ནས། །གྲུབ་ཐོབ་ཀྱི་གདན་ས་བསྙེགས་པ་ལ། །འདི་འདྲའི་སྙན་འབུལ་མ་དགོས་ཀྱང་། །ཚད་ཕེབས་དེ་ཟད་སར་འཁྱོལ་མཛད་ནས། །རྩོལ་མེད་ཀྱི་གཞན་དོན་མཁའ་ཁྱབ་ཞུ། །ཞེས་སོགས་བསྔགས་བརྗོད་ཀྱི་མེ་ཏོག་རྒྱ་ཆེར་འཐོར་བར་མཛད་དོ། །དེ་ནས་སྐུ་མཚམས་གྲོལ་བ་དང་བསྟུན་སྐུ་སྐྱེ་རིན་པོ་ཆེས་ཞུས་བསྐུལ་ལྟར་ཧོར་འབྲོག་ནག་ཆུ་ཁར་ཆིབས་སྒྱུར་མཛད་དེ། དེ་གར་ཧོར་པ་ལོ་ཆེན་སོགས་མི་དཔོན་བན་སྔགས་སེར་སྐྱ་མང་པོར་ཟབ་ཆོས་དུ་མའི་བཀའ་དྲིན་བསྩལ་ནས་ཐར་བའི་གྲོང་དུ་བཀྲི་བའི་སྒོ་འཕར་ཕྱེས། མཁར་བ་བསམ་གཏན་ཕུག་སོགས་སྒྲུབ་གནས་འགར་ཡུན་རིང་བཞུགས་ཤིང་ཐུགས་སྲས་ནམ་མཁའ་འོད་གསལ་ཡང་དེ་ཙམ་ཉིད་ན་ཞབས་འཁོར་དུ་ལྷགས། སླར་ཡང་ཤང་ཟམ་བུ་ལུང་དང་བྲག་ཡེར་བ་སོགས་སུ་ཕེབས་ནས་ལོ་མཚམས་དུ་མར་བཞུགས། བར་སྐབས་རྣམས་སུ་གནས་བརྟན་འཇམ་དབྱངས་གྲགས་པ་སོགས་དགའ་ལྡན་ཕོ་བྲང་གི་དྲུང་འཁོར་ཆེ་རིམ་དང་། སེ་འབྲས་སོགས་གདན་ས་ཆེ་ཁག་གི་དགེ་བཤེས་མང་པོ་ལྐོག་ཆོས་ཞུ་བར་བྱུང་ཞིང་དེ་དག་ལ་ཆོས་བཀའ་སྣ་ཚོགས་པ་གསུངས་པར་མཛད། ཐུགས་སྲས་ཞྭ་ལམ་རབ་འབྱམས་པ་བསྟན་པའི་རྒྱལ་མཚན་ཡང་འདི་སྐབས་ཞབས་འབྲང་དུ་བྱུང་། དེ་མཚམས་གྲགས་པའི་མཚོ་སྨན་ཆེ་བཞིའི་ཡ་གྱལ་བྱང་གི་གནམ་མཚོར་ཕེབས་ནས་སྐུ་ལུས་མ་སྤངས་པར་འོད་སྐུར་གྲོལ་བའི་དགོངས་བཞེས་སྐྱོང་ཚེ། རྒྱལ་མཆོག་ལྔ་པ་ཆེན་པོའི་ཡེ་ཤེས་ཀྱི་གཟིགས་ངོར་། ཨོ་རྒྱན་ལུང་ཟིན་པདྨའི་མཚན༔ རྣལ་འབྱོར་དབང་ཕྱུག་ཁྱེད་ཉིད་ཀྱིས༔ མདོ་ཁམས་ཉི་མ་ཤར་ཕྱོགས་སུ༔ རྒྱས་དང་རུ་དམ་ར་བ་དཀར༔ གང་རུང་གདན་ས་གནས་གྱུར་ཚེ༔ བསྟན་འགྲོ་སྤྱི་ཡི་རྒུད་པ་གསོ༔ མཐའ་འཁོབ་སྐྱེ་འགྲོ་ཆོས་ཀྱིས་འདུལ༔ ཞེས་ཡུལ་རྫ་སྟོད་དགེ་རྒྱས་དང་། མདོ་ཁམས་རུ་དམ་ལུང་། མི་ཉག་རྡོ་ར་དཀར་མོ་སྟེ་གདན་ས་རིམ་པ་གསུམ་དུ་རྟེན་འབྲེལ་དུས་བབ་ལྟར་བསྟན་འགྲོའི་འགྲོ་དོན་བསྐྱངས་ན་ཆོས་བརྒྱུད་དར་རྒྱས་སུ་འབྱུང་བར་འགྱུར་ཞེས་སྒྲིབ་བྲལ་རྡོ་རྗེའི་བཀའ་ལུང་གིས་གསལ་བར་བསྐུལ་བ་དང་། དེ་མཚུངས་ཆགས་མེད་རིན་པོ་ཆེས་ཀྱང་། དེ་ནས་ཁམས་སུ་ཅིས་ཀྱང་བྱོན་དགོས་ཏེ། །རང་དོན་མཛད་ནས་གཞན་དོན་མི་མཛད་པ། །ཐེག་དམན་ཉན་ཐོས་ལམ་གྱི་གོལ་ས་ཆེ། །རྫོགས་སངས་རྒྱས་ནས་འགྲོ་དོན་མ་གཏོགས་པ། །མཛད་རྒྱུ་གཞན་ནི་ཡོད་སྐད་མ་ཐོས་སོ། ཅེས་དང་། ཁམས་སུ་བྱོན་པ་ཟང་ཟིང་དོན་གཉེར་མིན། །དབང་ལུང་རྒྱ་མཚོ་འདི་དག་སྤེལ་ཐུབ་ན། །འགྲོ་ལ་ཆོས་སྦྱིན་ཨོ་རྒྱན་བསྟན་ལ་སྨན། །བསྟན་འགྲོའི་དོན་ཡིན་རང་དོན་མཆོག་དེ་ཡིན། །བླུན་སྒོམ་ཟ་ཆོག་བརྒྱ་ལས་དེ་ཉིད་ལྷག །ཅེས་སོགས་ཞབས་བསྐུལ་གྱི་ཆབ་ཤོག་སྔ་ཕྱིར་ནན་གྱིས་བསྩལ་བ་ལྟར་བསྟན་དང་འགྲོ་བའི་དོན་ཆེན་ཐུགས་ལ་བརྣག་སྟེ། གྲུབ་དབང་མཆོག་དགུང་གྲངས་དྲུག་ཅུ་བཞེས་པ་ཤིང་ཕོ་བྱི་བའི་ལོར་ཇོ་བོ་རྗེ་དཱི་པམ་ཀཱ་རཱ་བོད་དུ་བྱོན་པའི་རྣམ་ཐར་དང་ཚུལ་མཚུངས་པར་མདོ་ཁམས་ཉི་མ་ཤར་ཕྱོགས་སུ་ཞབས་བསྐྱོད་གནང་། དགུང་གྲངས་རེ་གཅིག་བཞེས་པ་ཁྲོ་བོ་ཞེས་པ་ཤིང་མོ་གླང་གི་ལོ་སྟེ་སྤྱི་ལོ་༡༦༨༥ལོར། ཨོ་རྒྱན་སངས་རྒྱས་གཉིས་པས་ཞབས་ཀྱིས་བཅགས་ཤིང་བྱིན་གྱིས་བརླབས་པས་དཔའ་བོ་མཁའ་འགྲོ་སྤྲིན་ལྟར་འདུ་བའི་གནས་མཆོག མདོ་ཁམས་ས་ཡི་ལྟེ་བ་རུ་དམ་སྐྱིད་ཁྲམ་ལུང་པ་ཞེས་སའི་དཔྱད་ཕུན་སུམ་ཚོགས་དགུ་མ་ཚང་བ་མེད་པའི་ནོར་འཛིན་གྱི་ཐིག་ལེར་ཞབས་པད་བཀོད། ཐོག་མར་གཡས་ལུང་མགོན་པོ་ཤྭ་ནའི་གནས་ཀྱི་འདབས་རོལ་ཞབས་ཆེན་སྤང་ཐང་དུ་གྲུབ་དབང་དཔོན་སློབ་གསོལ་ཇ་བསྐོལ་ཏེ་བཞུགས་སྐབས། བཀའ་སྲུང་དྲེགས་པའི་ཡང་རྗེ་པེ་ཧར་རྒྱལ་པོ་བྱ་རོག་གི་རྣམ་པར་སྤྲུལ་ནས་སྐྱེམས་ཕུད་ཕུད་ཕོར་དང་བཅས་པ་འཕུར་རྩལ་གྱིས་ནམ་མཁར་བཏེགས་ཏེ་གདན་སའི་རྒྱབ་རིའི་བྲག་སྟེགས་ཤིག་ཏུ་བཞག་པ་དང་། གཏོ་རུ་ཨ་དགེ་ཚང་ཞེས་འབྲོག་དུད་ཞིག་ཡོད་པར་ཁྱིམ་ཕེབས་མཛད་པས་ཐབ་ཟངས་ལས་འོ་མ་འཕྱུར་བ་སོགས་བཀྲ་ཤིས་པའི་མཚན་མ་འབུམ་ཕྲག་དུས་གཅིག་ཏུ་ཤར་བའི་རྟེན་འབྲེལ་ལེགས་ལམ་གྱི་སྒོ་འཕར་ཕྱེས་ནས། སྔ་འགྱུར་བསྟན་པའི་ཆུ་འགོ་རྫོགས་ཆེན་ཨོ་རྒྱན་བསམ་གཏན་ཆོས་འཁོར་གླིང་ཞེས་ཡོངས་སུ་གྲགས་པའི་ཆོས་སྡེ་ཆེན་པོ་འདི་ཉིད་ཐོག་མར་ཕྱག་བཏབ། འོད་གསལ་རྫོགས་པ་ཆེན་པོ་མཁའ་འགྲོ་སྙིང་ཐིག་གི་ཉམས་ལེན་ལ་བརྩོན་པའི་རིག་པ་འཛིན་པའི་རྣལ་འབྱོར་སྟོང་ཕྱེད་ལྔ་བརྒྱར་ལོངས་པས་སྒྲུབ་པའི་རྒྱལ་མཚན་བཙུགས་ཏེ་ངེས་གསང་སྙིང་པོའི་བསྟན་པ་ཉིན་བྱེད་ལྟར་གསལ་བར་མཛད། ཕྱོགས་དེར་འཁོད་པའི་སྡེ་དགེའི་ས་སྐྱོང་ཆེན་པོ་ཁྲི་ཆེན་སངས་རྒྱས་བསྟན་པ་དང་། གླིང་ཚང་མགོན་པོ་ལྷུན་གྲུབ། གད་ཐོག་གཉེར་ཆེན་ལྷ་ལུ་སོགས་མི་རྗེ་སྡེ་འབངས་ཡོངས་ཀྱིས་གྲུབ་དབང་དམ་པའི་ཞབས་རྡུལ་སྤྱི་བོར་བླངས་ཏེ་བསྟན་པའི་སྦྱིན་བདག་གི་མཐུན་འགྱུར་བྱས། ཁྱད་པར་ཆོས་རྒྱལ་ཁྲི་ཆེན་སངས་རྒྱས་བསྟན་པས་བསྐུལ་ཞུས་ལྟར་མངའ་ཁོངས་རྙིང་དགོན་རྣམས་སུ་རྗེ་ཉིད་ཞབས་པད་དངོས་བསྐྱོད་ཀྱིས་ལྟ་སྒོམ་སྤྱོད་པའི་ཉམས་ལེན་ལ་དག་ཐེར་དང་། འོད་གསལ་སྙིང་པོའི་ཆོས་ཀྱི་འཁོར་ལོ་རྒྱ་ཆེར་བསྐོར་ཏེ་བླུན་སྒོམ་རྟོག་བཟོའི་ལྟ་གྲུབ་ཀྱི་རྙོགས་མ་བསལ་ནས་ཀུན་མཁྱེན་རྒྱལ་བའི་རིང་ལུགས་འཁྲུལ་བྲལ་ཕྱོགས་ཀུན་སྤེལ་བར་མཛད། རྗེ་འདིས་སྔ་ཕྱིར་རྗེས་སུ་བསྐྱངས་པའི་ཞལ་སློབ་ཀྱི་གཙོ་བོ། འཁོན་ཀླུ་ཡི་དབང་པོའི་རྣམ་རོལ་གཏེར་སྟོན་ཉི་མ་གྲགས་པ་དང་། བདེ་གཤེགས་མྱ་ངན་མེད་ཀྱི་རྣམ་སྤྲུལ་རབ་འབྱམས་པ་བསྟན་པའི་རྒྱལ་མཚན། གྲུབ་ཆེན་མེ་ལོང་རྡོ་རྗེའི་རྣམ་འཕྲུལ་འདྲེན་མཆོག་ནམ་མཁའ་འོད་གསལ་བཅས་ཐུགས་སྲས་ཐུ་བོ་གསུམ་མམ་སློབ་བུ་ཉི་ཟླ་སྐར་གསུམ་ཞེས་ཡོངས་སུ་གྲགས་པ་དང་། གཞན་ཡང་རྒྱལ་མཆོག་ལྔ་པ་ཆེན་པོ། འཇམ་དབྱངས་ཧོར་གྱི་ལོ་ཆེན། གནས་བརྟན་འཇམ་དབྱངས་གྲགས་པ། རྫོགས་ཆེན་ཀློང་རྫོགས་མཐའ་བྲལ། དགེ་བའི་བཤེས་གཉེན་ཀུན་མཁྱེན་པ། རིག་འཛིན་ཀློང་གསལ་སྙིང་པོ། ཀཿཐོག་རྒྱལ་སྲས་བསོད་ནམས་ལྡེའུ་བཙན། དྲུང་པ་ནམ་མཁའ་རྒྱ་མཚོ་སོགས་སློབ་རྒྱུད་ཡང་རྒྱུད་དང་བཅས་པའི་ཕྲིན་ལས་ཆོས་རྒྱུད་ཀྱིས་ཁམས་དབུས་དྭགས་ཀོང་སོགས་ཡུལ་གྲུ་ཀུན་ཏུ་ཁྱབ་པ་དང་། དེ་བཞིན་ཕྱི་རབས་བསྟན་པའི་བཙས་སུ་བཞག་པའི་གསུང་རྩོམ་ཡང་། རྫོགས་ཆེན་གཞི་ལམ་འབྲས་གསུམ་གྱི་དོན་སྟོན་པ་མན་ངག་ཤེལ་ཕྲེང་གི་གླེགས་བམ་དང་། གསོལ་འདེབས་བླ་མའི་རྣལ་འབྱོར་བསྟོད་ཚོགས་སྨོན་ལམ་གྱི་སྐོར། དགེ་བསྐུལ་ལྕག་འདེབས་ཀྱི་སྐོར། རང་ཉིད་ཀྱི་རྣམ་ཐར་འཕྲོས་དོན་དུ་ཡོད་པའི་ལྟ་སྒོམ་སྤྱོད་པའི་གདེང་ཚད་ཉམས་མྱོང་མགུར་གྱི་སྐོར། ཐར་འདོད་ཀྱི་གང་ཟག་མཆོག་དམན་ཀུན་ལ་ཞལ་གདམས་ངོ་སྤྲོད་ཀྱི་སྐོར། སྒྲུབ་འཕྲིན་ཆོ་གའི་སྐོར་ཏེ་སྐོར་ཚོ་དྲུག་གམ་ཕར་ཕྱིན་དྲུག་གི་གྲངས་ཅན་གྱི་གླེགས་བམ་བཞུགས་ཀྱང་ཕལ་མོ་ཆེ་དུས་ཀྱི་རྒུད་པའི་སྐལ་ངན་གྱི་ཁྲོད་དུ་ཉམས་པར་གྱུར། དེ་ནས་དགུང་གྲངས་བདུན་ཅུ་རྩ་གསུམ་པ་དབང་ཕྱུག་ཞེས་པ་མེ་གླང་ལོའི་ཆོ་འཕྲུལ་ཟླ་བའི་རྫོགས་པ་དང་པོའི་ཚེས་ལ། འཇའ་ཚོན་གྱི་གུར་ཁྱིམ་དང་འབྱུང་བའི་རང་སྒྲ་སོགས་རྒྱུད་སྡེ་དང་མཐུན་པའི་རྣལ་འབྱོར་མཆོག་གི་ལམ་རྟགས་ངོ་མཚར་བ་དུ་མ་དང་བཅས་ཆོས་དབྱིངས་སྐྱེ་བ་མེད་པ་གཞོན་ནུ་བུམ་སྐུའི་ཀློང་དུ་ཞི་བར་གཟིམས་པའི་ཚུལ་བསྟན། སྐུ་གདུང་རིན་པོ་ཆེ་ཞུགས་སུ་ཕུལ་བ་འོད་གསལ་ཐུགས་ཀྱི་ཁང་བཟང་ཙིཏྟའི་གོང་བུ་འབྱུང་བས་མ་སྣད་པ་སྐལ་བ་ལྡན་པའི་རྗེས་འཇུག་རྣམས་བརྩེ་བས་རྗེས་སུ་འཛིན་པའི་བརྡ་རྟགས་ངོ་མཚར་ཅན་གྱི་མཛད་པ་མཐོང་ཞིང་ཐོས་པའི་སྐྱེ་བོ་དག་གི་རྒྱུད་ལ་ཡང་ཐར་བའི་ས་བོན་ཐེབས་པར་མཛད་དེ་ཞིང་འདིའི་མཛད་པ་རེ་ཞིག་རྫོགས་སོ། །
རྫོགས་ཆེན་རིན་པོ་ཆེ་སྐུ་ཕྲེང་གཉིས་པ་འགྱུར་མེད་ཐེག་མཆོག་བསྟན་འཛིན།
[རྩོམ་སྒྲིག]རབ་བྱུང་བཅུ་གཉིས་པའི་མྱོས་ལྡན་ཞེས་པ་ས་མོ་ཡོས་ཀྱི་ལོ་སྟེ་སྤྱི་ལོ་༡༦༩༩བར་ཟླ་ཀླུང་དལ་གྱིས་འབབ་པའི་ཉེ་འགྲམ་འབྲས་ལྡན་མེ་ཏོག་བཞད་པའི་སྐྱེད་ཚལ་ཞིག་ཏུ་སོག་པོ་ཨོ་རོད་རྒྱལ་པོའི་སྲས་རྒྱུད་ད་སྐུ་འཁྲུངས། གོང་མའི་ཐུགས་སྲས་རྣམས་དང་འཇིགས་བྲལ་ཚངས་པ་སྡེ་དགེ་ཆོས་རྒྱལ་ཆེན་མོ་བཅས་ཀྱིས་བོད་ཡུལ་དབུས་ལྗོངས་ཀྱི་ལྷ་བླར་དགོངས་རྟགས་ཕུལ་བས་གྲུབ་དབང་དམ་པའི་སྐྱེ་སྲིད་འཁྲུལ་མེད་ད་བཀས་བཅད་ཅིང་། སྨིན་གླིང་ནས་འགྱུར་མེད་ཐེག་མཆོག་བསྟན་འཛིན་དང་། རྡོ་བྲག་ནས་པདྨ་ཐེག་མཆོག་བསྟན་འཛིན་རྒྱ་མཚོ་ཞེས་མཚན་གྱི་ཅོད་པཎ་གསོལ། རིང་མིན་གདན་ས་ཆེན་མོར་སྤྱན་དྲངས་ཏེེ་འཇིགས་མེད་གདོང་ལྔས་བཏེགས་པའི་ཁྲི་འཕང་མཐོན་པོར་མངའ་གསོལ་ཞིང་། གོང་མའི་ཐུགས་སྲས་ཐུ་བོ་དཔོན་སློབ་ནམ་མཁའ་འོད་གསལ་དང་རབ་འབྱམས་བསྟན་པའི་རྒྱལ་མཚན་གཉིས་ནས་གཙུག་ཕུད་བཞེས་ཏེ་པདྨ་དབང་ཆེན་དང་པདྨ་དབང་དྲག་ཞེས་མཚན་འབུལ་མཛད། རིམ་པར་སྐྱེས་མཆོག་བླ་མ་རྣམ་གཉིས་ལས་བཀའ་གཏེར་གྱི་སྨིན་གྲོལ་གང་མང་བཞེས་མཚམས། དགུང་གྲངས་བཅུ་གཅིག་པ་ས་མོ་གླང་གི་ལོར་དབུས་ཕྱོགས་སུ་ཆིབས་ཁ་ཕྱོགས། ཐོག་མར་སྲིན་རྫོང་འོད་གསལ་སྒྲུབ་སྡེར་ཕེབས་པས་གཏེར་ཆེན་ཉི་མ་གྲགས་པ་དང་མཇལ། གཏེར་ཆེན་མཆོག་ནས་དགྱེས་བརྩེས་བསྙེན་བཀུར་ཕུན་སུམ་ཚོགས་པ་དང་བཅས་རང་གཏེར་ཕལ་ཆེར་གྱི་སྨིན་དབང་བསྩལ། གཞན་ཡང་རྒྱལ་སྲས་ཨོ་རྒྱན་བསྟན་འཛིན་དང་འབྲི་གུང་དཀོན་མཆོག་ཕྲིན་ལས་ལས་གཤིན་རྗེ་ཁྲོ་ཆུ་སོགས་བཀའ་ཆོས་འགའ་གསན་ནས་ལྷ་སར་ཕེབས། རྟེན་གསུམ་གཙུག་ལག་ཁང་རྣམས་སུ་མཆོད་པ་རྒྱས་འབུལ་དང་བཅས་རྡོར་སྨིན་ད་ཞབས་བསྐྱོད། དེར་རིག་འཛིན་གཏེར་བདག་གླིང་པ་ལས་རྗེ་ཉིད་ཀྱི་ཟབ་གཏེར་ཐུགས་ཆེན་བདེ་གཤེགས་ཀུན་འདས་གཙོས་བཀའ་གཏེར་གྱི་སྨིན་ཁྲིད་མཐའ་ཡས་པ་གསན་བཞེས་མཛད་པས་མཐུ་སྟོབས་དབང་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་སྡེ་ཞེས་མཚན་གསོལ་བ་དང་། ཉིད་གཏེར་ལས། ལང་གྲོའི་སྤྲུལ་པ་པདྨ་དྲག་པོའི་མིང༔ རྣལ་འབྱོར་འཛིན་པ་མདོ་ཁམས་སྨད་ནས་འབྱུང༔ ཞེས་ལུང་ཟིན་རྩ་བའི་ཆོས་བདག་ཏུ་ངོས་འཛིན་མངའ་གསོལ་མཛད། གཞན་ཡང་སྔ་ཕྱི་རྣམས་སུ་རྒྱལ་དབང་སྐལ་བཟང་རྒྱ་མཚོ་དང་། ངོར་མཁན་ཆེན་དཔལ་ལྡན་ཆོས་སྐྱོང་། ཞྭ་དམར་ཆོས་ཀྱི་དོན་འགྲུབ། ལོ་ཆེན་དྷརྨ་ཤྲཱི། རྒྱལ་སྲས་འགྱུར་མེད་རྒྱ་མཚོ། གླིང་གཏེར་པདྨ་དབང་ཕྱུག །སྟག་བླ་ཀུན་བཟང་བློ་གྲོས། དཔལ་རི་བ་ཀུན་བཟང་འོད་ཟེར། གྲ་ཐང་མཁན་ཀུན་དགའ་མཁྱེན་བརྩེ། བཤེས་གཉེན་འགྱུར་མེད་སྐལ་བཟང་སོགས་ཡོངས་འཛིན་བཅུ་ཕྲག་བཞི་ལྷག་ལས་མདོ་སྔགས་བསྟན་བཅོས་ཀྱི་འཆད་རྒྱུན། བཀའ་གཏེར་སྨིན་གྲོལ་གྱི་དབང་ཁྲིད། རྒྱལ་བའི་བཀའ་འགྱུར་རིན་པོ་ཆེའི་བཀླག་ལུང་སོགས་ཆོས་ཚུལ་རྒྱ་མཚོ་ལྟ་བུ་གསན་བཞེས་གནང་བས་ཐོས་པའི་ཕ་མཐར་སོན། ཁྱད་པར་དཔོན་སློབ་ནམ་མཁའ་འོད་གསལ་ལས་རྗེ་གོང་མའི་གསུང་སྒྲོས་ཀྱི་ཟབ་གནད་སྙན་ནས་སྙན་ད་བརྒྱུད་པའི་གདམས་ཟབ་དང་། ཕྱག་བཞེས་ཕྲ་རགས་ཀྱི་ཟབ་གནད་བྱིན་རླབས་ཀྱི་ཚན་ཁ་མ་ཉམས་པ་ཐམས་ཅད་བུམ་པ་གང་བྱོའི་ཚུལ་ད་གསན་པས་རྗེ་འདི་དང་གཏེར་ཆེན་འགྱུར་མེད་རྡོ་རྗེ་རྣམ་གཉིས་བཀའ་དྲིན་ཁྱད་འཕགས་ཀྱི་རྩ་བའི་བླ་མར་འཛིན། དེ་མཚུངས་ཉམས་ལེན་ཏིང་ངེ་འཛིན་གྱི་རྣལ་འབྱོར་ལ་སྐུ་ཚེ་གང་པོར་ཆད་མེད་ཆུ་བོའི་རྒྱུན་བཞིན་བརྩོན་པར་མཛད་དེ། སྐུ་ན་ཆེས་གཞོན་པའི་དས་ནས་བསྙེན་མཚམས་ལོ་གཉིས་དང་། ཕྱིས་སྐུ་ཚེའི་གེགས་འཕྲང་སེལ་ཕྱིར་བཅད་རྒྱ་ལོ་གཅིག ཁྱད་པར་རབ་བྱུང་བཅུ་གཉིས་པའི་བློ་ངན་ལྕགས་བྱའི་མཇུག་ནས་ཤིང་ཕག་བར་ལོ་ངོ་བཅོ་ལྔའི་རིང་། སྔ་ཕྱིའི་ཆོས་ཐུན་ཕུད་ཉིན་མཚན་ཀུན་ཏུ་རྒྱུད་སྡེ་བཞི་དྲུག་གི་ལྷག་ལྷ་ད་མའི་བསྙེན་སྒྲུབ་ཚད་འཁྱོལ་མཛད་པས། འཁོར་འདས་ཀྱི་སྣང་ཆ་ཐམས་ཅད་དག་པ་རབ་འབྱམས་སྒྱུ་འཕྲུལ་ལྷའི་ཕྱག་རྒྱ་དང་དབྱེར་མི་ཕྱེད་པའི་བརྟན་པ་ཐོབ། འོད་གསལ་རྫོགས་པ་ཆེན་པོ་ཀ་དག་ལྷུན་གྲུབ་ཀྱི་གནད་ལ་ཉམས་བཞེས་རྒྱུན་ཆགས་སུ་མཛད་པས་རྟོགས་ཚོགས་ཡེ་ཤེས་ཀྱི་ངོ་བོར་འབྱམས་སུ་ཀླས་ནས་ཀུན་བཟང་ཆོས་སྐུའི་དགོངས་པ་མངོན་ད་བརྙེས། དེ་ལས་ལྡང་བ་རྗེས་ཐོབ་སྒྱུ་མ་ལྟ་བུའི་རོལ་རྩལ་གྱི་ངང་ནས་བསྟན་འགྲོའི་ལེགས་བྱས་ཕྱོགས་བརྒྱར་སྤེལ་བར་མཛད་ཚུལ་ནི། དགུང་ལོ་ཞེ་གཉིས་པ་ལྕགས་སྤྲེལ་ལ་རྗེ་དབོན་པདྨ་གདན་ཚབ་ཏུ་བསྐོས་ཏེ་དབུས་ཕེབས་ཕྱི་མ་མཛད་ཅིང་། སྐུབས་དེར་ས་ངོར། འབྲི་སྟག རྡོར་སྨིན་སོགས་གདན་ས་ཆེ་ཆུང་ཕལ་མོ་ཆེ་ལ་མཆོད་སྤྲིན་རྒྱ་ཆེ་བ་དང་། ཁྱད་པར་ལྷ་ལྡན་ད་མཉན་ཡོད་མཆོད་པའི་དས་སྟོན་དང་། རྒྱལ་མཆོག་ལྔ་པའི་འདས་མཆོད་ཀྱི་ཚོགས་ཆེན་ལ་འགྱེད་འབུལ་མང་བསྐོལ་ཕུན་སུམ་ཚོགས་པས་བསྙེན་བཀུར། རྒྱལ་མཆོག་བདན་པ་སྐལ་བཟང་རྒྱ་མཚོས་ཐུགས་བརྩེའི་གཟིགས་པ་ཚད་མེད་པས་ཕོ་བྲང་ཆེན་མོའི་ནང་རྟེན་ལས་རྟེན་གསུམ་གདམ་ཀ་མཛད་དེ་གནང་དིན་བསྩལ། སྐུབས་དེར་རྗེ་ཉིད་ལ་དམ་ཅན་ནོར་སྒྲུབ་ཀྱིས་རང་གཟུགས་དངོས་སུ་བསྟན་ཏེ་ལུང་བསྟན་པས་ཐུབ་སྐུ་གཡུ་ཐོད་མ་དང་། ཆབ་ལྡེའུ་དཀར་ནག་ཁྲ་གསུམ་སོགས་མི་མིན་འཕྲུལ་གྱི་རྟེན་རྫས་སྣ་ཚོགས་མདོ་སྨད་སྤྱིའི་བསོད་ནམས་ཀྱི་བགོ་སྐུལ་ད་སྤྱན་དྲངས་པ་བཅས་ལེགས་བྱས་འགྲན་ཟླ་བྲལ་བ་གངས་ཅན་སྐྱེ་རྒུའི་རྣ་ལུང་མཛེས་པའི་རྒྱན་ད་བཏགས་པར་མཛད་དེ་རང་དགོན་ད་ཞབས་པད་བཀོད། དེ་ནས་ལོ་འགར་རྒྱང་ཕེབས་མ་མཛད་པར་རྒྱལ་བཀའ་རིན་པོ་ཆེ་ལན་གཉིས་དང་རྙིང་རྒྱུད་ཚར་ལྔ་གཙོས། བཀའ་དགོངས། མདོ་དབང་། མཛོད་བདན་བཅས་ཀྱི་བཀླག་ལུང་འཆད་ཁྲིད་རྒྱ་ཆེར་གནང་ཞིང་། སྐུབས་དེ་དག་ཏུ་རྡོ་རྗེའི་ལྗགས་ལ་ལྷག་ལྷས་དངོས་གྲུབ་སྟེར་བ་ལྟར་སྒྲ་དག་མྱུར་མགྱོགས་གཞན་མཚུངས་དང་བྲལ་བས་ཐམས་ཅད་ངོ་མཚར་གྱི་གནས་ལ་བཀོད་པར་བྱས། གཞན་ཡང་སྐྱེ་དགུའི་བསོད་ནམས་ཀྱི་ཞིང་ད་སངས་རྒྱས་བྱང་སེམས་དང་། ཡི་དམ་ཆོས་སྐྱོང་གི་སྐུ་བརྙན་སྣ་ཚོགས་འབུར་བཟོས་རས་བྲིས་བཅས་དངོས་གཙང་བ་བརྒྱ་ཕྲག་ད་མ་དང་། གསུང་རྟེན་ད་བཀའ་བསྟན་གྱི་གླེགས་བམ་སྟོང་ཕྲག་ལྷག་བརྒལ་བ། ཐུགས་རྟེན་ད་རྗེ་བླ་མ་ནམ་མཁའ་འོད་གསལ་གྱི་གསེར་གདང་ཁྱད་འཕགས་སོགས་སྐུ་གསུང་ཐུགས་རྟེན་མཆོད་རྫས་ཡོ་བྱད་བསམ་མི་ཁྱབ་པ་གསར་བཞེངས་མཛད། དེས་ཀྱང་མ་ཚད་པར་རྒྱུན་འཛུགས་མར་མེ་སྟོང་མཆོད་དང་། སཙྪ། རྡོ་འབུམ། དིན་སྲེག །དར་ལྕོག་སོགས་འབྱུང་བ་ཆེན་མོའི་བྱེད་པའང་དགེ་པའི་ཆོས་ལ་བསྒྱུར་ནས་མཐའ་ཡས་པའི་སེམས་ཅན་བྱང་གྲོལ་གྱི་ལམ་ལ་བཀོད། མདོར་ན་རྗེ་འདི་མཁས་བཙུན་བཟང་གསུམ། འཆད་རྩོད་རྩོམ་གསུམ། མཁྱེན་བརྩེ་ནུས་གསུམ་སོགས་ཚུལ་དགུའི་ཡོན་ཏན་ལ་རང་དབང་འབྱོར་བས་རྫོགས་ཆེན་མཁའ་འགྲོ་སྙིང་ཐིག་གི་སྔོན་འགྲོའི་ཁྲིད་ཡིག་ཐར་ལམ་བགྲོད་བྱེད་ཤིང་རྟ་བཟང་པོ་སོགས་འཆོས་སྐྱོབས་གཉིས་ལྡན་གྱི་བསྟན་བཅོས་ཀྱང་པུསྟི་གཉིས་ཙམ་མཛད། གསུང་གིས་བསྐྱངས་པའི་ཞལ་སློབ་འབར་ཆུང་བཀྲ་ཤིས་རྒྱ་མཚོ། རྡོ་བྲག་སྐལ་བཟང་དབང་ཕྱུག །དཔལ་རི་སྤྲུལ་སྐུ། ཟུར་སྤྲུལ་གསུམ་པ་ཕྲིན་ལས་རྒྱ་མཚོ། ཀཿཐོག་དྲི་མེད་ཞིང་སྐྱོང་མགོན་པོ། ཉི་སྤྲུལ་པདྨ་ཐེག་མཆོག དཔོན་སློབ་གཉིས་པ་གསང་སྔགས་བསྟན་འཛིན། རབ་འབྱམས་འགྱུར་མེད་ཀུན་བཟང་རྣམ་རྒྱལ། ཁམས་སྤྲུལ་རིན་པོ་ཆེ་གོང་འོག །ཉི་གྲགས་རྒྱལ་སྲས་ཨོ་རྒྱན་བསྟན་འཛིན། རྗེ་བཙུན་མ་མི་འགྱུར་དཔལ་སྒྲོན་སོགས་མཁས་པའི་གྲགས་སྙན་ཐོབ་པ། སྒྲུབ་པའི་རྒྱལ་མཚན་འཛིན་པ། བསྟན་པ་དར་རྒྱས་སུ་སྤེལ་བའི་སྐྱེས་ཆེན་ད་མ་བྱོན། དགུང་གྲངས་ང་དགུ་བཞེས་པ་མེ་གླང་ལོར་བསྟན་འགྲོའི་འགྲོ་དོན་ཐོག་གཅིག་རྫོགས་པའི་ཚུལ་གྱིས་སྐུ་མྱ་ངན་ལས་འདའ་བར་ཕྱོགས་ཤིང་། འདས་ཚོགས་ཡོངས་ལ་སོ་སོའི་སྐལ་བ་དང་འཚམས་པའི་བསླབ་བྱ་ཞལ་ཆེམས་རྒྱ་ཆེར་བསྩལ་བ་དང་། ཁྱད་པར་རྗེ་དབོན་རིན་པོ་ཆེ་པདྨ་ཀུན་གྲོལ་ལ་གདན་སའི་ཁུར་དང་དོན་བརྒྱུད་ཀྱི་བསྟན་པ་གཏད་ནས་ཧོར་ཟླ་བཅུ་པའི་ཚེས་བཅོ་བརྒྱད་ལ་ཆོས་སྐུའི་གཟིགས་སྟངས་དང་བཅས་ཐེག་རྩེ་གསང་བའི་ཉེ་ལམ་ནས་ནང་གསལ་གཞོན་ནུ་བུམ་སྐུར་ཐིམ་པར་གྱུར་ཏོ། །
རྫོགས་ཆེན་རིན་པོ་ཆེ་སྐུ་ཕྲེང་གསུམ་པ་ངེས་དོན་བསྟན་འཛིན་བཟང་པོ།
