Aias Oileos

Kassandra krog er Palladion, da c'houlenn gwarez, hag Aias ouzh he diframmañ dioutañ. Diabarzh ur gib atikat gant dremmoù ruz, gant livour Kodros, war-dro 440-430 kent J.-K., Mirdi al Louvre.
Poseidon o lazhañ Aias Vihan.

Aias Oileos (Αἴας Ὀϊλῆος, Aias Oïlễos e henc'hresianeg), a oa mab da Oileos, roue Lokris, hag unan eus harozed brezel Troia. A-wezhioù e vez graet Aias vihan anezhañ abalamour ma oa bihanoc'h a vent eget an haroz all Aias Telamonios, lesanvet Aias Veur pe Aias Vras.

Mojenn

[kemmañ | kemmañ ar vammenn]

Aias a oa unan eus ar bleustrerien o doa goulennet dimeziñ gant Elena. Pa voe skrapet honnezh gant Paris e c'houlennas ar roue Menelaos skoazell digantañ da adkemer e vaouez. Mont a reas d'e heul betek kêr Priamos.

E-pad preizhadenn Troia e wallas Kassandra, belegez Athena, a oa o c'houlenn gwarez digant an doueez. Hervez ar vojenn eo abalamour d'an torfed-se e oa savet droug en doueez ouzh an Akeaned e-pad o distro.

War e hent en-dro da Lokris) e voe graet peñse gant Aias e-pad ur barrad gwallamzer kaset gant an doueez Athena. En em dennañ a reas war ur roc'h ha mallozhiñ an doueed. Kastizet e voe e vallozhioù raktal, ha lonket e voe gant ar mor. Gant Thetis e voe beziet e Mykenai.

Evel Ac'hilleüs e kreder emañ o vevañ, goude e varv, en Enez Wenn (Leuke hiziv an deiz), e genoù an Danav.

Azeulet e veze Aias eveltañ ivez gant Lokrisiz kêr Opous. Kavet e veze e skeudenn war o fezhioù moneiz hag en enor dezhañ e laoskent atav ul lec'h goullo en o arme.

Sofokles en doa savet ur pezh-c'hoari diwar e benn hag a zo kollet hiziv.

Mammennoù

[kemmañ | kemmañ ar vammenn]