[རྩོམ་སྒྲིག]ངེས་དོན་བསྟན་འཛིན་བཟང་པོ་ཨ་ཏི་བསྟན་པའི་རྒྱལ་མཚན་མཆོག་ནི། སྤྱི་ལོ་༡༧༥༩པ་རབ་བྱུང་བཅུ་གསུམ་པའི་མེ་ཡོས་ལོར། བྱང་ཟླ་ཀླུང་སྔོན་མོ་དལ་གྱིས་འབབ་པའི་ཡུལ་གྱི་བྱེ་བྲག་ཧོ་པ་ཞེས་པའི་ཆར་ཡབ་ཚེའི་རིག་བྱེད་ལ་བྱང་ཆུབ་པ་འགའ་ཞིག་བྱོན་པའི་རྒྱུད་ལས་བཀྲ་ཤིས་འབུམ་བྱ་བའི་སྲས་སུ་སྐུ་འཁྲུངས། གསུང་ངག་བྱེ་བ་ཉིད་ནས་རྗེ་གོང་མའི་ཐུགས་ཀྱི་བག་ཆགས་མ་བརྗེད་པར་རྫོགས་ཆེན་མཆོག་སྤྲུལ་ཡིན་ཚུལ་དང་། སྐུ་འཁོར་གྲྭ་པ་པདྨའི་མིང་འཛིན་གསུམ་ཡོད་ཚུལ་སོགས་ཡང་ཡང་གསུངས་ཤིང་། དབུས་གཙང་ལྷ་བླའི་གསུང་རྟགས་དང་དམ་ཅན་སྐྱེས་བུའི་ལུང་བསྟན། རྗེ་དབོན་བླ་མའི་གསུང་ལུང་རྣམས་གཅིིག་མཐུན་བྱུང་བ་ལྟར་ངོས་འཛིན་ཕུལ། སྤྲུལ་བའི་སྐུས་སྔོན་གནས་རྗེས་སུ་དྲན་པའི་རྣམ་ཐར་བཟང་པོས་གོང་མའི་ཕྱག་དཔེ་དང་རྡོར་དྲིལ། ཕྱག་ཕྲེང་། གསོལ་ཞལ་སོགས་ཉེར་སྤྱོད་རྣམས་ངོས་འཛིན་གནང་བ་དང་། སྔོན་གྱི་མཛད་ཚུལ་སོགས་ངེས་ཤེས་འདྲོངས་པའི་གསུང་འཕྲོས་མང་པོ་བསྩལ་བས་ཐམས་ཅད་ཡང་ད་ཡིད་ཆེས་ཀྱི་ས་ལ་བཀོད་དེ་དད་པའི་སོར་འདབ་དབང་མེད་ད་ཟུམ་པར་བྱས། དགུང་གྲངས་བཞི་ལ་སོན་པ་སྣ་ཚོགས་ཞེས་པ་ཆུ་རྟ་ལོར་རྗེ་དབོན་རིན་པོ་ཆེ་དང་ས་སྐྱོང་ཆོས་རྒྱལ་ཆེན་མོ་གཙོས་ཡུལ་སྡེ་དགོན་འབངས་ཡོངས་ཀྱིས་ཕུན་སུམ་ཚོགས་པའི་ཆིབས་བསུ་དང་བཅས་གདན་སར་སྤྱན་དྲངས། ཉི་སྤྲུལ་བསྟན་པའི་རྒྱལ་མཚན་གྱིས་གཙུག་ཕུད་བཞེས་པའི་མཚན་ལ་ཀུན་བཟང་ཐེག་མཆོག་བསྟན་པའི་མགོན་པོ་ཞེས་དང་། རྗེ་དབོན་རིན་པོ་ཆེས་གསེར་ཁྲིར་བཀོད་པའི་མཚན་ལ་ངག་དབང་པདྨ་རྣམ་རྒྱལ་ད་གསོལ། ས་སྐྱོང་གོང་མ་ངག་དབང་ཀུན་དགའ་བློ་གྲོས་ཀྱིས་ཀྱང་ཆབ་ཤོག་གི་ལམ་ནས་ཞབས་བརྟན་དང་བཅས་རིག་འཛིན་ཕྲིན་ལས་དབང་ཕྱུག་ཨ་ཏི་བསྟན་པའི་རྒྱལ་མཚན་ཞེས་མཚན་འབུལ་གནང་། དགུང་ལོ་བདན་པར་སྐུ་རྒྱབ་སློབ་དཔོན་ཐེག་མཆོག་ལས་ལྗགས་ཀློག་དང་འདོན་ཆོག་མ་ལུས་པ་བྱང་ཆུབ་པར་མཛད་པ་དང་། དེ་ནས་ཡིད་བཞིན་མཛོད་དང་སྡོམ་གསུམ་སོགས་ཐུགས་འཛིན་གནང་ཞིང་རིམ་པར་ཉི་སྤྲུལ་རྡོ་རྗེ་འཆང་ལས་བླ་མ་དགོངས་འདས་ཉི་གྲགས་གཏེར་ཆོས་སོགས་བཀའ་གཏེར་ཆོས་ཚུལ་ད་མའི་སྨིན་དབང་གྲོལ་ཁྲིད་སྣ་ཚོགས་གསན། ཁྱད་པར་ཉི་སྤྲུལ་རིན་པོ་ཆེས་མཁན་པོ་དང་རྗེ་དབོན་མཆོག་ནས་ལས་ཀྱི་སློབ་དཔོན་མཛད་དེ་དགེ་འདན་ལྔ་ཚོགས་ཀྱི་དབུས་སུ་རབ་ཏུ་བྱུང། མཚན་ངེས་དོན་བསྟན་འཛིན་བཟང་པོར་གསོལ། གཞན་ཡང་རྗེ་དབོན་རིན་པོ་ཆེ་ལས་སྙིང་ཐིག་གོང་འོག་གི་ཉམས་ཁྲིད་གནད་ཡིག་སོགས་གོང་མའི་ཞལ་ཤེས་ཐམས་ཅད་བུམ་པ་གང་བྱོའི་ཚུལ་ད་བསྩལ་བས་ཐུན་མིན་རིགས་བདག་ཏུ་གྱུར། ཀཿཐོག་དྲི་མེད་ཞིང་སྐྱོང་ལས་བདད་འདལ་གཏེར་ཆོས་ཆ་ཚང་བ་དང་། འབར་ཆུང་བཀྲ་ཤིས་རྒྱ་མཚོ་ལས་རྒྱལ་བཀའ་རིན་པོ་ཆེའི་བཀླག་ལུང་། ཉི་གྲགས་གདན་ཚབ་སྐལ་བཟང་དོན་ཡོད་ལས་སྙིང་ཐིག་ཉམས་ཁྲིད་ཟབ་རྒྱས་བཞེས། དེ་མཚུངས་དཔའ་བོ་ལས་རབ་རྩལ། གུ་གུ་བླ་མ་བསྟན་འཛིན་སྙིང་པོ། མཁས་བཙུན་ནམ་མཁའ་མཆོག་གྲུབ་སོགས་དགེ་བའི་བཤེས་གཉེན་ད་མ་ལས་བཀའ་ཆོས་གྲངས་མང་གསན། དགུང་གྲངས་ཉི་ཤུ་པ་ས་ཁྱི་ལོར་སྐུ་རབས་གོང་མའི་མཛད་སྲོལ་ལྟར་དབུས་ཕྱོགས་སུ་ཆིབས་བསྐྱོད་མཛད། ཇོ་ཤཱཀ་གཉིས་གཙོ་བོར་གྱུར་པའི་ལྷོ་བྲག་ཚུན་གྱི་གཙུག་ལག་ཁང་རྣམས་སུ་མཆོད་སྤྲིན་རྒྱས་སྤྲོས་དང་བསྟན་འགྲོར་ཕན་པའི་ཐུགས་སྨོན་འཕྲིན་བཅོལ་གང་ཟབ་གནང། རྒྱལ་དབང་ཐམས་ཅད་མཁྱེན་པ་འཇམ་དཔལ་རྒྱ་མཚོ་དང་ཁྲི་ཆེན་ནོ་མི་ཧན་གཉིས་ལ་དངོས་རྫས་གཏོས་ཆེན་པོའི་འབུལ་ཚན་ཕུལ་ཞིང་། གཞུང་ས་ནས་ཀྱང་རྗེ་གོང་མ་གཉིས་དང་འདྲ་མཚུངས་ཀྱི་ལུང་ཐམ་གནང་། གདན་ས་ཆེན་མོ་གསུམ་དང་སྨོན་ལམ་འདས་ཚོགས་ལ་མང་ཇ་དངུལ་འགྱེད་གྱ་ནོམ་པ་དང་བཅས་ལྷོ་བྲག་ཕྱོགས་སུ་ཕེབས་ཏེ། ལྷོ་བྲག་ཐུགས་སྲས་ལས་པད་གླིང་ཆོས་སྐོར་དང་། གྲུབ་ཆེན་པདྨ་བཤེས་གཉེན་ལས་བྱང་གཏེར་སོགས་རྙིང་ཆོས་འགའ། སྨིན་གླིང་མཁན་ཆེན་ལས་བསྙེན་པར་རྫོགས་ཤིང་གཏེར་ཆེན་ཡབ་སྲས་ཀྱི་ཆོས་སྐོར་ཡོངས་རྫོགས་གསན་པ་སོགས་ཆོས་སྲིད་ཀྱི་ལེགས་ཚོགས་གོང་འཕེལ་ངང་མདོ་ཁམས་སུ་ཞལ་ཕྱིར་ཕྱོགས། ཀུན་མཁྱེན་འཇིགས་མེད་གླིང་པས་དགོན་གྱི་ལུང་ཕུར་ས་དབྱིབས་སྒོམ་ཆེན་མཉམ་བཞག་འདྲ་བའི་པང་ད་སྒྲུབ་སྡེ་ཞིག་བཙུགས་ན་ཕུང་པོ་འོད་སྐུར་གྲོལ་བ་གྲངས་གྱིས་མི་ལང་པ་འབྱུང་ཞེས་ལུང་བསྟན་པ་ལྟར་གནས་དེར་སྒྲུབ་སྡེའི་འད་ཁང་རྟེན་བརྟེན་པ་གསར་བཞེངས་དང་། འཇུ་བླ་སངས་རྒྱས་འོད་ཟེར་སོགས་སྤོང་བ་པ་བཅུ་གསུམ་སྒྲུབ་རྒྱགས་མཚམས་གཡོག་བཅས་རྒྱུན་འཇགས་མཛད་། དེ་བཞིན་བར་ན་བཀའ་མའི་དཀྱིལ་འཁོར་བཅུ་གསུམ་གྱི་སྒྲུབ་མཆོད་ངོ་མཚར་བ། གར་ཐིག་དབྱངས་རོལ་བཅའ་གཤམ་སོགས་སྒྲིག་ལམ་གྱི་ཕྱག་བཞེས་གསར་ད་འཛུགས་པར་མཛད་ཅིང་། དེ་ལས་འཕྲོས་ཏེ་མདོ་ཁམས་སྟོད་སྨད་ཀུན་ཏུ་བཀའ་གཏེར་གྱི་བསྟན་པ་ཉིན་བྱེད་གསལ་བ་ལྟར་ཁྱབ་པར་བྱུང་བ་ཡང་སྐྱེས་བུ་དམ་པ་འདིའི་ཕྲིན་ལས་ལས་མ་འདས། སྨད་ན་གཟུངས་སྔགས་ཀྱི་ཆོས་འཁོར་ཆེན་པོ་བཅུ་གསུམ་བཞེངས་ནས་འབྱུང་བ་ཆུ་ཡང་ཆོས་མཛད་ཀྱི་བྲན་ད་བཀོལ་བས་བགྲངས་ཡས་འགྲོ་བའི་རྒྱུད་ལ་རྣམ་པར་གྲོལ་བའི་ས་བོན་ཐེབས་པར་བྱས། གཞན་ཡང་རྫ་རྒྱུད་ད་ཕྱག་ཚྭ་དགོན་དང་། སྟག་དགོན་ད་ཀཿཐོག་དགོན། སྙི་ཁོག་ཏུ་ཡང་ལྷ་ཁང་གསར་བཞེངས་བཅས་ཕྱོགས་སུ་བུ་དགོན་མང་པོ་གསར་འདེབས་དང་དེ་དག་ལ་དངོས་པོའི་མཐུན་རྐྱེན་རྒྱ་ཆེར་བསྩལ་བར་མཛད། རང་དགོན་ད་སྐྱེས་རབས་ལྷ་ཁང་དང་། ལི་མ་ལྷ་ཁང་། ཞི་ཁྲོའི་ལྷ་ཁང་སོགས་གཙུག་ལག་ཁང་ད་མ་གསར་བཞེངས་མཛད་ཅིང་། དེ་དག་རྣམས་སུ་སྐུ་རྒྱུ་གཟི་བྱུར་དང་གསེར་ཟངས་ལས་གྲུབ་པའི་སྐུ་བརྙན་ཆེ་ཆུང་མང་པོ་བཞུགས་སུ་གསོལ་བ་དང་། གཞན་གསེར་དངུལ་སོགས་རིན་པོ་ཆེ་སྣ་ཚོགས་ཀྱི་ཁུ་བས་བྲིས་པའི་སྐྱེས་རབས་ལྡེབས་རིས་དང་ཞལ་ཐང་དངོས་གཙང་བ་བརྒྱ་ཕྲག་གི་གྲངས་ལས་བརྒལ་བ་བཅས་སྐུ་རྟེན་དང་། གསུང་རྟེན་ད་བཀའ་བསྟན་གྱི་ཆོས་དཔེ་སྣ་ཚོགས་པུསྟི་བརྒྱ་ཕྲག་མང་པོ་དང་། ཉིད་ཀྱི་ལྗགས་རྩོམ་ཆོས་སྤྱོད་སོགས་བཀའ་གཏེར་གྱི་དཀྱིལ་འཁོར་མང་པོའི་འདོན་ཆ་དཔར་ཤིང་ད་བསྐྲུན་པ་ཁོ་ན་ལྡེབ་སྟོང་ཕྲག་ད་མ་ལས་བརྒལ་བ་སོགས་ཆོས་སྤྱོད་བཅུའི་མཛད་པ་བློ་ཡུལ་ལས་འདས། མཆོག་སྤྲུལ་འདིས་གྲུབ་དབང་གོང་མ་རྣམས་ཀྱི་ཕྱག་བཞེས་བསམ་གཏན་གྱི་སྡེ་སྐྱོང་བ་ཁོ་ནས་མ་ཚད་པར། སྒྲུབ་མཆོད་གར་ཐིག་སོགས་སྤྲོས་བཅས་ཀྱི་མཛད་པ་རྒྱ་ཆེ་བར་བསྐྱངས་པས་གདན་ས་འཕེལ་རྒྱས་སྔར་ལས་ཆེ་བ་བྱུང་། རིག་འཛིན་ཉི་མ་གྲགས་པའི་དག་སྣང་ཐོར་བུའི་ལུང་བྱང་ལས། འགྲོ་དོན་འདི་བྱང་གི་ཕྱོགས་སུ་འབྱུང༔ ཞི་བ་འདི་རྒྱས་པའི་ལས་ལ་འགྲོ༔ དེ་བྱང་ཆུབ་སེམས་ལྡན་རིག་པ་འཛིན༔ པདྨའམ་གྲགས་པོའི་མིང་གིས་སྤེལ༔ ཞེས་དང་། རྗེ་དབོན་རིན་པོ་ཆེའི་བཀའ་ལས། བདག་གི་མཆོག་སྤྲུལ་རིན་པོ་ཆེ་འདི་དས་གསུམ་ཀུན་མཁྱེན་པདྨ་འབྱུང་གནས་དང་པཎ་ཆེན་བཱི་མ་ཟུང་གི་ཕྲིན་ལས་གཅིག་བསྡུས་ཡིན་པས། བསྟན་འགྲོའི་ཕན་བདེ་སྤེལ་བར་འགྲན་ཟླ་མེད་པ་ཡིད་བཞིན་ནོར་བུ་དང་འདྲ་བ་ཞིག་འབྱུང་ངེས་ཡིན་ཞེས་བཀའ་ལུང་གནང་བ་དོན་སྨིན་ད་བྱུང་ཞེས་ཀུན་ཀྱིས་བསྔགས་བརྗོད་ཀྱི་མེ་ཏོག་འཐོར་བར་མཛད་པ་སྟེ་ཐུན་མོང་ཕྱི་ཡི་རྣམ་ཐར་སྤྱི་དང་། བྱེ་བྲག་ཐུན་མིན་གྱི་རྣམ་ཐར་ལྷག་པའི་ལྷས་ཞལ་གཟིགས་ལུང་བསྟན་ཐོབ་པ། ཆོས་སྐྱོང་བྲན་ད་བཀོལ་བ། ས་ལམ་གྱི་མངོན་རྟོགས་རྫོགས་ཚུལ་སོགས་གསང་བའི་རྣམ་ཐར་ཤིན་ཏུ་མང་བ་སྟེ། དགུང་གྲངས་བཞི་པར་གདན་སར་ཐོག་མར་ཞབས་འཁོད་ཉིན་ཕོ་བྲང་དབུ་རྩེའི་སྟེང་ན་དཔལ་མགོན་མ་ནིང་དང་སྔགས་སྲུང་མ་བཞུགས་པ་དངོས་སུ་གཟིགས་ཤིང་། དེ་ནས་སྐབས་དང་སྐབས་སུ་དམ་ཅན་སྐུ་ཆུང་ངུ་ཞིག་གིས་སྲུང་བའི་ཚུལ་གྱིས་ཡང་ཡང་སྐོར་བ་བྱེད། ཡོངས་འཛིན་སློབ་དཔོན་པདྨ་མཆོག་ལས་ལྗགས་ཀློག་དང་སྐབས། གཟིམས་ལམ་ད་གཞི་བདག་ཀུ་ར་ཡིན་ཟེར་བའི་གཡག་དཀར་ཞོན་པའི་མི་དཀར་བོན་ཞྭ་གྱོན་པ་ཞིག་ཡང་ཡང་འོང་བ་གཟིགས། རྗེ་དབོན་བླ་མར་ཞུས་པས་དེ་ཡུལ་ལྷ་ཡིན་ཞིང་ཁྱེད་ལ་འཁོར་བར་སྣང་ཡང་མི་ལེགས་པས་ངས་ཐབས་བྱའོ་གསུངས་ཏེ་ཐུགས་དམིགས་གནང་བས་དེ་ཕྱིན་འོང་རྒྱུ་མེད་པར་གྱུར། སྐུབས་ཤིག་མི་མང་ཚོགས་པའི་ཁྲོམ་གསེབ་ཞིག་ཏུ་འདག་པ་ལན་གཅིག་གཟིགས་གསུངས། ཡང་སྐབས་ཤིག་དཔལ་མགོན་མ་ནིང་མངོན་རྟོགས་དང་མཐུན་པ་ཞིག་གིས་ཞལ་གཟིགས་པ་དང་། གྲུབ་དབང་པདྨ་བཤེས་གཉེན་ལ་དབང་གསུང་སྐབས་སྨན་ཐོད་ལས་བདད་རྩི་དངོས་སུ་ཁོལ་བ་དེར་གནས་ཀུན་ཀྱིས་མངོན་སུམ་ད་མཐོང་། དགུང་གྲངས་ཉེར་གཉིས་དས་མཚོ་རྒྱལ་དཀར་མོ་ཕྱག་ན་མདའ་དར་དང་ཚེ་བུམ་ཐོགས་པ་ཞིག་གིས་འབྱུང་འགྱུར་ལུང་བསྟན་དང་། ཆོས་བཀའ་མང་པོ་འབེབས་རྒྱུའི་བརྡ་འགྲོལ་བྱུང་ཡང་བདག་གིར་མ་མཛད། ཁྱད་པར་ཨོ་རྒྱན་ཆེན་པོས་ཞལ་གཟིགས་ཐེངས་མང་གནང་བ་དང་། དེ་མཚུངས་པཎ་ཆེན་བཱི་མ་ཏྲ། རླངས་ཆེན་དཔལ་གྱི་སེང་གེ། རྒོད་ཚང་སྣ་ཚོགས་རྣམས་ཀྱིས་ཀྱང་ཞལ་གཟིགས་ཡང་ཡངཐོབ་ཅིང་གསུང་གླེང་མང་པོ་མཛད། ལྷ་ལྡན་ད་ཇོ་བོ་མཇལ་དས་ཤཱཀྱ་ཐུབ་པ་དངོས་ཞལ་འཛུམ་པར་གཟིགས་ཤིང་འཁོར་གྱི་ལྷ་རྣམས་ཀྱང་དེ་དང་དེར་མངོན་སུམ་ད་གཟིགས། ཁྲ་འབྲུག་ཏུ་སྒྲོལ་མ་ཞལ་ཟས་མ་ཞལ་འཛུམ་པར་མཛད་པ་དང་། ཁྲོ་བོ་མི་གཡོ་བའི་རལ་གྲི་ལས་མེ་འབར་བ་སོགས་གཟིགས་སྣང་ཁྱད་པར་ཅན་སྣ་ཚོགས་བྱུང་། དེ་བཞིན་གདན་སར་སྒྲུབ་ཆེན་གྱི་ཚོགས་དབུར་བཞུགས་དས་རྒྱུད་མགོན་ལེགས་ལྡན་དང་ཚེ་རིང་མཆེད་ལྔས་རང་གཟུགས་དངོས་སུ་བསྟན་པ་དང་། རྒྱུན་ད་མ་གཟའ་དམ་གསུམ། བཙན་རྒོད་ཆེན་པོ་སོགས་སྐུ་མདན་ད་མི་དང་མི་བཞིན་འོང་སྟེ་ཅི་བཅོལ་གྱི་ཕྲིན་ལས་སྒྲུབ་པ་སོགས་ངོ་མཚར་བའི་རྣམ་ཐར་མཐའ་ཡས། དེ་ལྟར་ཕྱི་ནང་གསང་བའི་མཛད་པས་བསྟན་འགྲོའི་གཞན་དོན་རྒྱ་ཆེར་བསྒྲུབས་ནས། དགུང་ལོ་སུམ་ཅུ་ལ་སོན་སྐབས་མཁའ་འགྲོས་བསུ་བའི་ལྟས་མང་པོ་རིམ་པར་བྱུང་ཞིང་། བླ་ཆེན་ནམ་མཁའ་མཆོག་གྲུབ་ནས་བསུན་བཟློག་མཛད་པས་ཡུན་རེར་བཟློག་པ་ལྟར་སྣང་ཡང་། སླར་ཡང་སྔར་ལྟར་བྱུང་བར་གསུངས་ཤིང་རེ་ཞིག་གདལ་བྱ་དེ་ཙམ་ད་དགོངས་ནས་དགུང་ལོ་སོ་བཞི་པ་ཆུ་ཕོ་བྱི་བའི་ལོར་དགོངས་པ་ཆོས་དབྱིངས་སུ་བསྡུ་བའི་ཚུལ་བསྟན། གསུང་ལས་སྐྱེས་པའི་ཞལ་སློབ་ཀྱི་གཙོ་བོ་རྡོ་གྲུབ་འཇིགས་མེད་ཕྲིན་ལས་འོད་ཟེར། འབར་ཆུང་འཇིགས་མེད་གོ་ཆ། དགེ་རྩེ་བླ་མ་འཇིགས་མེད་ངོ་མཚར་རྒྱ་མཚོ། སེང་ཕྲུག་པདྨ་བཀྲ་ཤིས། འཇུ་བླ་སངས་རྒྱས་འོད་ཟེར་སོགས་སྒྲུབ་གྲྭའི་འཇའ་ལུས་པ་བཅུ་གསུམ། ཉི་གྲགས་སྤྲུལ་སྐུ་ཨོ་རྒྱན་བསྟན་འཛིན། རབ་འབྱམས་གཉིས་པ་ཀུན་བཟང་རྣམ་རྒྱལ། རྒྱལ་ཚབ་མཆོག་སྤྲུལ། དབོན་སྤྲུལ་བསྟན་པའི་ཉི་མ། གུ་གུ་བླ་མ་བསྟན་འཛིན་སྙིང་པོ། གནས་མདོའི་ཆགས་མེད་སྤྲུལ་སྐུ། རྡོ་བྲག་མཆོག་སྤྲུལ། ཡོལ་མོ་སྤྲུལ་སྐུ། ལྕགས་ལའི་རྒྱལ་སྲས། གྲུབ་ཆེན་པདྨ་བཤེས་གཉེན་སོགས་ས་ཐོབ་ཀྱི་སེམས་དཔའ་མིའི་བརྫུ་ལ་བྱོན་པ་གྲངས་མེད་པས་རྒྱལ་བསྟན་བཤད་སྒྲུབ་ཀྱི་འཁོར་ལོ་མཁས་ཚུལ་གསུམ་གྱི་མཛད་པས་ཇི་སྲིད་བསྐལ་བ་རྒྱ་མཚོར་མི་ཉམས་སྲིད་པའི་བླ་ན་མངོན་པར་མཐོ་བར་མཛད་དོ། །
རྫོགས་ཆེན་རིན་པོ་ཆེ་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེ།
[རྩོམ་སྒྲིག]འོད་གསལ་བསྟན་པའི་ཤིང་རྟ་ཆེན་པོ་མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་ནི། ཐེག་རྩེ་མན་ངག་སྙིང་ཐིག་གི་བརྒྱུད་པའི་བཀའ་སྲོལ་ཐམས་ཅད་ཡོངས་སུ་རྫོགས་པ་འཛིན་པའི་གསང་མཛོད་ཆེན་པོ་སྟེ། གོང་དུ་ཞིབ་པར་གསལ་བ་ལྟར་ཨོ་རྒྱན་སངས་རྒྱས་གཉིས་པས་གཞོ་སྟོད་ཏི་སྒྲོ་མཁའ་འགྲོའི་ཚོགས་ཁང་ཆེན་མོར་ཞི་ཁྲོ་དོན་གྱི་དཀྱིལ་འཁོར་གྱི་རང་ཞལ་ཕྱེས་ནས། མཁའ་འགྲོ་ཡེ་ཤེས་མཚོ་རྒྱལ་སོགས་ཡེ་ཤེས་ཀྱི་མཁའ་འགྲོ་མ་འབུམ་ཕྲག་གཅིག་ལ་རིམ་དགུ་ཐེག་པའི་རྩེ་རྒྱལ་གསང་བ་སྙིང་ཐིག་གི་སྨིན་ཁྲིད་མནོག་ཆོས་སུ་བསྩལ་བ། ཨོ་རྒྱན་ཡབ་ཡུམ་གྱིས་ཕྱི་རབས་ཀྱི་གདུལ་བྱའི་དོན་དུ་དགོངས་ཏེ་ཡི་གེར་ཕབ་ཅིང། ལྷ་ལྕམ་པདྨ་གསལ་ལ་སྨོན་ལམ་གཏད་རྒྱ་དང་བཅས་དྭགས་ལུང་ཁྲ་མོའི་བྲག་ལ་གཏེར་དུ་སྦས་པ། ཕྱིས་སུ་སྨོན་ལམ་ལུང་བསྟན་དུས་སུ་སྨིན་པ་ལྷ་ལྕམ་སྤྲུལ་པ་པདྨ་ལས་འབྲེལ་རྩལ་གྱིས་གཏེར་གནས་ནས་སྤྱན་དྲངས་ཏེ་རྒྱལ་སྲས་ལེགས་ལྡན་རྡོ་རྗེ་ལ་བསྩལ་བ་དང་། དེ་ལས་ཀུན་མཁྱེན་ཆོས་ཀྱི་རྒྱལ་པོ་དང་རྒྱལ་བ་ཡེ་ཤེས་རབ་འབྱམས་སོགས་བླ་རབས་བརྒྱད་ནས་གྲུབ་དབང་པདྨ་རིག་འཛིན་ལ་བཀའ་བབ། དེ་ལས་དཔོན་སློབ་ནམ་མཁའ་འོད་གསལ། རྗེ་དབོན་པདྨ་ཀུན་གྲོལ། ནམ་མཁའ་ཚེ་དབང་མཆོག་གྲུབ་ནས། མི་འགྱུར་ནམ་མཁའི་རྡོ་རྗེ་ལ་བསྩལ་བའི་རྫོགས་ཆེན་མཁའ་འགྲོ་སྙིང་ཐིག་ཐུན་མིན་རང་རྐང་གི་བརྒྱུད་པ་གཅིག་དང་། གཞན་ཡང་ཀུན་མཁྱེན་ཆེན་པོ་ནས་མཁན་ཆེན་ཁྱབ་གདལ་ལྷུན་གྲུབ་སོགས་ལ་རིམ་པར་བརྒྱུད་དེ། ཕྱིས་སུ་སྨིན་གླིང་གཏེར་ཆེན་ནས་ངེས་དོན་བསྟན་འཛིན་བཟང་པོ་སོགས་སུ་བརྒྱུད་པའི་ཐུན་མོང་རིང་བརྒྱུད། ཁྱད་པར་ཀུན་མཁྱེན་ཆེན་པོས་རིག་འཛིན་འཇིགས་མེད་གླིང་པ་ཡེ་ཤེས་སྒྱུ་མའི་སྐུས་ལན་གསུམ་རྗེས་སུ་བཟུང་སྟེ་བསྩལ་བའི་ཉེ་བརྒྱུད་རྡོ་གྲུབ་འཇིགས་མེད་འཕྲིན་འོད་ཟེར་ལས་ཆིག་བརྒྱུད་དུ་གསན་པ་དང་། དེ་བཞིན་མི་འགྱུར་ནམ་མཁའི་རྡོ་རྗེ་ཉིད་མགོན་ཁང་དབང་དྲག་རོལ་བར་དགོངས་པ་འོད་གསལ་གྱི་ཏིང་ངེ་འཛིན་ལ་བཞུགས་སྐབས་ཀུན་མཁྱེན་ཆོས་ཀྱི་རྒྱལ་པོས་ཞལ་དངོས་སུ་བསྟན་ནས་ཡེ་ཤེས་ཀྱི་སྐུས་བྱིན་གྱིས་བརླབས་ཏེ། ཡང་ཏིག་ཡིད་བཞིན་ནོར་བུའི་དབང་ཁྲིད་གདམས་ངག་དང་བཅས་པ་གནང་བའི་ཟབ་པ་ཤིན་ཏུ་ཉེ་བརྒྱུད་དེ་བརྒྱུད་པའི་ཆུ་བོ་ཆེན་པོ་བཞི་འདུས་ཀྱི་བཀའ་བབ་པ་ཡིན་ལ། དམ་པའི་སྐྱེས་བུ་མཆོག་ཉིད་ཚུར་མཐོང་གདུལ་བྱའི་མོས་ངོར་ཞིང་འདིར་ཇི་ལྟར་བྱོན་པའི་ཚུལ་ནི། སྤྱིར་ལོངས་སྤྱོད་རྫོགས་པའི་སྐུ་རྣམས་ཡེ་ཤེས་རང་སྣང་གི་སྐུ་དང་ཞིང་ཁམས་ལས་ནམ་ཡང་གཡོ་བ་མེད་བཞིན་སྤྲུལ་བའི་རྣམ་རོལ་ཚད་མེད་པ་རྟག་ཁྱབ་ལྷུན་གྲུབ་ཏུ་འབྱུང་བ་བཞིན། བདག་ཉིད་ཆེན་པོ་འདི་ཡང་རྒྱལ་བའི་དཀྱིལ་འཁོར་མ་ལུས་པའི་དབང་ཕྱུག་ཁྱབ་བདག་གདོད་མའི་མགོན་པོ་དང་ཐ་མི་དད་པའི་ངོ་བོར་སངས་རྒྱས་སུ་ཟིན་ཀྱང་། སྣ་ཚོགས་འཁྲུལ་བས་བསླུས་པའི་འགྲོ་བ་ལ་ཐུགས་ལྷག་པར་བརྩེ་བ་དང་། ཁྱད་པར་གསང་ཆེན་བླ་ན་མེད་པ་འོད་གསལ་རྫོགས་པ་ཆེན་པོའི་རིང་ལུགས་ཕྱོགས་བརྒྱར་སྤེལ་ཕྱིར་སུམ་ལྡན་རྡོ་རྗེ་འཛིན་པའི་ཚུལ་དུ་བསམ་བཞིན་སྲིད་པ་བཟུང་བ་སྟེ། ཇི་སྐད་དུ། ཀུན་མཁྱེན་འཇིགས་མེད་གླིང་པའི་རྡོ་རྗེའི་ལུང་བྱང་ལས། གནས་དང་འབྲེལ་བ་གངས་ཀྱི་མཚམས༔ ཤུལ་གསུམ་བགྲོད་ལ་བལྟ་རྟོག་གྱིས༔ ཨེ་ཀ་ཛ་ཊཱིའི་སྐོུང་སྟོང་འབུངས༔ ཞེས་དང་། ལྐོག་གྱུར་འདི་དོན་ལྐོག་ཏུ་མ་གྱུར་ཏེ༔ རྡོ་རྗེ་གསུམ་སྤྲུལ་གཉིས་ནི་དབུས་མཐར་གབ༔ འགྲོ་དོན་དུས་བབ་དག་ཆེན་ཐུགས་ཀྱི་སྤྲུལ༔ གནས་དེའི་ནུབ་ཕྱོགས་གནས་དང་ཉེ་བའི་ཆར༔ གངས་རི་ཡིས་མཚན་གསེར་ལྡན་ཀླུང་ཆེན་འགྲམ༔ ཆེ་བཙན་རིགས་བཙུན་གསུམ་ཤུལ་གཙང་མའི་རྒྱུད༔ བསོད་ནམས་ཕ་ལ་ནོར་འཛིན་མ་ཐོགས་པར༔ ཡོད་ཅེས་སྣང་ཤེས་འདྲེས་པའི་ངང་ནས་གོ༔ ཞེས་ཤིན་ཏུ་གསལ་བར་གསུངས་པ་དང་། དེ་མཚུངས་སྐུ་གོང་མ་ངེས་དོན་བསྟན་འཛིན་བཟང་པོའི་ཞལ་ནས། ཁོ་བོ་ཡུན་རིང་འཚོ་དཀའ་ཡང་སྤྲུལ་པ་གསུམ་འབྱུང་བའི་གཉིས་མངའ་རིས་དང་དབུས་ཕྱོགས། གཅིག་ཕྱོགས་འདི་དང་མི་རིང་བའི་སར་ཤིང་སྡོང་ཆེན་པོ་ཡོད་པ་ཞིག་གི་རྩར་འཁྲུངས་ལ། དེ་ཉིད་ཀྱིས་བསྟན་པ་ལ་ཕན་པ་འོང་ཞེས་ཞབས་གྲས་ནང་མ་རྣམས་ལ་གསུང་འཕྲོས་སུ་བསྩལ་བ་ལྟར། གདན་ས་ཆེན་པོ་རུ་དམ་ཨོ་རྒྱན་བསམ་གཏན་གླིང་གི་ནུབ་ཕྱོགས་ཉིན་ཞག་གསུམ་གྱིས་ཆོད་པའི་སའི་ཆ། སྔོན་ཡིག་མཁན་ལྡན་མ་རྩེ་མང་དང། པཎ་ཆེན་སྨྲི་ཏི་ཛྙ་ན། འབྲོམ་སྟོན་པ་རྒྱལ་བའི་འབྱུང་གནས་སོགས་འཕགས་བོད་ཀྱི་སྐྱེས་བུ་དུ་མས་ཞབས་ཀྱིས་བཅགས་པའི་གནས། དགེ་བཅུ་སའི་དཔྱད་ཡོངས་སུ་རྫོགས་པའི་ལྗོངས་ཆེན་མོ་འདན་ཡུལ་ཞེས་གྲགས་པའི་ནོར་འཛིན་གྱི་ཐིག་ལེ། གཞིའི་བདག་པོ་གངས་རི་མཆེད་བརྒྱད་ཀྱིས་སྐྱོང་བས་གངས་རི་ཞེས་པའི་སའི་མཚམས། གནས་ཆེན་སེང་གེ་གནམ་རྫོང་དང་མཐའ་འདུལ་གྱི་གཙུག་ལག་ཁང་གླང་ཐང་སྒྲོལ་མ་ལྷ་ཁང་ཞེས་གྲགས་པའི་ཉེ་འདབས་གསེར་ལྡན་འབྲི་ཆུའི་ཀླུང་ཆེན་དལ་གྱིས་འབབ་པའི་གཡས་ཟུར། འདན་ར་ཁོ་དཔོན་ཚང་ཞེས་ཆེ་བ་བཙན་གྱི་རིགས་རྒྱུད་མ་ཉམས་ཤིང་དམ་པའི་སྐྱེས་བུ་བརྒྱུད་མར་བྱོན་པའི་ལྷ་ཁྱིམ་ལྕང་མའི་སྡོང་པོ་ཆེན་པོ་གདུགས་ལྟར་མཛེས་པ་རུ། ཡབ་བསོད་ནམས་རབ་བརྟན་དང་། ཡུམ་ནམ་མཁའ་ནོར་འཛིན་དབང་མོ་གཉིས་ཀྱི་སྲས་སུ་རབ་བྱུང་བཅུ་གསུམ་པའི་ནང་ཚན་ཆུ་མོ་གླང་གི་ལོ་སྟེ། སྤྱི་ལོ་༡༧༩༣པར་ངོ་མཚར་བའི་མཚན་ལྟས་དུ་མ་དང་བཅས་སྐུ་བལྟམས། འཁྲུངས་ནས་རིང་པོར་མ་ལོན་པར་རྫོགས་ཆེན་རྫོགས་ཆེན་ཞེས་ཡང་ཡང་གསུངས་པ་དང་། རྔ་བོ་ཆེ་ཞིག་ཡོད་པ་རྡུང་བཞིན་བཛྲ་གུ་རུའི་འཛབ་དབྱངས་སྒྲོག་པ་དང་། དེ་བཞིན་དབང་སྐུར་ཆོས་བཤད་ཀྱི་ཚུལ་མཛད་པ་སོགས་དམ་པའི་བག་ཆགས་གསལ་བར་སད། དགུང་ལོ་ལྔ་ལ་སོན་སྐབས་ཆེ་ཡོས་རིག་འཛིན་ཆེན་མོའམ་དཔའ་བོ་ལས་རབ་རྩལ་ལྡན་ཁོག་ལོ་ཆུང་ནང་དུ་སྡེ་དགེའི་གཉེར་ཆེན་གཤེན་རབ་སྟག་རྒྱལ་གྱིས་གདན་དྲངས་པ་ལྟར་ཕེབས་ནས་ཚེ་སྒྲུབ་བདུད་བཞི་རྣམ་རྒྱལ་གྱི་སྒྲུབ་ཆེན་མཛད། དེ་སྐབས་རིག་འཛིན་ཆེན་པོས། ད་རེས་ར་ཁོ་དཔོན་ཚང་གི་བུ་ཆུང་བ་དེ་འདིར་མ་འབྱོར་ཐབས་མེད་ཡིན་ཞེས་ནན་གསུང་གནང་། བཀའ་ལྟར་སྐུ་མདུན་དུ་ཁྲིད་པས་སྒྲུབ་དབང་རྒྱས་པ་སྐུ་རྐྱང་ལ་བསྩལ་བ་དང་། ཚེ་སྒྲུབ་ཀྱི་ཕྱག་དཔེ་ཞིག་ཀྱང་གནང་ནས་ལྗགས་ཀློག་མཁྱེན་པ་དང་ཐུགས་འཛིན་ཞལ་འདོན་ཆད་མེད་གནང་དགོས་ཚུལ་སོགས་ཐུགས་ཤིན་ཏུ་དགྱེས་པས་དོན་གྱི་ངོས་འཛིན་མཛད། དགུང་ལོ་བདུན་བཞེས་པ་ས་མོ་ལུག་གི་ལོར་རྫོགས་ཆེན་གདན་ཚབ་སྤྲུལ་སྐུ་ནམ་མཁའ་ཚེ་དབང་མཆོག་གྲུབ་དང་། སྡེ་དགེ་ཆོས་རྒྱལ་ཆེན་པོ་སོགས་མཆོད་ཡོན་རྣམས་ཀྱི་ཐུགས་དགོངས་ལྟར། རྒྱལ་རོང་སྤྲུལ་སྐུ་བསྟན་པའི་ཉི་མ། དབོན་ཨོ་རྒྱན་བསམ་འགྲུབ། བླ་མ་རིག་འཛིན་བཟང་པོ་སོགས་དབུ་ཆེ་དྲགས་རིམ་དཔོན་སློབ་སུམ་ཅུ་སྐོར་ཡབ་གཞིས་སུ་བྱོན་པ་ན། སྤྲུལ་པའི་སྐུས་སྔོན་གནས་རྗེས་དྲན་དང་དགྱེས་པའི་རྣམ་འགྱུར་དུ་མ་མཛད་པས་བླ་གྲྭ་ཀུན་ཡིད་ཆེས་ཀྱི་ངེས་ཤེས་འཁྲུངས་ཤིང་དད་པའི་མཆི་མ་དབང་མེད་དུ་འཐོར་བ་དང་བཅས་གྲུབ་དབང་རྫོགས་ཆེན་པའི་ཡང་སྲིད་བཞི་པར་ཐུགས་ཐག་ཆོད། དེ་ནས་ཡབ་ཡུམ་སྐུ་འཁོར་དང་ས་དབང་སྡེ་དགེའི་ཆིབས་ཁ་བ་སོགས་དཔོན་འཁོར་སུམ་ཅུའི་ཚོགས་དང་བཅས་པ་དལ་འབབ་གསེར་ལྡན་གྱི་ཆུ་བོ་བརྒལ་ཏེ་རུ་དམ་སྐྱིད་ཁྲམ་ལུང་དུ་ཆིབས་ཀྱི་ཁ་ལོ་བསྒྱུར། རིམ་པར་ཆུ་སྟོད་ཟླ་བའི་ཚེས་བཅུའི་སྔ་ཆ་ཉི་ཤར་གྱི་དུས་སུ། ཟེ་ཆེན། རྒྱལ་རོང་། སྟག་མོ་སྒང་སོགས་རྩ་བའི་དགོན་ལག་ཁག་དང་། སྡེ་གླིང་གི་མི་ཆེན་དཔོན་མགོ་སྐྱ་སེར་བཅས་སྐྱེ་བོའི་འདུ་ཚོགས་ས་གཞི་མི་མངོན་པ་ཙམ་གྱིས། ཆིབས་བསུ་རིང་ཐུང་དང་སེར་ཕྲེང་བཀོད་བཤམས་སོགས་ལྷ་མིའི་དཔལ་གྱི་འབྱོར་བ་བློའི་ར་བ་ལས་འདས་པའི་མཆོད་སྤྲིན་དང་བཅས། གོང་མའི་གདན་ས་རུ་དམ་ཨོ་རྒྱན་བསམ་གཏན་ཆོས་གླིང་གི་གཙུག་ལག་ཁང་ཐུབ་བསྟན་ཡོངས་སུ་འདུས་པའི་དགའ་བའི་ཚལ་ཆེན་པོར་ཞབས་སེན་ནོར་བུའི་ཕྲེང་བ་མི་འཇིགས་སྡེར་ལྔས་བཏེག་པའི་ཁྲི་ལ་མངའ་གསོལ། གཙང་ཁང་ཐུབ་ཆེན་གྱི་སྤྱན་སྔར་མཁས་གྲུབ་ཆེན་པོ་ནམ་མཁའ་ཚེ་དབང་མཆོག་གྲུབ་གྱིས་གཙུག་ཕུད་བཞེས་ཏེ་མཚན་འཇིགས་མེད་མཁྱེན་བརྩེའི་དབང་ཕྱུག་རྣམ་རྒྱལ་རྡོ་རྗེ་ཞེས་གསོལ། སླར་གསེར་ཁྲིར་ཞབས་པད་བཀོད་པ་དང་ཆབས་ཅིག་ཚེ་སྒྲུབ་འཆི་མེད་ཡང་སྙིང་གི་བརྟན་བཞུགས་དང་འབྲེལ་རྫོགས་ཆེན་གཞུང་གིས་ཁྲི་འབུལ་དང་། དེ་རྗེས་སྡེ་དགེ་ཆོས་རྒྱལ་ཆེན་པོས་སྐུ་ཚབ་གཉེར་ཆེན་ཆེད་མངགས་ཀྱིས་ཁྲི་འབུལ་ཕུལ། རིམ་པར་རྒྱལ་རོང་། གཡག་ཟེ། ཨོ་གུར་སོགས་ཡུལ་དགོན་ཐམས་ཅད་ནས་ཁྲི་འབུལ་དང་སྦྲགས། རྒྱལ་རོང་དབོན་བསམ་འགྲུབ་ནས་གསུང་བཤད་ཁྲོམ་ཐོག་ཆོད་པ་མཛད། ཕྱི་ཉིན་ཟེ་ཆེན་རིག་འཛིན་དཔལ་འབྱོར་རྒྱ་མཚོ་དབུ་བཞུགས་ཀྱིས་ཚེ་ཆོག་དང་འབྲེལ་ཞབས་བརྟན་ལེགས་འབུལ་རྒྱ་ཆེར་སྤྲོས་པ་དང་ཆབས་ཅིག་དབོན་སྤྲུལ་མཐུ་སྟོབས་རྣམ་རྒྱལ་དགུང་ལོ་བཅུ་གསུམ་དུ་སོན་པས་ཕུན་སུམ་ཚོགས་པ་ལྔ་ལྡན་གྱི་ལྗགས་བཤད་རྒྱ་ཆེར་སྤྲོས། རྒྱལ་ཚབ་པདྨ་གསང་སྔགས་བསྟན་འཛིན་གྱིས་སྔ་འགྱུར་བསྟན་པའི་བབ་ལུགས་ཀྱིས་དབུ་དྲངས་ཏེ་སྐབས་སུ་བབས་པའི་འབེལ་གཏམ་འབྱམས་ཀླས་པ་གནང་། དེ་འབྲེལ་སྟག་དགོན་གདན་ས་ནས་དབོན་སྤྲུལ་ཨོ་རྒྱན་ཉི་མ་དང་ཁང་དམར་སྤྲུལ་སྐུ་སོགས་དང་རྫོགས་ཆེན་ཕྱོགས་ཀྱི་ཡུལ་སྡེ། གཞན་ཡང་གྲུབ་མཐའ་རིས་མེད་ཀྱི་དགོན་སྡེ་འབྲེལ་ཅན། གླིང་ཚང་རྒྱལ་པོ་སོགས་ལྷ་སྡེ་མི་སྡེ་ཀུན་ཀྱིས་ཁྲི་སྟོན་དཔང་བསྟོད་དེ་ཕུལ། ཉིན་གསུམ་པར་སུ་ར་ཏོ་བཅུ་དྲུག་གི་མཆོད་གར་སོགས་དགའ་སྟོན་མཐའ་རྒྱས་ཀྱིས་མཇུག་བསྡུ་བར་མཛད། ཡབ་ཚང་ལ་དངུལ་སྲང་ཉིས་བརྒྱས་གཙོས་རྣམ་གྲངས་སུམ་བརྒྱ་ལྷག་གི་བླུ་ཡོན་གནང་སྐྱེས་དང་། དེ་བཞིན་ཕྱོགས་འབྱོར་ལྷ་མིའི་སྡེ་ཚོགས་ཀུན་ལ་སྟོན་ཆེན་གསོལ་མགྲོན་འབུལ་འགྱེད་སོགས་ཕུན་སུམ་ཚོགས་པའི་མཛད་སྒོ་སྤེལ། དེ་ནས་བཟུང་ཉེ་བར་གནས་པའི་སློབ་དཔོན་དབོན་པོ་ཆོས་གྲགས་བཟང་པོས་མཛད་དེ་བགྲང་བྱ་བཞིའི་བར་དུ་ཡི་གེའི་ཕྱི་མོ་ནས་ཐུན་མོང་རིག་གནས་ལ་བསླབ་སྦྱང་ནན་ཏན་མཛད་པས་མཁས་པར་མཁྱེན། བར་སྐབས་རྣམས་སུ་དབང་ལུང་གསན་བཞེས་དང་བསྙེན་སྒྲུབ་སོགས་ཅི་རིགས་མཛད། དགུང་ལོ་བཅུ་གཅིག་པར་ཡོངས་འཛིན་ཞི་བར་གཤེགས་པའི་ཚབ་ཏུ་མཁས་དབང་ཐུགས་རྗེ་བཀྲ་ཤིས་བཞུགས། འདི་ལོར་རྒྱ་རོང་དུ་ཆིབས་བསྐྱོད་ནས་ཉི་སྤྲུལ་གསུམ་པ་མི་འགྱུར་ཕན་བདེ་རྒྱ་མཚོ་ལས། ལྷ་བཙུན་རིག་འཛིན་སྲོག་སྒྲུབ། ལྔ་པའི་རྒྱ་ཅན་ཉེར་ལྔ། ཉི་གྲགས་ཆོས་སྐོར་ཡོངས་རྫོགས། འཇིགས་གླིང་པོད་དགུ། ཐུགས་མཆོག་རྡོ་རྗེའི་ཎཱ་ག་རཀྵ་སོགས་ཀྱི་དབང་ལུང་ཁྲིད་གསུམ་མ་ལུས་པ་གསན། དགུང་ལོ་བཅུ་གཉིས་པ་ལོ་གསར་ཆོ་འཕྲུལ་ཟླ་བར་ལོ་དར་གྱི་བུམ་སྒྲུབ་ཚེས་བཅུའི་ཚོགས་དབུར་ཕེབས་ཏེ་ཕྱི་ནང་གི་ཞལ་བཀོད་སྟོང་ཐུན་ཤར་མར་ཐུགས་ཐོག་ནས་གནང་བས་མཁན་སྤྲུལ་འདུས་སྡེ་ཡོངས་ཀྱིས་བསྔགས་བརྗོད་ཀྱི་མེ་ཏོག་འཐོར། དགུང་གྲངས་བཅོ་ལྔ་པར་མཁས་གྲུབ་མཚུངས་མེད་དཔོན་གུར་བླ་མ་ངག་དབང་བློ་གྲོས་གདན་དྲངས་ནས་བཀའ་བརྒྱད་གསང་རྫོགས། ཚེ་བདག་ལྕགས་འདྲ་ལྕགས་སྡིག རྫོགས་ཆེན་སྙན་བརྒྱུད། པད་གླིང་བླ་མ་ནོར་རྒྱམ། དྲི་མེད་ལྷུན་པོའི་དོན་ཏིག་སོགས་དབང་ལུང་གི་རྒྱུན་དཀོན་རིགས་མང་པོ་གསན་བཞེས་གནང་། ལོ་དེར་ཞེ་ཆེན་རབ་འབྱམས་གསུམ་པ་རིག་འཛིན་དཔལ་འབྱོར་རྒྱ་མཚོ་ལས་དགེ་ཚུལ་གྱི་སྡོམ་པ་བཞེས་པས་རིག་འཛིན་འགྱུར་མེད་ཀུན་བཟང་ཐེག་མཆོག་བསྟན་འཛིན་དཔལ་བཟང་པོར་མཚན་འབུལ་དང་སྦྲགས་སྟོན་མཆོག་ཤཱཀྱ་སེངྒེའི་རྒྱལ་ཚབ་ཏུ་མངའ་གསོལ། དེ་ནས་བཟུང་སྐུ་ཚེ་གང་པོར་ཕམ་ལྟུང་གི་སྡེ་ཚན་རགས་པས་ལྟ་ཅི་ཐ་ན་ཕྱི་དྲོའི་ཁ་ཟས་སོགས་ཉེས་ལྟུང་གི་ཆ་ཕྲ་མོས་ཀྱང་མ་གོས་པར་གནས་བརྟན་འདུལ་འཛིན་ཆེན་པོའི་ངོ་བོར་བཞུགས། གདོད་མའི་མགོན་པོ་ནམ་མཁའ་ཚེ་དབང་མཆོག་གྲུབ་ཐུན་མིན་རིགས་བདག་ཏུ་བསྟེན་ཏེ་མཁའ་འགྲོ་སྙིང་ཐིག་དང་། གསང་བ་སྙིང་ཐིག རྡོར་སེམས་སྙིང་ཐིག་རྣམས་ཀྱི་ཉམས་ཁྲིད་གསན་ནས་སྔོན་འགྲོའི་ཐུགས་སྦྱོང་མཛད་པས་དད་དང་ངེས་འབྱུང་བྱང་སེམས་རྣམས་བཅོས་མིན་ཐུགས་ལ་འཁྲུངས། ཁྱད་པར་གྱི་སྔོན་འགྲོ་འཁོར་འདས་རུ་ཤན་སྐབས་སྒོ་གསུམ་སྦྱོང་བ་དང་སེམས་རིག་ཤན་འབྱེད་ལ་རྡོ་རུས་ཐུག་པ་མཛད་པས། དངོས་གཞིའི་ཉམས་ཁྲིད་ལ་མ་ལྟོས་པར་རིག་སྟོང་རྗེན་པར་ངོ་འཕྲོད་དེ་ཀུན་བཟང་གདོད་མའི་རྒྱལ་སར་དབང་བསྒྱུར་བས་མདོ་ཁམས་རྫོགས་ཆེན་པ་ཞེས་གྲགས་པ་དོན་ལྡན་དུ་མཛད། དེ་མཚུངས་དགུང་ལོ་ཉི་ཤུ་བཞེས་པ་ཆུ་བྱ་ལོར་ཡར་ལུང་པདྨ་བཀོད་དུ་ཆེད་ཕེབས་ཀྱིས། ལྷ་སྲས་མཆོག་གྲུབ་རྒྱལ་པོའི་རྣམ་སྤྲུལ་གྲུབ་དབང་འཇིགས་མེད་ཕྲིན་ལས་འོད་ཟེར་ལས་ཀུན་མཁྱེན་ཡབ་སྲས་ཀྱི་བཀའ་གཏེར་དག་སྣང་བསྟན་བཅོས་སྐོར་དང་། སྙན་བརྒྱུད་རྡོ་རྗེ་ཟམ་པ་སོགས་ཀྱི་དབང་ལུང་ཁྲིད་གསུམ་ཡོངས་རྫོགས་གསན། རྗེ་འདི་ཐོག་མར་ཞལ་མཇལ་སྐབས་གཟིམས་ཁང་ཕྱིའི་ཉི་རའི་ནང་དུ་སྐུ་ན་ཤིན་ཏུ་བགྲེས་པའི་བླ་མ་ཞིག་བཞེངས་འདུག་པའི་ཞལ་ནས་ངས་ཁྱོད་ད་བར་བསྒུགས་པ་ཡིན་ཞེས་དགྱེས་ཚོར་ཆེན་པོ་གནང་སྟེ་མི་སྣང་བར་གྱུར། རིམ་པར་གཟིམས་ཁང་དུ་ཕེབས་པ་ན་ད་ཅིའི་བླ་མ་དེ་ཁྲི་མཐོན་པོ་ཞིག་གི་སྟེང་ན་ཆང་ཐོད་པ་གང་གསོལ་བཞིན་ཡོད་པ་མཇལ། ཕྱག་འབུལ་བྱས་ཏེ་སྐུ་དྲུང་དུ་བཅར་བས། དེ་མ་ཐག་ཆང་ཐོད་པ་གང་གནང་ནས་རོལ་ཅིག་གསུངས། ཡོངས་འཛིན་གྱིས་སྤྲུལ་སྐུ་རྟེན་དགེ་ཚུལ་ཡིན་ལགས་ཞུས་པར། དགེ་ཚུལ་ཡིན་ནའང་གསོལ་ཅིག་གསུངས་པས། བཀའ་གསུང་ལྟར་གསོལ་བས་སྐད་ཅིག་དེ་ཉིད་དུ་ཐ་མལ་གྱི་སྣང་ཤེས་ཐམས་ཅད་རང་བཞིན་གྱིས་འགགས་ཏེ། གང་སྣང་བདེ་སྟོང་གི་རོལ་པར་འབྱམས་སུ་ཀླས་ཤིང་བླ་སློབ་དགོངས་པ་གཅིག་ཏུ་འདྲེས་ནས་བྱིན་བརྒྱུད་ཀྱི་རྟོགས་པ་ཅར་ཕོག་ཏུ་འཕོས་པས་མཐོང་ལམ་དོན་དམ་གྱི་བདེན་པ་མངོན་དུ་གྱུར། རྗེ་འདི་གཉིས་བཀའ་དྲིན་འགྲན་མེད་ཀྱི་རྩ་བའི་བླ་མ་ཡིན་ཞེས་རྒྱུན་དུ་དད་གུས་ཚད་མེད་མཛད། གོང་གསལ་སྙིང་ཐིག་རྣམ་གཉིས་ཀྱི་དབང་ལུང་དང་། ཉང་གཏེར་རྟ་ནག མགོན་པོ་ཕྱག་བཞི་སོགས་ཉང་གཏེར་དང་། རྫོགས་ཆེན་ལྟ་བ་ཀློང་ཡངས་སོགས་རྡོར་གླིང་ཆོས་སྐོར། སངས་རྒྱས་གླིང་པའི་དགོངས་འདུས། ཀར་གླིང་ཞི་ཁྲོ། རཏྣའི་ཕུར་པ། དཔའ་བོ་ལས་རབ་རྩལ་གྱི་ཟབ་གཏེར་ཕལ་ཆེར་སོགས་དབང་ཁྲིད་ཀྱི་རྒྱུན་དཀོན་རིགས་རྣམས་གསན་བཞེས་དང་། གཏེར་ཆེན་ཀློང་ཆེན་རོལ་པ་རྩལ་གྱིས་རང་གཏེར་པདྨ་རྒྱལ་པོའི་ཆོས་སྐོར་ཤིན་ཏུ་ཟབ་པ་གཙོ་བོ་གྱུར་པའི་སྨིན་གྲོལ་གདམས་པ་བསྩལ་ཞིང་། ལྷག་པར་རྫོགས་ཆེན་སྙིང་ཐིག་གི་ཐུན་མིན་ཁྱད་ཆོས་ཐོད་རྒལ་ཉམས་ཁྲིད་བསྩལ་བ་ཐུགས་ཉམས་སུ་བཞེས་པས་རིག་པ་ཚད་ཕེབས་ཀྱི་རྟགས་སྣང་མངོན་དུ་གྱུར། མཁན་རིག་འཛིན་བཟང་པོའི་མདུན་ནས་ཉང་གཏེར་བཀའ་བརྒྱད། དགེ་རྩེ་བླ་མ་འཇིགས་མེད་ངོ་མཚར་རྒྱ་མཚོ་ལས་འདུས་པ་མདོ་དབང་ཆེན་མོ་དང་སྙིང་ཐིག་སྐོར། རྒྱལ་བའི་སྲས་པོ་གཞན་ཕན་མཐའ་ཡས་ལས་བཀའ་བསྟན་གྱི་ལུང་རྒྱུན་གང་ཡོད་དང་། ཁྱད་པར་སྔ་འགྱུར་རྙིང་མའི་རྒྱུད་གཞུང་རྒྱ་འགྲེལ་གྱི་བཤད་རྒྱུན་འཕགས་བོད་པཎ་གྲུབ་ཀྱི་ཞལ་ཤེས་འཁྲུལ་མེད་རྣམས་གསན། དེ་མཚུངས་ཕྱག་ན་པད་མོ་འཇིགས་མེད་རྒྱལ་བའི་མྱུ་གུ་དང་། འབར་ཆུང་བཀྲ་ཤིས་རྒྱ་མཚོ། ཉི་སྤྲུལ་ཕན་བདེ་རྒྱ་མཚོ། རྒྱལ་དབང་དགུ་པ་ལུང་རྟོགས་རྒྱ་མཚོ། རྒྱལ་ཚབ་དེ་མོ། གྲུབ་མཆོག་འཇིགས་མེད་གོ་ཆ། མཁས་གྲུབ་ཕྲིན་ལས་དར་རྒྱས། ཞིང་སྐྱོང་འཇིགས་མེད་མགོན་པོ། རྨོག་སྟོན་ཆོས་དབྱིངས་རྡོ་རྗེ། ངོར་ཐར་རྩེ་མཁན་ཆེན་སོགས་མདོར་ན་གངས་རིའི་ལྗོངས་འདིར་སྐབས་དེར་འཚོ་གཞེས་ཀྱི་བསྟན་འཛིན་མཁས་གྲུབ་ཡོད་དོ་ཅོག་གི་ཞབས་ལ་གཏུགས་ནས་སྒྲུབ་བརྒྱུད་ཤིང་རྟ་བརྒྱད་ཀྱི་མན་ངག་ཆོས་ཚུལ་ཐམས་ཅད་མ་གསན་པ་མེད་པས་གསན་ཡིག་རྐྱང་པ་པོད་ཆེན་གསུམ་ལྷག་བཞུགས། དེ་ལྟར་གསན་བཞེས་གནང་བ་ཐམས་ཅད་རྣམ་གཡེང་དང་ཕྱི་བཤོལ་གྱི་དབང་དུ་མ་སོང་བར་སྐུ་ཚེ་གང་པོར་བསྐྱེད་རྫོགས་ལྟ་སྒོམ་གྱི་ཉམས་ལེན་དང་། བསྙེན་སྒྲུབ་ཏིང་འཛིན་གྱི་རྣལ་འབྱོར་ལས་མི་འདའ་བས་ལྟ་བའི་ཕུ་ཐག་ཆོད་དེ་ཆོས་ཉིད་ཟད་སར་འཁྱོལ། སྒོམ་པ་ཀློང་དུ་གྱུར་པས་འོད་གསལ་ལ་གཡོ་འགུལ་བྲལ། སྤྱོད་པ་ཚད་དུ་ཕྱིན་པས་ཚོགས་དྲུག་རང་སར་གྲོལ། རྟོགས་པས་རང་རྒྱུད་གྲོལ་བས་ཆོས་བརྒྱད་འདོར་ལེན་དང་བྲལ། ཐུགས་རྗེས་གཞན་རྒྱུད་གྲོལ་བས་འབྲེལ་ཚད་དོན་ལྡན་དུ་བྱོན་པ་སྟེ། ཆོས་རྗེ་དཔལ་སྤྲུལ་རིན་པོ་ཆེས། སྙིགས་དུས་འདིར་རྫོགས་པ་ཆེན་པོའི་སྣང་བཞི་མཐའ་རུ་ཕྱིན་ནས་ཆོས་ཉིད་ཟད་ས་ལ་སྒྲ་ཇི་བཞིན་སྤྱོད་པ་སྐྱེས་མཆོག་འདི་ཉིད་ཁོ་ན་ཡིན་ཞེས། ཉིན་ལྟར་གཤིན་རྗེ་སྒྲུབ་ཕུག་ནས་རྫོགས་དགོན་ལ་ཞབས་ཐང་གིས་ཕེབས་ཏེ་སྐུ་མདུན་རང་དུ་ཕྱག་འབུམ་ཕྲག་གཅིག་འཚལ་བར་མཛད། གཞན་ཡང་རྡུལ་བྲལ་སྟོབས་བཅུ་མངའ་བའི་ཡེ་ཤེས་ཀྱི་གཟིགས་པས་མཐའ་དག་ཤེས་བྱ་རབ་འབྱམས་ཀྱི་ཆོས་ཚུལ་ཐམས་ཅད་མ་འདྲེས་ཅིག་ཅར་ཉིད་དུ་མཁྱེན་ཅིང་ཆུབ་པས། སྐུབས་དེའི་མདོ་ཁམས་ཕྱོགས་ཀྱི་ཡང་སྲིད་ངོས་འཛིན་ཐམས་ཅད་རྗེ་འདི་ཁོ་ནས་མཛད་ཅིང། ཐ་ན་དགོན་འདབས་ཀྱི་ཕྱུགས་རྫི་བྱིས་པ་ཚོས་ཀྱང་དགུང་ཁ་གྲུབ་དབང་མཆོག་ལ་དགོངས་བརྟག་ཞུས་ཏེ་ཕྱུགས་འདེད་ལ་འགྲོ་བ་དང་། སྐུབས་ཤིག་ཨ་མདོ་བཀྲ་ཤིས་འཁྱིལ་གྱི་སློབ་གཉེར་གྲྭ་གཞོན་གསུམ་དབུས་ཕྱོགས་ལ་མཇལ་སྐོར་དུ་སོང་ནས་ཕྱིར་ལོག་པའི་ལམ་ཞོར་རྫོགས་ཆེན་ལ་སླེབས་ཤིང་། དེ་ལས་གཅིག་གིས་རྫོགས་ཆེན་རིན་པོ་ཆེ་ལ་མངོན་ཤེས་ཆགས་ཐོགས་མེད་ཅེས་ཀུན་ལ་རླུང་ལྟར་གྲགས་འདུག་པས། འུ་ཅག་གི་སྦུད་རྐྱལ་བུག་རལ་འདི་གནས་རོགས་ནད་པ་ཞིག་ཡིན་ཁུལ་གྱིས་ཁོང་ལ་དགོངས་བརྟག་མཛད་རོགས་ཞེས་ཉམས་སད་ཅིག་ཨེ་བྱེད་ཟེར་བར། གཅིག་ཤོས་གཉིས་ཀྱང་མཐུན་ཏེ་ཕྱི་ཉིན་གྲུབ་དབང་རིན་པོ་ཆེའི་སྐུ་མདུན་བཅར་ནས། ངེད་ཚོ་མི་བཞི་ལྷ་སར་སོང་བ་ལས་བཀྲ་ཤིས་ཚེ་རིང་ཟེར་བའི་གནས་གྲོགས་དེ་ཕྱིར་འོང་བའི་ལམ་ཁ་ནས་ནད་ཀྱིས་མནར་ཞིང་། ད་ལྟ་དབུགས་འབྱིན་རྔུབ་ཡང་དཀའ་བ་འདུག་ན་སྨན་དཔྱད་ཇི་དགོས་དང་སྲོག་སྐྱོན་ཡོད་མེད་སོགས་ལ་ཐུགས་བརྟག་ཞིག་གནང་རོགས་ཞེས་ཞུས་པར། ཆོས་ཀུན་ཆུབ་པའི་ཡེ་ཤེས་ལ་མཉམ་རྗེས་རེས་འཇོག་གི་རྩོལ་སྒྲུབ་དང་བྲལ་ཡང་དལ་གཅིག་དགོངས་པ་གཏད་པའི་ཚུལ་དང་བཅས་ཞལ་ནས། བུ་སྦུད་པ་ཚེ་རིང་ནད་ཀྱིས་ཐེབས་པར། སྨན་ལྷ་རྗེ་མི་དགོས་ཁབ་སྐུད་ཚོལ། ཅེས་གསལ་བར་གསུངས་པས་ཁོང་ཚོ་ཡིད་འགྱོད་སྐྲག་སྔངས་དང་བཅས་ཕྱིར་ལོག །གཞན་ཡང་དུས་དེར་ཉག་སྐེད་མགོན་པོ་རྣམ་རྒྱལ་ཞེས་མི་སྲུན་རླང་པོར་སྤྱོད་པ་དད་དང་སྙིང་རྗེའི་རྩ་བ་ཆད་པས་དགོན་སྡེ་དང་དཀོན་མཆོག་གི་རྟེན་གྱ་ཚོམ་དུ་མེར་སྲེག་ཅིང་། ཀུ་རེ་ཙམ་གྱི་ཆེད་དུའང་ཡུལ་མི་གསོད་བཅོམ་བྱེད་པ་སོགས་སྡིག་པའི་ལས་ལ་འཛེམ་མེད་དུ་སྤྱོད་པ་དེ་རྫོགས་ཆེན་དགོན་དུ་འོང་བ་ཐོས་པས་ཐམས་ཅད་འཇིགས་སྐྲག་གིས་མནར་ཞིང། གཉེར་ཆེན་སོགས་ཆེ་རིམ་པ་འགའ་གྲུབ་དབང་མཆོག་གི་སྐུ་དྲུང་དུ་སྔོན་བཅར་བྱས་ཏེ། ད་རེས་དུས་རྒྱུན་ལྟར་གང་བྱུང་འཁྲུལ་ཞིག་གི་བཀའ་གསུང་མི་ཕེབས་པར་མཐུན་འཇུག་མི་ཆོས་ཤིག་མ་མཛད་ཕྱིན་བསྟན་དགོན་ལ་བར་ཆད་ཆེ་ཚུལ་བཅས་བསླབ་ཞུས་ཞིབ་ཕྲ་བྱས། ཕྱི་ཉིན་ཉག་སྐེད་དཔོན་འཁོར་རྣམས་དགོན་ཐོག་ཏུ་འབྱོར་མ་ཐག་མགྲོན་གཉེར་སོགས་ཀྱིས་དར་བཏང་གུས་འདུད་ཀྱིས་སྣ་ལེན་བྱས་པར་གཏམ་ལེན་ཙམ་ཡང་མི་བྱེད་པར་ཤར་རྒྱག་གཟིམས་ཁང་དུ་ཤོར། གྲུབ་དབང་མཆོག་གི་མདུན་དུ་བསྡད་དེ་ང་ཤི་རྗེས་གང་དུ་སྐྱེ་ས་འདུག་ཅེས་དྲིས་པར། ཁྱོད་ཤི་མ་ཐག་དམྱལ་བ་རྡོ་རྗེ་གདན་ལས་འགྲོ་ས་མི་འདུག་ཅེས་བཀའ་ལན་གནང་། འོ་ན་ངའི་དཔུང་གིས་གཞུང་ས་དགའ་ལྡན་ཕོ་བྲང་གི་སྲིད་དབང་འཕྲོག་ཐུབ་ས་ཨེ་འདུག་ཞུས་པར། ལྷ་ལྡན་ཕར་ཞོག་ཆབ་མདོ་ལའང་སླེབ་ཐུབ་ས་མ་རེད་ཅེས་གསུངས་པས། ཁོ་ཡི་རང་དང་བཅས་བླ་མ་ཟེར་བ་ཆོས་བརྒྱད་མཐུན་འཇུག་དང་བྲལ་བ་ཁྱེད་འདྲ་བ་དགོས། ད་སྔོན་འཕྲད་པའི་བླ་མ་ཐམས་ཅད་ངོ་དགའ་ཁ་ཡག་ཅན་འབའ་ཞིག་ལས་དངོས་དོན་གསུང་མཁན་སུ་ཡང་མ་བྱུང་ཞེས་ཞབས་སྤྱི་བོར་བླངས། ཕྱིན་ཆད་ཁོ་པ་དམྱལ་པར་མི་གཏོང་རྒྱུའི་ཞལ་བཞེས་མ་གནང་ཐབས་མེད་ཡིན་ཞེས་བཙན་གྱིས་ཞུས་པར། འོ་ན་སྐྱེ་རེས་གསུམ་དུ་ངན་འགྲོར་མི་གཏོང་། ཞེས་ཞལ་བཞེས་གནང་བ་སོགས་ངོ་མཚར་བའི་རྣམ་ཐར་བརྗོད་ཀྱིས་མི་ལང་པ་དང་། དེ་ལས་གཞན་བྱ་བ་ལས་ཀྱི་འཁོར་ལོས་བསྟན་འགྲོའི་མཛད་བཟང་ཕྱོགས་བརྒྱར་སྤེལ་བའི་ཚུལ་ནི། སྐུ་ན་ཕྲ་མོའི་དུས་མཁན་སློབ་ཆོས་གསུམ་གྱི་སྐུ་བརྙན་གསེར་ཟངས་ལས་གྲུབ་པ་ཐོག་ཚད་བཞེངས་པ་ནས་བཟུང་རྒྱུན་དུ་སྐུ་གསུང་ཐུགས་རྟེན་དང་། དུས་མཆོད་སྒྲུབ་ཁག་གི་མཆོད་རྫས་ཡོ་བྱད་སོགས་ཚད་མེད་པ་གསར་བཞེངས་མཛད། དགུང་གྲངས་ཉེར་གཉིས་པ་ཤིང་ཁྱི་ལོར་དབུས་ཕྱོགས་སུ་ཆིབས་བསྐྱོད་མཛད་དེ་རྩེ་ཤོད་ཆོས་འཁོར་གསུམ་དང་རྡོར་སྨིན་གཉིས་སོགས་སུ་མཆོད་སྤྲིན་རྒྱས་སྤྲོས་དང་། ཁྱད་པར་ལྷ་ལྡན་སྨོན་ལམ་ཆེན་མོའི་ཚོགས་དབུར་རྒྱལ་མཆོག་དགུ་པ་སྟོན་འཁོར་སྤྱན་དྲངས་ཏེ་མཆོད་པའི་སྤྲིན་ཕུང་སྤྲོས་པ་དང་འབྲེལ་མཎྜལ་ཚོགས་བཤད་རྗེ་ཉིད་ཀྱིས་མཛད་པས་གདན་ས་གསུམ་གྱི་དགེ་བཤེས་འདུས་ཚོགས་ཐམས་ཅད་ཐུགས་ཡིད་འཕྲོག་སྟེ་གྲགས་པའི་རྔ་ཆེན་ཕྱོགས་ཀུན་ལྡིར་བར་བྱས། རྒྱལ་དབང་ལུང་རྟོགས་རྒྱ་མཚོ་འདན་ཡུལ་དུ་འཁྲུངས་ཤིང་ར་ཁོ་ཚང་དང་སྐུ་རིགས་གཅིག་པའི་དབོན་དུ་སོང་བས་ནང་བརྩེའི་གཟིགས་པ་ཚད་མེད་པས་ཧོ་ཐོག་ཐུའི་འཇའ་ས་ཕུལ་བ་དང་བཅས་སྔ་འགྱུར་བསྟན་པའི་བདག་པོར་མངའ་གསོལ། དགུང་གྲངས་ལྔ་བཅུར་ཕེབས་པ་ཆུ་སྟག་དབྱུག་ཟླའི་ཚེས་དྲུག་གི་སྔ་ཆར་བསྟན་པའི་གེགས་ཆག་སྟོབས་སུ་བདོ་བས་ཧོར་ཁོག་ནས་བརྩམས་ཏེ་ས་གཡོས་ཀྱི་འཇིག་པ་ཆེན་པོ་བྱུང་བས་དགོན་གནས་རྨང་མེད་དུ་གྱུར། སྐུབས་དེར་རྗེ་ཉིད་སྡེ་དགེའི་རྒྱལ་ཁབ་ཏུ་བཞུགས་ཀྱང་སྒྲིབ་བྲལ་ཡེ་ཤེས་ཀྱི་གཟིགས་པས་ཇི་བཞིན་མཁྱེན་པས་ཐུགས་དབྱུང་སྟེ་བྱ་བཏང་སྤོང་བ་པའི་བརྟུལ་ཞུགས་ལ་ཐུགས་གཏད་པ་ན། ཆོས་རྒྱལ་དམ་ཚིག་རྡོ་རྗེས་ཐུགས་གསོའི་ཞུ་བསྐུལ་དང་དགོན་གཞིས་ཉམས་གསོ་སོར་ཆུད་བྱེད་རྒྱུའི་ཁས་ལེན་ནན་ཞུ་ཡང་ཡང་ཕུལ་བས། སླར་གདན་སར་ཞབས་པད་བཀོད་དེ་གཙུག་ལག་ཁང་བླ་བྲང་བཅས་པ་སྔར་ལས་ལྷག་པའི་བཞེངས་བཀོད་གྲུབ། དེ་མཚུངས་ཁྱབ་བདག་བཀའ་འགྱུར་པ་རྒྱལ་སྲས་གཞན་ཕན་མཐའ་ཡས་དང་སེང་ཕྲུག་པདྨ་བཀྲ་ཤིས་ཟུང་ལ་བཀའ་བགྲོས་ཏེ། དགོན་ལས་རྒྱང་གྲགས་གཅིག་གིས་ཆོད་པའི་མཁས་པའི་ལྗགས་སམ་ཤེས་རབ་ཀྱི་རལ་གྲིའི་དབྱིབས་དང་མཚུངས་པའི་རི་ཕྲན་གྱི་སྟེང་དུ། གངས་ལྗོངས་མཁས་པའི་འབྱུང་གནས་ཤྲཱི་སེང་ཆོས་གྲྭ་ཆེན་མོ་གཙུག་ལག་ཁང་གྲྭ་ཤག་དང་བཅས་པ་གསར་དུ་བསྐྲུན། ཡུལ་མདོ་སྨད་ཀྱི་ལྗོངས་སུ་བསྟན་རྩ་ཆོས་འདུལ་རིན་པོ་ཆེ་གཞི་གསུམ་གྱི་ཕྱག་བཞེས་གཙང་མའི་སྒོ་འཕར་གསར་དུ་ཕྱེས། གཞུང་ཆེན་བཀའ་པོད་ལྔ་དང་རྒྱུད་རྒྱལ་གསང་བ་སྙིང་པོའི་གཙོས་སྔ་འགྱུར་ཆེ་བ་དྲུག་ལྡན་གྱི་མདོ་སྔགས་དགོངས་འགྲེལ་དང་བཅས་པའི་བཤད་པའི་བཀའ་སྲོལ་ཐོག་མར་ཕྱེས་པས་ད་ལྟའི་བར་དུ་ཆོས་བརྒྱུད་སློབ་ཚོགས་དང་བཅས་པས་ཕྱོགས་ཀུན་ཡོངས་སུ་ཁྱབ་པས་རྒྱལ་བསྟན་སྤྱི་དང་བྱེ་བྲག་ལ་བཀའ་དྲིན་དང་ཕྲིན་ལས་རྨད་དུ་བྱུང་བ་ཉིད་དོ། །འཕྲོས་དོན་གསུང་གི་བདུད་རྩི་བཞེས་པའི་བསྟན་འཛིན་གྱི་སྐྱེས་བུ་ནམ་མཁའི་སྐར་ཚོགས་ལྟར་བྱོན་པ་ལས་གཙོ་བོའི་མཚན་ཙམ་སྨོས་ན། དཔོན་སློབ་སྐུ་ཕྲེང་གསུམ་པ་ནམ་མཁའ་ཆོས་ཀྱི་རྒྱ་མཚོ། བཞི་པ་འཇིགས་མེད་ཆོས་དབྱིངས་འོད་གསལ། ཀུན་མཁྱེན་རྒྱལ་བའི་སྲས་པོ་གཞན་ཕན་མཐའ་ཡས་འོད་ཟེར་ཏེ་སྐྱེས་མཆོག་བསྟན་འཛིན་ཆེན་པོ་གསུམ། ཉི་གྲགས་བཞི་པ་དཀོན་མཆོག་འཇིགས་མེད་རྒྱལ་མཚན། རབ་འབྱམས་བཞི་པ་མི་མཇེད་ཞིང་མགོན། རྒྱལ་ཚབ་མི་བསྐྱོད་མཁས་གྲུབ། རྗེ་དབོན་གསུམ་པ་གར་དབང་ཐུགས་མཆོག་རྡོ་རྗེ། ནམ་སྤྲུལ་གཉིས་པ་ཀུན་བཟང་ཐུགས་མཆོག་རྡོ་རྗེ་སྟེ་བརྒྱུད་འཛིན་གདམས་པའི་གཏེར་མཛོད་འཛིན་པ་ལྔ། རིག་འཛིན་འཇིགས་མེད་གླིང་པའི་ཐུགས་སྤྲུལ་མཁྱེན་བརྩེ་ཡེ་ཤེས་རྡོ་རྗེ། གླིང་ཚང་གཏེར་སྟོན་པདྨ་འགྲོ་འདུལ། མཆོག་གྱུར་བདེ་ཆེན་གླིང་པ་སྟེ་སྤྲུལ་པའི་གཏེར་ཆེན་རྣམ་གསུམ། སྤྱན་རས་གཟིགས་དབང་རྒྱལ་བའི་མྱུ་གུ། རྡོ་གྲུབ་གཉིས་པ་བསྟན་པའི་རྒྱལ་མཚན། ཨོ་རྒྱན་འཇིགས་མེད་ཕྲིན་ལས་འགྲོ་འདུལ། མཆོག་སྤྲུལ་པདྨ་བདེ་ཆེན་བཟང་པོ་སྟེ་མཁྱེན་བརྩེ་ནུས་ལྡན་གྱི་བརྒྱུད་འཛིན་གསུམ། མཁས་གྲུབ་འཇིགས་མེད་སྐལ་བཟང། དཔལ་སྤྲུལ་འཇིགས་མེད་ཆོས་ཀྱི་དབང་པོ་སྟེ་ཀུན་སྤང་རྟོགས་པའི་དབང་ཕྱུག་ཆེན་པོ་གཉིས། མཁན་ཆེན་སེང་ཕྲུག་པདྨ་བཀྲ་ཤིས། མཁན་ཆེན་པདྨ་བཛྲ་སོགས་རང་དགོན་གྱི་མཁན་རབས་པདྨའི་མཚན་འཆང་ཆེན་པོ་བཅུ། དེ་ལས་པདྨ་འོད་ཟེར་དང་། གླིང་སྤྲུལ་ཐུབ་བསྟན་པདྨ་རྒྱལ་མཚན་ཏེ་ནང་གི་ཐུགས་སྲས་ཐུ་བོ་གཉིས། དགེ་མང་དབོན་པོ་བསྟན་འཛིན་ནོར་བུ་དང་། བཀའ་བབ་བདུན་ལྡན་མཁྱེན་བརྩེའི་དབང་པོ་སྟེ་དགོངས་བརྒྱུད་བྱིན་རླབས་འཕོས་པའི་ཐུགས་སྲས་ཉི་ཟླ་ཟུང་། ཉག་བླ་པདྨ་བདུད་འདུལ། འཇུ་བླ་སངས་རྒྱས་འོད་ཟེར་སོགས་འོད་ལུས་གྲུབ་པ་བཅུ་གསུམ། ཀཿཐོག་ཞིང་སྐྱོང་གོང་འོག་དང་རྨོག་སྟོན་གོང་འོག་སྟེ་བཀའ་གཏེར་གྱི་བསྟན་འཛིན་ཆེན་པོ་བཞི། ཞེ་ཆེན་མ་ཧཱ་པཎ་ཆེན་དབོན་སྤྲུལ་མཐུ་སྟོབས་རྣམ་རྒྱལ། མཁས་མཆོག་གུ་རུ་བཀྲ་ཤིས་སོགས་བཤེས་གཉེན་ཆེན་པོ་བཅུ། ཨ་འཛོམས་འབྲུག་པ་འགྲོ་འདུལ་དཔའ་བོ་རྡོ་རྗེ། རྫོགས་ཆེན་འབྲུག་པ་ཆོས་དབྱིངས་རོལ་བའི་རྡོ་རྗེ་སོགས་རྟོགས་གྲོལ་ལུང་ཟིན་གྱི་སྐྱེས་བུ་གསུམ། ལི་ཐང་དགེ་བཤེས་བྱམས་པ་ཕུན་ཚོགས། ལྷ་རམ་དགེ་བཤེས་ཀུན་བཟང་བསྟན་དར། མི་ཉག་ཀུན་བཟང་བསོད་ནམས་སོགས་མདོ་སྔགས་འཆད་པའི་བཀའ་བབ་ཆེན་པོ་ཉེར་བདུན། མཛོད་ལྔའི་ཤིང་རྟ་ཀོང་སྤྲུལ་ཡོན་ཏན་རྒྱ་མཚོ། ནཱ་ལེནྡྲའི་གཟིམས་འོག་ཐམས་ཅད་མཁྱེན་པ་ངག་དབང་བསྟན་འཛིན་སྙན་གྲགས། མཁས་གྲུབ་ཆེན་པོ་ཀྱི་ལིང་ཐུགས་མཆོག་རྡོ་རྗེ་སོགས་ཕྱོགས་ཀྱི་བསྟན་འཛིན་ཆེན་པོ་བཅུ། རིགས་དབོན་འཇིགས་མེད་སོགས་ཕྱག་བཞེས་འཕྲིན་སྒྲུབ་ཀྱི་རྒྱལ་ཚབ་རྩེ་མོ་དགུ། ཁམས་སྤྲུལ་སྒྲུབ་བརྒྱུད་ཉི་མ་གོང་འོག་སྟེ་སྒྱུབ་བརྒྱུད་བསྟན་འཛིན་མཆོག་ཟུང། མང་བཟའ་བླ་མ་དཔལ་གྱི་སེང་གེ། རོག་བཟའ་དཔལ་དགེ་སོགས་སྒྲུབ་པའི་རྒྱལ་མཚན་འཛིན་པའི་སྤོང་བ་པ་ཆེན་པོ་ཉེར་བདུན། མ་ཅིག་མཁའ་འགྲོས་བྱིན་རླབས་ཐོབ་པ་གཡག་ཟེ་བ་དགོངས་གཅོད་བསོད་ནམས་ནོར་བུ་སོགས་གཅོད་ཡུལ་བཀའ་བབ་ཀྱི་ལུང་ཟིན་སྐྱེས་བུ་བཞི། དགེ་རྒྱས་གཅོད་པ་སོགས་བརྟུལ་ཞུགས་སྤྱོད་པའི་རྣལ་འབྱོར་ཆེན་པོ་བརྒྱད། རས་སྤྲུལ་འཁྲུལ་སྣང་སྣ་ཚོགས་རང་གྲོལ། ཁྱུང་ལུང་རས་པ་དམ་ཚིགས་རྡོ་རྗེ་སོགས་ཕྱོགས་མེད་འགྲོ་དོན་མཛད་པའི་རྣལ་འབྱོར་པ་དགུ། ཉི་གྲགས་དབོན་སྤྲུལ། དཔལ་སྤུངས་དབོན་སྤྲུལ། དཔལ་ཡུལ་དབོན་སྤྲུལ། ཛར་ཀ་དབོན་པོ། གསེར་ཏོག་དབོན་པོ། སྟོང་དཔོན་རྡོར་ལྷུན། ཆོས་སྐོར་ཀློང་གསལ། གཞི་ཆེན་སྤྲུལ་སྐུ་སོགས་ས་ཐོབ་སེམས་དཔའ་ཆེན་པོ་བཅུ། ཁྲོ་ཟུར་གཏེར་སྟོན་སྐྱེ་ཆེན་རང་གྲོལ། གཏེར་སྟོན་ཚེ་དབང་ནོར་བུ་སོགས་ཟབ་གཏེར་བཀའ་བབ་ལྔ། གྲུབ་བརྙེས་རིག་འཛིན་ཆོས་དབྱིངས་སྟོབས་ལྡན་གོང་འོག །ཨ་ལགས་ནམ་མཁའ་རྒྱ་མཚོ་སྟེ་རྡོ་རྗེ་འཛིན་པ་དྲག་སྔགས་བཀའ་བབ་ཆེན་པོ་གསུམ། ཡང་སློབ་ཕུར་ཐོག་སྟོང་དང་དགུ་བརྒྱ། རབ་འབྱམས་ལྔ་པ། སྐུ་ཞབས་གཉིས་པ། གྲུབ་ཆེན་གསུམ་པ། ཀུན་བཟང་སྤྲུལ་སྐུ། འབྲུག་སྤྲུལ་གོང་འོག ནོར་གླིང་སྤྲུལ་སྐུ། གཡག་ཟེ་མཆོག་སྤྲུལ་རྣམ་གཉིས། ལེ་དགོན་སྤྲུལ་སྐུ། འཇུ་སྤྲུལ་པདྨ་བསྟནའཛིན། ཨ་གྲོ་བླ་མ། སྡེ་དགེ་རྒྱལ་སྲས་བླ་མ་སོགས་སྨིན་གྲོལ་ཕྱོགས་བརྒྱར་སྤེལ་བའི་བླ་སྤྲུལ་ལྔ་བཅུ་བཅས་མདོར་ན་དུས་དེར་བོད་ཆེན་པོའི་ལྗོངས་སུ་སྔ་འགྱུར་རྙིང་མ་གཙོ་བོ་གྱུར་པའི་སྒྲུབ་བརྒྱུད་ཤིང་རྟ་བརྒྱད་ཀྱི་རིང་ལུགས་འཛིན་པའི་བསྟན་འཛིན་སྐྱེས་ཆེན་ཕལ་མོ་ཆེ་རྗེ་འདིའི་ཞལ་མཇལ་ཆོས་འབྲེལ་མ་ནོས་པ་འགའ་ཡང་མེད་པ་ལྟ་བུར་གྱུར་པས་གྲོལ་བ་བཞི་ལྡན་གྱི་ཕྲིན་ལས་ཡངས་པའི་རྒྱལ་ཁམས་ཀུན་ལ་མ་ཁྱབ་པ་མེད་པ་དང་། དེ་བཞིན་བསྟན་པ་སྟོབས་ཀྱིས་འདེགས་པའི་སྦྱིན་བདག་ཀྱང་། སྡེ་དགེ་ཆོས་རྒྱལ་ཡབ་སྲས། ལྕགས་ལ་མི་ཆེན་རྒྱལ་པོ། ཡིད་ལྷུང་ལྷ་རིགས་ཆོས་རྒྱལ། གླིང་ཚང་རྒྱལ་པོ་བཅས་གཙོ་གྱུར་ཐུ་མི་ཁག་ཉི་ཤུ། དེམ་ཕྱི་ཉེར་ལྔར་གྲགས་པ་ཕལ་ཆེར་དང་། གཞུང་ས་དགའ་ལྡན་ཕོ་བྲང་གི་བཀའི་བློན་པོ་འགའ་དང་ཞབས་པད་ས་དབང་ཕུ་ལུང་པ་སོགས་མི་ཆེན་ཐམས་ཅད་ཀྱིས་གུས་པས་སྤྱི་བོས་བཏུད་ཅིང་མི་ཕྱེད་དད་པས་བཀུར་ཞིང་མཆོད་པ་སོགས། མདོར་ན་ལུགས་གཉིས་ཀྱི་སྒོ་ནས་ཕྱི་མའི་དུས་འདིར་རྗེ་འདི་ཁོ་ན་ཕྲིན་ལས་འགྲན་ཟླ་དང་བྲལ་ཞིང་། དགུང་གྲངས་བདུན་ཅུ་རྩ་བརྒྱད་བཞེས་པ་རབ་བྱུང་བཅོ་ལྔ་པའི་ལྕགས་ཕོ་རྟའི་ལོའི་སྨིན་དྲུག་ཟླ་བའི་དམར་ཕྱོགས་ཀྱི་རྒྱལ་བ་དང་པོའི་ཚེས་ལ་གཟུགས་སྐུའི་བཀོད་པ་གདོད་མའི་གཞི་དབྱིངས་ནང་གསལ་ཆེན་པོར་བསྡུ་བའི་ཚུལ་བསྟན་ཏོ། །དེ་ལྟར་ཐུན་མོང་མཐུན་སྣང་གི་མཛད་རྣམ་རགས་བསྡུས་འདི་ནི་འཇམ་དབྱངས་མཁྱེན་བརྩེའི་དབང་པོས་མཛད་པའི་གདན་རབས་མཚན་ཐོ་ཕྱོགས་བསྒྲིགས་ལ་གཞི་བྱས་ཐོག་གནའ་བོའི་ངག་རྒྱུན་ཚད་མས་ཟུར་བརྒྱན་ཏེ་བྲིས་པ་དང། ད་དུང་རྗེ་ཉིད་ཀྱིས་མཛད་པའི་ཐུན་མིན་གསང་བའི་རྣམ་ཐར་དང་། ཞེ་ཆེན་མ་ཧཱ་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ་གྱིས་མཛད་པའི་རྗེ་བླ་མའི་རྣམ་ཐར་སྒྲ་དབྱངས་རྒྱ་མཚོ་ཞུ་བ་སོགས་ཡོད་པར་ཐོས་པས་དེ་དག་ཏུ་གཟིགས་ཁྱབ་གནང་བར་ཞུ། །
རྫོགས་ཆེན་རིན་པོ་ཆེ་སྐུ་ཕྲེང་ལྔ་པ་ཐུབ་བསྟན་ཆོས་ཀྱི་རྡོ་རྗེ།
[རྩོམ་སྒྲིག]གྲུབ་དབང་སྐུ་རབས་ལྔ་པ་ཐུབ་བསྟན་ཆོས་ཀྱི་རྡོ་རྗེ་བསྟན་འཛིན་འཇིགས་མེད་དབང་པོ་མཆོག་ནི། རྩོད་བྲལ་སྤྲུལ་བའི་གཏེར་ཆེན་མཆོག་གྱུར་བདེ་ཆེན་གླིང་པས་སྤྱན་དྲངས་པའི་ཨོ་རྒྱན་ཆེན་པོའི་གསང་བའི་བརྡ་ལུང་གིས་བསྟན་པ་ཉིད། བཀའ་བབ་བདུན་ལྡན་མཁྱེན་བརྩེའི་དབང་པོའི་ཞལ་སྔ་ནས་གསལ་བར་བྱས་པ་ལས། བཱི་མ་མི་ཏྲ་ཁམས་ཀྱི་ལྷོ་ཕྱོགས་སུ༔ སྤྲེལ་ལོ་དྷརྨ་བཛྲའི་མིང་ཅན་འབྱུང༔ བར་ཆད་བདུད་ཀྱི་གཡུལ་ལས་རྒྱལ་གྱུར་ན༔ སྙིང་པོའི་བསྟན་ལ་བྱ་བ་མཆོག་ཏུ་བྱེད༔ ཅེས་དང་། ལྐོག་ཡིག་སྙིང་བྱང་ཐུགས་ཀྱི་ཆ་ལག་ལས། །སྤྲེལ་ལོར་དྷརྨ་བཛྲ་ཞེས་བྱ་འབྱུང༔ རུ་དམ་ལུང་ལ་བསྟན་པའི་སྲོག་ཤིང་བཙུགས༔ བཤད་དང་སྒྲུབ་པའི་བསྟན་པ་རྒྱ་ཆེར་སྤེལཿ ཞེས་སོགས་སྒྲིབ་བྲལ་ཡེ་ཤེས་ཀྱི་གཟིགས་པ་མངའ་བའི་ལྷ་བླའི་བརྟག་ལུང་ཐམས་ཅད་གཅིག་ཏུ་མཐུན་པར། སྤྱི་ལོ་༡༨༧༢པ་སྟེ་རབ་བྱུང་བཅོ་ལྔ་པའི་ལྕགས་སྤྲེལ་ལོར། སྐུ་ཕྲེང་དང་པོའི་འཁྲུངས་ཡུལ་དང་གཅིག་པར་ཁམས་ཀྱི་རི་བོ་ཆེའི་ཕྱོགས་སུ་ཡབ་མགོན་པོ་རྒྱལ་དང་། ཡུམ་བསོད་ནམས་གཡང་མཚོ་གཉིས་ཀྱི་སྲས་སུ་བཀྲ་ཤིས་ངོ་མཚར་གྱི་མཚན་མ་བརྒྱ་ཕྲག་དང་བཅས་མཚན་དཔེའི་འདབ་སྟོང་གསར་དུ་གྲོལ། ཐོག་མ་ཉིད་ནས་བྱང་ཆུབ་ཀྱི་སེམས་དང་སྐྱེས་ནས་ཐོབ་པའི་ཤེས་རབ་སོགས་རྒྱལ་བའི་སྲས་ཀྱི་མངོན་རྟགས་མཐའ་ཡས་པ་མེ་ཏོག་དང་དྲི་བསུང་བཞིན་ལྷན་སྐྱེས་སུ་མངའ། དགུང་གྲངས་བཞི་ལ་སོན་པ་འཛིན་བྱེད་ན་ཚོད་ལྡན་ཞེས་པ་ཤིང་མོ་ཕག་གི་ལོའི། སྟོན་པ་ཐུབ་པའི་དབང་པོས་རྫུ་འཕྲུལ་གྱི་ཆོ་འཕྲུལ་ཆེན་པོས་མུ་སྟེགས་ཀྱི་སྡེ་ཚོགས་ཕམ་པར་མཛད་པའི་བཀྲ་ཤིས་ཀྱི་ཟླ་བ། ཨོ་རྒྱན་ཆེན་པོའི་དཔལ་གྱི་བསམ་ཡས་མཆིམས་ཕུར་ལྷ་སྲིན་དབང་དུ་བསྡུས་ནས་ཟབ་མོ་གཏེར་གྱི་གཉེར་བྱང་གཏད་ཅིང་བོད་ཡུལ་གཏེར་གྱིས་བཀང་བའི་དུས་ཆེན་ཡར་ངོའི་ཚེས་བཅུའི་སྔ་ཆར། ཀུན་ཕན་ཉིན་བྱེད་ཀྱི་དཀྱིལ་འཁོར་ཤར་རིའི་རྩེ་མོར་མངོན་པར་འཕགས་པ་དང་མཉམ་དུ་ཞབས་ཟུང་རྩིབས་སྟོང་གི་འཁོར་ལོ་རུ་དམ་གདན་ས་ཆེན་མོར་ཐོག་མར་བཀོད་ཅིང་། དེ་ན་གནས་པའི་སྐྱེ་བོའི་ཚོགས་རུབ་སྟར་བསྒྲིགས་ཤིང་གདུགས་དང་། རྒྱལ་མཚན། འཕན་འཕུར་བཅས་སྣ་ཚོགས་པའི་དར་དང་། རྒྱལ་སྲིད་རིན་པོ་ཆེ་སྣ་བདུན། བཀྲ་ཤིས་པའི་རྫས་རྟགས་བརྒྱད་སོགས་མཆོད་པའི་ཡོ་བྱད་མཐའ་ཡས་པ་མ་ཚང་བ་མེད་པ་ཐོགས་ཏེ་གཙུག་ལག་ཁང་ཆེན་མོ་ཐུབ་བསྟན་ཡོངས་སུ་འདུས་པའི་དགའ་ཚལ་དུ་སྤྱན་དྲངས། དཔོན་སློབ་སྐུ་རབས་བཞི་པ་འཇིགས་མེད་ཆོས་དབྱིངས་འོད་གསལ་དང་། མཁན་ཆེན་པདྨ་བཛྲ། ཟེ་ཆེན་པདྨ་འགྱུར་མེད་རྒྱ་མཚོ། རྒྱལ་རོང་མཆོག་སྤྲུལ་ཀུན་བཟང་ཐེག་མཆོག་རྡོ་རྗེ་སོགས་བསྟན་པ་འཛིན་པའི་སྐྱེས་ཆེན་རྣམས་དང་། སྡེ་དགེ་ཆོས་རྒྱལ་ཆེན་མོའི་གཉེར་ཆེན་དཔོན་འཁོར། ཆབ་མདོ་རྒྱལ་བ་མཆོག་གི་ཞལ་སྔ་ནས་དྲུང་འཁོར་ལྷན་རྒྱས་གཙོས་ལྷ་མིའི་སྡེ་ཚོགས་ཀུན་ཀྱིས་འཇིགས་མེད་གསེར་གྱི་ཁྲི་འཕང་མཐོན་པོར་མངའ་གསོལ། ལྔ་རིག་མཁས་པའི་དབང་ཕྱུག་སྡེ་སྣོད་འཛིན་པ་མང་པོས་ཕུན་སུམ་ཚོགས་པ་ལྔ་དང་འབྲེལ་བའི་མནྜལ་གྱི་རྣམ་བཤད་དང་། མདོ་རྒྱུད་གཞུང་ལུགས་ཀྱི་ཚོགས་གཏམ་སྣ་ཚོགས་སྤེལ་ཏེ་མཁས་པའི་བསླབ་གྲལ་མཛེས་པར་བྱས་པ་དང་། དེ་མཚུངས་མང་འགྱེད་དངོས་འབུལ་སོགས་ཕུན་སུམ་ཚོགས་པའི་གཏོང་བའི་སྒོ་འཕར་ཡངས་པོར་ཕྱེས་ཏེ། སྡེ་འབངས་དགྱེས་པའི་སྟོན་ཆེན་ཉིན་འགར་བཤམས་ནས་ཐམས་ཅད་སྤྲོ་དགའི་དཔལ་ལ་བཀོད། དེ་ནས་རིམ་པར་ཡོངས་འཛིན་དགེ་བའི་བཤེས་གཉེན་ཆེན་པོ་དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། མཁན་ཆེན་པདྨ་བཛྲ། གར་དབང་བློ་གྲོས་མཐའ་ཡས་སོགས་ལས་ཐུན་མོང་གི་གཙུག་ལག་སྒྲ་ཚད་བཟོ་གསོ་ནས། ཐུན་མིན་སྡེ་སྣོད་གསུམ་དང་རྒྱུད་སྡེ་བཞི་དྲུག་གི་འགྲེལ་ཊཱིཀ་སྟོང་ཐུན་དང་བཅས་པ་གསན་བཞེས་མཛད། རྗེ་གོང་མའི་ཐུགས་རིག་གསལ་བས་བརྩོན་པ་ཆེན་པོའི་སྦྱང་པ་ལ་མ་ལྟོས་པར་རྟོགས་པའི་ཀློང་བརྡོལ་བས་དགོངས་གཏེར་ནམ་མཁའ་མཛོད་ཀྱི་ཆོས་སྡེ་ཆེན་མོར་མངའ་དབང་མཛད། ཁྱད་པར་འཇམ་དབྱངས་མཁྱེན་བརྩེའི་དབང་པོ་གཙུག་གི་རྒྱན་གཅིག་ཏུ་བསྟེན་ནས་སྨིན་གྲོལ་ཉམས་ཁྲིད་ཀྱི་ཟབ་ཆོས་སྤྱི་དང་། བྱེ་བྲག་འོད་གསལ་རྫོགས་པ་ཆེན་པོ་སྙིང་ཐིག་གོང་འོག་གི་གདམས་གནད་ཐམས་ཅད་ཆིག་རྫོགས་སུ་བསྩལ་བས། ཡིད་དཔྱོད་རྩོལ་ཞེན་གྱི་འཕྲང་ལ་མ་ལྟོས་པར་ས་ལམ་གདན་ཐོག་གཅིག་ཏུ་གཅོད་པའི་གྲུབ་བརྙེས་ཡིད་བཞིན་གྱི་རྒྱལ་སར་ཕེབས་ཏེ། ནམ་མཁར་བྱ་བཞིན་འཕུར་བ་དང་། སྒྲུབ་གཏོར་འོད་དུ་ཞུ་ནས་བདུད་རྩིར་གྱུར་པ། ཐོད་སྣོད་ལས་སྨན་རཀ་ཁོལ་བ། ཉི་མ་རྟོད་ལ་མནན་པ། བུམ་པ་བར་སྣང་དུ་བཞག་པ། བུམ་ཆུ་ཟད་མེད་དུ་བསྒྱུར་བ། ཞབས་རྗེས་རྡོ་ལ་མངོན་པ། སྐུ་གཟན་ཉི་ཟེར་ལ་འགེལ་བ། མྱ་ངམ་གྱི་ཐང་ལས་ཆུ་གཏེར་བཏོན་པ། ཤང་ཁྲག་རས་དཀར་དུ་བྱུགས་ནས་དྲིལ་ཏེ་གནང་བ་ཕྱིས་ཞལ་ཕྱེས་ཚེ་ཨོ་རྒྱན་ཆེན་པོའི་ཐང་སྐུར་གྱུར་ཅིང་རིང་བསྲེལ་གྱིས་གང་བ་སོགས། ངོ་མཚར་གྲུབ་རྟགས་ཀྱི་མཛད་པ་ཕལ་པའི་བློའི་ཡུལ་ལས་རྣམ་པར་འགོང་པ་སྣ་ཚོགས་པ་མཐུན་སྣང་མཐོང་ཆོས་སུ་བསྟན་པ་དང་། དངོས་ཉམས་འོད་གསལ་གྱི་སྣང་ཆར་དཔལ་རི་པདྨ་འོད་གླིང་དུ་རིག་འཛིན་འདུས་པའི་ཚོགས་གྲལ་དུ་ལན་གཉིས་སུ་ཕེབས་པ་སོགས་དག་པའི་སྣང་ཆ་འབའ་ཞིག་འབྱམས་སུ་ཀླས། ལྐོག་གྱུར་གྱི་ཆོས་ཀུན་སྒྲིབ་མེད་དུ་གཟིགས་པས་སྐབས་དེའི་མདོ་ཁམས་སྟོད་སྨད་ཀྱི་བསྟན་འཛིན་གྱི་སྐྱེས་བུ་ཕལ་མོ་ཆེ་རྡོ་རྗེའི་ལུང་གིས་གཟེངས་སུ་བསྟོད་པ་དང་། རང་དགོན་དུ་བདེ་ཀོང་མཁྱེན་གསུམ་གྱི་ཡང་སྲིད་ངོས་འཛིན་གནང་སྟེ་སྐུ་དྲུང་དུ་སྐུ་བདག་མཛད། དེ་བཞིན་འབྱུང་འགྱུར་གྱི་ཆོས་སྣ་ཚོགས་པ་ཆགས་ཐོག་མེད་པར་མཁྱེན་པའི་སྔོན་ལུང་གནང་བའི་རྣམ་ཐར་བགྲངས་ལས་འདས་པ་དང་། གཞན་འཕྲིན་ལས་དོན་ཡོད་ཞགས་པས་བསྟན་འགྲོའི་དགེ་མཚན་རླབས་པོ་ཆེ་ཇི་ལྟར་བསྡུས་པའི་ཚུལ་ནི། དབུས་འགྱུར་ཆོས་ཀྱི་ཞིང་སར་སྔ་ཕྱིར་ལན་གཉིས་ཕེབས་ཤིང་། དེ་དག་གི་སྐབས་སུ་རིས་མེད་ཆོས་སྡེ་ཀུན་ལ་མཆོད་འབུལ་མང་འགྱེད་སོགས་ཟང་ཟིང་གི་དངོས་པོའི་མཆོད་སྦྱིན་རྒྱ་ཆེར་སྤེལ་ཞིང་། དཔལ་གྱི་བསམ་ཡས་སུ་ཕེབས་སྐབས་ཆོས་རྒྱལ་ཆེན་པོའི་སྐུ་རྟེན་པ་ལ་ཆོས་སྐྱོང་ཐོག་བབ་ཀྱིས་ཅི་བཅོལ་ཕྲིན་ལས་སྒྲུབ་པའི་གཡར་དམ་བཅས་ཤིང་རོལ་ཆེན་པེ་ཧར་དགྱེས་གླུ་རྟེན་སྐལ་དུ་ཕུལ། གོང་ས་ལྷ་མིའི་རྣམ་འདྲེན་རྒྱལ་དབང་ཐམས་ཅད་མཁྱེན་པས་བཀའི་ཆབ་ཤོག་དང་གསེར་ཐམ་སོགས་ཆེན་པོར་འོས་པའི་ཡོ་བྱད་སྣ་ཚོགས་པའི་གནང་སྐྱེས་དང་བཅས་དབུགས་དབྱུང་གཟེངས་བསྟོད་རྨད་དུ་བྱུང་བ་མཛད། དེ་བཞིན་བཤད་སྒྲུབ་ལས་གསུམ་གྱི་ཕྲིན་ལས་ཀྱི་སྣང་བས་ཕྱོགས་ཀྱི་ཐ་གྲུ་ཀུན་ཏུ་ཁྱབ་ཅིང། ཁྱད་པར་གདན་ས་ཆེན་མོ་གང་དུ་སྔར་ཡོད་ཀྱི་སྒྲུབ་སྡེ་པ་བཅུ་གསུམ་དེ་བཅུ་ཕྲག་གསུམ་གྱི་གྲངས་སུ་སྤེལ། དཔྱལ་གྱི་བྲག་དཀར་ལ་ཚེ་སྒྲུབ་རྒྱུན་མཚམས་པ་བཅུ་གསུམ་ཡོད་པའི་སྒྲུབ་སྡེ་གསར་དུ་བཏབ། ཤྲཱི་སེང་གི་ཆོས་གྲྭར་རྒྱུན་བཞུགས་ཀྱི་བཤད་གྲྭ་བ་སྔར་ཡོད་ཀྱི་སྟེང་བཅུ་ཕྲག་ལྔ་རུ་སྤེལ་བ་དང་། གང་གི་ཐུགས་བསྐྱེད་ཀྱི་མཐུས་བསྐུལ་ཏེ་མཁན་ཆེན་གཞན་དགའ་རིན་པོ་ཆེས་གཞུང་ཆེན་བཅུ་གསུམ་རྒྱ་མཆན་གྱིས་འགྲེལ་པ་དང་། འཇམ་མགོན་མི་ཕམ་རིན་པོ་ཆེས་རང་ལུགས་དྲི་མ་མེད་པ་གཙོར་འདོན་གྱིས་དགོངས་འགྲེལ་བསྟན་བཅོས་སྣ་ཚོགས་པ་ལྗགས་རྩོམ་མཛད་ཅིང་དེ་དག་པར་དུ་བསྐྲུན་པ་དགོན་ཡར་མར་གཉིས་སུ་པར་ལྡེབ་ཁྲི་ཕྲག་བཅུ་ལས་མི་ཉུང་བ་གསར་བཞེངས་མཛད། བཤད་སྒྲུབ་ལུང་རྟོགས་ཀྱི་བསྟན་པ་དར་བར་མཛད་པའི་མཐུ་ལས་ཕྱོགས་ཀྱི་བུ་དགོན་ཉིས་བརྒྱ་ལྷག་ཏུ་འཕེལ་ཞིང་། གཉུག་མར་གནས་པའི་འདུས་སྡེ་ཞལ་གྲངས་སྟོང་ཕྲག་ལས་བརྒལ་བར་གྱུར། གཞན་ཡང་སྟོང་མཆོད་ཀུན་བཟང་མཆོད་སྤྲིན་དང་། མགོན་ཁང་དབང་དྲག་རོལ་པ། ལྷ་གསར་ཐོག་བརྩེགས་ལྔ་པ་སོགས་རྟེན་བརྟེན་པ་དང་བཅས་པ་གསར་དུ་བཞེངས། དེ་མཚུངས་ལོ་དར་གྱི་དུས་མཆོད་བཀའ་གཏེར་ཆུ་བོ་ཟུང་འབྲེལ་གྱི་མཆོད་ཁག་བརྒྱད་ཅུ་ཐམ་པ་དང་། ཚེ་སྒྲུབ་བདུད་བཞི་རྣམ་རྒྱལ་ཚེ་གཡང་ཁ་སྤྲོད་དུ་སྒྲུབ་པ་ལས་ཀྱི་ཁ་ཚར་དང་བཅས་པ། ཕུར་ཆེན་དགྲ་བགེགས་ཀུན་སྒྲོལ་སྨད་ལས་གར་འཆམ་དང་བཅས་པ། མཐའ་དམག་འདུལ་བའི་གཉེན་པོ་འཛམ་གླིང་གེ་སར་རྒྱལ་པོ་དཔའ་ཐུལ་ཕུ་ནུའི་འཁོར་ཚོགས་དགྲ་བླ་རླུང་རྟའི་ལྷ་ཚོགས་དང་བཅས་པའི་གར་འཆམ་གསར་འཛུགས། གསོལ་ཁ་གྲ་ཚང་བརྒྱད་ཅུས་སྔ་དགོང་རྒྱུན་ཆགས་སུ་སྐོང་གསོལ་ཆད་མེད་དང་། མར་མེ་ཚེ་འབར་གྲངས་མེད་རྒྱུན་འཛུགས་གནང་བ་སོགས་རྣམ་དཀར་དགེ་བའི་སྒོ་འཕར་རྒྱ་ཆེ་བ་མང་པོ་གསར་དུ་ཕྱེས། དམ་པ་གང་གི་གསུང་གི་བདུད་རྩིས་དབུགས་དབྱུང་ཐོབ་པའི་ཞལ་སློབ་གྲུབ་པའི་ས་མཐོར་གཤེགས་ཤིང་མཁས་པའི་ཡང་རྩེར་སོན་པ་གྲངས་ལས་འདས་པ་བྱོན་ཞིང་གཙོ་བོའི་མཚན་ཙམ་སྨོས་ན། མདོ་རིན་པོ་ཆེ་ཟིལ་གནོན་དགྱེས་པ་རྡོ་རྗེ། རྫོང་སར་མཁྱེན་སྤྲུལ་ཆོས་ཀྱི་བློ་གྲོས། རབ་འབྱམས་དྲུག་པ་སྣང་མཛད་གྲུབ་པའི་རྡོ་རྗེ། རྡོ་གྲུབ་བཞི་པ་ཐུབ་བསྟན་ཕྲིན་ལས་དཔལ་བཟང་། ཀཿཐོག་སི་ཏུ་རིན་པོ་ཆེ། གླག་བླ་བསོད་ནམས་ཆོས་འགྲུབ། གཡག་ཟེའི་འཇའ་ལུས་བསོད་ནམས་རྣམ་རྒྱལ། དིལ་མགོ་མཁྱེན་སྤྲུལ་རབ་གསལ་ཟླ་བ། མི་ཕམ་སྤྲུལ་སྐུ་དགུ་རོང་རྒྱལ་སྲས། ཉི་གྲགས་མཆོག་སྤྲུལ་རིན་པོ་ཆེ། ཀཿཐོག་མཁན་པོ་ངག་ཆུང་། དཔལ་ཡུལ་གྲུབ་དབང་སྤྲུལ་སྐུ། ཀཿཐོག་རྨོག་ཚ། བ་ཐུར་མཁན་ཆེན་ཐུབ་དགའ། བོད་སྤྲུལ་མདོ་སྔགས་བསྟན་པའི་ཉི་མ། རྨེ་བ་མཁན་ཆེན་ཚེ་དབང་རིག་འཛིན་དང་ནོར་བུ་བསྟན་འཛིན། རང་དགོན་གྱི་མཁན་སྤྲུལ་བརྒྱད་ཅུ་ལྷག་བཅས་བསྟན་པ་འཛིན་པའི་སྐྱེས་ཆེན། རྟོགས་པ་བརྙེས་པའི་གྲུབ་མཆོག གཞུང་ལུགས་འཆད་པའི་མཁན་པོ་སོགས་གྲངས་ལས་འདས་པ་བྱོན་ཞིང་དེ་དག་རེ་རེས་ཀྱང་བུ་སློབ་ནམ་མཁའི་སྐར་ཚོགས་ལྟར་བསྐྱངས་པས་མི་རིགས་སྐད་རིགས་མི་གཅིག་པའི་འཛམ་གླིང་ཆོས་ལྡན་གྱི་ཡུལ་གྲུ་མང་པོར་གང་གི་ཕྲིན་ལས་ཀྱི་གདུགས་དཀར་ཡངས་པོས་ཁྱབ་པར་གྱུར། མཐར་དགུང་གྲངས་དྲུག་ཅུ་རེ་གཅིག་བཞེས་པ་རབ་བྱུང་བཅུ་དྲུག་པའི་ཤིང་ཕག་ལོར་རྟག་འཛིན་ཅན་གྱི་སྐྱེ་བོ་དག་མཐའ་བཞིའི་བསྡུས་པའི་ཆོས་ལ་ངེས་པ་འབྱུང་ཕྱིར་སྐུ་ཚེ་དེའི་འགྲོ་དོན་མཐའ་རུ་ཕྱིན་ཏེ་རེ་ཞིག་ཞི་བར་གཤེགས་པའི་ཚུལ་བསྟན་ཏོ། །
རྫོགས་ཆེན་རིན་པོ་ཆེ་སྐུ་རབས་དྲུག་པ་ཨོ་རྒྱན་འཇིགས་བྲལ་བྱང་ཆུབ་རྡོ་རྗེ།
[རྩོམ་སྒྲིག]རྫོགས་ཆེན་སྐུ་རབས་དྲུག་པ་ཨོ་རྒྱན་འཇིགས་བྲལ་བྱང་ཆུབ་རྡོ་རྗེ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་ཉིད་ནི། ལྷོ་ཕྱོགས་དཔལ་གྱི་ཙཱ་རི་ཏྲ་དཔའ་བོ་དང་མཁའ་འགྲོ་རང་བཞིན་གྱིས་འདུ་བའི་གནས་མཆོག་ཏུ། རྗེ་གོང་མའི་ལུང་བསྟན་ལས། ཁྱད་པར་གནས་མཆོག་དཔལ་གྱི་བསམ་ཡས་ཀྱི། །བྱང་ནས་བྱང་དུ་བསྙེགས་པའི་གྲོང་ཁྱེར་དུ། །ཐབས་ཤེས་ཨི་ཨུར་ཞུགས་པའི་མིང་ཡིག་དང་། །པུནྱ་དྷེ་ཝ་ཞེས་གྲགས་གཙང་མའི་རིགས། །ཞུགས་དང་བལྟམས་པའི་མཚན་ལྟས་གསར་དུ་ངོམས། །སྐྱེ་ཀུན་འབྲེལ་བའི་ལྷ་མཆོག་དྲེགས་པའི་རྗེ། །མཐུ་ཆེན་སྲུང་མའི་དབང་པོ་སྡེ་བཞི་ཡི། །མི་འདའ་རྡོ་རྗེ་ཐ་ཚིག་གཉན་པོ་ཡིས། །མི་རིང་གདན་ས་འཛིན་པའི་དཔལ་དུ་ཤར། །ཞེས་དང་། རྫོགས་ཆེན་སྤྲུལ་སྐུ་དྲི་མེད་སོགས་དམ་པ་དུ་མའི་བསླུ་མེད་རྡོ་རྗེའི་ལུང་བྱང་མང་པོ་ནས་དགོངས་པ་གཅིག་དང་དབྱངས་གཅིག་གིས་བསྔགས་པ་ལྟར། ཡབ་གྲུབ་དབང་གོང་མའི་ཐུགས་སྲས་མཁས་ཤིང་གྲུབ་པ་བརྙེས་པའི་རིག་སྔགས་འཆང་ཆེན་པོ་ཨ་གྲོ་ངག་དབང་ནོར་བུ་དང་། ཡུམ་མཁའ་འགྲོའི་མཚན་ལྡན་དཔལ་གྱི་ཙཱ་རི་ཏྲ་པ་ཚེ་རིང་ཆོས་སྒྲོན་གྱི་རིགས་སྲས་སུ་ངོ་མཚར་བའི་ལྟས་བཟང་དུ་མ་དང་བཅས་སྐུ་འཁྲུངས། མི་འཇིགས་གདོང་ལྔས་བཏེགས་པའི་གསེར་ཁྲི་ལ་མངའ་གསོལ། སྐུ་བྱིས་པའི་དུས་ནས་མཁྱེན་རབ་དང་རྣམ་དཔྱོད་འགྲན་ཟླ་བྲལ་བས་འབྲི་ཀློག་སོགས་བརྡ་དང་རྟགས་ཙམ་གྱིས་མཁྱེན་ཞིང་། ཡོངས་འཛིན་མཁན་ཆེན་པདྨ་ཚེ་དབང་ཆེད་དུ་བསྐོས་པ་ལས་བཅུ་ཕྲག་རིག་པའི་གནས་ཡན་ལག་དང་བཅས་པ་དུས་ཡུན་རིང་པོའི་ངལ་བ་ལ་མ་ལྟོས་པར་དགོངས་དབྱིངས་སུ་ཆུབ་པ་བྱུང་། སྐུ་ནར་ཅུང་ཟད་སོན་སྐབས་ངེས་པ་དོན་གྱི་རྡོ་རྗེ་འཆང་ཆེན་པོ་འཇིགས་མེད་རྟ་མགྲིན་མགོན་པོ་དུས་ཀུན་འབྲལ་བ་མེད་པར་ཡོངས་འཛིན་དུ་བཞུགས་པའི་ཞལ་སྔ་ནས་སྔོན་འགྲོ་ཀུན་བཟང་བླ་མའི་ཞལ་ལུང་དང་། ཀློང་ཆེན་མཛོད་བདུན། སྙིང་ཐིག་ཡ་བཞི་སོགས་མན་ངག་ཟབ་ཁྲིད་ཀྱི་སྐོར་གསན་བཞེས་མཛད་དེ་ཉམས་རྟོགས་ཚད་དུ་འཁྱོལ། དགུང་ལོ་བརྒྱད་པར་དམ་ཆོས་འདུལ་བ་ལས་རབ་ཏུ་བྱུང་ནས་ཐོག་མར་དགེ་འདུན་འདུས་པ་སྟོང་ཕྲག་མང་པོ་འཚོགས་པའི་བུམ་སྒྲུབ་ཆེན་མོའི་དབུ་བཞུགས་མཛད་དེ་གནས་དུས་སྟོན་འཁོར་ཕུན་སུམ་ཚོགས་ཤིང་། དགུན་གྲང་བའི་སྒང་ཡིན་ཡང་དབྱར་གྱི་རྔའི་སྒྲ་ལྡིར་ཞིང་ཨུག་ཆོས་མེ་ཏོག་བཞད་པ་སོགས་ལྷར་བཅས་ཆེ་དགུའི་གཙུག་གིས་བཏུད་པའི་ངོ་མཚར་བའི་ལྟས་དུ་མ་དང་བཅས་མཆོག་གི་རྡོ་རྗེ་སློབ་དཔོན་དུ་ཁྲིར་ཕེབས། རྡོ་རྗེ་ཐེག་པ་རང་གཞུང་ནས་ཇི་ལྟར་འབྱུང་བ་བཞིན་དེ་ཉིད་བཅུ་དང་རང་བཞིན་བརྒྱད་སོགས་ཡོན་ཏན་དང་མཚན་ཉིད་ཐམས་ཅད་མ་ཚང་བ་མེད་པས་སྐལ་ལྡན་ལས་ཅན་འདུས་པ་དང་པོའི་འཁོར་གྱི་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད། དགུང་ལོ་བཅུ་ནས་འཇམ་མགོན་ཆོས་ཀྱི་བློ་གྲོས་རིགས་ཀྱི་བདག་པོར་བཀུར་ཞིང་རྫོང་སར་དུ་སྔ་རྗེས་ཐེངས་བཞིར་ཕེབས་ནས་རྒྱུད་སྡེ་ཕྱི་ནང་དང་སྔ་འགྱུར་བཀའ་གཏེར་གྱི་སྨིན་དབང་མ་ཚང་པ་མེད་པ་གསན། ཉི་སྤྲུལ་དྲུག་པ་ཐུབ་བསྟན་འོད་གསལ་བསྟན་པའི་ཉི་མ་ལས་ཉི་གྲགས་གཏེར་ཆོས་ཆ་ཚང་བ། རྫོགས་ཆེན་གླིང་རྒན་རིན་པོ་ཆེ་ཐུབ་བསྟན་བཤད་སྒྲུབ་ཕྲིན་ལས་རྒྱ་མཚོ་ལས་གྲུབ་དབང་གོང་མ་ཐུབ་བསྟན་ཆོས་ཀྱི་རྡོ་རྗེ་ལས་བརྒྱུད་པའི་རིན་ཆེན་གཏེར་མཛོད་ཆེན་མོའི་སྨིན་དབང་། གཞན་ཡང་མཁན་ཆེན་པདྨ་ཐེག་མཆོག་བློ་ལྡན། འཁྲུལ་ཞིག་ཀུན་དགའ་དཔལ་ལྡན། རྒྱལ་རོང་ནམ་སྤྲུལ། མཁན་ཟུར་ཐུབ་བསྟན་སྙན་གྲགས། མཁན་ཟུར་པདྨ་ཚེ་དབང་། རྫ་ལྕང་མའི་མཁན་པོ་ཐུབ་དགའ། མུ་ར་པདྨ་ནོར་བུ། དགེ་བའི་བཤེས་གཉེན་ཚུལ་ཁྲིམས་བློ་གྲོས། ཡབ་རྗེ་ངག་དབང་ནོར་བུ། འབྲི་གུང་གཏེར་ཆེན་སོགས་དམ་པ་དུ་མའི་ཞབས་པད་མཉེས་པ་གསུམ་གྱིས་བསྙེན་ནས་གསར་རྙིང་རིས་སུ་མ་ཆད་པའི་ཆོས་བཀའ་རྒྱ་མཚོའི་སྨིན་གྲོལ་རྒྱབ་བརྟེན་དང་བཅས་པ་བུམ་པ་གང་བྱོའི་ཚུལ་དུ་ཐུགས་ཉམས་སུ་བཞེས། ཡི་དམ་སོ་སོའི་བསྙེན་སྒྲུབ་མཐར་ཆགས་སུ་མཛད་པས་སྒྲུབ་རྟགས་མངོན་དུ་གྱུར། སྒོམ་དོན་གྱི་ཡེ་ཤེས་མངོན་དུ་གྱུར་པས་གདུལ་བྱ་ཐུན་མོང་གི་སྣང་ངོར་རྡོ་ལ་ཞབས་རྗེས་བཞག་པ་དང་། ན་བཟའི་དུམ་བུ་ཙམ་གྱིས་ཀྱང་ནད་མཚོན་གྱི་འཇིགས་པ་འགོག་པ། གཞན་སྣང་དབང་དུ་བསྡུ་བའི་ཏིང་འཛིན་གྱིས་སྡེ་བརྒྱད་ལས་ལ་འདུ་བས་ཅི་བཅོལ་གྱི་ཕྲིན་ལས་སྒྲུབ་པ་སོགས་ཐུན་མོང་དང་ཐུན་མོང་མ་ཡིན་པའི་མཛད་པ་ངོ་མཚར་བ་བསམ་གྱིས་མི་ཁྱབ། དགུང་ལོ་བཅུ་བདུན་ནས་བསྟན་སྲིད་ཀྱི་ཐུགས་འགན་བཞེས་ཏེ་རླབས་ཆེན་རྟེན་བཞེངས་ཀྱི་མཛད་པའི་དབུ་བརྩམས། ཆོས་ཁྲིམས་དར་གྱི་མདུད་པ་སྡོམ་གསུམ་གནང་བཀག་གི་བཅའ་ཁྲིམས་ལ་གཞི་བཟུང་བ་སོགས་མཛད་ཕྲིན་ནམ་མཁའི་ཕྱོགས་མཐར་བདལ་བས་གྲུབ་དབང་རྫོགས་ཆེན་པའི་ཆོས་བརྒྱུད་འཛིན་པའི་བུ་དགོན་སུམ་བརྒྱར་ཉེ་བ་སྤེལ། དགུང་ལོ་ཉི་ཤུ་པར་དབུས་སུ་ཕེབས་ནས་ཇོ་ཤཱཀ་རྣམ་གཉིས་ཀྱིས་གཙོས་པའི་སྐུ་གསུང་ཐུགས་རྟེན་དང་། ལྷ་ཁང་། དགོན་སྡེ། སྒྲུབ་གནས། མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་ལ་སོགས་པར་མཆོད་འབུལ་བརྟན་བཞུགས་དང་འབྲེལ་ཐུབ་བསྟན་དར་ཞིང་རྒྱལ་ཁམས་བདེ་བའི་ཐུགས་སྨོན་མཛད། གོང་ས་ཐམས་ཅད་མཁྱེན་པ་རྒྱལ་མཆོག་བཅུ་བཞི་པ་མཆོག་ནས་མ་ཧཱ་པཎྜི་ཏ་ཨེར་ཏི་ནི་ཧོ་ཐོག་ཐུ་ཞེས་པའི་མཚན་གནས་ཀྱི་ཅོད་པཎ་གསོལ་ཏེ་ཆེན་པོར་འོས་པའི་ཡོ་བྱད་སྣ་ཚོགས་པས་ཆོས་སྲིད་ཀྱི་ཁྲི་འཕང་མཐོན་པོར་གཟེངས་སུ་བསྟོད་པ་བདག་གིར་བཞེས། འདིའི་དུས་ཆོལ་གསུམ་བོད་ཁམས་ཀྱི་དགོན་ཡུལ་བསྟན་འཛིན་ཕལ་མོ་ཆེ་ཞལ་ཕྱི་གླིང་དུ་ཕྱོགས་པའི་སྒང་ཡིན་ཡང་རྒྱལ་དང་སེམས་དཔའི་མཛད་སྤྱོད་དགོས་པ་ཁྱད་པར་ཅན་གཞན་ལ་གཟིགས་ནས་སླར་གདན་ས་རང་དུ་ཆིབས་ཀྱི་ཁ་ལོ་བསྒྱུར། ཕེབས་ལམ་གྱི་གཙང་དབུས་ཁམས་གསུམ་གྱི་དགོན་ཁག་དང་ཆོས་སྡེ་ཚང་མར་སྐུ་འགྱེད་དང་། གསོལ་འདྲེན། རྟེན་བཞག་སོགས་གྱ་ནོམ་པའི་ལེགས་འབུལ་བསྟབས་པ་ལས་གཞན་སྨོན་ལམ་དང་ཐུགས་དམིགས་རྣམ་པར་དག་པས་ཕྱི་ཕྱག་མཛད། གདན་སར་ཞབས་སོར་བཀོད་ནས་སྔར་ཉམས་རྒུད་དུ་ཕྱིན་པའི་རྟེན་གསུམ་དང་དུས་མཆོད་བསྐྱར་གསོ་གནང་། དགུང་ལོ་ཉེར་གཅིག་པར་ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་ཞལ་སྔ་ནས་བསྙེན་པར་རྫོགས་ཏེ་ཕྱི་སོ་སོར་ཐར་པ་འདུལ་བ་རང་གཞུང་ལྟར་ཉེས་ལྟུང་གནང་བཀག་གི་གནས་ཕྲ་མོས་ཀྱང་མ་གོས་ཤིང་། ནང་བྱང་སེམས་རྒྱལ་སྲས་ཀྱི་སྤྱོད་པས་འགྲོ་བ་ཡོངས་ལ་མ་གཅིག་པུའི་བུ་ལྟར་ཐུགས་རྗེའི་འཇུག་པ་མི་འདོར་ཁར། གསང་བ་དམ་ཚིག་རྣམ་པར་དག་པས་རིམ་གཉིས་རྣལ་འབྱོར་གྱི་དབང་ཕྱུག་སྡེ་གསུམ་ཀློང་དགུའི་ཤིང་རྟ་ཆེན་པོར་གྲུབ་པའི་རྒྱལ་སར་གཤེགས། མདོར་ན་མཁས་བཙུན་བཟང་པོའི་ཡོན་ཏན་གྱིས་ལེགས་པར་ཕྱུག་ཅིང་བཤད་སྒྲུབ་ལས་གསུམ་གྱི་ཕྲིན་ལས་ནམ་མཁའི་མཐའ་དང་མཉམ་པས། དཀར་ནག་རྒྱ་ཡི་ཡུལ་གྲུ་བརྒལ་བའི་འཛམ་གླིང་ཤར་མཐའི་ས་ཆ་ཚུན་ལ་མཚན་སྙན་གྱི་གྲགས་པས་ཁྱབ་པར་གྱུར་ཏོ། །དེ་ལྟ་ན་ཡང་འབྱོར་བའི་མཐའ་མ་རྒུད་པ་དང་། འདུས་པའི་མཐའ་མ་འབྲལ་བ་སོགས་གཅིག་ཏུ་བརྟན་པ་མིན་པའི་འདུས་བྱས་ཀྱི་ཆོས་ལ་གདུལ་བྱ་མཐའ་དག་སྐྱོ་བ་བསྐུལ་བའི་དགོངས་བཞེས་སྙིང་པོར་བཟུང་སྟེ། དགུང་ལོ་ཉེར་བཞི་པར་གོང་དུ་སྨོས་པའི་བསྟན་པ་སྤྱི་དང་བྱེ་བྲག་གི་སྔ་ཕྱིའི་དོན་ཆེན་ལ་དགོངས་པའི་བསྟན་དགོན་ཉམས་པ་སླར་གསོ་སོགས་ཀྱི་ཕྱག་ལས་གང་འཚམས་གྲུབ་འཕྲོས་ཀྱི་བླ་བྲང་དཀོར་མཛོད་ཀྱི་ནོར་རྣམས་ཆ་བཞིར་བགོས་ཏེ། ཆ་གཅིག་རིས་མེད་རྒྱལ་བའི་བསྟན་པ་རིན་པོ་ཆེ་བཤད་སྒྲུབ་མདོ་སྔགས་ཀྱིས་འཛིན་སྲུང་སྤེལ་བར་བྱེད་པའི་བསྟི་གནས་གང་དུ་འཁོད་པའི་དགེ་འདུན་པ་རྣམས་ལ་བླ་ན་མེད་པའི་བཀུར་སྟིས་བསྙེན་བསྲིང་བའི་ཆ་རྐྱེན་དང་། རྒྱལ་བཀའ་རིན་པོ་ཆེ་དང་གཟུངས་སྔགས་ཁྱད་པར་ཅན་དག་ཉིན་ཞག་མང་པོར་ཐུན་སྦྲེལ་གྱིས་ཞལ་འདོན་དུ་བསྒྲགས་པའི་སྐུ་ཡོན་དུ་ཕུལ། ཆ་གཅིག་མར་མེ་འབུམ་ཕྲག་མང་པོ་གཙོ་བོར་བྱས་པའི་མཆོད་སྤྲིན་རབ་འབྱམས་སྤྲོས་པས་དཀོན་མཆོག་མཆོད་པ་དང་། གསོལ་འདེབས་བསམ་པ་ལྷུན་གྲུབ་དང་འབྲེལ་བའི་ཚོགས་ཀྱི་འཁོར་ལོ་འབུམ་ཕྲག་མང་པོས་ཉམས་ཆགས་བསྐང་ཞིང་སྡིག་སྒྲིབ་སྦྱོང་བའི་ཆོ་གའི་རིམ་པ་སོགས་རྒྱལ་ཁམས་བདེ་བའི་བསྟན་པ་སྤྱིའི་ཞབས་རིམ་སྒྲུབ་པའི་ཆེད་དུ་བཏང་། ཆ་གཅིག་ཆོས་སྡེ་ཆེན་པོ་དེ་ཉིད་ཀྱི་དགེ་འདུན་པར་སྐུ་འགྱེད་དང་། དབུལ་ཕོངས་དང་ནད་པ་མགོན་མེད་རྣམས་ལ་རྒུད་སྐྱོབ་ཏུ་བསྩལ་བས་གཏོང་བ་ཆེན་པོའི་མཆོད་སྦྱིན་གྱི་སྒོ་འཕར་རྒྱ་ཆེན་པོ་དབྱེ་བར་མཛད། ཆ་གཅིག་བཤད་སྒྲུབ་ཀྱི་གྲྭ་ཚང་ཁག་དང་། སྒྲུབ་པའི་མཆོད་ཁག་གི་གསོལ་ཕོགས་དང་མཆོད་རྫས་འཕར་མའི་རྟེན་རྩར་ཞལ་འདེབས་སུ་ཕུལ་ཞིང་། སླར་ཡང་སྐུ་རབས་དྲུག་རིང་གི་འཚོགས་འཛུགས་ཀྱི་རྟེན་རྩའི་ཟང་ཟིང་འབོར་ཆེན་དེ་དག་དགེ་འདུན་པ་ཡོངས་ལ་འོས་བསྟུན་གྱིས་ཕྱིར་བགོ་བཤའ་མཛད། སྔར་མཇལ་བར་དཀའ་བའི་རྟེན་གསུམ་དམ་བསྒྲགས་མ་ཀུན་ཀྱང་འདི་དུས་ཞལ་ཕྱེས་ཏེ་ཁྲོམ་དབང་དུ་བསྐུར། ཆོས་སྲིད་ཀྱི་བཀའ་འབངས་སུ་མཆིས་པའི་སེར་སྐྱ་མཆོག་དམན་ཕོ་མོ་རྒན་གཞོན་ཀུན་བསྡུས་ནས་ཚེ་འདི་དང་ཕྱི་མར་ཕན་པའི་ལུགས་གཉིས་ཀྱི་བསླབ་བྱ་དམ་ཆོས་ཀྱི་སྙིང་པོ་ཅན་དག་རྣ་བའི་བདུད་རྩིར་བསྩལ། གཞོན་པར་ཚེ་འགུག་དང་། རྒན་པར་འཕོ་བའི་གདམས་པ་ཕོག་སྟེ། ཐམས་ཅད་དཀྱིལ་འཁོར་གཅིག་ཏུ་ཚོགས་པའི་རྟེན་འབྱུང་གིས་ཕྱི་མར་ཚོམ་བུ་གཅིག་ཏུ་མཇལ་བའི་ཐུགས་སྨོན་མཛད། ལོ་དེའི་སྟོན་ཀར་ཆབ་སྲིད་སློབ་སྦྱོང་དུ་བསྙད་དེ་གྲུབ་དབང་མཆོག་གི་དབུས་བླ་སྤྲུལ་ཆེ་གྲས་དཔོན་འཁོར་རྣམས་སྡེ་དགེའི་རྫོང་མཁར་དུ་ཕེབས་ཞུས་ལྟར་ཟླ་བ་བཞི་ལྷག་ལ་བཞུགས། དེ་ནས་ཕྱིར་རྫོགས་ཆེན་དུ་སྐྱོན་འདོན་ངོས་ལེན་གྱི་ཆེད་དུ་ཕེབས་དགོས་པའི་བཀའ་བཀོད་བྱུང་། སྡེ་དགེ་ནས་ཞབས་བཏེགས་པའི་ནང་མོ་བླ་བྲང་གི་གཉེར་གཞོན་ཉེ་གནས་པ་བསོད་རྒྱལ་ལ་ཁྱོད་ཀྱིས་ཕྱིན་ཆད་སྤྲུལ་སྐུ་སྐལ་བཟང་འདི་བདག་སྐྱོང་ལེགས་པོ་བྱོས་དང་འུ་ཅག་མྱུར་དུ་འཕྲད་ཡོང་ཞེས་ཞལ་བགོས་ནན་མོ་མཛད། དེ་ལྟར་སྔོན་དང་ཕྱི་མའི་མཐའ་ལ་གཟིགས་པ་རྣམ་པར་དག་ཅིང་མ་འདྲེས་པའི་རྣམ་ཐར་རྒྱལ་བའི་སྲས་ཀྱི་དགོངས་སྤྱོད་རྨད་དུ་བྱུང་བ་དག་ལ་སྔར་ནས་གོམས་པའི་མཛད་པ་ཉི་མའི་ཟེར་བཞིན་འགག་མེད་རང་ཆས་སུ་གསལ་བཞིན། དགུང་ལོ་ཉེར་ལྔ་པ་རབ་རྒྱལ་ས་ཕག་ཧོར་ཟླ་དང་པོའི་ཚེས་གཅིག་གི་སྲོད་ལ་ཕྱི་རོལ་འགལ་རྐྱེན་གྱི་རྣམ་པར་བརྟེན་པའི་ཚུལ་གྱིས་སྐུ་དངོས་ཀྱིས་གདུལ་བར་བྱ་བའི་མཛད་པ་རེ་ཞིག་རྫོགས་ཏེ་གཟུགས་སྐུའི་བཀོད་པ་ཞི་བའི་དབྱིངས་སུ་བསྡུས། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་དབུས་ཤུལ་ལུས་པ་སྐྱ་སེར་རྣམས་ཀྱིས་རྫ་ཉིན་ཁྲོམ་བཟའི་ས་ཆ་སྒོའི་བྲག་ལུང་མདོར་སྐུ་གདུང་རིན་པོ་ཆེ་ཞུགས་ལ་ཕུལ། དུས་དེར་ནམ་མཁའ་མཐིང་ཞུན་ལྟར་གཡའ་དག་པའི་ངོས་ཀུན་ཏུ་སྤྲིན་དཀར་གྱི་འཇའ་རིས་སྲབ་མོའི་སྐུ་གཟུགས་དང་ཕྱག་མཚན་བཀྲ་ལམ་མེ་མངོན་པ་དང་། ཨ་ཡིག་རང་བྱོན་དོད་པའི་དབུ་ཐོད་དང་ཐུགས་ལྗགས་སྤྱན་གསུམ་མེས་མ་རྨས་པར་བསོད་ནམས་ཀྱི་རྟེན་དུ་བསྩལ་ཞིང་། ཡུང་འབྲུ་ལྟ་བུའི་རིང་བསྲེལ་ཀྱང་མང་དུ་བྱོན་པ་བཅས་ཐ་མའི་མཛད་པ་མཐོང་ཞིང་ཐོས་པ་དག་ཀྱང་རྣམ་གྲོལ་ཞི་བའི་གོ་འཕང་ལ་དབུགས་འབྱིན་པའི་ས་བོན་ཐེབ་པར་མཛད། ཟླ་དེའི་ཚེས་བརྒྱད་ཉིན་གྱི་ནུབ་མོ་ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་འོད་གསལ་ཡེ་ཤེས་ཀྱི་སྣང་ཆར། རྗེ་སངས་རྒྱས་ཀུན་དངོས་རྡོ་རྗེ་འཆང༔ དྲིན་འཁོར་མེད་མཚོ་སྐྱེས་རྡོ་རྗེ་ལ༔ སྙིང་རུས་པའི་གཏིང་ནས་གསོལ་བ་འདེབས༔ བློ་བསམ་དོན་ཆོས་བཞིན་འགྲུབ་པར་ཤོག༔ ཤར་ཆུ་འཛིན་དཀར་པོའི་འོག་ཤེད་ན༔ སྙིང་དམར་པོའི་དྭངས་བཅུད་ཐིགས་པ་ཞིག༔ མིང་དྷྭ་ཛ་ཏཱ་རེའི་སྐྱེད་ཁྱིམ་དུ༔ ཡ་མཚན་གྱི་ཐིག་ལེར་སྨིན་པའི་ཚུལ༔ སེམས་དགའ་སྐྱོ་འདྲེས་པའི་སྣང་ཉམས་སུ༔ འལ་འོལ་གྱི་ཀུན་རྟོག་ཐོལ་ཐོལ་སྐྱེས༔ སྙིང་དམར་པོའི་བཅུད་དུ་རྒྱས་བཏབ་སྟེ༔ དུས་རེ་ཞིག་སྤིར་གྱི་ཁ་བཞིན་སྡོམས༔ ཞེས་པའི་ཡང་སྲིད་རིན་པོ་ཆེ་ངོས་འཛིན་གྱི་བརྡ་བྱང་ཕྱག་བྲིས་མཛད་དེ་རྗེ་ཉིད་ཀྱི་སྐུ་ཚ་བསོད་ནམས་སྟོབས་ལྡན་གྱི་ལག་ཏུ་གཏད་པར་མཛད་དོ། །
== རྫོགས་ཆེན་རིན་པོ་ཆེ་སྐུ་རབས་བདུན་པ་འཇིགས་མེད་བློ་གསལ་དབང་པོ། ཇི་སྐད་དུ། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་བརྡ་བྱང་ལུང་བསྟན་ཕྱག་བྲིས་མ་ལས། རྗེ་སངས་རྒྱས་ཀུན་དངོས་རྡོ་རྗེ་འཆངཿ དྲིན་འཁོར་མེད་མཚོ་སྐྱེས་རྡོ་རྗེ་ལཿ སྙིང་རུས་པའི་གཏིང་ནས་གསོལ་བ་འདེབསཿ བློ་བསམ་དོན་ཆོས་བཞིན་འགྲུབ་པར་ཤོགཿ ཤར་ཆུ་འཛིན་དཀར་པོའི་འོག་ཤེད་ནཿ སྙིང་དམར་པོའི་དྭངས་བཅུད་ཐིག་པ་ཞིགཿ མིང་དྷྭ་ཛ་ཏཱ་རེའི་སྐྱེད་ཁྱིམ་དུཿ ཡ་མཚན་གྱི་ཐིག་ལེར་སྨིན་པའི་ཚུལཿ སེམས་དགའ་སྐྱོ་འདྲེས་མའི་སྣང་ཉམས་སུཿ འལ་འོལ་གྱི་ཀུན་རྟོག་ཐོལ་ཐོལ་སྐྱེསཿ སྙིང་དམར་པོའི་བཅུད་དུ་རྒྱས་བཏབ་སྟེཿ དུས་རེ་ཞིག་སྤིར་གྱི་ཁ་བཞིན་སྡོམཿ ཞེས་གསུངས་པ་རྗེ་གང་གི་ཐུགས་སྲས་ཐུ་བོ་རྟོགས་པ་དོན་གྱི་བརྒྱུད་འཛིན་པ་ཆེན་པོ་རྟོགས་ལྡན་བློ་གྲོས་རྒྱ་མཚོའི་ཞལ་སྔ་ནས། སྐྱབས་ཀུན་འདུས་ཞལ་པདྨ་འབྱུང་གནས། ངོ་བོ་དབྱེར་མེད་རྩ་བའི་བླ་མ། སྒོ་གསུམ་གུས་པས་རྩེ་གཅིག་གསོལ་འདེབས། འབྲལ་མེད་མགོན་དེས་བྱིན་གྱིས་རློབས་ཤོག གཞི་དབྱིངས་སྟོང་གསལ་ཆོས་སྐུའི་ཀློང་ནས། རྩལ་སྣང་འགག་མེད་རོལ་བའི་འཆར་ཚུལ། འཇིགས་བྲལ་སེམས་དཔའི་ཐུགས་བསྐྱེད་སྨོན་ལམ། བསླུ་མེད་རྟེན་འབྲེལ་བདེན་སྟོབས་མངོན་གསལ། ཤར་ཆུ་འཛིན་འོད་དཀར་རང་ཕྱོགས་ཡུལ་གསལ། མགོན་རྩ་བའི་བླ་མའི་ཞལ་ལུང་ནང་དུ། མིང་དྷ་ཛ་ཏྭ་རེ་དོན་གསལ་སྐྱེད་ཁྱིམ། བརྡ་ཡ་མཚན་ཅན་གྱི་ཐིག་ལེར་སྨིན་གསུངས། རང་སྣང་ལ་ཤེལ་དཀར་ཕ་ཝང་ཞིག ནོར་བུའི་འོད་མདངས་རྒྱས་པར་ཤར། ལྷ་བླ་མའི་བཀའ་ལུང་བདེན་དཔང་ཡིན། དོན་རང་ལ་དབང་བའི་ནོར་བུ་དེ། གནད་ཆེན་གྱི་བཀུར་སྟིས་སྲུང་བ་ན། རེ་ཞིག་ནས་བསྟན་དོན་དར་རྒྱས་ཏེ། བསྟན་འགྲོ་ཡི་དོན་ཆེན་འགྲུབ་པར་འོང་། དེ་སྐད་ཀྱི་ཚིག་སྣ་དུམ་ཆོད་དེ། མ་ཏི་ས་རས་གང་ཤར་བྲིས། ཚིག་ལ་སྙན་ཆ་མེད་མོད་ཀྱང་། དོན་ཆེན་གནད་རྣམས་འདུས་པ་ཡིན། བརྒྱུད་གསུམ་བླ་མའི་བྱིན་རླབས་སྙིང་དབུས་ཞུགས། རྩ་གསུམ་ལྷ་ཡིས་དངོས་གྲུབ་ཆར་ལྟར་འབེབ། ཆོས་སྐྱོང་དམ་ཅན་ལུས་དང་གྲིབ་བཞིབ་འགྲོག བསམ་དོན་ཆོས་བཞིན་འགྲུབ་པའི་བཀྲ་ཤིས་ཤོག ཅེས་སྒྲིབ་བྲལ་ཡེ་ཤེས་ཀྱི་གཟིགས་པ་མངའ་བའི་སྔ་ཕྱིའི་དགོངས་ལུང་གིས་གང་དུ་སྐུ་བལྟམས་པའི་གནས་དུས་དང་ཡབ་ཡུམ་གྱི་མཚན་སྒྲ་སོགས་གསལ་བར་བསྟན་པ་ལྟར། གངས་ཅན་བོད་ཀྱི་ཡུལ་གྲུ་ལས་ཤར་ཕྱོགས་ཀྱི་སའི་ཆ་སྲིད་པའི་ཟོ་དོར་ཆེན་པོ་ལྷ་གཉན་རྨ་རྒྱལ་སྤོམ་རས་ཡོངས་སུ་སྲུང་ཞིང་། རྨ་ཀླུང་དལ་འགྲོ་རིང་མོ་ཡངས་པའི་ས་ཆེན་མོའི་ཁྱོན་ན་གཡུ་འབྲུག་འཁྱིལ་འགྲོས་ཀྱིས་ཕྱོགས་སུ་འབབ་པའི་འབྱུང་ཁུངས་མཚོ་སྐྱ་རིང་གི་འགྲམ་ངོགས་སུ། སྐྱེད་ཡབ་མདོ་སྨད་དཔའ་རིས་ཡུལ་གྱི་ཨ་མགོན་གྱི་རུས་ལས་ཚེ་རིང་རྒྱལ་མཚན་ནམ་ཆུང་མིང་དུ་ཚེ་རིང་རྒྱལ་དང་། སྐྱེད་ཡུམ་ཨ་གྲོའི་རུས་ལས་གྲུབ་དབང་གོང་མ་འཇིགས་བྲལ་བྱང་ཆུབ་རྡོ་རྗེའི་སྐུ་སྲིང་མར་གཏོགས་པ་དོན་འགྲུབ་སྒྲོལ་མ་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ཀུན་དགའ་ཞེས་པ་ཤིང་སྟག་ལོར་སྐུ་འཁྲུངས། སྐུ་བྱིས་པའི་དུས་ནས་བཅོས་མིན་གྱི་ངེས་འབྱུང་དང་སྙིང་རྗེ་སོགས་ལྷན་སྐྱེས་སུ་མངའ་ཞིང་། ཁྱད་པར་དགུང་གྲངས་བདུན་གྱི་དུས་སུ་ཡུལ་དེར་ཟོག་ལུག་མང་པོ་བཤས་སུ་ཕབས་པ་གཟིགས་པ་སོགས་ཀྱི་རྐྱེན་གྱིས་ཡབ་ཡུམ་གྱིས་ཀྱང་བཟློག་ཏུ་མ་ཐུབ་པའི་ཐུགས་འདུན་ལྟར་མདོ་ཁམས་གྲུབ་དབང་རྫོགས་ཆེན་པའི་གདན་སར་ཕེབས་སྐྱེལ་བྱས། དེ་ནས་བཟུང་སྐུ་ཞང་སྐྱབས་རྗེ་པདྨ་སྐལ་བཟང་རིན་པོ་ཆེ་དང་རྫོགས་ཆེན་བླ་བྲང་གི་ཞབས་གྲལ་བགྲེས་པོ་བསོད་རྒྱལ་རྣམ་གཉིས་ནས་དགྱེས་བརྩེ་ཆེན་པོས་སྒེར་བདག་བསྐྱེད་སྲིང་གནང་སྟེ་བོད་ཡིག་ཀློག་འདོན་ལ་སྦྱང་པའི་དབུ་བཙུགས། བཅོ་ལྔ་ནས་ཤྲཱི་སེང་ཆོས་གྲྭར་ཞུགས་ཏེ་བརྡ་དག་སྙན་སུམ་སོགས་ཐུན་མོང་རིག་གནས་ལ་སྦྱང་པ་མཛད་ཅིང་མཁན་ཆེན་ཟླ་བའི་འོད་ཟེར་ལས་རབ་ཏུ་བྱུང་། རིམ་པར་རྗེ་དེ་ཉིད་དང་། མི་ཉག་མཁན་པོ་ཚེ་རིང་ཉི་མ། དགེ་རྒྱལ་མཁན་རིན་པོ་ཆེ་ཐུབ་བསྟན་རྣམ་རྒྱལ། དགེ་མང་མཁན་པོ་དབང་ལོ་དང་དབང་སྡིས་རྣམ་གཉིས། མི་ཉག་མཁན་ཆེན་རྩ་ར་ཆོས་གྲགས་སོགས་བཤེས་གཉེན་དུ་མའི་ཞལ་སྔ་ནས་གཞུང་ཆེན་བཅུ་གསུམ་དང་། རྒྱུད་ཀྱི་རྒྱལ་པོ་གསང་བ་སྙིང་པོ་གཙོ་བོར་གྱུར་པའི་མདོ་སྔགས་ཀྱི་གཞུང་ལུགས་ཆེ་ཕྲ་དུ་མ་གསན་བསམ་ཆད་མེད་མཛད་པ་དང་། ཁྱད་པར་གནས་ལྔ་རིག་པའི་པཎ་ཆེན་ཨ་རིག་མཁན་ཆེན་པདྨ་ཚེ་དབང་ལས་དབུ་ཕར་ཚད་མངོན་གྱི་གཞུང་འགྲེལ་ཆེན་མོ་ཁག་དང་རང་ལུགས་འཇམ་མགོན་མི་ཕམ་པའི་ཡིག་ཆའི་བཤད་ཁྲིད་སོགས་རྒྱས་སུ་གསན་ཞིང་། སྐྱེས་སྦྱང་གི་མཁྱེན་རབ་ཁྱད་དུ་འཕགས་པས་དགུང་གྲངས་བཅོ་བརྒྱད་པ་ནས་ཤྲཱི་སེང་ཆོས་གྲྭའི་སྐྱོར་དཔོན་མཛད། ཉི་ཤུ་པར་བྱ་བྲལ་བླ་མ་མཁན་ཆེན་ཆོས་དབྱིངས་ཁྱབ་བརྡལ་རིན་པོ་ཆེའི་རྣམ་ཐར་སྙན་པ་གསན་པས་དམ་པ་གང་གི་ཞབས་པད་ལ་བཏུད་དེ་གཉུག་སེམས་སྐོར་གསུམ་དང་། བཀའ་བརྒྱད་རྣམ་དཔྱད། གཞུང་སྤྱིའི་བཀའ་གནད་སོགས་འཇམ་མགོན་མི་ཕམ་པའི་གསུང་སྐོར་དང་། ལྟ་གྲུབ་ཤན་འབྱེད་སོགས་བོད་སྤྲུལ་གསུང་སྐོར། ཁྲིད་ཡིག་ཡེ་ཤེས་བླ་མ་སོགས་མན་ངག་གི་ཆོས་ཚན་བཅས་སྔ་འགྱུར་རང་ལུགས་ཀྱི་ཟབ་ཆོས་དུ་མ་གསན། དགུང་གྲངས་ཉེར་གཉིས་པར་ཤྲཱི་སེང་ཆོས་གྲྭའི་མཁན་ཆུང་གི་མཚན་གནས་བཞེས་ཏེ་དབུ་མ་རིགས་ཚོགས་དང་། འཇུག་པ། ངེས་ཤེས་སྒྲོན་མེ། ལྟ་གྲུབ་ཤན་འབྱེད། ཕར་ཕྱིན་འགྲེལ་ཆུང་དོན་གསལ་སོགས་དབུ་ཕར་གྱི་གཞུང་ལུགས་དུ་མའི་བཤད་ཁྲིད་མཛད། ཉེར་བཞི་པ་ནས་རིགས་བདག་མཚུངས་མེད་རྟོགས་བླ་མ་བློ་གྲོས་རྒྱ་མཚོའི་ཞལ་སྔ་ནས་གསང་བ་སྙིང་པོའི་རྒྱ་འགྲེལ་ཕལ་མོ་ཆེ་དང་། མཛོད་ཆེན་བདུན། ངལ་གསོ་སྐོར་གསུམ། རྒྱུད་བཅུ་བདུན། ཁྲིད་ཡིག་ཡེ་ཤེས་བླ་མ་རྒྱབ་ཆོས་ཁྲིད་སྦྱང་དང་བཅས་པ། བར་དོ་དྲུག་ཁྲིད། བླ་མ་ཡང་ཏིག་ཡིད་བཞིན་ནོར་བུ་བཅས་ཡང་གསང་རྫོགས་པ་ཆེན་པོ་སྙིང་ཐིག་གོང་འོག་གི་སྙན་བརྒྱུད་མྱོང་ཁྲིད་དང་བཅས་པ་རང་ལུགས་གྲུབ་དབང་རྫོགས་ཆེན་པའི་བརྒྱུད་པ་ཐུན་མིན་མ་ཚང་པ་མེད་པ་བསྩལ་ཏེ་ཕ་ནོར་བུ་ཡི་ལག་ཏུ་འཕྲོད་པ་ཡིན་པའི་དབུགས་དབྱུང་གཟེངས་སྟོད་མཛད། དགུང་གྲངས་ཉེར་བདུན་པར་རྗེ་དེ་ཉིད་ཀྱི་དབུས་གནས་བརྟན་འདུལ་བ་འཛིན་པའི་དགེ་འདུན་གྲངས་ཚང་བའི་ཞལ་སྔ་ནས་བསྙེན་པར་རྫོགས་པ་དགེ་སློང་གི་དངོས་པོ་བཞེས། གཞན་ཡང་སྔ་ཕྱི་ཀུན་ཏུ་སྐྱབས་རྗེ་པདྨ་སྐལ་བཟང་རིན་པོ་ཆེ་དང་། འཁོར་ལོའི་མགོན་པོ་འབྲུག་སྤྲུལ་ཐུབ་བསྟན་ཉི་མ་རྣམ་གཉིས་ལས་སྔ་འགྱུར་བཀའ་གཏེར་རྒྱ་མཚོའི་སྨིན་བྱེད་ཀྱི་དབང་དང་། གྲོལ་བྱེད་ཀྱི་ཁྲིད། རྒྱབ་རྟེན་ལུང་དང་བཅས་པའི་ཟབ་ཆོས་མཐའ་ཡས་པ་གསན་བཞེས་གནང་སྟེ་མཁས་བཙུན་བཟང་པོའི་མངའ་བདག་ཏུ་བཞུགས་བཞིན་པ་ནས། འབྱུང་ཆར་སྐྱེ་དགུའི་བདེ་སྐྱིད་ཀྱི་གཞི་རྩ་རྒྱལ་བསྟན་ལུང་རྟོགས་ཀྱི་བསྟན་པ་རིན་པོ་ཆེ་སྤྱི་དང་། བྱེ་བྲག་གསང་ཆེན་སྔ་འགྱུར་བསྟན་པའི་གཙུག་ནོར་གྲུབ་དབང་གོང་མ་རིམ་བྱོན་གྱི་རྣམ་ཐར་ལ་བསྙེགས་པ་ཚུལ་དགུའི་ཡོན་ཏན་གྱི་མངའ་བདག་ཏུ་ཇི་སྲིད་བསྐལ་བ་རྒྱ་མཚོར་ཞབས་པད་རྡོ་རྗེའི་ཆོས་བདུན་གྱི་ངོ་བོར་བརྟན་པར་སྨོན་ནོ།
རྫོགས་ཆེན་ཡིད་བཞིན་ནོར་བུ་སྐུ་ཕྲེང་བདུན་པ་༧པདྨ་གར་དབང་འོད་གསལ་རིག་པའི་རྡོ་རྗེ་མཆོག་ངོས་འཛིན་ཁྲི་གསོལ་གྱི་བརྒྱུད་རིམ།
[རྩོམ་སྒྲིག]དང་པོ། གྲུབ་དབང་སྐུ་རབས་དྲུག་པ་འཇིགས་བྲལ་བྱང་ཆུབ་རྡོ་རྗེ་དགོངས་པ་རྫོགས་ཁའི་ཞལ་ཆེམས་ཇི་ལྟར་བསྩལ་ཚུལ།
[རྩོམ་སྒྲིག]གྲུབ་དབང་སྐུ་རབས་དྲུག་པ་འཇིགས་བྲལ་བྱང་ཆུབ་རྡོ་རྗེ་མཆོག་དགུང་གྲངས་ཉེར་ལྔ་བཞེས་པ་སྤྱི་ལོ་༡༩༥༩པ་ས་ཕག་ཧོར་ཟླ་དང་པོའི་ཚེས་གཅིག་ཉིན་གཞན་རྐྱེན་ལ་བརྟེན་པའི་ཟོལ་གྱིས་དགོངས་པ་རྫོགས་པ་སྟེ། རྗེ་ཉིད་ཞིང་དུ་མ་གཤེགས་པའི་ཟླ་འགའི་སྔོན་གྱི་ཉིན་ཞིག་གི་ཕྱི་དྲོར་གློ་བུར་དུ་ཞབས་གྲལ་པ་དོན་གྲུབ་ཕུན་ཚོགས་དང་ཡོངས་འཛིན་མཁན་ཆེན་རིན་པོ་ཆེའི་སྐུ་ཚ་བསོད་ནམས་སྟོབས་ལྡན་གཉིས་ལ་ཚོགས་རྫས་ཉུང་ངུ་ཞིག་གྲ་སྒྲིགས་གྱིས་དང་མཚོ་བར་མའི་གུ་རུའི་སྒྲུབ་ཕུག་ཏུ་འགྲོ་དགོས་ཞེས་བཀའ་བསྩལ། ཞབས་གྲལ་གཉིས་ནས་དོ་ནུབ་ཉི་མ་ཕྱི་དྲོ་གྱུར་པ་དང་ཆིབས་རྟ་སོགས་གྲ་སྒྲིགས་མེད་པས་སང་ཉིན་ཕེབས་པར་མི་དགའ་འམ་ཞུས་ཞེས་ཀྱང་། དོ་ནུབ་མ་སོང་ཐབས་མེད་ཡིན་པས་ཆིབས་རྟ་མེད་ཀྱང་རྐང་ཐང་དུ་འགྲོ་ཆོག་ཅེས་གསུངས་ནས་དཔོན་འཁོར་རྣམས་ཞབས་ཐང་གིས་མཚོ་བར་མར་ཕེབས། དེར་གུ་རུའི་སྐུ་དྲུང་ནས་ཚོགས་བསྡུས་ཤིག་གསུངས་པའི་བར་ཞིག་ན་ཡིད་བཞིན་ནོར་བུ་མཆོག་དབུ་གཟན་གྱིས་གཏུམ་ནས་གཤུམ་ཏེ་ཅུང་ཙམ་བཞུགས་རྗེས་ཕྱག་བྲིས་ཤོག་བྱང་ཞིག་མཛད་འདུག་པ་གུ་རུའི་ན་བཟའ་ནང་མའི་ཐུགས་ཀར་འཇོག་པར་མཛད། དེ་འཕྲལ་ཕྱིར་ཕེབས་སྐབས་མུན་རུབ་པས་དམ་ཅན་སྒང་དུ་ཡབ་རྒན་ངག་དབང་ནོར་བུ་བཞུགས་པའི་སྐུ་དྲུང་དུ་བྱོན། ཡབ་ཆེན་མཆོག་ནས་ཁྱེད་རྣམས་འདི་འདྲའི་གློ་བུར་དུ་ཕེབས་དགོས་དོན་ཅི་ཡིན་ཞེས་ནན་འདྲི་གནང་བར་ཡིད་བཞིན་ནོར་བུས་ཚོགས་འཁོར་འབུལ་དུ་སོང་བ་ཡིན་ཞེས་པ་ཙམ་ལས་ཞིབ་གསུངས་མ་མཛད། ཡང་དུ་ཚོགས་འཁོར་དོ་ནུབ་འབུལ་དགོས་པ་ཅིའི་ཕྱིར་སོགས་ཞབས་གྲལཔ་བསོད་སྟོབས་ལ་ནན་འདྲི་གནང་བས། ཡིད་བཞིན་ནོར་བུས་ཕྱག་བྲིས་ཤོག་བྱང་ཞིག་གུ་རུའི་ཐུགས་ཀར་འཇོག་པར་མཛད་སོང་སོགས་ཞིབ་གསལ་ཞུས། ཡབ་ཆེན་མཆོག་ནས་དེ་མ་ཐག་ཏུ་ཉེ་གནས་གླིང་དཀར་གཤིས་པ་བསམ་གཏན་ལ་ཁྱོད་ད་ལྟ་མྱུར་བར་སོང་སྟེ་ཤོག་བྱང་དེ་ཁྱེར་ནས་ཤོག་གསུངས། གླིང་དཀར་བསམ་གཏན་གོམ་བགྲོད་ཤིན་ཏུ་མྱུར་བ་ཞིག་ཡིན་པས་ཕལ་ཆེར་དེང་དུས་ཀྱི་ཆུ་ཚོད་གཅིག་མ་ཟིན་ཙམ་གྱིས་ཚུར་སླེབ། ཡབ་ཆེན་མཆོག་ནས་ཕྱག་བྲིས་ལ་གཟིགས་ཚེ་དུས་ཀྱི་རྒུད་པ་སྟོབས་སུ་བདོ་བས་སྤྱི་བྱེའི་བསྟན་འགྲོ་ལ་སྨན་པ་ཞིག་སྐུ་ཚེ་འདིར་མ་བྱུང་ཡང་། སྐུ་ཕྲེང་རྗེས་མ་མཁས་བཙུན་བཟང་གསུམ་གྱི་ཡོན་ཏན་འདི་ལས་ལྷག་པ་ཞིག་གི་སྐྱེ་སྲིད་བཞེས་ཏེ་སྤྱི་དང་བྱེ་བྲག་གི་བསྟན་འགྲོར་སྨན་པའི་ཐུགས་དམ་སྨོན་ལམ་རྒྱ་ཆེར་མཛད་འདུག་པར། ཡབ་ཆེན་མཆོག་ནས་ཨ་ཙི་ཅི་གསུང་པ་ཡིན་ན། དཔའ་ཆེན་བྱང་ཆུབ་སེམས་དཔའི་ཐུགས་བསྐྱེད་ཅེས་པ་གང་དུ་ཅི་ཙམ་རྒུད་ཅིང་ཅི་ཙམ་ཉམས་ཐག་པ་དེ་ཙམ་དུ་ཐུགས་ལྷག་པར་བསྐྱེད་དགོས་པ་ལས་འདི་འདྲའི་གསུང་བྱོན་པ་ཅི་ལ་སྲིད་སོགས་ཐུགས་ཁྲོ་ཉམས་དང་བཅས་ཡུན་དུ་འཚོ་བཞུགས་དགོས་པའི་ཞུ་བསྐུལ་གྱི་གསུང་མཛད་མང་དུ་གནང་བར། ཡིད་བཞིན་ནོར་བུ་མཆོག་ནས་ཞལ་རས་འཛུམ་ཙམ་མཛད་པ་ལས་གསུང་ལན་གང་ཡང་གནང་མ་སོང་བས་དེ་དུས་ཙམ་ནས་ཞིང་ཁམས་གཞན་དུ་ཐུགས་གཏད་ཟིན་པར་འདུག་ཅེས། སྐབས་དེའི་ཞབས་གྲལ་ད་ལྟ་འཚོ་བཞུགས་པ་བསོད་ནམས་སྟོབས་ལྡན་གྱི་ངག་ལམ་ལྟར་ཡིག་གེར་བཀོད།
གཞན་ཡང་སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་དགུང་གྲངས་བཅུ་བཞིའི་དུས་ཀྱི་ཉིན་ཞིག་གཟིམས་སྐྱིལ་འཆི་མེད་གྲུབ་པའི་དགའ་ཚལ་དུ་ནམ་རྒྱུན་ལྟར་གྲུབ་དབང་རྫོགས་ཆེན་དྲུག་པའི་སྐུ་པང་དུ་དབུ་བསྙེས་ཏེ་བཞུགས་པའི་སྐབས་སུ། གྲུབ་དབང་རིན་པོ་ཆེའི་ཕྱག་གིས་དབུ་ལ་བྱིལ་བྱིལ་དང་བཅས་ངའི་བདག་པོ་ཁྱོད་ལས་མེད་ཨེ་གོ་ཅེས་ནན་གསུངས་མཛད། སྐྱབས་རྗེ་པདྨ་སྐལ་བཟང་རིན་པོ་ཆེས་དེང་དུས་གསུངས་དོན། ཡིད་བཞིན་ནོར་བུའི་གསུང་དེ་ཕྱི་མཐའ་གཟིགས་པའི་ལུང་བསྟན་ཡིན་པ་ངས་དུས་ཕྱིས་མ་གཏོགས་མ་ཤེས་ཀྱང་། གསུང་ཚིག་དེ་དག་ངའི་ཡིད་ལ་ཁྲ་བཏབ་པ་བཞིན་སྐྱིད་སྡུག་ལེགས་ཉེས་གང་གི་སྐབས་སུའང་བརྗེད་པ་མེད་པར་ཡང་ཡང་དྲན་གི་འདུག་ཅེས་གསུངས། དེ་བཞིན་ཡིད་བཞིན་ནོར་བུ་དགོངས་པ་མ་རྫོགས་པའི་ཉིན་འགའི་སྔོན་སྡེ་དགེའི་ཁྲིམས་ཁང་ནས་ཕྱིར་རྫོགས་ཆེན་ལ་ཕེབས་སྐབས་བླ་བྲང་གཉེར་གཞོན་བསོད་རྒྱལ་ལ་ཁྱེད་ཀྱིས་སྤྲུལ་སྐུ་སྐལ་བཟང་འདི་འཁྱར་སྡོམ་བྱེད་དུ་མ་བཅུག་པར་བདག་སྐྱོང་ལེགས་པོ་བྱོས་དང་འུ་ཅག་མྱུར་དུ་འཕྲད་པར་ཡོང་ཞེས་ཞལ་སྒོས་མཛད་པ་དང་། ན་བཟའ་བརྗེ་སྐབས་སུ་ཉིན་ཞིག་ངེད་ལའང་མཚོན་ཟུག་པའང་སྲིད་ཅེས་གསུངས་པ་སོགས་ཕྱི་མཐའ་གཟིགས་པའི་གསུང་དང་མཛད་པ་དུ་མ་སྟོན་བཞིན་སྐུ་དངོས་ཀྱིས་གདུལ་བར་བྱ་བའི་མཛད་པ་རེ་ཞིག་རྫོགས་ཏེ། དགུང་གྲངས་ཉེར་ལྔ་བཞེས་པ་ས་ཕག་ཧོར་ཟླ་དང་པོའི་ཚེས་གཅིག་གི་ནུབ་མོ་གཞན་རྐྱེན་ལ་བརྟེན་པའི་ཟོལ་གྱིས་རུ་དམ་གདོང་ཕུ་ཞེས་པའི་ས་ཆར་ཞི་བར་གཤེགས། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་དབུས་ཤུལ་ལུས་གྲྭ་འཁོར་རྣམས་ཀྱི་སྐུ་གདུང་རིན་པོ་ཆེ་རྫ་རྒྱུད་ཁྲོམ་ཟའི་ས་ཆར་སྤྱན་དྲངས་ཏེ་ཚེས་ལྔའི་ཉིན་གདུང་མཆོད་ཞུགས་འབུལ་མཛད་ཚེ་དབུ་ཐོད་དུམ་བུ་ཞིག་ལ་ཨ་ཡིག་རང་བྱོན་དང་། གདུང་ཆེན་ལྔ་དང་རིང་སྲེལ་གྲངས་མེད་པ་ཆར་ལྟར་བབས་པ་སོགས་ངོ་མཚར་བའི་རྟགས་མཚན་དུ་མ་བྱུང་། དེ་ཉིན་ཡོངས་འཛིན་མཁན་ཆེན་རིན་པོ་ཆེ་མཆོག་ནས་མི་རིང་བར་རྒྱལ་བསྟན་ཡང་དར་གྱི་དུས་བཟང་གསར་དུ་འཆར་སྲིད་པ་དང་སྐྱབས་རྗེ་རིན་པོ་ཆེའི་ཡང་སྲིད་གདན་སར་འཁོད་པར་འགྱུར་སོགས་ཀྱི་བཀའ་སློབ་བསྩལ་ཞིང་མྱུར་འབྱོན་གསོལ་འདེབས་ཀྱང་མཛད།
གཉིས་པ། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོས་གྲུབ་དབང་དྲུག་པའི་ཡང་སྲིད་རིན་པོ་ཆེ་ངོས་འཛིན་ཀྱི་བརྡ་བྱང་ཕྱག་བྲིས་ཇི་ལྟར་གནང་ཚུལ།
[རྩོམ་སྒྲིག]ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོ་ནི་ལྕེ་བཙུན་སེང་གེ་དབང་ཕྱུག་དང་། ཀུན་མཁྱེན་འཇིགས་མེད་གླིང་པ། མི་འགྱུར་ནམ་མཁའི་རྡོ་རྗེ་བཅས་ཀྱི་གསང་གསུམ་གཅིག་ཏུ་བསྡོམས་པའི་སྤྲུལ་བར་གྲགས་ཤིང་། མཐུན་སྣང་ལྟར་ན་གདོད་མའི་མགོན་པོ་མིའི་རྫུ་ལ་བྱོན་པ་ཕྱི་མའི་དུས་འདིར་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་བསྟན་པའི་ཤིང་རྟ་ཡོངས་ཀྱི་དགེ་བའི་བཤེས་གཉེན་ཆེན་པོ་ཞིག་སྟེ། སྤྱི་ལོ་༡༨༩༩པ་རབ་བྱུང་བཅོ་ལྔ་པའི་ས་ཕག་ལོར་སྐུ་འཁྲུངས་ཤིང་གྲུབ་དབང་སྐུ་རབས་ལྔ་པ་ཐུབ་བསྟན་ཆོས་ཀྱི་རྡོ་རྗེ་དང་། རྒྱ་ཀོང་མཁན་ཆེན་གཞན་ཕན་སྣང་བ། བྱ་བྲལ་ཀུན་དགའ་དཔལ་ལྡན་སོགས་མཁས་གྲུབ་སྐྱེས་ཆེན་དུ་མའི་ཞལ་སྔ་ནས་མདོ་སྔགས་རིག་གནས་དང་བཅས་པར་གསན་སྦྱང་གནང་ཞིང་། ཁྱད་པར་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་དབང་ཁྲིད་གདམས་ངག་དང་བཅས་པ་མནོག་ཆོས་སུ་བསྩལ་ཏེ་མན་ངག་དོན་བརྒྱུད་འཛིན་པའི་ཐུགས་སྲས་ཐུ་བོར་གྱུར། དགུང་གྲངས་བཞི་བཅུའི་སྐོར་ཤྲཱི་སེང་བཤད་གྲྭའི་མཁན་ཁྲིར་བཞུགས་ཏེ་མདོ་སྔགས་རིག་གནས་དང་བཅས་པའི་འཆད་ཁྲིད་རྒྱ་ཆེར་བསྐྱངས་ཤིང་། སྐུ་ཚེའི་སྨད་དུ་གྲུབ་དབང་དྲུག་པ་འཇིགས་བྲལ་བྱང་ཆུབ་རྡོ་རྗེའི་སྐུའི་ཡོངས་འཛིན་དུ་རྒྱུན་བཞུགས་མཛད་པ་དང་ཕྱོགས་དང་ཕྱོགས་ནས་ཕེབས་པའི་ལས་ཅན་རྣམས་ལ་མན་ངག་རྫོགས་པ་ཆེན་པོའི་ཆོས་འཁོར་རྒྱ་ཆེར་བསྐོར་ཞིང་སྨིན་ཅིང་གྲོལ་བའི་ས་ལ་བཀོད་པར་མཛད། མཐར་དུས་འགྱུར་ཆེན་མོའི་སྐབས་ཀྱི་འཇིགས་བྲལ་བྱང་ཆུབ་རྡོ་རྗེ་དགོངས་པ་རྫོགས་ནས་ཟླ་འགའི་རྗེས་སུ་རྗེ་འདི་ཉིད་ཀྱང་ཞི་བར་གཤེགས། དེ་ཡང་གྲུབ་དབང་སྐུ་རབས་དྲུག་པ་འཇིགས་བྲལ་བྱང་ཆུབ་རྡོ་རྗེ་དགོངས་པ་རྫོགས་ནས་ཞག་གསུམ་སོང་བའི་ཚེས་བརྒྱད་ཀྱི་ནུབ་མོ་ཡོངས་འཛིན་མཁན་ཆེན་རིན་པོ་ཆེ་དང་། རྗེ་ཉིད་ཀྱི་སྐུ་ཚ་བསོད་ནམས་སྟོབས་ལྡན། དོན་གྲུབ་ཕུན་ཚོགས། འཇམ་དབྱངས་རྒྱ་གྲོལ། སྦ་ར། ཆོས་རྡོ། ཐུབ་བསྟན་བློ་གྲོས་བཅས་རས་གུར་ཞིག་ཏུ་གཟིམས་པའི་ནམ་གུང་ཙམ་ན་མཁན་ཆེན་རིན་པོ་ཆེས་དབུ་གཏེགས་ཏེ་ཕྱག་བྲིས་ཤིག་མཛད་བཞིན་འདུག ཕྱི་ཉིན་སྔ་མོ་སྐུ་ཚ་བསོད་ནམས་སྟོབས་ལྡན་ལ་མཚལ་སྨྱུག་གིས་བྲིས་པའི་ཤོག་བྱང་བརྡ་ཡིག་ཞིག་གནང་སྟེ་ཁྱོད་ཀྱིས་འདི་ཉར་ཚགས་ལེགས་པོ་གྱིས་ཞེས་ཞལ་བསྒོས་མཛད། དེ་རྗེས་ཟླ་བ་གསུམ་ཙམ་རིང་དཔོན་འཁོར་རྣམས་རྫ་བརྒྱུད་ཁྲོམ་ཟ་དང་དབོན་པོ་སོགས་ཀྱི་རི་ལུང་འགར་སྦས་སྐུང་གིས་ཕེབས་པར་མཛད་ཅིང་། ས་ག་ཟླ་བའི་ཚེས་ཉེར་ལྔ་ཉིན་ཡོངས་འཛིན་མཁན་ཆེན་རིན་པོ་ཆེ་ཡང་གཞན་རྐྱེན་ལ་བརྟེན་པའི་ཟོལ་གྱིས་དགོངས་པ་རྫོགས། མི་རིང་བར་སྐྱབས་རྗེ་པདྨ་སྐལ་རིན་པོ་ཆེ་མཆོག་སྡེ་དགེའི་ཁྲིམ་ཁང་ནས་ཚུར་རྫོགས་ཆེན་ལ་ཕེབས་རྗེས་སྤྱི་ལོ་༡༩༦༤པ་ཤིང་འབྲུག་ལོར་བསོད་ནམས་སྟོབས་ལྡན་གྱིས་བརྡ་ལུང་ཕྱག་བྲིས་འཁྲུལ་མེད་ཕྱག་ཏུ་ཕུལ། སྐྱབས་རྗེ་མཆོག་ནས་ཡིད་བཞིན་ནོར་བུའི་གདུང་རུས་ཆ་ཚང་དང་ལུང་བསྟན་ཤོག་བྱང་གཉིས་སྐུ་སྲོག་དང་བསྡོས་ཏེ་ཉར་སྲུང་མཛད་ཅིང་ཤུལ་ལུས་བླ་གྲྭ་ལྷག་བསམ་ཅན་ཀུན་གྱིས་རྫོགས་ཆེན་བསྟན་པ་ཡང་དར་འབྱུང་རེ་དང་། ལུང་དོན་དང་མཐུན་པའི་ཡང་སྲིད་འཁྲུལ་མེད་ཞིག་མཇལ་རྒྱུར་སྐོམ་པ་ཆུ་འདོད་ལྟ་བུའི་རེ་སྒུག་བྱས་པས་ལུང་བསྟན་བརྡ་ཡིག་གི་ཚིག་དོན་མ་ལུས་པ་ཕལ་མོ་ཆེའི་བློ་ཐོག་ནས་བསྐྱར་ཐུབ་པ་བྱུང་། དེ་ལྟར་མི་ལོ་ཉི་ཤུའི་དུས་རིང་གི་ནམ་ཟླ་སྐྱེལ་བའི་མཇུག་ཞིག་ན་ད་ལྟའི་ཡང་སྲིད་པདྨ་གར་དབང་མཆོག་དགུང་གྲངས་བདུན་གྱི་དུས་ནས་འཁྲུངས་ཡུལ་མགོ་ལོག་རྨ་སྟོད་ནས་སྐུ་ཞང་སྐྱབས་རྗེ་པདྨ་སྐལ་བཟང་རིན་པོ་ཆེ་དང་། རྫོགས་ཆེན་བླ་བྲང་གི་ཞབས་གྲལ་བགྲེས་པོ་བསོད་རྒྱལ་རྣམ་གཉིས་རྫོགས་ཆེན་དུ་བཞུགས་པའི་དྲུང་དུ་ཟློག་ཏུ་མི་ཐུབ་པའི་ཐུགས་མདུན་གྱིས་ཕེབས་ཤིང་དེར་གཏན་བཞུགས་མཛད། སྐབས་དེར་འཁྲུངས་ཡུལ་དང་ཡབ་ཡུམ་གྱི་མཚན་སྒྲ་སོགས་བརྡ་ལུང་དང་ཆེས་མཐུན་པ་བྱུང་བ་དང་ཁྱད་པར་རྣམ་གཉིས་ལ་བསྩལ་པའི་གོང་མའི་ཞལ་ཆེམས་ལ་གཞིགས་ཚེ་གྲུབ་དབང་རིན་པོ་ཆེའི་ཡང་སྲིད་དུ་ཐུགས་དོགས་བྱུང་ཡང་། མི་རིང་བར་རྫོགས་ཆེན་རིན་པོ་ཆེའི་ཡང་སྲིད་ཞིག་རྒྱ་གར་དུ་འཁྲུངས་པ་བརྡ་ལུང་དང་མཐུན་པ་མ་བྱུང་ཡང་ཚད་མའི་སྐྱེས་བུ་གཞན་དང་གཞན་གྱིས་ངོས་འཛིན་གནང་གྲུབ་པ་གསན་པ་དང་། སྐབས་དེའི་ཡུལ་དུས་ཁོར་ཡུག་གི་གནས་བབས་སོགས་གང་ཅིར་གཞིགས་ཚེ་འདི་ཉིད་སྒེར་གྱི་ངོ་སྐལ་དུ་བྱོན་པ་ལས་གདན་སའི་དཔལ་དུ་བྱོན་པའི་ཡང་སྲིད་མིན་པར་དགོངས་ཏེ་བརྡ་ལུང་སོགས་རང་གར་འཇོག་པར་མཛད་པ་དང་། སྐྱབས་རྗེ་པདྨ་སྐལ་བཟང་རིན་པོ་ཆེ་མཆོག་སྐུ་ངལ་ཆེད་བསད་ཀྱིས་རྒྱ་གར་དུ་ཕེབས་ནས་བསྟན་འཛིན་འཇིགས་བྲལ་ལྷུན་པོ་སྤྱན་འདྲེན་མཛད།
གསུམ་པ། ཡོངས་འཛིན་མཁན་ཆེན་འཇིགས་མེད་ཡོན་ཏན་མགོན་པོའི་བརྡ་ལུང་ཕྱག་བྲིས་དང་དེའི་འབྲུ་འགྲེལ།
[རྩོམ་སྒྲིག]རྗེ་སངས་རྒྱས་ཀུན་དངོས་རྡོ་རྗེ་འཆང་། དྲིན་འཁོར་མེད་མཚོ་སྐྱེས་རྡོ་རྗེ་ལ། སྙིང་རུས་པའི་གཏིང་ནས་གསོལ་བ་འདེབས། བློ་བསམ་དོན་ཆོས་བཞིན་འགྲུབ་པར་ཤོག ཤར་ཆུ་འཛིན་དཀར་པོའི་འོག་ཤེད་ན། སྙིང་དམར་པོའི་དྭངས་བཅུད་ཐིག་པ་ཞིག མིང་དྷྭ་ཛ་ཏ་རེའི་སྐྱེད་ཁྱིམ་དུ། ཡ་མཚན་གྱི་ཐིག་ལེར་སྨིན་པའི་ཚུལ། སེམས་དགའ་སྐྱོ་འདྲེས་པའི་སྣང་ཉམས་སུ། འལ་འོལ་གྱི་ཀུན་རྟོག་ཐོལ་ཐོལ་སྐྱེས། སྙིང་དམར་པོའི་བཅུད་དུ་རྒྱས་བཏབ་ཏེ། དུས་རེ་ཞིག་སྤིར་གྱི་ཁ་བཞིན་སྡོམ། ཞེས་གསུངས་ཤིང་། ཤོ་ལ་ཀ་དང་པོ་ཨོ་རྒྱན་གྱི་སློབ་དཔོན་ཆེན་པོ་གུ་རུ་མཚོ་སྐྱེས་རྡོ་རྗེའི་ཐུགས་རྒྱུད་བསྐུལ་བའི་གསོལ་འདེབས་དང་འབྲེལ་དོན་འདིར་བདུད་དང་དམ་སྲིའི་བར་ཆད་ཀྱི་དབང་དུ་མི་འགྲོ་བར་ཆོས་ལྡན་གྱི་བྱ་བ་ཆོས་བཞིན་འགྲུབ་པར་ཤོག་ཅེས་ཐུགས་སྨོན་མཛད་ཅིང་། དེ་ལྟར་ཨོ་རྒྱན་ཆེན་པོ་ལ་གསོལ་སྨོན་མཛད་དགོས་པ་རྫོགས་ཆེན་ཡིད་བཞིན་ནོར་བུ་སྐུ་ཕྲེང་གོང་མ་ཐམས་ཅད་གུ་རུའི་ལུང་བསྟན་གིས་ངོས་འཛིན་མཚན་གསོལ་མཛད་པ་ཤ་སྟག་ཡིན་པས། བརྡ་བྱང་འདི་ཉིད་ཀྱང་ཡོངས་འཛིན་མཁན་ཆེན་རིན་པོ་ཆེ་ལ་སློབ་དཔོན་པདྨས་ལུང་དུ་བསྟན་པ་ཡིན་སྙམ། ཤོ་ལོ་ཀ་གཉིས་པས་གང་དུ་སྐུ་འཁྲུངས་པའི་ཡུལ་ཕྱོགས་དང་ཡབ་ཡུམ་གྱི་མཚན་སྒྲ་བཅས་འཁྲུལ་མེད་དུ་བསྟན་པ་སྟེ། ད་ལྟའི་མཆོག་སྤྲུལ་རིན་པོ་ཆེ་གང་དུ་སྐུ་འཁྲུངས་པའི་ཡུལ་ནི་སྤྱིར་འཛམ་གླིང་གི་ས་ཆེན་པོ་དུམ་བུ་བཞིར་ཕྱེས་པ་ལས་ཤར་གླིང་ཨེ་ཤ་ཡའི་ལྟེ་བ་གངས་ཅན་བོད་ཀྱི་ལྗོངས། དེ་ལའང་ཤར་ལྷོ་ནུབ་བྱང་གི་ཆ་བཞིར་དབྱེ་བ་ལས་ཤར་ཕྱོགས་སྐྱོང་བའི་ཟོ་དོར་ལྷ་གཉན་རྨ་རྒྱལ་སྤོམ་རའི་བདག་ཏུ་བཟུང་བའི་གནས་མཆོག་མཐོང་སྨོན་གླིང་གི་ས་ཆ་རྨ་ཡུལ་གཞུང་དུ་སྐུ་བལྟམས་པས་ན་ཤར་ཆུ་འཛིན་དཀར་པོའི་འོག་ཤེད་ན་ཞེས་གསུངས་པ་དང་མཐུན། ཚིག་རྐང་གཉིས་པས་ལེགས་སྦྱར་གྱི་སྐད་དུ་དྷྭ་ཛ་སྟེ་བོད་སྐད་དུ་རྒྱལ་མཚན་ཞེས་པའི་ཡབ་མིང་དང་། ཡུམ་མིང་ལེགས་སྦྱར་གྱི་སྐད་དུ་ཏཱ་རེ་སྟེ་བོད་སྐད་དུ་སྒྲོལ་མ་ཞེས་པའི་སྐྱེད་ཁྱིམ་དུ་འབྱུང་འགྱུར་སྐུ་བལྟམས་པའི་ཚུལ་སྣང་ངོ་ཞེས་གསུངས་པ་སྟེ། མཆོག་སྤྲུལ་རིན་པོ་ཆེའི་ཡབ་ཀྱི་ཆུང་མིང་ལ་ཚེ་རིང་རྒྱལ་ལམ་ཚེ་རིང་རྒྱལ་མཚན་ཞེས་འབོད་པ་དང་། ཡང་ན་མཆོག་སྤྲུལ་རིན་པོ་ཆེ་ཉིད་དགུང་ལོ་ཆུང་དུས་ནས་རྫོགས་ཆེན་ལ་ཕེབས་ཤིང་སྐབས་དེར་སྐྱབས་རྗེ་པདྨ་སྐལ་བཟང་དང་བླ་བྲང་གི་གྲྭ་རྒན་བསོད་རྒྱལ་རྣམ་གཉིས་ཀྱིས་སྒེར་བདག་མཛད་ཅིང་ཁྱིམ་དེར་བསོད་རྒྱལ་ཚང་ཞེས་འབོད་པས་དེ་ལའང་གོ་ཆོག་པ་དང་། སྐྱེད་ཡུམ་གྱི་མཚན་སྒྲ་དོན་འགྲུབ་སྒྲོལ་མའམ་དོན་སྒྲོལ་དུ་འབོད་པས་ན་བརྡ་ལུང་གིས་བསྟན་པ་དང་ཆེས་མཐུན། ཤོ་ལོ་ཀ་གསུམ་པས་དེ་ལྟའི་སྣང་ཉམས་ཐོལ་བྱུང་དུ་བྲིས་པའི་བརྡ་བྱང་འདི་ཉིད་དུས་རེ་ཞིག་གི་བར་སྙིང་དབུས་སུ་ཆོང་ལ་དུས་འདིར་སུ་ལའང་ཡིད་ཆེས་དཀའ་ཕྱིར་མ་སྨྲ་བ་བར་རྒྱ་མཚོའི་ནང་གི་ཆུ་སྲིན་སྤིར་གྱི་ཁ་བཞིན་དུ་སྡོམ་པར་གྱིས་དང་། དུས་ནམ་ཞིག་གི་ཚེ་ན་གངས་ལྗོངས་རྒྱལ་བསྟན་ཡང་དར་གྱི་དུས་བཟང་འཆར་ཞིང་གྲུབ་དབང་དྲུག་པའི་ཡང་སྲིད་རིན་པོ་ཆེ་བསྟན་འགྲོའི་སྤྱི་དཔལ་དུ་བྱོན་པར་འགྱུར་རོ་ཞེས་བསླུ་མེད་རྡོ་རྗེ་ལུང་གིས་འཁྲུལ་བ་མེད་པར་དངོས་སུ་བསྟན་ཏོ།
བཞི་པ། རྗེ་བཙུན་བླ་མ་རྟོགས་ལྡན་བློ་གྲོས་རྒྱ་མཚོ་རིན་པོ་ཆེའི་མཉམ་བཞག་འོད་གསལ་གྱི་དགོངས་ཉམས་ཀྱིས་བརྡ་ལུང་གི་ཚིག་དོན་བཀྲལ་ཏེ་ངོས་འཛིན་མཚན་གསོལ་གནང་ཚུལ་ནི།
[རྩོམ་སྒྲིག]གསང་ཆེན་བསྟན་པའི་སྒྲོན་མེ་རྟོགས་ལྡན་བླ་མ་བློ་གྲོས་རྒྱལ་མཚན་མཆོག་ནི། པཎ་ཆེན་བཱི་མ་མི་ཏྲ་དང་ལོ་ཆེན་བཻ་རོ་ཙ་ན་ཟུང་དུ་འཇུག་པའི་རྣམ་རོལ་སྔ་འགྱུར་བསྟན་པའི་ཉི་མ་རྒྱལ་སྲས་གཞན་ཕན་མཐའ་ཡས་ཀྱི་ཐུགས་སྤྲུལ་དུ་གཏེར་ཆེན་པདྨ་གླིང་པ་དང་རྡོ་གྲུབ་རིན་པོ་ཆེའི་ལུང་གིས་ཟིན་ཞིང་། རྒྱལ་བསྟན་ཡང་དར་གྱི་ཕྱི་མའི་དུས་འདིར་འོད་གསལ་རྫོགས་པ་ཆེན་པོའི་བསྟན་པ་སྤྱི་དང་། ཁྱད་པར་གྲུབ་དབང་རྫོགས་ཆེན་པའི་དོན་གྱི་བསྟན་པ་མན་ངག་གི་བརྒྱུད་པ་སྣུམ་ཟད་ཀྱི་མར་མེ་ལྟར་གྱུར་པ་གཞིར་བཞེངས་སུ་སློང་བ་ལ་བསམ་བཞིན་སྲིད་པ་བཟུང་བ་ཞིག་སྟེ། རྗེ་ཉིད་དགུང་གྲངས་ཉེར་གཅིག་པར་སྐུ་ཡུལ་མགོ་ལོག་ཨ་སྐྱོང་ནས་གྲུབ་དབང་རྫོགས་པའི་གདན་སར་ཆོས་བྲོས་སུ་བྱོན་སྟེ་ལོ་ངོ་བཅུ་ཕྲག་ལྷག་ལ་དཀའ་སྤྱད་ཚད་མེད་པས་མཁན་ཆེན་པདྨ་ཚེ་དབང་སོགས་བཤེས་གཉེན་དུ་མ་བསྟེན་ཏེ་མདོ་སྔགས་རིག་གནས་དང་བཅས་པར་ཐོས་བསམ་མཛད་ཅིང་། ཁྱད་པར་གདོད་མའི་མགོན་པོ་མིའི་བརྫུ་ལ་བྱོན་པ་ཡོངས་འཛིན་མཁན་ཆེན་འཇིགས་མེད་མགོན་པོའི་ཞལ་སྔ་ནས་ཀུན་མཁྱེན་ཀློང་ཆེན་པས་མི་འགྱུར་ནམ་མཁའི་རྡོ་རྗེ་ལ་ཞལ་གཟིགས་སྐབས་བསྩལ་བའི་བླ་མ་ཡང་ཏིག་གི་ཟབ་ཁྲིད་ཉེ་བརྒྱུད་དུ་བྱོན་པ་སོགས་སྙིང་ཐིག་གོང་འོག་གི་སྨིན་ཁྲིད་མཐའ་ཡས་པ་མནོག་ཆོས་སུ་བསྩལ་ཞིང་། ལྷུན་མཉམ་བྱ་བྲལ་ཞེས་པའི་མཚན་གསོལ་དང་བཅས་དོན་བརྒྱུད་ཀྱི་བསྟན་པ་གཏད་ཅིང་ཕྱིས་སུ་བཙོན་ཁང་དུ་བཞུགས་སྐབས་ཀྱང་ཞལ་གཟིགས་འདས་རྗེས་ཐོབ། རྗེ་ཉིད་སྔ་ཕྱིར་ཟི་ལིང་དང་ཐང་དཀར་མོ་སོགས་ཀྱི་བཙོན་ཁང་དུ་ལོ་ངོ་ཉི་ཤུ་ཙམ་ལ་བཞུགས་དགོས་བྱུང་ཞིང་སྐབས་དེར་དུས་སྐབས་ནམ་བྱུང་ལ་རྫོགས་པ་ཆེན་པོ་ཁྲེག་ཆོད་ཐོད་རྒལ་གྱི་ཉམས་བཞེས་ལ་རྩེ་གཅིག་ཏུ་བརྩོན་པར་མཛད་ཅིང་། མོས་ལྡན་གྱི་སློབ་བུ་འགའ་ལ་ལྐོག་ནས་གདམས་ཁྲིད་བསྩལ་བ་དང་དགོངས་གཏེར་བསྟན་བཅོས་ཀྱི་ཚུལ་དུ་བྱོན་པ་རྫོགས་ཆེན་ནམ་མཁའ་སྤྲིན་བྲལ་སོགས་ཚིག་དོན་གྱི་ཆ་གང་ནས་ཀྱང་རྒྱལ་དབང་ཀློང་ཆེན་པའི་གསུང་དང་དབྱེར་མི་ཕྱེད་པའི་བསྟན་བཅོས་དུ་མ་མཛད། དེ་སྐབས་གྲུབ་པའི་རྟགས་མཚན་ངོ་མཚར་བ་བཙོན་གྲོགས་ཡོངས་ལ་མངོན་སུམ་མཐུན་སྣང་གྲུབ་པ་དུ་མ་བསྟན་པར་མཛད་པ་དང་། རྗེ་ཉིད་ཀྱི་ཞལ་སློབ་མཆོག་སྤྲུལ་བསྟན་པོའམ་པད་ནག་དབོན་སྤྲུལ་རིན་པོ་ཆེས་ང་རང་ཚེ་སྨད་ཇི་ལྟར་འགྱུར་བའི་ལུང་བསྟན་ཞིག་གསུང་བར་བསྐུལ་བར། ཇི་སྐད་དུ། གསའ་ཕྲུ་གུའི་རི་ལ་གནས་མལ་ཆགསཿ བརྒྱུད་འཛིན་གྱི་བུ་སློབ་ཕྱོགས་སུ་རྒྱསཿ ཕ་པདྨའི་ཟབ་ཆོས་བསྒོ་སྐལ་འབྱེདཿ བུའི་དབང་ཐང་དར་བའི་དུས་ཤིག་འོང་། འཁོར་གདུལ་བྱ་འགྲོ་བའི་ཁ་ལོ་བསྒྱུརཿ ཞེས་སོགས་བརྩོན་ཁང་ནས་བརྩོན་གྲོལ་ཐོབ་པའི་དུས་དང་རང་ཡུལ་དུ་སླེབས་རྗེས་ཆོས་སྡེ་ཞིག་ཕྱག་འདེབས་ཚུལ། དང་པོ་གྲུབ་མཐའི་ཕྱོགས་རིས་ལྟ་བུའི་བར་ཆད་འབྱུང་ཡང་རྗེས་སུ་བར་ཆད་གྲོགས་སུ་འགྱུར་ཚུལ། གསའ་ཡི་ཕྲུ་གུ་སྟག་ཞེས་གྲགས་པ་ལྟར་ཁོང་གི་ད་ལྟའི་གདན་ས་སྟག་ལུང་ཞེས་པའི་ས་ཆར་ཆགས་པ་སོགས་ཐམས་ཅད་དོན་ཐོག་ཏུ་མ་ཁེལ་བ་གཅིག་ཀྱང་མ་བྱུང་ཞེས་གསུངས། མདོར་ན་དམ་པ་འདིའི་གྲུབ་པའི་རྟགས། དགོངས་པའི་ཉམས། མཁས་པའི་ཡོན་ཏན། བཙུན་པའི་ཚུགས། ཆོས་མཐུན་བྱ་བཏང་གི་མཛད་པ་སོགས་ཕྱི་ནང་གསང་བའི་རྣམ་ཐར་གཞན་དང་གཞན་ལས་མཁྱེན་པར་མཛད་པ་ལས་འདིར་སྨྲོས་ཀྱིས་མི་ལངས། བསྟན་པ་ཡང་དར་གྱི་དུས་བཟང་གསར་དུ་ཚེས་པ་ནས་སྐུ་ཡུལ་ཨ་སྐྱོང་ཕྱོགས་སུ་ཕེབས་ཏེ་འོད་གསལ་རྫོགས་པ་ཆེན་པོའི་ཆོས་འཁོར་རྒྱ་ཆེར་བསྐོར་བས་ཕྱོགས་དང་ཕྱོགས་ནས་མོས་ལྡན་གྱི་སློབ་བུ་སྤྲིན་ཚོགས་བཞིན་འདུས་ཏེ་ཨ་སྐྱོང་རྟོགས་ལྡན་སྒར་དུ་གྲགས་པ་བྱུང་། ཉེ་བའི་ལོ་འགའི་རིང་རུ་དམ་རྫོགས་ཆེན་གདན་སར་ཞབས་པད་བཀོད་ནས་མཁན་སྤྲུལ་འདུས་སྡེ་ཡོངས་ལ་མན་ངག་གི་ཟབ་ཁྲིད་བསྩལ་ཞིང་ཐུན་མིན་རང་ལུགས་ཀྱི་གདམས་པའི་སྲོག་འཐུད་དེ་སྙིང་པོའི་བསྟན་པ་གཞིར་བཞེངས་སུ་བསླང་། སྐབས་དེར་རྗེ་གང་གི་མཉམ་བཞག་འོད་གསལ་གྱི་སྣང་ཉམས་ཀྱིས་གྲུབ་དབང་བདུན་པ་ངོས་འཛིན་གྱི་ལུང་བྱང་བརྡ་འགྲོལ་མཛད་པ་སྟེ། དེ་ཡང་རབ་བྱུང་བཅུ་བདུན་པའི་ལྕགས་སྦྲུལ་ལོའི་དབྱར་ཁར་རྟོགས་ལྡན་བླ་མ་རིན་པོ་ཆེས་ཤྲཱི་སེང་ཆོས་གྲྭར་ཆེད་ཕེབས་ཀྱིས་འདུས་སྡེ་ཡོངས་ལ་ངལ་གསོ་སྐོར་གསུམ་དང་དམིགས་བསལ་མཁན་སྤྲུལ་ཉེར་གཅིག་ལ་ཡང་ཟབ་སྙིང་པོའི་རྒྱུད་ཆེན་བཅུ་བདུན་གྱི་བཀའ་ཆོས་བཀའ་དྲིན་བསྩལ་ཞིང་། ཉིན་ཞིག་ཆོས་ཁྲིད་སྐབས་གློ་བུར་དུ་ད་ལྟའི་ཡང་སྲིད་རིན་པོ་ཆེ་ལ་མགུར་དར་སྒྲོན་ཏེ་བརྡ་ལུང་འགྲོལ་བ་གནང་བའི་ཕྱག་བྲིས་ཕྱག་བསྟར་མ་དང་པདྨ་གར་དབང་འོད་གསལ་རིག་པའི་རྡོ་རྗེ་ཞེས་པའི་མཚན་བྱང་བཅས་གནང་། ཉིན་དེའི་ཕྱི་ཉིན་སྐྱབས་རྗེ་པདྨ་སྐལ་བཟང་རིན་པོ་ཆེས་རྟོགས་ལྡན་བླ་མ་མཆོག་གཟིམ་སྐྱིལ་དུ་གདན་ཞུས་མཛད་དེ་བཀའ་འདྲི་ཞིབ་པར་མཛད་ཚེ། ཉིད་ཀྱི་སྐུ་ཚ་དབང་ཆེན་དར་རྒྱས་འདི་ཉིད་རྗེ་བླ་མ་འཇིགས་མེད་ཡོན་ཏན་མགོན་པའི་བརྡ་ལུང་གིས་བསྟན་པའི་གྲུབ་དབང་དྲུག་པའི་ཡང་སྲིད་ཡིན་པར་སྙམ་པའི་སྣང་ཉམས་དགའ་བྱུང་བ་ལ། ཁར་ཉིན་མཚན་གསོལ་ཁྲི་འདོན་མངོན་གྱུར་བྱས་ན་རྫོགས་ཆེན་ཚང་གི་བསྟན་པ་ལ་ཕན་མིན་དང་འགྲོ་དོན་ཡོད་མིན་བརྟགས་པ་བྱས་པས་རྨི་ལམ་མ་ཡིན་པའི་མངོན་སུམ་ལྟ་བུའི་ཉམས་སྣང་ལ། ནམ་མཁའ་ནས་དཀར་པོ་ལོག་ལོག་ཅིག་རུ་དམ་ལུང་འདིར་བབ་པ་ཡུད་ཙམ་ནས་ཁ་གད་དེ་འོད་ཀྱིས་ཕྱོགས་ཀུན་ཁྱབ་པ་ཞིག་བྱུང་བས་མ་འོངས་པར་རང་བསྟན་མི་ཉམས་འཛིན་སྐྱོང་སྤེལ་བ་ལ་ཕྲིན་ལས་རྒྱས་པའི་རྟེན་འབྲེལ་དུ་རྒན་བུ་ནས་མཚན་གསོལ་མགུར་དར་སྒྲོན་པ་ཡིན་སོགས་གསུངས།
ལྔ་པ། རྗེ་བཙུན་བླ་མ་མ་ཏི་ས་རའམ་རྟོགས་ལྡན་བློ་གྲོས་རྒྱ་མཚོ་མཆོག་གི་ཞལ་སྔ་ནས་གནང་བའི་ཕྱག་བྲིས་བརྡ་ལུང་ཐེ་ཚོམ་མདུད་འགྲོལ་གྱི་ཞལ་བཤུས།
[རྩོམ་སྒྲིག]སྐྱབས་ཀུན་འདུས་ཞལ་པདྨ་འབྱུང་གནས། ངོ་བོ་དབྱེར་མེད་རྩ་བའི་བླ་མ། སྒོ་གསུམ་གུས་པས་རྩེ་གཅིག་གསོལ་འདེབས། འབྲལ་མེད་མགོན་དེས་བྱིན་གྱིས་རློབས་ཤོག གཞི་དབྱིངས་སྟོང་གསལ་ཆོས་སྐུའི་ཀློང་ནས། རྩལ་སྣང་འགག་མེད་རོལ་བའི་འཆར་ཚུལ། འཇིགས་བྲལ་སེམས་དཔའི་ཐུགས་བསྐྱེད་སྨོན་ལམ། བསླུ་མེད་རྟེན་འབྲེལ་བདེན་སྟོབས་མངོན་གསལ། མགོན་རྩ་བའི་བླ་མའི་ཞལ་ལུང་ནང་དུ། ཤར་ཆུ་འཛིན་འོད་དཀར་རང་ཕྱོགས་ཡུལ་གསལ། མིང་དྷ་ཛ་ཏྭ་རེ་དོན་གསལ་སྐྱེད་ཁྱིམ། བརྡ་ཡ་མཚན་ཅན་གྱི་ཐིག་ལེར་སྨིན་གསུངས། རང་སྣང་ལ་ཤེལ་དཀར་ཕ་ཝང་ཞིག ནོར་བུའི་འོད་མདངས་རྒྱས་པར་ཤར། ལྷ་བླ་མའི་བཀའ་ལུང་བདེན་དཔང་ཡིན། དོན་རང་ལ་དབང་བའི་ནོར་བུ་དེ། གནད་ཆེན་གྱི་བཀུར་སྟིས་སྲུང་བ་ན། རེ་ཞིག་ནས་བསྟན་དོན་དར་རྒྱས་ཏེ། བསྟན་འགྲོ་ཡི་དོན་ཆེན་འགྲུབ་པར་འོང་། དེ་སྐད་ཀྱི་ཚིག་སྣ་དུམ་ཆོད་དེ། མ་ཏི་ས་རས་གང་ཤར་བྲིས། ཚིག་ལ་སྙན་ཆ་མེད་མོད་ཀྱང་། དོན་ཆེན་གནད་རྣམས་འདུས་པ་ཡིན། བརྒྱུད་གསུམ་བླ་མའི་བྱིན་རླབས་སྙིང་དབུས་ཞུགས། རྩ་གསུམ་ལྷ་ཡིས་དངོས་གྲུབ་ཆར་ལྟར་འབེབ། ཆོས་སྐྱོང་དམ་ཅན་ལུས་དང་གྲིབ་བཞིན་འགྲོག བསམ་དོན་ཆོས་བཞིན་འགྲུབ་པའི་བཀྲ་ཤིས་ཤོག ། དགེའོ། སརྦ་མངྒ་ལམ།།
དྲུག་པ། ཚད་མའི་ལུང་བསྟན་དུ་མ་དང་དམ་པའི་སྐྱེས་ཆེན་མང་པོའི་ཐུགས་བརྟགས་དགོངས་ལུང་གཅིག་མཐུན་གྱིས་དབུགས་དབྱུང་གཟེངས་བསྟོད་མཛད་ཚུལ།
[རྩོམ་སྒྲིག]རྫོགས་ཆེན་སྤྲུལ་སྐུ་དྲི་མེད་ནི་དུས་འགྱུར་སྐབས་དགོངས་པ་རྫོགས་ཤིང་མདོ་མཁྱེན་བརྩེའི་ཉེ་གནས་འོད་གསལཐཐཐཐ་གྱི་སྤྲུལ་སྐུ་ཡིན་པར་གྲགས། ཁོང་གིས་གྲུབ་དབང་དྲུག་པ་འཇིགས་བྲལ་བྱང་ཆུབ་རྡོ་རྗེ་སོགས་སྐབས་དེའི་རྫོགས་ཆེན་ཚང་གི་སྤྲུལ་སྐུ་ཕལ་ཆེར་ངོས་འཛིན་མཛད་པ་དང་ཚད་མའི་གཏེར་སྟོན་དུ་ཀུན་གྱིས་ཁས་ལེན། སྤྲུལ་སྐུ་དྲི་མེད་མཆོག་ནས་དུས་འགྱུར་ཆེན་མོའི་ཡང་སྔོན་དུ་བསྩལ་བའི་ལྐོག་ཡིག་སྙིང་བྱང་ཐུགས་ཀྱི་ཆ་ལག་ཅེས་པའི་ལུང་བསྟན་དུ་བོད་ཡུལ་སྤྱི་དང་བྱེ་བྲག་གྲུབ་དབང་རྫོགས་ཆེན་པའི་བསྟན་པའི་འཕེལ་འགྲིབ་གསལ་བར་ལུང་དུ་བསྟན་ཅིང་། དེ་ཉིད་ལས་གྲུབ་དབང་སྐུ་ཕྲེང་བདུན་པའི་མཚན་དང་དུས་རྟགས་སོགས་མ་ནོར་བར་གསུང་འདུག་པ་སྟེ། ཇི་སྐད་དུ། བསམ་གཏན་ཆོས་གླིང་དེ་འཛིན་ཎིརྨ་ཀའིཿ སྐུ་ཕྲེང་བདུན་པ་པདྨ་གར་གྱི་དབངཿ རྒྱ་ནག་མ་ཧཱ་ར་ཛས་ཞབས་ནས་འདེགཿ དབང་གི་གཟི་འོད་ར་གའི་ཅོད་པཎ་ངོམསཿ འབྲི་རྫ་ཟལ་མོ་སྒང་གི་མངའ་ཐང་རྒྱསཿ ཤྭ་ན་རྟ་མགྲིན་དཔལ་ཆེན་ལུང་གསུམ་དངཿ མངྒ་ལམ་དང་ས་མུ་དྲ་སོགས་སུཿ རབ་བྱུང་སྔགས་པ་ཇོ་མའི་དགོན་སྡེ་ཆགསཿ སྦྲུལ་ཆུ་ཉག་དང་གཡག་ཐང་ཆུ་བར་ཚུནཿ རྒྱ་བོད་གཉིས་ཀྱི་གྲོང་ཚོ་འདྲེས་མ་ཆགསཿ ཞེས་སོགས་གསུངས་ཤིང་དེ་དག་གི་ཚིག་དོན་ཅུང་ཟད་བཀྲལ་ན། གྲུབ་དབང་རྒྱལ་བ་རྫོགས་ཆེན་དགོན་ནམ་རུ་དམ་ཨོ་རྒྱན་བསམ་གཏན་ཆོས་གླིང་དུ་གྲགས་པའི་གདན་ས་དེ་ཉིད་ཀྱི་བསྟན་པའི་བདག་པོ་སྤྲུལ་པའི་སྐུའམ་ཎིརྨ་ཀ་རྫོགས་ཆེན་ཡིད་བཞིན་ནོར་བུ་སྐུ་ཕྲེང་བདུན་པ་ནི་པདྨ་གར་གྱི་དབང་ཕྱུག་ཞེས་མཚན་དུ་གྲགས་པ་འབྱུང་ལ། དེ་ཉིད་རྒྱ་ནག་མ་ཧཱ་ར་ཛའམ་རྒྱ་ནག་ཆེན་པོའི་རྒྱལ་ཁབ་ཀྱིས་སྲུ་ཞུའི་མཐུན་འགྱུར་ལ་བརྟེན་ཏེ་གསེར་ཁྲིར་འཁོད་པའམ་ཞབས་ནས་གཏེགས་པར་འགྱུར་ཞིང་། ཡང་སྲིད་རིན་པོ་ཆེ་ནི་དབང་གི་གཟི་འོད་དམར་པོ་པདྨ་ར་གའི་མདངས་ཅན་གྱི་ཅོད་པཎ་ཏེ་མཁན་ཞྭ་དམར་འཛུག་མནབ་པ། སྡེ་སྣོད་འཛིན་པ་མཁས་བཙུན་གཉིས་ལྡན་སྔ་འགྱུར་རང་ལུགས་ཀྱི་ལྟ་གྲུབ་འཛིན་པ་ཞིག་འབྱུང་ཞེས་དང་། སྐབས་དེའི་དུས་རྟགས་སུ་སྦྲུལ་ཆུ་ཉག་དང་གཡག་ཐང་ཕར་ཚུར་རྣམས་སུ་རྒྱ་བོད་གཉིས་ཀྱི་གྲོང་ཚོ་འདྲེས་མ་གསར་དུ་ཆགས་པ་དང་། ཤྭ་ན་དང་རྟ་མཛེས་ལུང་སོགས་རུ་དམ་གཡས་གཡོན་དུ་རབ་བྱུང་དང་སྔགས་པ་ཇོ་མོ་བཅས་ཀྱི་དགོན་སྡེའམ་འདུས་ཚོགས་སྔར་མེད་གསར་དུ་འབྱུང་བར་འགྱུར་སོགས་གསུངས། ལུང་བསྟན་འདི་ཉིད་ཀྱི་ཚིག་དོན་ད་ལྟའི་ཡང་སྲིད་རིན་པོ་ཆེ་ལ་ཇི་ལྟར་འབྱོར་བའི་ཚུལ་ནི། ༡ ཚིག་རྐང་དང་པོའི་དོན། རྟོགས་ལྡན་བླ་མ་རིན་པོ་ཆེས་ངོས་འཛིན་མཚན་གསོལ་གྱི་ཕྱག་བྲིས་སུ་པདྨ་གར་གྱི་དབང་ཕྱུག་འོད་གསལ་རིག་པའི་རྡོ་རྗེ་ཞེས་མཚན་གསོལ་བ་དང་དངོས་སུ་མཐུན་ཞིང་། སྐྱབས་རྗེ་རིན་པོ་ཆེས་རྟོགས་ལྡན་བླ་མ་ལ་ཁྱེད་ཀྱིས་སྤྲུལ་སྐུ་དྲི་མེད་ཀྱི་ལུང་བསྟན་གཟིགས་མྱོང་ངམ་ཞེས་བཀའ་འདྲི་ཞུས་པར། སྤྲུལ་སྐུ་དྲི་མེད་ལུང་བསྟན་ཕབ་མཁན་ཞིག་ཡིན་པ་དང་རྫོགས་ཆེན་པའི་གྲྭ་རྒོད་རྣམས་ཀྱིས་སྒྲོ་བཀུར་སྣ་ཚོགས་བྱེད་པ་ཙམ་ལས་ཆ་ཅི་ཡང་མེད་ཅེས་གསུངས། ༢ ཚིག་རྐང་གཉིས་པའི་དོན། མཆོག་སྤྲུལ་རིན་པོ་ཆེ་ལ་རྒྱ་ནག་སྲིད་གཞུང་གིས་རིམ་པ་དང་པོའི་སྤྲུལ་སྐུའི་ཕྱག་ཁྱེར་འཕྲལ་མར་ཕུལ་ཞིང་། ཁྲི་སྟོན་གྱི་མཛད་སྒོ་སྐྱོང་བ་སོགས་མཐུན་རྐྱེན་བསྐྲུན་པས་རྒྱ་ནག་མ་ཧཱ་ར་ཛས་ཞབས་ནས་གཏེགས་ཅེས་པའང་ཇི་བཞིན་དུས་སུ་བབས་པ་བྱུང་། ༣ ཚིག་རྐང་གསུམ་པའི་དོན། དབང་གི་གཟི་འོད་ར་གའི་ཅོད་པཎ་ངོམས་ཞེས་པ་སྟེ། སྤྱིར་མཆོག་སྤྲུལ་རིན་པོ་ཆེ་སྡེ་སྣོད་འཛིན་པ་མཁས་བཙུན་གཉིས་ལྡན་སྔ་འགྱུར་རང་ལུགས་ཀྱི་ལྟ་གྲུབ་ལ་གཞན་དྲིང་མི་འཇོག་པའི་མཁྱེན་རབ་དང་ལྡན་པ་ཞིག་ཡིན་པར་བསྟན་ཞིང་། ཁྱད་པར་རྫོགས་ཆེན་ཤྲཱི་སེང་ཆོས་གྲྭའི་བཅའ་ཡིག་གི་སྒྲིག་གཞི་གསར་པ་ལྟར་ཁྲི་སྟོན་མཛད་སྒོའི་སྔ་རོལ་དུ་ཕར་ཕྱིན་ལས་རྩམ་པའི་དམ་བཅའ་འཇོག་མཛད་པར། ཆོས་གྲྭ་ཆེན་མོ་ནས་སྔ་མའི་མཁན་པོའི་མཚན་གནས་ཀྱི་སྟེང་དུ་གཞུང་ཆེན་རབ་འབྱམས་པའི་མཚན་གནས་ཕུལ་ཞིང་དབང་མདོག་གི་པཎ་ཞྭ་དངོས་སུ་གསོལ་བ་བྱུང་། ༤ ཚིག་རྐང་བཞི་པ་སོགས་ཀྱི་དོན། སྦྲུལ་ཆུ་ཉག་གམ་གྲོང་སྐད་དུ་དྲུག་ཅུ་ཉག་ནས་གཡག་ཐང་ཕར་ཚུར་རྣམས་སུ་རྒྱ་བོད་གཉིས་ཀྱི་གྲོང་ཚོ་འདྲེས་མ་གསར་དུ་ཆགས་པའི་དུས་རྟགས་ཉེ་བའི་ལོ་འགའི་རིང་མངོན་དུ་གྱུར་བཞིན་པ་དང་། ད་དུང་ལུང་བསྟན་དེ་ཉིད་ལས། ལས་དང་སྨོན་ལམ་བཟང་པོའི་འབྲེལ་བ་ནིཿ གཟུར་ཡང་མི་ཕན་ལས་ཀྱི་བརྩེ་གདུང་ཆེཿ མཐུན་རྐྱེན་ལེགས་ཚོགས་བཟང་པོའི་ཕན་གྲོགས་བྱེདཿ དེ་ཚེ་རྟེན་ཅིང་འབྲེལ་འབྱུང་མི་བསླུ་བསཿ མིང་དང་བརྡ་ལ་བརྟེན་ནས་གོ་བ་རྙེདཿ མིང་དོན་མཚུངས་ན་ལས་ཀྱི་འཕྲོ་ཡང་མཐུདཿ རྟེན་འབྲེལ་ཕུན་སུམ་ཚོགས་པའི་མཚམས་སྦྱར་ནསཿ ཁྱོད་ཀྱི་གདུལ་བྱ་མཐའ་རུ་ཕྱིན་པར་འགྱུརཿ ཞེས་སོགས་བསླུ་མེད་རྡོ་རྗེའི་ལུང་གིས་བསྟན་པ་ཐམས་ཅད་ཇི་བཞིན་མངོན་དུ་གྱུར་པ་བྱུང་། དེ་མཚུངས་ལི་ཐང་གཡོན་རུ་གཏེར་ཆེན་དང་རྫ་སྨད་གླིང་གཞིས་བླ་མ་སོགས་ཀྱི་ལུང་བསྟན་དུའང་མཆོག་སྤྲུལ་རིན་པོ་ཆེ་འདི་ཉིད་ཀྱི་དགུང་སྙིང་དང་མཛད་པ་སོགས་ཇི་བཞིན་གསལ་བར་བསྟན་པ་འདུག་ཀྱང་འདིར་ཡི་གེ་མང་དུ་དོགས་པ་དང་རྐྱེན་དབང་གཞན་གྱིས་མ་དྲངས། གཞན་ཡང་འཇམ་མགོན་མི་ཕམ་པའི་སྐུ་སྐྱེ་དེ་མ་ཐག་པ་དགུ་རུང་རྒྱལ་སྲས་རིན་པོ་ཆེ་མཆོག་ནས་ཡང་སྲིད་འཁྲུལ་མེད་དུ་ཐུགས་ངེས་འཁྲུངས་པའི་ཕྱག་བྲིས་དང་འཇམ་མགོན་བླ་མའི་གསུང་ཆོས་ཡོངས་སུ་རྫོགས་པའི་བཀའ་ལུང་གཏད་རྒྱ་མཛད་ཅིང་། དེ་བཞིན་ཐམས་ཅད་མཁྱེན་ཅིང་གཟིགས་པའི་ཡེ་ཤེས་མངའ་བའི་སྐྱེས་ཆེན་གཞན་དང་གཞན་དག་གིས་ཀྱང་ཡང་སྲིད་འཁྲུལ་མེད་དུ་རྒྱབ་སྐྱོར་དང་མཚན་གསོལ་མཛད།
བདུན་པ། མི་འཇིགས་གསེར་གྱི་ཁྲི་འཐང་མཐོན་པོར་མངའ་གསོལ་ཞིང་འཇིགས་བྲལ་སྨྲ་བའི་སེང་གེའི་དམ་བཅའ་འཇོག་པར་མཛད་དེ་གཞུང་ཆེན་རབ་འབྱམས་པའི་མཚན་གནས་བཞེས་པ།
[རྩོམ་སྒྲིག]སྤྱི་ལོ་༢༠༠༣ལོའི་ཟླ་༨པའི་༡༩སྟེ་བོད་རབ་བྱུང་བཅུ་བདུན་པའི་ཧོར་ཟླ་དྲུག་པའི་ཚེས་ཉེར་གཉིས་ཉིན་གྲུབ་དབང་སྐུ་རབས་བདུན་པ་མཆོག་སྤྲུལ་པདྨ་གར་དབང་འོད་གསལ་རིག་པའི་རྡོ་རྗེ་མཆོག་གདན་ས་རུ་དམ་ཨོ་རྒྱན་བསམ་གཏན་གླིང་དུ་གསེར་ཁྲིར་མངའ་གསོལ་བ་སྟེ། དེ་ཡང་སྔ་དྲོའི་ཆུ་ཚོད་བརྒྱད་པར་བཞུགས་གནས་པདྨའི་ཐང་ནས་རྟ་པ་བརྒྱ་ཕྲག་འགའ་དང་རླུང་འཁོར་བཅུ་ཕྲག་ལྔ་ལྷག། ཡུལ་དེའི་དད་ལྡན་ཕོ་མོ་སྟོང་ཕྲག་འགའ། ཕྱོགས་ནས་ཕེབས་པའི་དགོན་ལག་ཁག་གི་མཁན་སྤྲུལ་བླ་ཆེན་རྣམས་ཀྱི་དབུས་གྲྭ་མང་ཉིས་སྟོང་ལྷག་གི་རུ་ཚོགས་ཕྲེང་སྟར་སྒྲིག་པས་མདུན་བསུས་ཏེ་ལྷ་གསར་ལྷ་ཁང་དུ་སྤྱན་དྲངས་ཤིང་ཐམས་ཅད་བཞུགས་གདན་དུ་འཁོད་པ་ན། འབྲུག་ཆེན་མཐུ་སྟོབས་རྣམ་རྒྱལ་རིན་པོ་ཆེ་མཆོག་ནས་ཕྱོགས་ཀྱི་སྐུ་མགྲོན་སེར་སྐྱ་ཡོངས་ལ་བཀྲ་ཤིས་བདེ་ལེགས་ཀྱི་མཚམས་འདྲིའི་གསུངས་བཤད་དང་འབྲེལ་མཛད་སྒོའི་དབུ་བཙུགས། དེ་འཕྲལ་སྐྱབས་རྗེ་པདྨ་སྐལ་བཟང་རིན་པོ་ཆེའི་ཞལ་སྔ་ནས་གཏན་འབེབ་མཛད་པའི་ཤྲཱི་སེང་ཆོས་གྲྭའི་བཅའ་ཡིག་ཏུ། གྲུབ་དབང་རྫོགས་ཆེན་པའི་ཆོས་བརྒྱུད་འཛིན་པའི་དགོན་ལག་དང་བཅས་པ་ཡོངས་ཀྱིས་མ་མཐའ་ཡང་མཁན་ཆུང་གི་ཡོན་ཏན་མེད་ཕྱིན་འོས་སྤྲུལ་གསར་པ་ཁྲི་གསོལ་མི་ཆོག་ཅིང་། རིགས་བརྒྱུད་དང་དངོས་འབྱོར་ལ་ཞེན་ཕྱོགས་ཀྱིས་གང་བྱུང་དུ་ཡང་སྲིད་ངོས་འཛིན་མི་ཆོག་ཅེས་འཁོད་པ་ལྟར། ཐོག་མར་མཆོག་སྤྲུལ་རིན་པོ་ཆེ་གདན་འབོར་ཁ་གང་ཅུང་ཟད་མཐོ་བའི་སྟེང་དུ་བཞུགས་སུ་གསོལ་ནས་ཕར་ཕྱིན་གྱི་དཀའ་གནད་ས་བཅུའི་གྲངས་ཅན་ལ་གང་མོས་ཀྱིས་ཐལ་འགྱུར་གྱི་རྒོལ་བའི་རྩོད་པ་མཛད་ཅིང་འཇིགས་བྲལ་སྨྲ་བའི་སེང་གེའི་གནས་སུ་དམ་བཅའ་བ་མཛད་པས་སྤྱི་དང་བྱེ་བྲག་གི་བསྟན་པའི་མིག་རྒྱན་དུ་ཆེ་བའི་མཛད་པ་བསྐྱངས། དེ་ནས་མཁན་ཆེན་ཁྲི་པ་ཨོ་རྒྱན་རིག་འཛིན་རིན་པོ་ཆེ་མཆོག་གིས་ཤྲཱི་སེང་ཆོས་གྲྭ་ནས་བསྩལ་བའི་པཎ་ཞྭ་གསོལ་བ་དང་གཞུང་ཆེན་རབ་འབྱམས་པ་ཞེས་པའི་མཚན་གནས་གོས་དར་ཕུལ་བས། དབང་གི་གཟི་འོད་ར་གའི་ཅོད་པཎ་ངོམསཿ ཞེས་པའི་ལུང་བསྟན་ཡང་དོན་ཐོག་ཏུ་སྨིན་པ་བྱུང་། དེ་མཚམས་དཀར་མཛེས་ཁུལ་ཆོས་ལུགས་ལས་དོན་ཁང་ནས་རིམ་པ་གོང་འོག་སྲིད་གཞུང་གི་ཚབ་བྱས་ཏེ་གསུང་བཤད་གནང་བ་དང་ཚད་ལྡན་སྤྲུལ་སྐུའི་ཐོབ་ཐང་ཕྱག་ཁྱེར་ཕུལ་བས། སྐུ་ཕྲེང་བདུན་པ་པདྨ་གར་གྱི་དབངཿ རྒྱ་ནག་མ་ཧཱ་ར་ཛས་ཞབས་ནས་འདེགསཿ ཞེས་པའི་ལུང་བསྟན་དངོས་ཐོག་ཏུ་ཁེལ་བ་བྱུང་། དེ་རྗེས་གསེར་ཁྲིར་འཁོད་པ་དང་རྫོགས་ཆེན་བསྟན་པའི་སྲོག་འཛིན་ཆེན་པོ་སྐྱབས་རྗེ་འབྲུག་པ་རིན་པོ་ཆེ་ཐུབ་བསྟན་ཉི་མ་མཆོག་ནས་རྒྱལ་དབང་ཚེ་དཔག་མེད་ཀྱི་ངོ་བོར་བསྒྲུབས་པའི་བརྟན་བཞུགས་མངའ་དབུལ་ཁྲུས་གསོལ་དང་བཅས་པའི་ཆོ་ག་རྒྱས་པ་གྲུབ་མཚམས། མཁན་ཆེན་ཁྲི་པ་ཨོ་རྒྱན་རིག་འཛིན་རིན་པོ་ཆེ་མཆོག་ནས་གྲུབ་དབང་སྐུ་རབས་རིམ་བྱོན་གྱི་རྣམ་ཐར་དང་འབྲེལ་བའི་ལེགས་པར་བཤད་པའི་ཚོགས་གཏམ་རྒྱ་ཆེར་མཛད། རིམ་པར་རྫོགས་ཆེན་མཆོག་གླིང་སྤྲུལ་སྐུ་མཆོག་སྤྲུལ་གུར་དགའ་རིན་པོ་ཆེ་མཆོག་ནས་མནྡལ་གྱི་རྣམ་བཤད་མཛད་བསྟུན་དགོན་གཞུང་སྤྱི་གཉེར་ཁང་དང་། སྐྱབས་རྗེ་འབྲུག་པ་རིན་པོ་ཆེའི་དབུས་གདན་ས་རང་གི་མཁན་སྤྲུལ་རྣམ་པ། ཕྱོགས་ནས་ཕེབས་པའི་བསྟན་འཛིན་སྐྱེས་ཆེན་ཁག་དང་། གྲུབ་དབང་རྫོགས་ཆེན་པའི་བུ་དགོན་ཁག་གི་ཞལ་ཚབ་མཁན་སྤྲུལ་ལྷན་རྒྱས། རྒྱལ་ཁབ་འབྲེལ་ཡོད་སྡེ་ཚན་གྱི་དབུ་ཁྲིད་དཔོན་རིགས། དད་ལྡན་སེར་སྐྱ་ཡོངས་བཅས་ནས་རིམ་པར་སྐུ་གསུང་ཐུགས་བརྟེན་དང་ཟང་ཟིང་གི་དངོས་འབྱོར་རྒྱ་ཆེན་པོའི་མནྡལ་ཕུལ་བ་བཅས་བཀྲ་ཤིས་ལུགས་ལེགས་ཀྱི་མཛད་སྒོའི་མཇུག་སྡོམ་མཛད་དོ། །
གདན་རབས་བཅུ་གཉིས་པ་ཁྱབ་བདག་རྫོགས་ཆེན་པ་༧སྐྱབས་རྗེ་པདྨ་སྐལ་བཟང་།
[རྩོམ་སྒྲིག]
དེང་གི་དུས་ན་གངས་རིའི་ལྗོངས་སུ་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་བསྟན་པའི་བཀའ་བབས། བདག་ཅག་གི་འདྲེན་མཆོག་མཚུངས་མེད་མཁས་བཙུན་གྲུབ་པའི་དབང་ཕྱུག ༧རྫོགས་ཆེན་ཁྱབ་བདག་པ་སྐྱབས་རྗེ་པདྨ་སྐལ་བཟང་ངམ་ཐུབ་བསྟན་ལུང་རྟོགས་བསྟན་པའི་རྒྱལ་མཚན་མཆོག་ནི། ཕྱི་ལོ་༡༩༤༣པ་སྟེ་བོད་རབ་བྱུང་བཅུ་དྲུག་པའི་ཆུ་ལུག་ལོར་མདོ་ཁམས་རྫ་ཆུ་ཁར་སྐུ་འཁྲུངས། དགུང་ལོ་ལྔ་ཡི་སྟེང་རྫོགས་ཆེན་ཀོང་སྤྲུལ་དང་། རྫོང་སར་མཁྱེན་བརྩེ་ཆོས་ཀྱི་བློ་གྲོས། གྲུབ་དབང་རྫོགས་ཆེན་དྲུག་པ་འཇིགས་བྲལ་བྱང་ཆུབ་རྡོ་རྗེ་བཅས་ཀྱིས་རྫོགས་ཆེན་མཁན་ཆེན་པདྨ་བཛྲ་རྩལ་གྱི་ཡང་སྲིད་གསུམ་པར་ངོས་བཟུང་ནས་རྫོགས་ཆེན་གདན་སར་མངའ་གསོལ། སྐུ་ན་ཆུང་ངུའི་དུས་རྫ་སྟོད་ལྕང་མའི་མཁན་ཆེན་ཐུབ་དགའ་ཚང་དང་། རྫོགས་ཆེན་མཁན་རྒན་ཨ་བུ་ལྷ་སྒང་བཅས་ཀྱིས་ཐུགས་དགྱེས་པ་ཆེན་པོས་རྗེས་བཟུང་དགོངས་གཏད་མཛད། མཁས་པའི་དབང་པོ་རྫོགས་ཆེན་མཁན་པོ་པདྨ་ཚེ་དབང་ཡོངས་འཛིན་དུ་བཞུགས་པ་ལས་གཞུང་ཆེན་བཅུ་གསུམ་གཙོར་གྱུར་མདོ་སྔགས་རིག་གནས་བཅས་པ་གསན་བཞེས་གནང་བས་སྐྱེས་ཐོབ་ཀྱི་མཁྱེན་རབ་ཕུལ་དུ་ཕྱིན་པའི་ཚད་དུ་གླེང་། རྫོང་སར་མཁྱེན་བརྩེ་ཆོས་ཀྱི་བློ་གྲོས་དང་། རྫོགས་ཆེན་དྲུག་པ་གྲུབ་དབང་འཇིགས་བྲལ་བྱང་ཆུབ་རྡོ་རྗེ་རྣམ་གཉིས་ལས་སྔ་འགྱུར་བཀའ་གཏེར་གཙོར་གྱུར་སྒྲུབ་བརྒྱུད་ཤིང་རྟ་བརྒྱད་ཀྱི་དབང་ལུང་ཕལ་མོ་ཆེ་གསན། ཁྱད་པར་དུ་གདོད་མའི་མགོན་པོ་དང་མི་གཉིས་པ་མཁན་ཆེན་འཇིགས་མེད་ཡོན་ཏན་མགོན་པོ་ལས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གོང་འོག་གི་ཟབ་ཁྲིད་མཐའ་དག་ཆིག་རྫོགས་སུ་གསན། དུས་འགྱུར་ཆེན་མོའི་ཡོ་ལངས་སྐབས་དགུང་ན་གཞོན་ཡང་དམ་པའི་རང་གཤིས་མ་འགྱུར་བ་མཁས་བཙུན་བཟང་པོའི་བདག་ཉིད་དུ་བཞུགས་ཤིང་སྐུ་གསུང་ཐུགས་རྟེན་བཟང་ལ་མང་བ་སྐུ་སྲོག་དང་བསྡོས་ཏེ་ཉར་བསྡུ་མཛད། གངས་རིའི་ལྗོངས་སུ་ཆོས་རིག་གི་མེ་རོ་སླར་གསོའི་དུས་རབས་ཏེ་ཕྱི་ལོ་༡༩༨༡ལོར། ཉེ་རབས་བོད་ཁུལ་གྱི་ཆེས་ཐོག་མའི་རིག་གནས་གླིང་ཀ་སི་ཁྲོན་བོད་ཡིག་སློབ་གྲྭ་རྫོགས་ཆེན་དུ་བཙུགས་པར་མཐུན་འགྱུར་ཕྱག་ལས་རྒྱ་ཆེར་གནང་བ་དང་འབྲེལ། སྔ་འགྱུར་རྙིང་མའི་གདན་ས་ཆེན་མོ་རྫོགས་ཆེན་དགོན་སླར་གསོའི་ཐུགས་ཁུར་ཆེད་བཞེས་མཛད། ཕྱི་ལོ་༡༩༨༨ལོ་ནས་མདོ་ཁམས་ཡུལ་གྱི་ལོ་རྒྱུས་རིང་ཤོས་ཀྱི་བཤད་གྲྭ་སྟེ་རྫོགས་ཆེན་ཤྲཱི་སེང་ཆོས་གྲྭ་ཆེན་མོ་བསྐྱར་གསོ་རྒྱ་བསྐྱེད་མཛད་དེ་སྔ་ཕྱིར་སྡེ་སྣོད་འཛིན་པ་སྟོང་ཕྲག་ལྷག་བསྐྱེད་སྲིང་བྱུང་། མདོ་དབུས་ཁམས་གསུམ་གྱི་སྔ་འགྱུར་རྙིང་མའི་དགོན་སྡེ་གཙོ་བོར་གྱུར་པའི་རིས་མེད་ཆོས་སྡེ་མང་པོར་ཞབས་ཀྱིས་བཅགས་ཏེ་སོ་བྱང་སྔགས་གསུམ་གི་སྡོམ་རྒྱུན་དང་དབང་ལུང་མན་ངག་གི་རྒྱུན་སྤེལ་བས། དམ་པ་ཉིད་ཀྱི་ཞལ་སྔ་ནས་སྨད་འདུལ་སྔ་འགྱུར་སྡོམ་བརྒྱུད་ལས་རབ་ཏུ་བྱུང་བ་དང་བསྙེན་པར་རྫོགས་པའི་སྡོམ་ཕྲུག་ཁོ་ན་སྟོང་ཕྲག་གཉིས་ལྷག་ཟིན། ཕྱོགས་འདུས་རིས་སུ་མ་ཆད་པའི་ཞལ་སློབ་དག་ལ་སྔ་འགྱུར་བཀའ་གཏེར་གྱི་དབང་ཁྲིད་སྤྱི་དང་། ཁྱད་པར་འོད་གསལ་རྫོགས་པ་ཆེན་པོ་སྙིང་ཐིག་གོང་འོག་གི་སྔོན་འགྲོ་དངོས་གཞི་དང་བཅས་པའི་རྒྱས་ཁྲིད་ནས། རྒྱབ་རྟེན་མཛོད་ཆེན་བདུན་དང་། ཤིང་རྟ་རྣམ་གསུམ། སྙིང་ཐིག་ཡ་བཞི་དང་བཅས་པ་རྒྱ་ཆེ་བ་པཎྡི་ཏའི་ལུགས་སུ་མཁས་པའི་རྩལ་ཐོན་པའི་རྒྱས་ཁྲིད་མཛད་པས་དེང་གི་དུས་ན་གངས་རིའི་ལྗོངས་སུ་འོད་གསལ་རྫོགས་པ་ཆེན་པོའི་བསྟན་པའི་བཀའ་བབས་སུ་དོན་གྱིས་གྲུབ། སྔ་ཕྱིའི་དུས་བར་རྣམས་སུ་སྐུ་མཚམས་བཅད་རྒྱ་ལ་བཞུགས་ཏེ་ཡི་དམ་ལྷའི་བསྙེན་བཟླས་དང་བསྐྱེད་རྫོགས་རྫོགས་ཆེན་གྱི་ཉམས་བཞེས་ལ་བཞུགས་པ་སྡོམ་ཚེ་ལོ་ངོ་བཅུ་ལྷག་ལ་ལོངས། མདོར་ན་དམ་པ་འདི་ཉིད་ཀྱི་སྐུ་ཚེ་གང་པོར་མཁས་བཙུན་བཟང་གསུམ་གྱི་དམ་པའི་རྣམ་ཐར་བདག་གིར་བཞེས་ཤིང་། བཤད་སྒྲུབ་ལས་གསུམ་གྱི་མཛད་པ་ཁོ་ནས་གངས་རིའི་ལྗོངས་ཀྱི་ཆོས་རིག་གི་སྒྲོན་མེ་སྦར་བའི་མཛད་རྗེས་ཟླ་མེད་དུ་བསྐྱངས་པར་བརྟེན། གངས་རིའི་མགོན་པོ་༧རྒྱལ་དབང་ཐམས་ཅད་མཁྱེན་པའི་ཞལ་ནས་ཀྱང་། བཤད་དང་སྒྲུབ་པའི་འོད་སྣང་སྟོང་ཕྲག་གིས། །ལུང་དང་རྟོགས་པའི་རྒྱལ་བསྟན་པ༵དྨ༵འི་ཚལ། །སྐ༵ལ་བཟ༵ང་གདུལ་བྱའི་དཔལ་དུ་བཞད་མཛད་པའི། །བསྟན་འཛིན་ཉིན་བྱེད་དབང་པོར་གསོལ་བ་འདེབས། །སྙིགས་མ་ལྔ་ཡི་ཡང་མཐར་ལྷུང་བ་ཡི། །ཕན་བདེའི་རྩ་ལག་གངས་ལྗོངས་རྒྱལ་བའི་བསྟན། །བཤད་སྒྲུབ་སྙིང་པོས་དབེན་པ་འདིར་དགོངས་ལ། །ཞབས་པད་མི་འགྱུར་རིང་དུ་བརྟན་པར་མཛོད། །ཅེས་དང་། དཔལ་ས་སྐྱ་༧གོང་མ་བདག་ཆེན་རིན་པོ་ཆེའི་ཞལ་ནས་ཀྱང་། རྒྱལ་དབང་པ༵དྨ༵འི་མན་ངག་ཆུ་ཀླུང་ཀུན། །རྣམ་དཔྱོད་ཐུགས་མཚོར་འཁྱིལ་བའི་ཀློང་ཟབ་མོར། །རྒྱལ་བསྟན་ནོར་བུ་གདེངས་ཀའི་རྩེར་འཛིན་པ། །སྐ༵ལ་བཟ༵ང་ཀླུ་ཡི་དབང་པོ་ཞབས་བརྟན་ཤོག །མདོ་རྒྱུད་སྤྱི་དང་ཁྱད་པར་སྔ་འགྱུར་གྱི། །བཀའ་བབས་ཕྱག་བཞེས་ཟབ་མོའི་དགོངས་པའི་དོན། །མ་འདྲེས་བརྡ་དོན་འཕྲོད་པའི་གསུང་དབྱངས་ཀྱིས། །གདུལ་བྱའི་བློ་སྒོ་འབྱེད་མཛད་ཞབས་བརྟན་ཤོག །ཅེས་དང་། གཞན་ཡང་གནས་ལྔ་རིག་པའི་པཎ་ཆེན་མཁན་ཆེན་པདྨ་ཚེ་དབང་མཆོག་གི་ཞལ་ནས་ཀྱང་། ཐུ༵བ་བསྟ༵ན་ལུ༵ང་དང་རྟོགས༵་པའི་ཡིད་བཞིན་དབང་། །བཤད་དང་སྒྲུབ་པའི་ལྷ་གོས་རྩེར་མཆོད་ནས། །བསྟ༵ན་པ༵འི་རྒྱ༵ལ་མཚ༵ན་སྲིད་རྩེར་བསྒྲེང་མཛད་པའི། །སྐྱེས་མཆོག་དམ་པ་བསྐལ་བརྒྱར་འཚོ་གཞེས་གསོལ། །སོགས་དོན་གནས་མཁས་པའི་གསུང་གིས་མངོན་པར་བསྟོད་ཅིང་བསྟན་འགྲོའི་དཔལ་དུ་ཞབས་པད་བརྟན་པར་བདེན་ཚིག་གྲུབ་པའི་གསུང་གིས་ནན་བསྐུལ་མཛད། སྤྱིར་རྗེ་འདི་ཉིད་འཕགས་ཆེན་དམ་པའི་སྐྱེས་བུ་སྙིགས་མའི་དུས་འདིར་བསྟན་འགྲོའི་དཔལ་མགོན་དུ་བསམ་བཞིན་བྱོན་པའི་ཚུལ། སྔོན་བྱོན་ཚད་གྲུབ་ཀྱི་དམ་པ་དུ་མའི་སྒྲིབ་མེད་གསལ་བའི་ལུང་བྱང་ལས་མཚན་དང་། གདན་ས། མཛད་འཕྲིན་བཅས་མ་ནོར་གསལ་བར་བསྟན་པ་སྟེ། ཀརྨ་པ་དེ་བཞིན་གཤེགས་པའི་ལུང་བསྟན་གྱི་མགུར་ལས། མདོ་ཁམས་ཟལ་མོ་སྒང་རྒྱུད་དུ༔ ལས་ཅན་སྐྱེས་བུ་སྟོན་ཟླའི་མདོག༔ ཆོས་དབྱིངས་འགྱུར་མེད་གཤིས་ལ་རྫོགས༔ འབྲེལ་ཚད་པདྨ་འོད་དུ་འདྲེན༔ དེ་ལས་མདོ་ཁམས་པདྨའི་ཚལ༔ ས་ལ་སྤྱོད་པའི་གདན་ས་དེར༔ གནས་བརྟན་སྤྲུལ་པ་ངུར་སྨྲིག་འཛིན༔ འབྲེལ་ཚད་དོན་དང་ལྡན་པ་ཡིན༔ ཞེས་དང་། རྡོ་གྲུབ་ཆེན་གྱི་འབྱུང་འགྱུར་ལུང་བསྟན་གསལ་བའི་མེ་ལོང་ལས། མདོ་ཁམས་ཡུལ་ནས་པདྨའི་མིང་ཅན་གྱིས༔ ནགས་ཁྲོད་གངས་འདབ་པདྨ་ཐང་ཆེན་དུ༔ སྔར་མེད་གནས་སུ་རྟེན་བཞེངས་འགྲོ་བ་སྐྱོབས༔ ཞེས་དང་། གཡོན་རུ་གཏེར་སྟོན་པདྨ་བདུད་འདུལ་གླིང་བའི་དག་སྣང་ལུང་བསྟན་དྭངས་གསལ་མེ་ལོང་ལས། སྒྲུབ་སྡེ་ཤྲཱི་སེངྷ་ཡི༔ མི་འཇིགས་སེངྒེའི་ཁྲི་མཆོག་ལ༔ གདོང་ལྔ་དབང་པོས་ངར་སྐད་འབྱིན༔ པདྨའི་ཐུགས་སྤྲུལ་པདྨའི་མཚན༔ རྒྱལ་བསྟན་སྤྱི་དང་བྱེ་བྲག་གི༔ དགེ་ལེགས་ཡོན་ཏན་ཉིན་མོར་བྱེད༔ བཤད་སྒྲུབ་བསྟན་པ་སྤེལ་བ་ཡི༔ པད་གཞོན་མང་པོའི་འདབ་སྟོང་འཛུམ༔ ཞེས་དང་། པདྨ་གར་དབང་གླིང་པའི་གནས་ཡུལ་མཁའ་འགྲོའི་བརྡ་གླུ་ལས། གནས་རུ་དམ་ཨོ་རྒྱན་བསམ་གཏན་གླིང༔ དེའི་ཉེ་འཁོར་བསྟན་གཉིས་རྒྱས་པའི་ཚལ༔ རྗེ་གྲུབ་པའི་དབང་ཕྱུག་པདྨའི་མཚན༔ དགོན་དེ་ཡི་རྒྱན་དུ་ཆས་སྲིད་ན༔ བསྟན་གཞི་ཀུན་སྔར་ལས་ལྷག་པར་རྒྱས༔ ཡུལ་དེ་ལ་བདེ་སྐྱིད་ཉི་འོད་གསལ༔ ཞེས་སོགས་བསླུ་མེད་རྡོ་རྗེའི་ལུང་གིས་ལན་གཅིག་མིན་པར་ཡང་ཡང་བསྔགས་པར་མཛད། རྗེ་ཉིད་ཀྱི་ཞལ་གསུང་དྲི་མ་མེད་པའི་ལེགས་བཤད་ཀྱི་ཕུང་པོ་ཕྱི་རབས་བསྟན་པའི་བཙས་སུ་བཞག་པ་ནི། རྫོགས་པ་ཆེན་པོ་ཀོང་ཆེན་སྙིང་ཐིག་གི་སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་གི་ལྗགས་ཁྲིད་མཚུངས་མེད་བླ་མའི་ཞལ་རྒྱུན། ཀློང་སྙིང་སྔོན་འགྲོའི་ངག་འདོན་རྣམ་མཁྱེན་ལམ་བཟང་གི་ལྗགས་ཁྲིད་སྐལ་བཟང་ཐར་པའི་ལམ་སྟོན། རྫོགས་ཆེན་ཀློང་ཆེན་སྙིང་ཐིག་གི་ཐུན་མོང་སྔོན་འགྲོ་སེམས་སྦྱོང་བདུན་གྱི་དོན་ཁྲིད་ཐར་པའི་ཐེམ་སྐས་ཀྱི་ཟིན་ཐུན་མཚོ་སྐྱེས་བླ་མ་དགྱེས་པའི་ཞལ་ལུང་། ཁྲིད་ཡིག་ཡེ་ཤེས་བླ་མའི་རྒྱས་འགྲེལ་བརྒྱུད་གསུམ་བླ་མའི་ཞལ་ཆབ། ཚིག་དོན་རིན་པོ་ཆེའི་མཛོད་ཀྱི་འགྲེལ་བ་མན་ངག་ནོར་བུའི་བང་མཛོད། མན་ངག་རིན་པོ་ཆེའི་མཛོད་ཀྱི་འགྲེལ་བ་གདམས་ཟབ་ནོར་བུའི་གཏེར་མཛོད། ཡིད་བཞིན་རིན་པོ་ཆེའི་མཛོད་ཀྱི་འགྲེལ་བ་རྨོངས་མུན་འཇོམ་པའི་སྣང་མཛོད། ཆོས་དབྱིངས་རིན་པོ་ཆེའི་མཛོད་ཀྱི་འགྲེལ་བ་ཀུན་ཏུ་བཟང་པོའི་དགོངས་མཛོད། འཇམ་མགོན་མི་ཕམ་རྒྱ་མཚོའི་གསུང་རྫོགས་པ་ཆེན་པོ་སེམས་ངོ་མཛུབ་ཚུགས་ཀྱི་གདམས་པའི་གནད་འགྲོལ། བླ་སྒྲུབ་རིག་འཛིན་འདུས་པའི་རྣམ་བཤད་རིག་འཛིན་བརྒྱུད་པའི་ཞལ་ལུང་། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལས་བྱང་ཚོར་བ་རང་གྲོལ་གྱི་སྙིང་པོའི་རྣམ་བཤད་རིམ་གཉིས་གསལ་བྱེད། བདེ་བ་ཅན་གི་ཞིང་གི་སྨོན་ལམ་ཚིག་དོན་གོ་སླ་བར་བཀྲལ་བ་ཐར་ལམ་བགྲོད་པའི་ཐེམ་སྐས། བདེ་སྨོན་འགྲེལ་བ་རིན་ཆེན་པདྨ་རཱ་གའི་ཕྲ་ཚོམ། སྙན་རྩོམ་གླེགས་བམ་སྔ་ཕྱི་གཉིས་བཅས་རྨད་དུ་བྱུང་བའི་ལེགས་བཤད་ཀྱི་ཕུང་པོ་བཞུགས་པ་བཅས་ཐུན་མོང་ཕྱིའི་རྣམ་ཐར་ཉུང་བཏུས་མདོ་ཙམ་སྨྲོས་པ་སྟེ། རྗེ་འདིའི་མཁས་པའི་རྣམ་དཔྱོད། བཙུན་པའི་ཚུགས། གྲུབ་པའི་དགོངས་སྤྱོད། བཟང་པོའི་ཕྲིན་ལས་བཅས་གསང་བ་བསམ་མི་ཁྱབ་པའི་ཡོན་ཏན་མཐའ་དག་ཉུང་ངུའི་ངག་གིས་བརྗོད་པ་རྔོ་མི་ཐོག་པ་སྟེ། ཇི་སྐད་དུ། དཔལ་ལྡན་ཟླ་བས། ནམ་མཁའ་མེད་པས་འདབ་ཆགས་ལྡོག་པར་མི་འགྱུར་གྱི། །འདི་ནི་རང་མཐུ་ཟད་པས་ལྡོག་པར་འགྱུར་དེ་བཞིན། །སློབ་མ་དང་བཅས་སངས་རྒྱས་སྲས་རྣམས་སངས་རྒྱས་ཀྱི། །ཡོན་ཏན་མཁའ་ལྟར་མཐའ་ཡས་མ་བརྗོད་ལྡོག་པར་འགྱུར། །ཞེས་གསུངས་པ་གདམས་པར་བཟུང་བ་དང་། རྒྱ་ཆེ་བའི་མཛད་ཕྲིན་གྱི་ཕུང་པོ་ཡུན་ནས་ཡུན་ཏུ་རྒྱུན་མི་ཆད་པའི་རྟེན་འབྱུང་དུ་རེ་ཞིག་རྩོམ་པ་འཕྲོ་ཅན་དུ་འཇོག་པར་འདོད་ཅེས་སྔ་འགྱུར་རྫོགས་ཆེན་པདྨའི་འོད་སྣང་ཕྲིན་ལས་ཚོགས་པ་ནས་སྤེལ།
གྲུབ་དབང་རྒྱལ་བ་༧རྫོགས་ཆེན་པའི་སྐོར་གྱི་བརྙན་འཕྲིན།
[རྩོམ་སྒྲིག]གོང་ས་༧རྒྱལ་བའི་དབང་པོས་རྫོགས་ཆེན་ཆོས་བརྒྱུད་དང་བཅས་པར་བསྩལ་བའི་བཀའ་སློབ།
རྫོགས་ཆེན་ཡིད་བཞིན་ནོར་བུ་སྐུ་ཕྲེང་བདུན་པའི་ཁྲི་སྟོན་མཛད་སྒོ།